Kichay leenaykipaq

Índice nisqaman riy

 QALLARIYPI KAQ

¿Imaraykun Jesús ñak’arispa wañuran?

¿Imaraykun Jesús ñak’arispa wañuran?

“Juj runallawan [Adán] juchaqa kay pachapi qallariran, juchawantaq wañuypas rijuriran” (Romanos 5:12)

¿Munawaqchu wiñaypaq kausayta? Askha runakunan chay tapuyman kutichinku “manan wañuytaqa munanichu ichaqa jinachá kanan riki, imanasunmantaq” nispa. Ninkun: “Lliupas wañunchismi”, nispa.

¿Munawaqchu kunachallan wañupuyta? Chhaynata pitapas tapusunman chayqa “manan” ninmanmi. Ima problemapiña tarikushasunman chaypas llapanchispas kausaytapunin munanchis. Diosqa kamawaranchis wiñaypaq kausay munaqtan. Biblian nin: “Runamanqa qoykuranmi winay-wiñay kaqkunapi yuyariy atiyta”, nispa (Eclesiastés 3:11).

Ichaqa manan wiñaypaqchu kunanqa kausanchis. ¿Iman pasaran? ¿Imatan Jehová Dios ruwaran allichananpaq? Chay tapuykunaman Bibliaq kutichisqanqa kallpachawanchismi, chayraykun Jesuspas ñak’arispa wañuran.

¿IMAN PASARAN?

Génesis qelqapi ñaupaqkaq kinsa capitulokunan willan Adanmanta Evamantawan, paykunamanmi Diosqa munachiran wiñay kausayta, nirantaqmi imata ruwanankutapas. Ichaqa manan kasukurankuchu, chaymi pierdekuranku wiñaypaq kausayta. Chay pasasqantaqa fácil entiendeyllatan willan, chaymi wakinqa cuentolla kananpaq piensanku. Ichaqa Génesis qelqapas evangelio qelqakuna jinan cheqaqta willan. *

¿Iman pasaran Adán mana kasukusqanwan? Biblian nin: “Imaynan juj runallawan juchaqa kay pachapi qallariran, juchawantaq wañuypas rijuriran, chay jinallataqmi, wañuyqa llapa runaman chayaran llapallan juchallikusqankurayku”, nispa (Romanos 5:12). Adanqa Diosta mana kasukusqanwanmi juchallikuran. Chaymi manaña wiñaypaq kausayta atiranñachu, machuyaspataqmi wañupuran. Lliupas Adanpa miraynintaq kanchis chayqa juchayoqmi nacenchis; chayraykun onqonchis, machuyanchis, payayanchis, wañunchis. Bibliaq chayta nisqanqa cientificokunaq nisqanwanpas tupanmi. Ichaqa, ¿imatan Dios ruwaran chayta allichananpaq?

 ¿IMATAN DIOS RUWARAN?

Adanña chinkachiran wiñay kausayta chaypas, Jehová Diosqa munaranmi Adanpa mirayninkuna wiñaypaq kausanankuta. ¿Imatan ruwaran?

Biblian nin: “Juchaq pagayninqa wañuymi”, nispa (Romanos 6:23). Jucha kasqanraykun wañuyqa kan. Adanqa juchallikusqanraykun wañuran, noqanchispas juchallikusqanchisraykun wañunchis. Ichaqa manamá riki noqanchisqa juchayoqchu kanchis Edén huertapi pasasqanmantaqa, chayraykun Diosqa khuyapayakuq kayninpi churin Jesucristota kachamuran juchamanta manu kasqanchista pagananpaq. ¿Imaynapin manu karanchis?

Jesuspa wañusqanwanmi atisun wiñaypaq kusisqa kausayta

Adanqa perfecto runan karan, mana kasukusqanraykun llapa runakuna juchayoq nacenchis wañunchis ima; chayraykun juj perfecto runa wañunankama kasukunan karan chhaynapi juchamanta manunchista pagananpaq. Biblian nin: “Imaynan ch’ulla runaq mana kasukusqan jawa, askha runa juchasapapaq jap’isqa kapuranku, chay jinallataqmi ch’ulla runaq kasukusqan jawa askha runa chaninpaq jap’isqa kanqaku”, nispa (Romanos 5:19). Chay ‘ch’ulla runaqa’ karan Jesusmi, payqa janaq pachamantan jamuran *, perfecto runan karan, paymi noqanchisrayku wañuran. Jesuspa wañusqanraykun Diosqa chaninpaq qhawariwasun, chhaynapin wiñaypaq kausayta atisun.

