Leeqkunan yachayta munanku

¿Huk rikch’ayniyoq runakunallatachu Dios sayapakun?

▪ Manan, “Diosqa manan mayqen runatapas rikch’ayninta qhawaspachu akllan, aswanpas may suyupipas payta yupaychaspa chanin-kayta ruwaqtaqa chaskinmi” (Hechos 10:34, 35).

Rikusqanchis hina Diospa yuyaykusqanqa sinchi hatunmi runakuna yuyaykusqankumantaqa. Askha runakunan yuyaykunku t’aqallanku huk t’aqakunamanta aswan allin kasqanta. Chhayna yuyaykusqankuqa tupanmi Charles Darwin qelqasqanwan, paymi nirqan: “Aswan allin yuyayniyoq runakunan pisi yuyayniyoq runakunata tukunqa”, nispa. Llakikunapaqmi wakin hatunchakuq runakuna huk runakunata cheqnikunku, ñak’arichinku, wañuchinkupas.

¿Allinchu chhayna hatunchakusqanku? ¿Ima ninkun yachaysapa runakuna? ¿Ninkuchu wakin runakunaqa aswan yuyayniyoqmi huk runakunamanta nispa? Universidad de Oxford nisqamanta, Bryan Sykes yachachiq manan chhaynatachu yuyaykun, payqa aswanpas nin: “Manan imapas kanchu ‘runakunaqa sapaq-sapaqmi kanku’ ninankupaqqa. [...] Tapukullawankun: ‘¿Sapaqchu kanku griego runakuna otaq italiamanta runakuna?’, nispa. Ñoqan nini: “Manan sapaqchu kanku, aswanpas llapan runakunan yawarmasillantin kanchis”, nispa.

Chay yachaysapa runaq nisqanmi Bibliaq yachachisqanwan tupan. Diosmi kamarqan huk qhari warmillata, paykunallamantan lliwpas miranchis (Génesis 3:20; Hechos 17:26). Chhaynaqa llapa runakunan Diospaqqa kaqlla kanchis.

Jehová Diosqa manan qhawarinchu yuraq, yana, q’ellu kasqanchistachu otaq ima rikch’ayniyoq kasqanchistachu, aswanpas payqa sonqonchistan qhawan. Pay kikinmi nin: “Manan ñoqaqa runa hinachu patallanta qhawani, runallan rikch’aynintaqa qhawan, ñoqan ichaqa sonqonta qhawani”, nispa (1 Samuel 16:7). Chay nisqanpi yuyaykuyqa kusikunapaqmi. ¿Imarayku? Qhawarisun.

Maymantaña kanchis chaypas yaqapaschá llapallanchisman mana gustawanchischu imayna rikchayniyoq kasqanchis, manataqmi imatapas ruwasunmanchu cambiananchispaq. Ichaqa sonqonchista yuyayninchistawan cambiaytaqa atisunmanmi (Colosenses 3:9-11). Allinta qhawarikuspaqa yaqapas reparasunman huk runakunamanta rikch’ayninchisrayku hatunchakusqanchista otaq pisichakusqanchistapas. Chhayna yuyaykuyqa Diospa yuyaykusqan contran kashan, chaymi kallpachakunanchis sonqonchismanta horqonapaq (Salmo 139:23, 24).

Sichus kallpachakusun Jehová Dios hina yuyaykuyta chayqa, paymi yanapawasun. Biblian nin: “Señor Diosqa kay pachantintan qhawashan tukuy sonqo payta serviqkunarayku atiyninta rikuchinanpaq”, nispa (2 Crónicas 16:9). Kusikunapaqmi kayqa, imayna rikch’ayniyoqña kanchis chaypas, Diosqa yanapawasunpunin.