Kichay leenaykipaq

Índice nisqaman riy

“Testigoykunan qankunaqa kankichis”

“Testigoykunan qankunaqa kankichis”

“Testigoykunan qankunaqa kankichis” (IS. 43:10)

1, 2. a) ¿Iman huk testigo? b) ¿Imatan noticiakuna mana sut’illantachu willarqanku? c) ¿Imaraykun Diosqa mana noticiakunapi paymanta willanankutaraqchu necesitan?

¿IMAN huk testigo? Huk qelqan nin: “Imakuna pasasqanta rikuspa hukkunaman sut’illanta willaqmi”, nispa. Sudáfrica nacionpin huk periodicoq sutin “Testigo” nisqa, chay periodicon 160 más watakunaña noticiakunata willashan. Chay periodicoq dueñonmi nirqan: “Kaypiqa sut’illantan imatapas willakunqa”, nispa. Arí, noticia willaqkunaqa sut’illantan imatapas willananku.

2 Ichaqa noticia willaqkunaqa manan iman kaqllatachu imatapas willanku. Mayninpiqa llullakuspan imatapas willanku wakintataqmi mana willankuchu. Hinaspapas Diosmantapas ruwasqankunamantapas manan sut’illantachu willanku. Chaywanpas Diosqa manan noticiakunapi paymanta willanankutaraqchu necesitan. Chaychá profeta Ezequielwan qelqachirqan: “Wak suyukunataq yachanqaku ñoqa [Jehová] Diosqa, [...] kasqayta”, nispa (Ezeq. 39:7). Arí, Jehová Diosmantaqa testigonkunan kay pachantinpi willashanku, paykunan kanku pusaq millón hina. Willashankutaqmi imakunata Jehová Dios ñawpa tiempopi ruwasqanta, imakunata hamuq tiempopipas ruwananta. Chhaynapin Jehová Diospa testigonkuna kasqankuta hunt’ashanku. Isaías 43:10 textopin Jehová Dios nirqan: “Testigoykunan qankunaqa kankichis,  akllakusqay kamachiykunan kankichis”, nispa.

3, 4. a) ¿Hayk’aqmantapachan Diospa sutinta apanchis? b) ¿Ima nirqankun iñiqmasikuna chay sutita apasqankumanta? (15 paginapi fotota qhaway.) c) ¿Ima tapuykunatan kay estudiopi kutichisun?

3 Jehová Diosqa ‘wiñay-wiñay Reymi’, chaymi sutinqa wiñaypaq kanqa. Pay kikinmi nirqan: “Kay sutiymi wiñaypaq, kay sutiywanmi wiñay-wiñaypaq reqsiwanqaku”, nispa (1 Tim. 1:17; Éx. 3:15; tupachiy Eclesiastés 2:16). Chaymi Diospa sutinwan sutichasqa kaytaqa ancha valorniyoqpaq qhawarinchis. Chay sutitan 1931 watamantapacha apashanchis. Chay qhepamanmi kay revistanchispi qelqakamurqan iñiqmasinchiskuna chay sutita apasqankumanta kusisqa kasqankuta. Canadá nacionpin huk iñiq t’aqa nirqan: “Maytan kusikurqayku Jehová Diospa testigon kasqaykumanta. Chay sutita apasqaykuman hinan kawsasaqku”, nispa.

4 Kunanpas ancha valorniyoqpaqmi qhawarinanchis Diospa sutin apasqanchista. Ichaqa, ¿imaynatan chayta rikuchisunman? Hinaspapas, ¿imaraykun Jehová Dios niwarqanchis “Testigoykunan qankunaqa kankichis” nispa? Chay tapuykunatan kay estudiopi kutichisun.

ÑAWPA TIEMPOPI DIOSPA TESTIGONKUNA

5, 6. a) ¿Imaynapin Israel runakuna Jehová Diospa testigon karqanku? b) ¿Imatawanmi Israel runakuna wawankuman yachachinanku karqan? c) ¿Imatan tayta-mamakuna chaymanta yachankuman?

