Kichay leenaykipaq

Índice nisqaman riy

Kay llank’imanta ruwasqa suyt’u tablillapin “Tattannu” suti rijurin juj lado patanpi

Juj pruebatawan tarinku

Juj pruebatawan tarinku

¿Arqueologokunaq tarisqanku apoyanchu Bibliaq nisqanta? 2014 watapi Biblical Archaeology Review revista tapuran: “¿Hebreo qelqakunapi rijuriq jayk’a sutikunatan arqueología tariran?”, nispa. Jinan kutichiran “50 runakunaqta jinan” nispa. Ichaqa Tatnai (Tatenai) sutin mana rijuriranchu. ¿Pin Tatnai karan? Qhawarisun paymanta Bibliaq willasqanta.

Jerusalén llaqtaqa juj tiempon Persia nacionpa kamachisqan karan. Éufrates mayuq inti jaykuy ladonpin kasharan, chaymi Persia runakunaqa reqsiranku ‘Éufrates mayuq inti jaykuy ladon’ nispa. Babiloniata atipaspan Persia runakunaqa preso kashaq judiokunata kacharichiranku, jinaspa kacharanku Jerusalenpi templota jujmanta jatarichinankupaq (Esdras 1:1-4). Ichaqa judiokunaq enemigonkunan mana munarankuchu sayarichinankuta, chaymi tumparanku Persia rey contra jatariymanta (Esdras 4:4-16). Darío I kamachikushaqtinmi (522-486 manaraq Jesús jamushaqtin, m.J.j.); Persia nacionmanta Tatnai sutiyoq autoridadta encargaranku chay asuntota averiguananpaq. Paymantan Biblia nin: “Éufrates mayu inti jaykuy lado jap’iypi kamachikuq”, nispa (Esdras 5:3-7).

Llank’imanta ruwasqa suyt’u tablilla tarisqankupin Tatnai suti rijurin, chay tablillatan juj familia waqaychanman karan. Chay familiamanta juj runan pagapunanpaq documentota jujnin tablillapi ruwaran, chaypin Tatnai suti rijurishan. Chayqa ruwakuran rey Dario I iskay chunka wataña kamachikushaqtinmi (502 m.J.j.). Chay documentopin jujnin testigo rijurishan “Tattannupa empleadon, Éufrates mayuq inti jaykuy lado jap’iypi kamachikuq” nisqa. Esdras libropas paymantan willashan.

¿Ima cargoyoqmi karan Tatnai? 535 (m.J.j.) watapin Ciro el Grande kamachisqan territoriota jujmanta t’aqaran provinciakunaman. Jujnintan suticharan: “Babilonia, Éufrates mayuq inti jaykuy ladon”, nispa. Tiempowanmi chay provincia iskayman t’aqakuran, jujnintataq “Éufrates mayuq inti jaykuy ladon” nispalla sutichakuran. Chaypin kasharan Celesiria, Fenicia, Samaria, Judá llaqtakuna. Yaqapaschá capitalninqa Damasco llaqtapi karan. Tatnaiqa chay nacionkunatan gobernaran 520 watamanta 502 watakama (m.J.j.).

Tatnaiqa Jerusalentan viajaran judiokunaq tumpasqa kasqankuta averiguaq. Chaymantataq Darioman informaran judiokunaqa rey Ciroq permisonwan templo jatarichisqankuta. Chay jinapuni kasqantataq palaciopi kaq rollokunapi tariranku (Esdras 5:6, 7, 11-13; 6:1-3). Chaymi Tatnaiqa ama jark’ananpaq kamachikuyta chaskiran, kasukurantaq chayta (Esdras 6:6, 7, 13).

“Éufrates mayu inti jaykuy lado jap’iypi kamachikuq” Tatnaiqa manaña nishu importante runachu karan chaypas, Bibliaqa willanmi sutinta ima cargoyoq kasqantapas. Chaykunan rikuchillantaq Bibliaq tukuy willasqanqa cheqaqpuni kasqanta.