Kichay leenaykipaq

Índice nisqaman riy

Jehová Diospa promesankunapi allinta iñisun

Jehová Diospa promesankunapi allinta iñisun

‘Iñiyqa mana rikuna kaqkunata rikushasunmanpas jinata rikuymi’ (HEB. 11:1)

54, 125 TAKIKUNA

1. ¿Imamantan agradecekunanchis?

PISI runakunallan iñiyniyoqqa kanku (2 Tes. 3:2). Chay iñiytaqa Jehová Diosmi qon llapa serviqninkunaman (Rom. 12:3; Gál. 5:22). Anchatan chaymanta agradecekunanchis.

2, 3. a) ¿Ima bendicionkunan kan iñiyniyoq kaqtinchis? b) ¿Imamantan kay estudiopi yachasunchis?

2 Jehová Diosmi munasqa wawanta kay pachaman kachamuran, chhaynapi pipas paypi iñiqqa juchanmanta perdonasqa kananpaq, Diospa amigon kaspa wiñay kausayta chaskinanpaqwan (Juan 6:44, 65; Rom. 6:23). Chaywanmi Jehová Diosqa rikuchiwaranchis anchata munakuwasqanchista. Payqa juchasapaña kaqtinchispas, wañuchinapaq jinaña kaqtinchispas yacharanmi allin kaqta ruway atisqanchista (Sal. 103:10). Chaymi yanapawaranchis Jesusmanta yachananchispaq, wiñay kausay suyakuytataq qowaranchis Jesusta qatikusqanchismantapacha (leey 1 Juan 4:9, 10).

3 Ichaqa, iñiyniyoq kanapaqqa manan Diospa imachus ruwasqallanmantachu yachananchis, nitaq imatachus  qhepaman ruwanqa chayllatapaschu yachananchis. Chhaynaqa, ¿imatawanmi ruwananchis? Chaymantan kay estudiopi yachasunchis.

“TUKUY SONQOWANMI IÑINA”

4. ¿Imatan ruwananchis iñiyniyoq kaspa?

4 Jehová Diospi Jesuspipas iñinapaqqa manan yachanallanchischu paykunamantaqa, aswanpas tukuy sonqonchiswanmi kallpachakunanchis paykunaq yachachiwasqanchisman jina kausananchispaq. Tukuy sonqowanmi jujkunatapas yanapananchis paykunata reqsinankupaq. Chaymi apóstol Pablo niran: “Simiykiwanchus runa qayllapi rimanki: ‘Jesusqa Señormi’, nispa, sonqoykiwantaqchus iñinki Diosqa wañusqamanta kausarichimusqanpi chayqa, salvasqan kanki. Chanin kanapaqqa tukuy sonqowanmi iñina, salvasqa kanapaqtaq chay simimanta jujkunaman willana”, nispa (Rom. 10:9, 10; 2 Cor. 4:13).

5. ¿Imanaqtinmi allin iñiyniyoq kananchis? ¿Imatan chaypaq ruwasunman? Juj ejemplota churay.

5 Rikusqanchis jina, wiñay kausayman chayananchispaqqa allin iñiyniyoqmi kananchis. Iñiyqa juj planta jinan. Imaynan plantapas ch’akipun mana qarpasqa kaspa, chhaynallataqmi iñiyninchiswanpas pasanman. Chayraykun allinta cuidananchis iñiyninchista chhaynapi “allin” kananpaq, astawan ‘yapakunanpaqwan’ (Tito 2:2; 2 Tes. 1:3; Luc. 22:32; Heb. 3:12).

BIBLIAN WILLAN IMACHUS IÑIY CHAYTA

6. ¿Ima ninmi Hebreos 11:1 texto iñiymanta?

6 Hebreos 11:1 (leey) textopin Bibliaqa nin: “Iñiyqa imatachus suyashanchis chayta cheqaqpaqpuni jap’iymi”, nispa. Chay suyasqanchis kaqkuna ukhupin tarikun jamuq tiempopaq Diospa promesankuna. Ejemplopaq, Diosmi prometewanchis tukuy mana allin kaqta chinkachispa mosoq pachata apamunanpaq. Chaymantapas chay textoqa nillantaqmi: ‘Iñiyqa mana rikuna kaqkunata rikushasunmanpas jinata rikuymi’, nispa. Chay mana rikuna kaqkunamanta wakinmi kanku Jehová Dios, Jesús, angelkuna, Diospa gobiernon ima (Heb. 11:3). Chay mana rikuna kaqkunapi, Diospa promesankunapipas allinta iñisqanchistaqa imayna kausasqanchispi, ima rimasqanchispi, ima ruwasqanchispi iman rikuchinanchis.

7. ¿Imatan Noé ruwaran iñisqanrayku? ¿Imatan chay yachachiwanchis iñiymanta? (21 paginapi dibujota qhaway.)