5 Jehová Diosmi Israel llaqtata akllakurqan testigonkuna kanankupaq. Chaymi sapanka Israel runakunaqa Diosmanta willanankupuni karqan (Is. 43:10). Ichaqa, ¿imaynatan chayta ruwarqanku? Sapankankun wawankuman willananku karqan imakunata Jehová Dios serviqninkunarayku ruwasqanta. Willanankun karqan pascua fiestamanta, chaytan Jehová Dios paykunata kamachirqan. Nirqanmi: “Wawaykichischus tapusunkichis: ¿Imataq kay ruwayniykichisri? nispa chayqa, ninkichis: Kayqa Señor Diospa uywa nak’asqa Pascuan. Paymi Egipto suyupi Israel runakunaq wasinta alqarparirqan. Egipto runakunata muchuchishaspanmi wasiykuta mana imanarqanpaschu”, nispa (Éx. 12:26, 27). Hinaspapas willarqankuchá Egipto reyqa Israel llaqtata mana kachariy munasqanta, faraonmi nirqan: “¿Pitaq chay [Jehová] Diosri, siminta kasunaypaq, Israel runakunata kacharinaypaqpas?”, nispa (Éx. 5:2). ¿Imaynatan Dios kutichirqan faraonman? Chaytapas willarqankuchá wawankumanqa. Diosqa sut’itan kutichirqan tukuy atiyniyoq kasqanta 10 plagakunawan Egipto nacionta ñak’arichispa, puka lamar qochapi Israel llaqtata yanapaspapas. Tukuy chaykunatan Israel runakunaqa rikurqanku, chhaynapin paykunaqa sut’ita yacharqanku Jehová Diosqa llapa prometesqankunata hunt’aq kasqanta, cheqaq Diospuni kasqantapas.

Israel runakunaqa sut’itan yacharqanku Jehová Diosqa cheqaq Dios kasqanta prometesqantapas hunt’aq kasqanta

6 Diospa sutin apasqankuta valorniyoqpaq qhawariq Israel runakunaqa, willarqankuchá  wak llaqtayoq runakunamanpas kamachinkunamanpas Jehová Diospa ruwasqankunata. Chaymantapas wawankutan yachachinanku karqan ch’uyata kawsanankupaq otaq Diospa kamachikusqanman hina kawsanankupaq. Diosmi paykunata nirqan: “Ch’uyan kankichis, ñoqa Diosniykichis Señor Dios ch’uya kasqayrayku”, nispa (Lev. 19:2; Deut. 6:6, 7). ¿Imatan tayta-mamakuna chaymanta yachankuman? Kunanpas llapa tayta-mamakunan wawankuta yachachinanku ch’uyata kawsanankupaq, chhaynapi Diospa sutinta hatunchanankupaq (leey Proverbios 1:8; Efesios 6:4).

Jehová Diosmanta wawanchiskunaman yachachispan sutinta valorniyoqpaq qhawarinchis (5, 6 parrafokunata qhaway)

7. a) ¿Imaynatan huk nacionkuna Israel llaqtata qhawarirqanku? b) ¿Imapaqmi kallpachakunanchis Diospa sutinta apasqanchisrayku?

7 Diospa kamachikuyninkunata Israel llaqta kasukuspaqa, bendecisqan karqanku. Huk nacionkunapas ‘manchakurqankun’ Jehová Diospa yanapasqanta pakaykusqantapas qhawarispanku (Deut. 28:10). Ichaqa sapa kutillanmi Diospa kamachikuyninta mana kasukurqankuchu. Paykunaqa idolokunatan yupaycharqanku. Sinchi millaymantaqmi tukupurqanku, chaymi wawankutapas idolokunaman sacrificiopi haywarqanku, wakchakunatapas ñak’arichirqanku. ¿Imatan chaymanta yachasunman? Diospa sutintataq apanchis chayqa, Jehová Dios hina ch’uya kananchispaqmi kallpachakunanchis.

MOSOQKAQTAN RUWASHANI

8. a) ¿Imatan Jehová Dios willachirqan Isaiaswan? b) ¿Imatan Isaías yachayta munarqan?

8 Jehová Diosmi profeta Isaiaswan willachirqan Jerusalén llaqta thunisqa kananta, Israel runakunataq Babilonia nacionman apasqa kanankuta. Hinaspapas willarqanmi imaynata llaqtanta salvananta (Is. 43:19). Diosqa yacharqanmi Israel runakuna chay willachisqanta mana uyarikunankuta, chaywanpas Isaiastan  nirqan willashanallanpaq. Chaytan Isaiasqa qelqarqan soqtantin ñawpaq capitulokunapi. Ichaqa yachaytan munarqan hayk’aqkama Israel runakuna mana kasukuq kanankuta. Hinan Diosqa kay hinata kutichirqan: “Llaqtakuna lliw thunisqa, mana ch’ulla tiyaqniyoq kanankama, wasikunapas mana ch’ulla runayoq kanankama, campokunapas purun-purun kanankama”, nispa (leey Isaías 6:8-11).

