Kichay leenaykipaq

Índice nisqaman riy

 BIBLIAQ YANAPAYNINWAN CAMBIANKU

¡Manan wañupuyta munaranichu!

¡Manan wañupuyta munaranichu!
  • NACESQAN WATA: 1964

  • NACIÓN: INGLATERRA

  • ÑAUPAQ KARAN: ADOLESCENTE KASHASPA WAWAYOQ KARAN MANA ALLINTATAQ KAUSARAN

ÑAUPA VIDAY

Paddington barriopin nacerani, chayqa tarikun Londres (Inglaterra) llaqtapin. Papayqa machaq runan karan, chaymi maynillanpi noqaykuwan tiyaq, mayninpitaq chinkaripuq.

Wawallaraq kashaqtiymi mamay ch’isinkuna Diosmanta mañakuyta yachachiwaran. Juch’uy Bibliaypin salmo takikunalla karan, chaymi takinaypaq musicata inventakuq kani. Juj kutinmi juj libropi leerani “juj p’unchaymi kausay tukukapunqa” nisqata. Chaypi piensaqtiymi manaña puñuypas chayawaranchu. Chaymi piensarani: “Manan chayllachu vidaqa kanman, ¿imaraykutaq kausashani?”, nispa. ¡Manan wañupuyta munaranichu!

Layqakunamantan yachayta munarani. Chaymi wañusqakunawan rimayta munaspa cementeriokunata escuelamanta amigoykunawan rirani. Jinaspapas, paykunawanmi manchakunapaq kaq peliculakunata qhawaq kayku, ichaqa chhaynaña kaqtinpas gustawaranmi.

10 watallayoqraq kashaspan mana allin ñanpiña kausasharani. Fumaytan qallarirani, chay vicioyoq kapurani. Qhepamanqa marihuanatan fumarani. 11 wataypin alcoholta ujarani, qallariypiqa jaya kasqanraykun mana gustawaqchu, ichaqa gustawaranmi ujasqa kaspa imayna sientekusqay. Nishutan musicapas tusuypas gustawaq, chaymi atispaqa riqpuni kani fiestakunaman discotecakunamanpas. Tutakunan wasimanta ch’inlla lloqsispa illarimuytataq mana piqpa reparasqan kutiyapuq kani. Chaymi sayk’usqa kaspan escuelamanpas faltakuq kani, claseman rispataq chaypipas ujaq kani.

Escuelapi último watapi kashaqtiymi notaykuna mana allin karan. Mamitayqa manataq yacharanchu imayna comportakushasqayta chayqa sinchi llakisqan kasharan, phiñakurantaq noqawan. Discutiraykun, jinan wasimanta ripurani. Juj tiempon parlaqmasiy Tonywan tiyarayku. Payqa suwakuypin puriq, drogakunata vendeq, millay runa jinataq reqsisqa karan. Chay qhepallamanmi onqoq rijurirani, jinaspa 16 watallaypi wawayoq karani.

 BIBLIAQ YANAPAYNINWAN CAMBIAPUNI

Madre solterakunapaq wawankunapaqwan kaq alberguepi tiyashaspan Jehová Diospa testigonkunata reqsirani. Iskay hermanakunan jamuranku madre soltera sipaskunata visitaq. Juj kutinmi rimasqankuta uyariq rirani Testigokuna pantashasqankuta rikuchinaypaq. Ichaqa tapusqaytan sumaqllata fácil entiendeyllata Bibliawan explicawaranku. Gustawaranmi paykuna munakuq, sumaq sonqo kasqanku, chaymi aceptarani estudiayta.

