Kichay leenaykipaq

Índice nisqaman riy

¿Imaraykun rurushanallanchis?

¿Imaraykun rurushanallanchis?

“Sichus askhata rurunkichis, rikuchinkichistaq discipuloykuna kasqaykichistapas chayqa, Yayaymi jatunchasqa kanqa” (JUAN 15:8)

53, 60 TAKIKUNA

1, 2. a) ¿Imamantan Jesús rimaran discipulonkunawan manaraq wañupushaspa? (Kay paginapi dibujota qhaway.) b) ¿Imaraykun yachananchis imaraykuchus predicananchis chayta? c) ¿Imakunamantan kaypi yachasun?

MANARAQ wañupushaspan Jesusqa apostolninkunawan unayta rimaran. Chaypin paykunata niran mayta munakusqanta. Ñaupaq estudiopi yachasqanchis jina chay kutipin uvas sach’awanpas comparakuran. Chaypin discipulonkunatapas niran: “Askhata rurunkichis”, nispa. Chaywanmi rikuchiran mana pisipaspa predicananku kasqanta (Juan 15:8).

2 Jesusqa manan “ruruychis” nillaranchu, willaranmi imaraykus rurunanku chaytapas. Arí, willaranmi ima razonkunas kan predicashanallankupaq chayta. Noqanchispas allintan chaytaqa entiendenanchis. Allinta entiendesun chayqa mana sayk’uspan apashallasun Diospa siminta (Mat. 24:13, 14). Bibliapiqa tawa razonkunan kan predicashanallanchispaq. Chaymantapas Diosqa tawa yanapaykunatan qowanchis chayta ruwananchispaq. Chaykunamantan kunan kaypi yachasun.

 JEHOVÁ DIOSTA JATUNCHANANCHISRAYKU

3. a) Juan 15:8 textoq nisqan jina, ¿imaraykun predicananchis? b) ¿Imatan representan Jesuspa willasqanpi uvaskuna? ¿Imaraykun predicasqanchista uvaswan comparakun?

3 ¿Imaraykun predicanchis? Predicaspanchismi Diosta jatunchanchis sutintapas ch’uyanchanchis. Chaymi kashan ñaupaq razón predicananchispaq (leey Juan 15:1, 8). Chaypaq yuyarisun uvas sach’amanta Jesuspa rimasqanta. Chaypin Jesusqa papanta compararan chajra llank’aqwan, paytataq uvas sach’awan, discipulonkunatataq uvas k’allmakunawan (Juan 15:5). Chhaynaqa uvaskunaqa Jesuspa discipulonkunaq willasqan willakuymi. Chaymantapas Jesuspa nisqan jina ‘sichus askhata rurusun chayqa, Yayanmi jatunchasqa kanqa’. ¿Imaynataq chayri? Sichus tukuy atisqanchista kallpachakusun Diosmanta willamunanchispaq chayqa paytan jatunchanqaku, imaynan uvas llank’aqtapas uvasninkuna allinta rurusqanmanta jatunchanku chhaynata (Mat. 25:20-23).

Tukuy atisqanchista kallpachakusun Diosmanta willamunanchispaq chayqa paymi jatunchasqa kanqa

4. a) ¿Imaynatan ch’uyanchasunman Diospa sutinta? b) Llapanchismi invitasqa kashanchis Diospa sutinta ch’uyanchananchispaq, ¿ima niwaqmi chaymanta?

4 Predicaspaqa Diospa sutintan ch’uyanchallanchistaq. Ichaqa, Diospa sutinqa ñataq ch’uyaña kashan chayqa, ¿imaynatan ch’uyanchasunman? Chaypaq leesun Isaías 8:13 textoq nisqanta, chaypin Jehová Dios nishan: “Noqa tukuy-atiyniyoq Señor Diostan ch’uya kasqayta reqsiwanaykichis”, nispa. ¿Imaynatan chayta ruwasunman? Sutinta respetaspanchismi, chay sutitan ima sutimantapas aswan jatunpaq qhawarinanchis. Llapa runakunamanmi yachachinanchis chay sutiqa ch’uya kasqanta (Mat. 6:9). Chaymantapas Satanasqa imaymana pantasqa yachachikuykunatan kay mundopi mast’arishan, chaykunamantan noqanchisqa Diospa sutinta ch’uyanchananchis (Gén. 3:1-5). Llapa runakunamanmi willananchis imaynas Dios chayta, imakunatas kay pachapaq ruwanqa chaytapas. Chaymantapas Diosllan chaskinan “alabaytapas, jatunchaytapas, atiytapas” chaytan lliuman yachachinallanchistaq, chayta ruwaspan sutinta ch’uyanchasun (Apo. 4:11). Rune sutiyoq hermanopas chaytan ruwashan, payqa 16 watañan precursor kashan. Paymi nin: “Maytan kusikuni tukuy imata kamaq Diospa Testigon kasqaymanta. Chaywanmi noqaqa astawanraq predicayta munani”, nispa.