¿IMARAYKUN JESÚS ÑAK’ARISPA WAÑURAN?

¿Necesariochu karan Jesuspa wañunan? ¿Manachu Dios atiran juj mosoq kamachikuyta paqarichiyta, chhaynapi Adanpa mirayninkuna wiñaypaq kausanankupaq? Diosqa autoridadniyoqmi chayta ruwananpaq, ichaqa ñan payqa niranña “juchaqa wañuywanmi pagakun” nispa, juj mosoq kamachiyta paqarichispaqa chaytachá p’akinman karan. Jinaspapas chay kamachisqanqa manan pimanpas convenisqanman jina cambianapaqchu karan. Chay kamachikuyqa justiciata ruwanapaqmi karan (Salmo 37:28).

Sichus Dios chay kutipi cambianman karan kamachikusqanta chayqa, ¿imaynapin seguro kasunman qhepa kutipipas kamachikuyninta mana cambiarunanmanta? Ejemplopaq, ¿chanintachu Dios  decidinman Adanpa mayqen mirayninchus wiñaypaq kausanqa mayqentaqchus mana chayta? ¿Imaynapin seguro kasunman llapan prometesqanta junt’ananpi? Diosqa salvakunanchisraykun kamachikuy churasqanta respetaran, chhaynapin seguro kanchis imatapas chanillanta ruwananmanta.

Jesuspa wañusqanwanmi Diosqa jujmanta oportunidadta qowanchis wiñay kausayta tarinapaq. Kikin Jesucriston niran: “Diosqa anchatapunin runakunata munakuran, chaymi sapan Churinta kachamuran, pipas paypi iñiqqa ama wañunanpaq, aswanpas wiñay kausayniyoq kananpaq”, nispa (Juan 3:16). Jesuspa wañusqanwanmi Diosqa rikuchin chanin kasqanta munakuq kasqantapas.

Ichaqa, ¿imaraykun chhaynata ñak’arispa wañuran? Chhayna problemapiña tarikuspapas Diosta kasukusqanwanmi probaran Saqra llulla kasqanta, Saqraqa runakunamantan kay jinata nisharan: “Problemakunapi tarikuspaqa runaqa Diostaqa manan kasukunmanchu”, nispa (Job 2:4, 5). Maypachachus Saqraq tentasqanwan Adanpas Evapas perfecto kashaspanku Diosta mana kasukurankuchu chayqa, razonniyoqpas Saqra kashanman jina karan. Ichaqa Jesusqa nishu ñak’ariypiña kaspapas Diostan kasukuran, perfecton karanpas (1 Corintios 15:45). Sichus Adán munanman karan chayqa paypas atinmanmi karan Dios kasukuyta. Noqanchispas atisunmanmi Jesús jina Dios kasukuyta (1 Pedro 2:21). Diosqa kasukusqanraykun Jesusman cielopi wiñay kausayta qoran.

¿IMAPIN ALLINNIYKIPAQ?

Jesusqa cheqaqtapunin wañuran, chhaynapitaqmi wiñay kausaypaq suyakuyta qowanchis. Jujmanta tapusaykiku: ¿Munawaqchu wiñaypaq kausayta? Jesusqa niwaranchismi imata ruwanapaq, niranmi: “Chay wiñay kausayqa kaymi: Qan sapallayki cheqaq Diosta, kachamuwasqayki noqa Jesucristotawan reqsiyninku”, nispa (Juan 17:3, Diospa Simin Qelqa, edición 1988).

Kay revistata ruwaqkunan animaykiku Jehová Diosta reqsinaykipaq, paymi cheqaq Diosqa, churin Jesucristotapas reqsinaykipaq. Jehová Diospa testigonkunaqa maytan munashanku yanapayta. Astawan yachanaykipaq jaykuy internetpi direccionniykuman www.jw.org.

^ párr. 8 Qhaway “Carácter histórico de Génesis” nisqata, Perspicacia para comprender las Escrituras nisqa qelqapi, volumen 1, 1017 paginapi, chaytaqa Jehová Diospa testigonkunan ruwanku.

^ párr. 13 Diosmi Jesuspa kausayninta churaran Mariaq wijsanman. Santo espiritunwantaqmi pakaykuran mana juchayoq nacenanpaq (Lucas 1:31, 35).