9. a) ¿Hayk’aqmi Isaiaspa willasqan hunt’akurqan? b) ¿Imaraykun kunanpas makilla kashananchis?

9 778 watapi (m.J.h.) Uziaspa kamachikuynin tukushaqtinmi, Isaiasta Jehová Dios nirqan chaykunata Israel runakunaman willananpaq. Chaytataqmi willarqan 732 watakama rey Ezequías kamachikushaqtin. Chhaynaqa 46 wata hinan Isaiasqa chaykunata willarqan Israel runakunaman. Chaymi hunt’akurqan 607 watapi (m.J.h.) Jerusalén thunisqa kaqtin, chayqa karqan unay watakuna qhepamanñan. Jehová Diosmi ichaqa ñawpaqmantaña Israel llaqtaman willarqan imata paykunawan ruwananta. Kay tiempopipas unaymantañan Diosqa llaqtanman willashan imata hamuq tiempopi ruwananta. Hinaspapas 135 watañan Qhawaq revista willashan Saqraq kamachikusqan tukupunanta, hinaspa Jesús waranqa wata kamachikamunanta. Chayraykun makilla kashananchis (Apo. 20:1-3, 6).

10, 11. ¿Ima profecía hunt’akusqantan llaqtankuman kutipuq Israel runakuna rikurqanku?

10 Jehová Diospa willachisqanta kasukuqkunan ichaqa mana Jerusalén llaqtawan kuskachu thunisqa karqanku, aswanpas Babiloniaman apasqan karqanku (Jer. 27:11, 12). Chaypi 70 wataña kashaqtinkun Diospa llaqtanqa huk profeciaq hunt’akusqanta rikullarqankutaq. Chaytan profeta Isaías ñawpaqmantaña willarqan, chay profecian nirqan: “Israelpa Ch’uya Diosnin, qespichiqniykichis Señor Diosmi nin: Qankunata qespichinallaypaqmi runakunata Babilonia contra kachani”, nispa (Is. 43:14).

11 ¿Imaynatan chay profecía hunt’akurqan? Huk tutapin 539 watapi octubre  killapi Babilonia llaqtaq reynin kamachinkunantin kuska diosninkuta yupaychasharqanku. Chaypin vinota ukyasharqanku Jerusalén templomanta apasqanku vasokunapi. Chaykaman Media suyu Persia suyu soldadokuna Babilonia llaqtata haykuspa thunirqanku. Iskay watakuna qhepamantaqmi Persia rey Ciro Israel runakunata kamachirqan llaqtankuman kutispa Jerusalén llaqtata hukmanta sayarichinankupaq. Tukuy chaykunatan Isaiasqa ñawpaqmantaña willarqan. Hinaspapas willarqanmi Israel runakuna llaqtankuman kutipushaqtinku Jehová Dios yanapananta pakaykunantapas. Diosmi paykunamanta nirqan: “Kay llaqtataqa ñoqapaqmi kamakurqani, yupaychaykunatan takipuwanqa”, nispa (Is. 43:21; 44:26-28). Chay hinapin llaqtankuman kutipuq Israel runakunaqa Diospa testigon kallarqankutaq, chaypin paykunaqa sut’ita rikurqanku Diosqa ima prometesqantapas hunt’asqanta.

12, 13. a) ¿Pikunan ñawpa Israel runakunawan kuska Diosta yupaycharqanku? b) ¿Imaynata kawsanankupaqmi ‘wak ovejakuna’ kallpachakunanku? c) ¿Imatan ‘wak ovejakuna’ suyakushanku?

12 Tukuy chaykunata rikuspan wak llaqtayoq runakunapas Diosta yupaychallarqankutaq, chay hinapin chay llaqtamanta kapurqanku. Qhepa watakunamanpas chay hinatan ruwallarqankutaq (Esd. 2:58, 64, 65; Est. 8:17). Kay tiemponchispipas ‘wak ovejakunamanta’ kaq ‘ancha askha runakunan’ tukuy sonqomanta yanapashanku akllasqa cristianokunata, chay akllasqakunan ‘Diospa cheqaq Israel llaqtanmanta kanku’ (Juan 10:16; Apo. 7:9, 10; Gál. 6:16). Chay hinapin ancha askha runakunapas akllasqa cristianokuna hina Diospa sutinta apallankutaq.