JEHOVÁ DIOSTA JESUSTAWAN MUNAKUSQANCHISRAYKU

5. a) Juan 15:9, 10 textoq nisqan jina, ¿imaraykun predicashanallanchis? b) ¿Imaraykun Jesús niran “noqawan jujllachasqalla kashaychis” nispa?

5 (Leey Juan 15:9, 10). Predicaspanchisqa Jehová Diosta Jesustawan munakusqanchistan rikuchishallanchistaq (Mar. 12:30; Juan 14:15). Jesuspunin chaytaqa willaran, niranmi: “Munakuynillaypin kashankichis”,  nispa. Ichaqa, ¿imaraykutaq chaytari niran? Payqa yacharanmi cristiano jina kausananchispaqqa kallpachakunanchis kasqanta. Chaychá Juan 15:4-10 textopipas sapa raton niran: “Noqawan jujllachasqalla kashaychis”, nispa.

6. ¿Imaynatan rikuchisunman Jesuspa munakuynillanpi kasqanchista?

6 ¿Imaynatan rikuchisunman Jesuspa munakuynillanpi kasqanchista? Kamachikusqankunata kasukuspan. Jesuspas Diospa kamachikusqankunatan kasukun. Chaymi niran: “Imaynan noqapas Yayaypa kamachikuyninkunata kasukuspa munakuynillanpi kashani jinata”, nispa (Juan 15:10). Rikusqanchis jina pay kikinmi ejemplota qowaranchis (Juan 13:15).

7. ¿Imaynapin kaqlla kasukuywan munakuywan?

7 Jesuspa nisqan jina kasukuywan munakuywanqa kaqllan. Niranmi: “Pipas kamachikuyniykunata jap’ikuspa chayman jina ruwaqmi munakuwaqniyqa”, nispa (Juan 14:21). Chaymantapas predicananchispaq Jesuspa kamachisqanta kasukuspaqa Diostan kasukushallanchistaq. ¿Imaynapi? Jesuspa ima kamachisqanpas Diospa munayninman jinan kashan (Mat. 17:5; Juan 8:28). Chhaynaqa, sichus Diostapas Jesustapas munakusun chayqa paykunapas munakuwallasuntaqmi.

RUNAKUNA LIBRASQA KANANRAYKU

8, 9. a) ¿Ima razonmi kallantaq predicashanallanchispaq? b) Ezequiel 3:18, 19; 18:23 textokunaq nisqan jina, ¿imaraykun predicashanallanchis?

8 Kay millay kausayqa chinkachisqan kanqa, chaymanta runakuna salvasqa kanankupaqmi predicallanchistaq. Noepas predicaranmi. Arí, ‘chanin kaqmantan payqa willaq’ (leey 2 Pedro 2:5). Llapa runakunamanchá willaq imaynas chay tiempopi millay kausayqa tukupunan karan chayta. ¿Imaynapin chayta yachanchis? Jesusmi niran: “Chay p’unchaykunapin manaraq jatun para chayamushaqtin runakuna mijusharanku, ujasharanku, qharikunapas warmikunapas casarakusharanku Noepa arcaman jaykusqan p’unchaykama, manataq imatapas repararankuchu jatun para chayamuspa llapankuta millp’unankama, chhaynallataqmi runaq Churin chayamusqan tiempopas kanqa”, nispa (Mat. 24:38, 39). Chhaynaqa, manaña runakuna uyarikuyta munarankuchu chaypas Noeqa willaranpunin Diospa juicionmantaqa.

