Bibliaqa manan willanchu qharipura warmipura casarakuqkunaq derechonmanta. Ichaqa kay tapuymi importante: ¿Ima ninmi Biblia qharipura otaq warmipura casarakuymanta?

Wakin runakunan yachaqman tukunku, ichaqa manan Bibliata allintachu estudianku. Wakinmi ninku: “Bibliaqa juchachanmi qharipura warmipura puñuqkunataqa”, nispa. Wakinñataq ninku: “Bibliapiqa ninmi: ‘Runamasiykitan munakunki qan kikiykita jina’, nispa. Chayrayku qharipuraña warmipuraña casarakunku chaypas, allillan kanman”, nispa (Romanos 13:9).

¿Mayqen kaq willakuymi cheqaq?

1. Bibliaqa juchachanmi qharipura warmipura puñuyta.

2. Bibliaqa allinpaqmi qhawarin qharipura warmipura puñuyta.

3. Biblian yachachin qharipura warmipura puñuqkunata cheqnikuyta.

BIBLIAQ KUTICHIYNIN:

1. CHEQAQ. Biblian nin ‘qharipura puñuqkuna’ Diospa gobiernonman mana jaykunankuta (1 Corintios 6:9, 10). Kaqllatataqmi nin warmikunamantapas (Romanos 1:26).

2. FALSO. Biblian yachachin warmiwan qhariwan casarakuspalla puñuy atisqankuta (Génesis 1:27, 28; Proverbios 5:18, 19).

3. FALSO. Bibliaqa juchachanña qharipura otaq warmipura puñuyta chaypas, manan chay runakunata cheqnikuytachu yachachin; nitaq paykuna contra jatarispa mana allin trataytapaschu (Romanos 12:18). ^[1]

Noqaykuqa creeykun Bibliapi kamachikuykuna allinpuni kasqanta, chaymi chayman jina kausayku (Isaías 48:17). ^[2] Chayraykun rechazayku Bibliaq juchachasqan ruwaykunata, chaypin kashan qharipura warmipura puñuypas (1 Corintios 6:18). ^[3] Testigokunaqa chay jina kausaytan ajllakuyku, derechoykupitaqmi kashayku chayta ruwanaykupaq.

Kallpachakuykun ‘lliu runawan thajpi kanaykupaqpas’ (Hebreos 12:14). Noqaykuqa mana allinpaqña qhawariyku qharipura warmipura puñuyta chaypas, manan jujkunata obligaykuchu noqayku jina piensanankupaq, manan qharipura warmipura puñuqkunatapas maltrataykuchu. Manan chaykuna pasaqtinpas kusikuykuchu. Tukuy atisqaykutan ruwayku Bibliaq kamachisqanman jina jujkunata tratanaykupaq, imaynatachus tratawanankuta munayku chayman jina tratanaykupaq (Mateo 7:12).

Wakinmi piensanku Biblia qharipura puñuqkuna cheqnikuyta yachachinanpaq. Chayman jina kausaqkunatataq piensayninkuta mana cambiay munaq runakunata jina qhawarinku. Wakinqa ninkun: “Bibliaqa piensayninkuta mana cambiayta munaq runakunaq tiemponpin qelqakuran, kunanqa lliu runakunatan aceptanchis, juj razamanta, juj nacionmanta kaqtinkupas, qharipuraña puñuyta munaqtinkupas”, nispa. Chhaynata piensaqkunapaqqa qharipura puñuqkunata rechazayqa kaqllan juj colorniyoq runakunata rechazaywan. Ichaqa, ¿allinchu chay jinata comparay? Manan.

Qharipura otaq warmipura puñuy comportamientota rechazayqa manan kaqllachu chhaynata kausaq runakunata rechazaywan. Bibliaqa cristianokunatan nin tukuy clase runakunata respetanankupaq (1 Pedro 2:17). ^[4] Ichaqa manan chaywanqa nishanchu cristianokuna tukuy clase comportamientota aceptanankuta.

Juj ejemplota churasun. Yaqapachá cigarro fumayta cuerpoykipaq mana allin kasqanta qhawarinki, llank’anaykipi compañeroykitaq fumaq runa. ¿Mana imatapas aceptaq runa jinachu qhawarisqa kawaq mana compañeroyki jina piensasqaykimanta? ¿Mana fumasqaykiraykuchu jujkunata cheqnikuq runa jina qhawarisqa kawaq? Sichus compañeroyki obligasunkiman fumaymanta piensasqaykita cambianaykipaq chayqa, ¿manachu chay mana imatapas aceptaq runaman payta tukuchinman?

Testigokunaqa Bibliaq kamachisqanman jina ruwanaykupaqmi decidikuyku, chaymi Bibliaq prohibisqan ruwaykunata mana ruwaykuchu. Ichaqa manan burlakuykuchu nitaq pisichaykuchu jujnirayta ruwaq runakunata.