Ch’uyata kawsasqanchiswanmi rikuchinchis Diospa sutin apasqanchismanta agradecekusqanchista

13 Chaymi ‘wak ovejakunamanta’ kaq ancha askha runakunaqa, chay sutita apasqankurayku kallpachakunanku ch’uyata kawsanankupaq. Sapa p’unchaytaqmi Diosmanta mañakunanku huchankumanta pampachasqa kanankupaq. Chaykunata ruwaspan Diosta anchata agradecekunku sutinta apasqankumanta (leey 1 Juan 1:8, 9). Chay hinapitaqmi waranqa wata Cristoq kamachikuyninpi kawsarimpuqkunaman willanqaku imaynata tukukuy p’unchaykunapi Jehová Diospa testigonkuna kawsarqanku chayta.

¿IMA NINANMI DIOSPA SUTIN?

14. ¿Ima ninanmi Diospa sutin?

14 Diospa sutin apasqanchista aswan valorniyoqpaq qhawarinanchispaqqa, yachananchismi ima ninanmi Diospa sutin chayta. Diospa sutinmi Jehová, chay sutiqa lliw prometesqantapas munasqantapas hunt’aq ninanmi. Chay sutitaqa Jehová Dios kikinpunin churakurqan imayna Dios kasqanta reqsinanchispaq. Hinaspapas Jehová Dios imatapas ruway munasqantaqa manan pipas tatichinqachu, Saqrapas manan tatichiyta atinmanchu.

15. ¿Imatan Jehová Diospa sutinmanta yachallanchistaq? (“ Diospa sutin” nisqa recuadrota qhaway.)

15 ¿Imatawanmi sutinmanta Dios willarqan? Egiptomanta llaqtanta horqomushaspan Moisesta nirqan: “Ñoqan kani Ñoqaqa [otaq Ñoqan munasqayman hina  kasaq]. Israel runakunata ninki: ‘Ñoqan kani’ nisqa sutiyoqmi qankunaman kachamuwan”, nispa (Éx. 3:14). Chaywanmi yachallanchistaq Jehová Diosqa munayninta hunt’ananpaq ima munasqanmanpas tukusqanta. Israel llaqtapaqmi Jehová Diosqa tukurqan kacharichiqninkuman, pakaykuqninkuman, pusariqninkuman necesitasqankuta qoqninkuman ima.

DIOSPA SUTINTA APASQANCHISMANTAN AGRADECEKUNCHIS

16, 17. a) ¿Imaynatan Diospa sutin apasqanchismanta agradecekusunman? b) ¿Imamantan qatimuq estudiopi yachasun?

16 Kunanpas Jehová Diosqa manan cambianchu, chaymi sutinpa nisqanman hina tukuy necesitasqanchispi yanapawanchis. Hinaspapas Jehová Diosqa kamasqankunatan ima necesitasqanman tukuchin munasqanta hunt’ananpaq. Chaymi kamachinkunawan predicacionta aparichishan. Chayta yachaspaqa kallpachakunanchismi Diospa sutinta allinta qhawarichinanchispaq. Chayta ruwananpaqmi Noruega nacionmanta 84 watayoq Kåre iñiqmasinchis kallpachakun. Payqa 70 watañan Diosta servishan, paymi nin: “Ancha valorniyoqpaqmi qhawarini Diospa sutin apaytaqa llaqtanpi kaytapas. Hinaspapas maytan kusikuni Bibliaq nisqanta hukkunaman willayta. Sapa kutillanmi runakunaman willani Jesuspa sacrificakusqanrayku kay pachapi wiñay kawsayta chaskinanchismanta, chayta willaymi kusichiwan”, nispa.

Jehová Diosqa kamasqankunatan ima necesitasqanman tukuchin munasqanta hunt’ananpaq

17 Yachasqanchis hina, Diosmanta yachay munaqkunata tariyqa manan facilchu. Chaywanpas Diospa sutinmanta yachachisqanchista pipas uyariwaqtinchisqa, Kåre iñiqmasinchis hinan kusikunchis. Ichaqa, ¿imaynapin Jehová Diospa testigon kashaspa Jesuspa testigon kallasunmantaq? Chaytan qatimuq estudiopi yachasun.