 9 Kunan tiempopas Noé jinan kananchis, llapa runakunamanmi willananchis Diospa gobiernonmanta, imaynachus jamuq tiempopi kausay kanqa chaymantawan. Diospas chay runakuna siminta uyarikuspa kausanankutan munan (Ezeq. 18:23). Wasin-wasintaña, carretachakunawanña maypiña predicasun chaypas llapa runamanmi yachachinanchis Diosmanta, kay millay kausayta tukuchinanmantapas (Dan. 2:44; Ezeq. 3:18, 19; Apo. 14:6, 7).

RUNAMASINCHISTA MUNAKUSQANCHISRAYKU

10. a) Mateo 22:39 textopi willasqan jina, ¿ima razonmi kallantaq predicashanallanchispaq b) ¿Imaynatan Pablowan Silaspiwan yanaparanku juj carcelerota?

10 Predicaspaqa runamasinchista munakusqanchistan rikuchillasuntaq. Chaymi chay tawa kaq razón predicananchispaq (Mat. 22:39). Mayninpiqa cambiankun runakunaqa. Manapaschá ñaupaqqa uyarikuqkuchu, kunanqa uyarikunqakupaschá. Chaymi paykunamanqa willashanallanchis Diosmanta. Apóstol Pablowan Filipos llaqtapi imachus pasasqanta yachasun. Payqa Silaswan kuskan carcelpi wisq’asqa kasharan. Chayllamanmi kuska tutata jina terremoto pasaran. Jinan llapa punkukuna kicharikapuran. Chayta rikuspan carceleroqa wañuchikuyta munasharan. Pablon ichaqa jark’aran chay ruwakunanta. Jinan chay carceleroqa manchasqa tapukuran: “¿Wiraqochakuna, imatan ruwanay salvasqa kanaypaq?”, nispa. Paykunataq niranku: “Señor Jesuspi iñiy”, nispa (Hech. 16:25-34).

Predicasqanchiswanmi rikuchishanchis Diosta, Jesusta runamasinchistawan munakusqanchista (5, 10 parrafokunata qhaway)

11, 12. a) ¿Imatan yachasunman carcelerowan imachus pasasqanmanta? b) ¿Imaraykun predicashanallanchis?

11 ¿Imatan yachasunman chay carcelerowan imachus pasasqanmanta? Payqa terremoto pasasqan qhepamanmi cambiaran, jinaspa yanapayta mañakuran. Runakunapas yaqapaschá vidankupi imapas pasasqanwan cambianqaku. Wakinqa yaqapaschá mana llank’anayoq rikukunku, wakinqa yaqapaschá casado kausayninkupi mana allintachu kausashanku, wakinqa ima onqoyniyoqpaschá kashanku, wakinpaqa mayqen familiankupaschá wañurakapun. Chaykuna pasasqanwanmi wakin runakunaqa cambianku, jinaspa tapukunku “¿imaraykutaq kaykunari pasan?” nispa. Yaqapaschá wakinqa chay carcelero jina ninqaku: “¿Imatan ruwanay salvasqa kanaypaq?”, nispa. Chaymi noqanchisqa predicashanallanchis, yaqapaschá mana jayk’aq uyarikuq runakuna kunanqa uyariwasun.

12 Kay tiempopiqa askha runakunan kallpachanata necesitashanku chayrayku predicashallasun (Is. 61:1). Chaytan Charlotte sutiyoq hermanapas nin, payqa 38 watañan precursora kashan. Paymi nin: “Kay tiempopi runakunaqa chinkasqa jinan purishanku. Chaymi predicashanallanchispuni”, nispa. Ejvor sutiyoq hermanapas yaqa chhaynatan nillantaq, payqa 34 watañan precursora kashan. Ninmi: “Kay tiempopi runakunaqa sinchi llakisqan purishanku. Paykunata yanapayta munaspan noqaqa predicashallani”, nispa. Chhaynaqa maypiña kaspapas willashallasun Diospa siminta chhaynapin rikuchisun runakuna munakusqanchista.

DIOSPA REGALONKUNAN YANAPAWASUN

13, 14. a) ¿Ima regalomantan rimashan Juan 15:11 textopi? b) ¿Imatan ruwananchis Jesús jina kusisqa kananchispaq? c) ¿Imata ruwananchispaqmi yanapawasun kusisqa kay?