Chay qhepallamanmi Bibliapi yachasqay vidayta cambiawaran. Wawa kasqaymantapachan manchakurani wañuyta, ichaqa yacharanin kausarimpuymanta Jesuspa nisqanta (Juan 5:28, 29). Jinaspapas yacharanin Dios noqapi interesakusqanta (1 Pedro 5:7). Jeremías 29:11 textopi nisqanmi sonqoyman chayaran, ninmi: “Noqaqa yachanin qankunapaq yuyaykusqayta, allinniykichispaqmi yuyaykushani, manan mana allinniykichispaqchu. Suyasqaykichis kausaytan ima sumaqta qhepaman qosqaykichis”, nispa. Creepuranin kay pacha paraíso kapuqtin noqapas chaypi wiñaypaq tiyapunaypaq (Salmo 37:29).

Testigokunaqa munakuywanmi tratawaranku. Juñunakuyninkuman primera vez rispan rikurani sumaq sonqo kasqankuta. Llapankupas munay tratoyoqmi kasqaku (Juan 13:34, 35). Chayqa jujniraypunin karan iglesiapi imayna tratawasqankumanta. Testigokunaqa manan juzgawarankuchu imayna kausayniyoq kasqaymanta. Aswanpas tiemponkuta t’aqaspan yanapawaranku. Juj jatun familiatapas tariyman jinan sientekurani.

Bibliata estudiaspan cuentata qokurani Diospa kamachikuyninman jina kausanaypaq cambiokuna ruwanay kasqanta. Sasapunin karan fumayta saqey, jinaspapas repararanin juj clase música uyarisqay marihuana fumayman tanqawasqanta, chaymi juj clase musicakunata uyariyta qallarirani. Manañan fiestakunaman discotecakunamanpas riraniñachu, chayqa alcohol ujaymanmi apawanman karan. Vidaypi yanapawaq allin amigokunatan maskhayta qallarirani (Proverbios 13:20).

Chay tiempopaqqa Tonypas Jehová Diospa testigonkunawanmi Bibliata estudiasharan. Tapukuyninkunaman Bibliawan kutichisqankuman jinan paypas repararan yachashasqan cheqaq kasqanta. Chaymi vidanta cambiayta qallariran: mana allin amigonkunata, suwakuyta, marihuana fumaytapas saqepuran. Chaymantaqa repararaykun Diospa sonqonpaq jina kausanaykupaqqa casarakunayku kasqanta. Chhaynapi wawaykupas formal familiapi wiñananpaq, chaymi 1982 watapi casarakapurayku.

“Kunanqa misk’itan puñuni tutakunapi, manañan llakikunichu jamuq tiempomanta wañuymantapas”

Qhawaq, ¡Rijch’ariy! * revistakunapin experienciakunata maskharani vidankuta imayna cambiasqankumanta leenaypaq. Chaymi anchata kallpachawaran ñauparinaypaq, mana pisipanaypaqpas. Diosmantan mañakuq kani pacienciakuwananpaq. Tonywanqa 1982 watapin bautizakurayku julio killapi, chhaynapin Testigo kapurayku.

BENDICIONKUNA CHASKISQAY

Dioswan amigontin kapusqaymi vidayta salvawaran. Tonywanmi rikurayku imaynata Jehová Dios sasachakuykunapi yanapawasqankuta. Problemakunapi tarikuspan yacharayku paypi confiayta, jinaspapas repararaykun familiaykuta tukuy tiempo cuidasqanta (Salmo 55:22).

May munaymi karan qhari wawaykuta ususiykutawan Jehová Diosta reqsinankupaq yanapasqaykuqa. Kunanpas anchatan kusikuni nietoykunapas astawan Diosta reqsishasqankumanta.

Kunanqa misk’itan puñuni tutakunapi, manañan llakikunichu jamuq tiempomanta wañuymantapas. Tonywanqa ocupasqan kashayku sapa semanan iñiq t’aqakunata visitaspa, chhaynapi paykunata kallpachanaykupaq. Jinaspapas paykunawan kuskan Jesuspi iñiq runakunaman allin willakuyta apayku, chhaynapi juj runakunapas kay pacha paraisopi wiñaypaq tiyanankupaq.

^ párr. 17 Jehová Diospa testigonkunan ruwanku.