7 Noemanta yachasunchis. Paymantan Pablo niran: “Iñisqanraykun Noepas manaraq rikusqankunamanta Dios willaqtin payta manchakuspa juj arcata ruwaran familianpiwan salvasqa kananpaq”, nispa (Heb. 11:7). Noeqa Jehová Diospa willasqanpi iñispan juj jatunkaray arcata ruwaran. Llaqtamasinkunaqa tapurankuchá imaraykus chay arcata ruwasharan chayta. Noeqa predicaranchá chay runakunata. Chaychá Bibliaqa Noemanta nin: ‘Chanin kaqmantan willaq’, nispa (2 Ped. 2:5). Noeqa willaranchá jatun para chayamunanmanta, llapantachá willaran Diospa imachus nisqanmantapas. Diosmi payta niran: “Llapan kausaqtan p’uchukachipusaq, paykuna jawa kay pacha mana chanin kaywan junt’a kashasqanrayku. Noqan  kay pachata para unuwan millp’uchisaq, kay pachapi jayk’an kausaqta p’uchukachinaypaq”, nispa. Noeqa willaranchá runakunaman salvasqa kanankupaqqa arcaman jaykunanku kasqanta (Gén. 6:13, 17, 18).

8. ¿Ima niranmi Santiago iñiymanta?

8 Santiagopas qelqaranmi iñiymanta. Chaytaqa apóstol Pabloq Hebreokunaman qelqasqan qhepamanmi qelqanman karan. Chaypin niran: “Rikuchiway iñiyniykita mana imatapas ruwaspalla, noqataq iñiyniyta rikuchisayki allin kaqkunata ruwaspa”, nispa (Sant. 2:18). Santiagoq nisqan jina, iñiyniyoq kanapaqqa manan creeyllachu creenanchis imapipas. Supaykunapas creenkun Diospiqa, ichaqa manan paypi iñinkuchu, aswanpas paypa contranpin kashanku (Sant. 2:19, 20). Diospi iñiqkunan ichaqa allin kaqkunata ruwaspa Diosta kusichinanku. Chaytan Abrahanpas ruwaran, chaymi Santiago niran: ‘¿Manachu taytanchis Abrahanpas imachus ruwasqanrayku chaninpaq jap’isqa karan? Arí, payqa wawan Isaacta sacrificiopi jaywananpaq altarman churaqtinmi chhayna qhawarisqa karan. Abrahanpa iñiyninqa imachus ruwasqankunawan kuskan llank’aran, imachus ruwasqankunawantaqmi junt’apasqapas karan. Imaynan mana espirituyoq cuerpoqa wañusqa kashan, chhaynallataqmi iñiyninchiswanpas kanman’, nispa (Sant. 2:21-23, 26).

9, 10. ¿Imaynatan rikuchisunman Churipi iñisqanchista?

9 30 wata jina qhepatan apóstol Juan Jesusmanta willakuyta qelqaran, qelqallarantaqmi kinsa cartakunatapas. Payqa allintan yacharan imachus iñiy kasqanta, chaymi askha kutipi chaymanta qelqaran.

Jesuspi iñiqkunaqa paytan kasukunanku

10 Paymi niran: “Pipas Churipi iñiqqa wiñay kausayniyoqmi kanqa, pipas Churita mana kasukuqtaq ichaqa mana kausayta rikunqachu, aswanmi Diospa phiñakuynin paypi kashallanqa”, nispa (Juan 3:36). Chhaynaqa Churipi iñiqkunaqa paytan kasukunanku. Juanpa willasqan jina, askha kutipis Jesusqa rimasqa wiñay kausayman chayanamanta, chaypaqqa paypi Yayanpi imas iñinanchis (Juan 3:16; 6:29, 40; 11:25, 26; 14:1, 12).

11. ¿Imaynatan Diosta agradecekusunman payman pusawasqanchismanta?

11 Jehová Diosqa santo espiritunwanmi yanapawaranchis paymanta wawanmantawan yachaspa iñinanchispaq (leey Lucas 10:21). Chayraykun payta anchata agradecekunanchis. Tukuy tiempon “gracias” ninanchis ‘iñiypi pusawaqninchis’ Jesuswan pusawasqanchismanta (Heb. 12:2). Chaymantapas tukuy tiempon Diosmanta mañakushananchis, mana saqespan palabrantapas estudiananchis. Chhaynapin iñiyninchista astawan yapasunchis (Efes. 6:18; 1 Ped. 2:2).

Iñiyninchista rikuchisun jujkunaman Bibliamanta yachachispa (12 parrafota qhaway)

12. ¿Imakunata ruwaspan iñiyninchista rikuchisunman?

12 Noqanchisqa tukuy ruwasqanchiswanmi rikuchinanchis Jehová Diospa promesankunapi tukuy sonqo iñisqanchista.  Chaypaqmi mana saqenanchischu predicayninchista, aswanpas lliutan yanapananchis Jesuspa discipulon kanankupaq. Chaymantapas ‘lliupaqmi imachus allin kaqta ruwapunanchis, astawanqa iñiqmasinchiskunapaq’ (Gál. 6:10). Ñaupa kausayninchistapas saqepunanchismi, chhaynapin mana imapas Jehová Diospa amigon kasqanchista imananqapaschu (Col. 3:5, 8-10).

IÑIYQA ANCHA IMPORTANTEN

13. ¿Maytukuy importanten Diospi iñiy? ¿Ima ninmi Biblia chaymanta?

