Kichay leenaykipaq

Índice nisqaman riy

Sumaq regalota chaskirqanku

Sumaq regalota chaskirqanku

JAPÓN nacionpi Nagoya llaqtapin huk huñunakuy aparikurqan 28 abril 2013 watapi. Chaytan uyarirqanku 210.000 runakuna, paykunamantan wakinqa internetninta uyarirqanku. Chaypin umalli t’aqamanta Anthony Morris willarqan mosoq libro ruwakamusqanta. Chay libroq sutinmi Biblia: Mateoq qelqasqan t’aqa nisqa. Kusikuymantan iñiqmasikunaqa unayta t’aqllakurqanku.

Chay librotaqa japonés simipi Biblianchismantan horqokurqan Mateoq qelqasqan t’aqata, 128 paginayoqmi. Morris iñiqmasinchismi nirqan chay libroqa huk libronchiskunamanta hukniray kasqanta, Japón nacionpi runakunata yanapananpaq hinapuni kasqanta. ¿Imaraykun hukniray chay libro? ¿Imaraykun ruwakamurqan? ¿Ima nirqankun Japón nacionmanta runakuna chay libromanta?

¿IMARAYKUN HUKNIRAY CHAY LIBRO?

Japonés simiqa qelqakunmanmi wichaymanta urayman otaq lloq’emanta pañaman. Ichaqa askha qelqakunan lloq’emanta pañaman qelqasqa kashan, qelqanchiskunapas chhayna ruwasqan. Kay mosoq libron ichaqa wichaymanta urayman qelqasqa kashan japonés simipi periodicokuna allin reqsisqa qelqakuna hina. ¿Imanaqtinmi wichaymanta urayman qelqakamurqan? Japón runakuna facil-llata leenankupaqmi. Bibliapiqa sapanka paginapi imakunamantachus rimanantan hojaq hawanpi lliwta churakamun, kay libropin ichaqa chay simikunata churakamun huch’uy titulokunata hina imamantachus rimayta qallarinanpaq. Chay hinapin leeqkunaqa facil-llata yachanqaku imachus aswan importante yachachikuykuna kasqanta.

Chaskispa hinan iñiqmasikunaqa leerqanku. 80 watanpiña kaq cristianan nin: “Mateo t’aqataqa askha kutitan Bibliapi leerqani, ichaqa kay mosoq librowanñan entiendeni orqo patapi Jesuspa yachachisqanta, chaypaqmi yanapawarqan aswan allinnin yachachikuykunata huch’uy titulokunata hina churamusqanku, hinaspapas wichaymanta uraymanmi qelqasqa kashan”, nispa. Sipas cristianan nin: “Askha runakunan wichaymanta urayman qelqasqa librokunata munanku, ñoqan ichaqa lloq’emanta pañaman qelqasqa librokunaman yachasqa kashani chaywanpas ñawiyraqmi pisirqan chay mosoq librota leesqaypi”, nispa.

PAYKUNAPAQ HINAPUNIN KARQAN

Kay libroqa Japón runakunapaqpunin. ¿Imanaqtin? Askhan Bibliamanta mana yachankuchu chaywanpas leeytaqa munankun. Mana Bibliayoq japoneskunapaqqa chay t’aqallapas kanqañan leenankupaq.

Ichaqa, ¿imanaqtinmi Mateo qelqata akllakurqan? Japón runakunata Bibliamanta rimapayaqtiykiqa, yaqa llapankun Jesucristopi piensanku. Mateo  librotaq willashan Jesuspa nacesqanmanta, familianmanta, orqo patapi yachachisqanmanta, tukukuy tiempokunamantawan. Japón runakunaqa chaykunamantan yachayta munanku.

Iñiqmasikunaqa kusisqan chay librowan predicanku, Bibliamanta astawan yachay munaqkunaman kutispapas qomunkun. Huk cristianan nin: “Kunanqa facil-llatan runakunaman Diosmanta willani, chay librota chaskisqay qhepallatan huk runaman qorqani”, nispa.

¿IMAYNATAN CHASKIKURQANKU?

Japón runakunaqa sapa kutillanmi ninku: “K’iphtu punkunta haykuy”, “ama perla walqaykita khuchikunaman wikch’uychu”, “paqarinmantaqa ama llakipakuychu”, nispa (Mat. 6:34; 7:6, 13). Ichaqa manan yachankuchu chay simikunaqa Jesuspa nisqan simikuna kasqanta. Chaykunata iñiqmasikuna chay mosoq libropi qhawachiqtinkun admirakuspa ninku: “Munarqanipunin Biblia leeytaqa”, nispa.

Chay librota saqemusqanku runakunaman iñiqmasikuna kutiqtinkun, yaqa llapankuña leeyta tukurusqaku. 60 watanpi kaq runan iñiqmasinchisman willarqan: “Askha kutitañan leeruni, anchatan kallpacharuwan. ¿Astawan Bibliamanta yachachiwankimanchu?”, nispa.

Iñiqmasikunaqa askha runakunaq kasqanpi predicaspan chay librota munachillankutaq. Librota chaskikuq sipasmanmi huk cristiana internetpi direccionninta qorqan, huk hora qhepallamanmi chay sipasqa cristianaman qelqamurqan libro leeshasqanta, hinaspa astawan yachay munasqanta. Semana pasasqanmantaq Bibliata estudiayta qallarirqanku hinamantaq huñunakuykunaman riyta qallarirqan.

Japón nacionpi iñiq t’aqakunaqa 1.600.000 más librokunatan chaskirqanku, sapa killantaqmi askhanpi rakikun. Libroq qallariyninpin nin: “Kay libron kallpachasunkichis Bibliata astawan estudianaykichispaq”, nispa.