¿Ima nisunmanmi qharipura warmipura puñuyta munaq runakunamanta? ¿Chhaynachu naceranku? Chhayna kaqtinqa, ¿juchachu kanman paykunata criticay?

Bibliaqa manan ninchu imarayku warmipura qharipura tiyasqankuta ichaqa ninmi wakin runakunapi mana allin pensamientokuna saphichakusqanta. Ichaqa sichus Diospa allin qhawarisqan kayta munanchis chayqa, Bibliaq juchachasqan ruwaykunatan mana ruwananchischu, chaypin kashan qharipura warmipura puñuypas (2 Corintios 10:4, 5).

Wakinqa piensankun Bibliaq kamachisqan nishu estricto kananpaq. Ichaqa chhayna piensayqa “cuerponchispa munayninman jinan ruwananchis” niq runakunamantan jamun, wakintaq ninku: “Cuerponchispa munaynintaqa manan controlayta atisunmanchu nitaqmi controlananchischu”, nispa. Biblian ichaqa willan controlay atikusqanta. Animalkunaqa kikillankumantan ruwanku, runakunan ichaqa atinchis decidiyta ima ruwayta ima mana ruwaytapas (Colosenses 3:5). ^[5]

Kay ejemplopi piensay. Investigaqkunan ninku wakin runaqa juj comportamientoyoq  nacesqankuta, yaqapaschá maqakuq runa kanman. Bibliaqa manan willanchu runakuna millay comportamientoyoq nacesqankuta, ichaqa willanmi ‘saltaq sonqo’ ‘k’araq phiñakuq’ runakunamanta (Proverbios 22:24; 29:22). Chaymi nin: “Qankunamanta wijch’upuychis tukuy ima sintipakuq kayta, phiñasqa kayta”, nispa (Salmo 37:8; Efesios 4:31).

Wakillanmi Bibliapi chay nisqanwanqa mana acuerdopichu kankuman. Yaqapaschá ninkuman: “Chay consejoqa nishu estricton maqakuq runakunapaq”, nispa. Jinaspapas chhayna comportamientoyoq nacesqankupi creeq investigadorkunan kallpachakunku paykunata yanapanankupaq, chhayna runa kasqankuta controlanankupaqpas.

Testigokunaqa chhaynallatataqmi piensanku Bibliaq contranpi kaq ima comportamientomantapas. Chhaynatan piensanku mana casado kashaspa warmi-qhari puñuymantapas. Chaykunamanta rimaspan Biblia nin: “Sapankaykichismi yachanaykichis cuerpoykichis kamachiyta, chhaynapi ch’uya kanaykichispaq allin qhawarisqa kanaykichispaqwan. Ama Diosta mana reqsiq [...] runakuna jinaqa kaychischu, paykunaqa mana controlakuspan sinchita warminayachikunku qharinayachikunku ima, manan chaykunawanqa amikunkupaschu”, nispa (1 Tesalonicenses 4:4, 5).

Qallariy siglopi cristianoman tukupuyta munaq runakunaq kausayninqa jujniraymi ñaupaqpi karan, juj llaqtakunamantataq karankupas. Wakinqa jatun cambiokunatan vidankupi ruwananku karan. Ejemplopaq, qhelli juchapi puriqkunamanta, ídolo adoraqkunamanta, warmipura otaq qharipura puñuqkunamanta rimaspan Biblia nin: “Chhaynan wakinniykichisqa karankichis”, nispa (1 Corintios 6:9-11).

Chaywan nishanchu, ¿warmipura otaq qharipura puñuqkuna manaña jayk’aqpas chayta munananku kasqanta? Manan. Bibliaqa nillantaqmi: “Diospa espiritunman jinallapuni purishaychis, chhaynapin mana aychaq ima munaynintapas ruwankichischu”, nispa (Gálatas 5:16).

Bibliaqa manan nishanchu cristianokuna mana jayk’aqpas chaykuna munanankuta, aswanpas decidinkun mana ruwanankupaq. Arí, controlakunkun chaypi mana piensanankupaq, chhaynapi mana urmanankupaq (Santiago 1:14, 15). ^[6]

Biblian riman munaymanta ruwaymantapas (Romanos 7:16-25). Qharipura puñuyta munaq runakunaqa atinkumanmi piensayninku controlayta, imaynan controlanku renegayninkuta, jujwan pantayta otaq sinchi munapayayninkutapas jinata (1 Corintios 9:27; 2 Pedro 2:14, 15).

Jehová Diospa testigonkunaqa kasukuykun Bibliapi kamachikuykunata, ichaqa manan pitapas obligaykuchu noqayku jina piensanankupaqqa. Manataqmi jujnirayta kausaq runakunata protegeq leykuna contrapas kaykuchu. Willasqaykuqa runakunatan yanapan, chaymi uyarikuqkunaman willayku (Hechos 20:20).