13 Biblian nin: “Manachus iñisunman chayqa manapunin Diospa sonqonpaq jinachu kasunman; pipas Diosman achhuykuqqa creenanmi Diosqa cheqaqpuni kasqanta, payta tukuy sonqowan maskhaqninkunamanpas premiota qoq kasqantawan”, nispa (Heb. 11:6). Bibliaq nisqan jina, ‘Diospi iñiyqa’ qallariy yachachikuykunamanta jujninmi, chayraykun chayqa ancha importante (Heb. 6:1). Ichaqa manan allin iñiyniyoq kaspallachu Diospa amigonqa kasunman, kallpachakunanchismi jujkunata ruwananchispaqpas (leey 2 Pedro 1:5-7; Jud. 20, 21).

14, 15. ¿Imanaqtinmi munakuy aswan allin iñiymanta?

14 Bibliapiqa iñiymantan astawanqa yachachikun. Ichaqa, ¿tukuy imamantapas aswan importante kaqtinchu masta chaymanta yachachikun?

15 Manan. Iñiymantaqa munakuymi aswan importante, chaymi apóstol Pablo niran: ‘Yaqapaschá iñiyniy orqokunata juj ladoman astanaypaq jinaraq kanman, ichaqa manataq munakuyniy kanmanchu chayqa, manan imapaschu kayman’, nispa (1 Cor. 13:2). Chaymi Jesuspas niran: ‘Ñaupaq kaq aswan jatun kamachikuyqa Diosta munakuymi’, nispa (Mat. 22:35-40). Munakuyninchis kaqtinqa iñiyninchispas kallanqataqmi, chaymi Biblia nin: ‘Munakuqqa tukuy imatan creen’, nispa, arí, munakuyninchis kaqtinmi Diospa lliu niwasqanchispi creesun (1 Cor. 13:4, 7).

16, 17. ¿Ima ninmi Biblia iñiymanta munakuymantawan? ¿Mayqenmi aswan importante? ¿Imanaqtinmi aswan importante?

16 Munakuywan iñiywan ancha importante  kasqanraykun Bibliapiqa iskayninmanta askha jawapi willakun. Pablon niran: “Qhasqo jark’anawan jina iñiyta munakuytawan churakusun”, nispa (1 Tes. 5:8). Pedropas niranmi: ‘Manaña jayk’aqpas Cristota rikurankichischu chaypas, munakunkichismi paytaqa ¿riki? Manaña kunanpas rikunkichischu chaypas, iñishankichismi paypiqa ¿riki?’, nispa (1 Ped. 1:8). Santiagopas ajllasqamasinkunatan niran: “¿Manachu Diosqa kay pacha runakunaq wajchapaq qhawarisqan runakunata ajllaran iñiyninkupi qhapaq kanankupaq? Paykunatamá riki ajllaran munakuqninkunaman prometesqan gobiernota herenciata jina chaskinankupaqpas”, nispa (Sant. 2:5). Apóstol Juanpas niranmi: “Kaymi Diospa kamachikuyninqa: Churin Jesucristoq sutinpin iñinanchis, noqanchispurataqmi munanakunanchispas”, nispa (1 Juan 3:23).

17 Chaywanpas Pabloqa niranmi: “Iñiywan, suyakuywan, munakuywanqa kashallanqan; chay kinsantinmanta kuraqmi ichaqa munakuy”, nispa (1 Cor. 13:13). Chaypi nisqan jina, jamuq tiempopiqa ñataq Diospa promesankuna junt’akunqaña chayqa, manañan chaykunapiqa iñinanchischu kanqa. Chay pachaqa Bibliaq prometewasqanchis paraisopiñan tiyashasunchis. Ichaqa Diostawan runamasinchiskunatawanqa munakushanallanchismi kanqa. Chay munakuyninchisqa wiñay-wiñaypaqmi astawan wiñanan kanqa.

ASKHA BENDICIONKUNAN KAN IÑISQANCHISRAYKU

18, 19. ¿Ima bendicionkunan kapuwanchis iñisqanchisrayku? ¿Pitan chaymanta alabananchis?

18 Jehová Diosta serviqkunaqa santo espirituwan pusachikusqankuraykun Diospa gobiernonpi iñinku, chaytan apoyankupas. Chaymantapas jujkuna-jujkunawanmi munanakunku (Gál. 5:22, 23). Chayraykun pusaq millón más runakunaña wayqe-panantin jina sumaqta kausashanchis. Chaypin rikukun iñiywan munakuywanqa ancha importante kasqanta.

19 Ichaqa Diospa yanapaynillanwanmi chhayna sumaqtaqa kausashanchis, chaymi payta alabananchis (Is. 55:13). Chaymantapas agradecekunanchismi ‘iñisqanchisrayku salvasqa kananchispaq’ yanapawasqanchismanta (Efes. 2:8). Jehová Diosqa askha runakunataraqmi yanapanqa paypi iñinankupaq. Tiempowanqa pay sonqo runakunallan kay pachapi wiñaypaq tiyanqaku payta alabanankupaq.