13 Manaraq wañupushaspan Jesusqa discipulonkunaman  willallarantaq imaymana regalokunamanta. Chay regalokunan paykunataqa yanapanan karan. ¿Imakunan chay regalokuna kanman karan? ¿Imaynatan noqanchistapas yanapawasunman?

14 Kusikuy. ¿Imaynatan qhawarinki predicayta? ¿Sasa ruwanata jinachu? Manachá. Uvas sach’amanta rimasqan qhepamanmi Jesusqa niran: “Chaykunataqa nishaykichis noqa jina kusikunaykichispaqmi”, nispa (leey Juan 15:11). ¿Imaynataq chayri? Ñaupaqpi yachamusqanchis jina uvas sach’aqa Jesusmi, k’allmakunataq discipulonkuna. K’allmakunaqa unutapas imatapas chaskin sach’api kaspallan ¿riki? Chhaynan noqanchiswanpas. Sichus kusisqa kayta munanchis chayqa Jesuspa ejemplontan qatikunanchis. Chhaynapin Diospa munayninta ruwaspa pay jina kusisqa kasunchis (Juan 4:34; 17:13; 1 Ped. 2:21). Chhayna kusisqan Hanne sutiyoq hermanapas kashan, payqa 40 watañan precursora kashan. Paymi nin: “Diosmanta willaspa purispallaymi noqaqa kusisqa kani. Chay kusikuymi yanapawan predicashanallaypaq”, nispa. Chhaynaqa manaña runakuna uyarikuyta munanqachu chaypas predicashallasun, chhaynapin kusisqa kasunchis (Mat. 5:10-12).

15. a) ¿Ima regalomantan rimashan Juan 14:27 textopi? b) ¿Imaynatan thaj kay yanapawanchis predicashanallanchispaq?

15 Thaj kay (leey Juan 14:27). Jesusmi apostolninkunata niran: “Noqaq qosqay thaj kaytan saqeshaykichis”, nispa. ¿Imaynatan chay thaj kay yanapawasunman astawan predicananchispaq? Predicaspaqa Diostawan Jesustawanmi kusichishanchis, paykunaqa contenton kashanku llank’asqanchiswan, ¿manachu chayta yachaspa thaj kanchis? Thajmi kanchis ¿riki? Chay thaj kaymantan Jesusqa rimasharan (Sal. 149:4; Rom. 5:3, 4; Col. 3:15). Ulf sutiyoq hermanopas predicaspaqa thajsi sientekun, payqa 45 watañan precursor kashan. Paymi nin: “Predicayta tukuspaqa sayk’usqan qhepani. Ichaqa chayta ruwaspallan sonqopas sonqo kani, chayllawanmi thaj kani”, nispa. Noqanchispas chayta ruwaspallan thaj kanchis ¿riki?

16. a) ¿Ima regalomantan rimashan Juan 15:15 textopi? b) ¿Imatan apostolkuna ruwananku karan Jesusmanta ama t’aqakunankupaq?

16 Jesuswan amigontin kay. Kusisqa kanankumanta rimasqan qhepallamanmi Jesusqa apostolninkunata kallpacharan munanakuspa kausanankupaq (Juan 15:11-13). Chaymantataq paykunata niran  “amigoykuna” nispa. ¡¿Kanmanchu imapas Jesuspa amigon kaymanta aswan jatun regalo?! Manan ¿riki? ¿Imatan apostolkuna ruwananku karan Jesusmanta ama t’aqakunankupaq? Rurushanallankun karan, otaq nisunman predicashanallankun karan (leey Juan 15:14-16). Manaraq chaykunata nishaspan Jesusqa iskay wata ñaupaqta jina apostolninkunata kamachisqa “janaq pacha gobiernon qayllaykamunña” nispa predicamunankupaq (Mat. 10:7). Chay willakuytan paykunaqa mana manchakuspa apashanallanku karan (Mat. 24:13; Mar. 3:14). Manapaschá chayta ruwayqa facilchu karan. Ichaqa Jesuspa amigon kanankupaqqa chaytan ruwananku karan.

17, 18. a) ¿Ima regalomantan rimashan Juan 15:16 textopi? b) ¿Imaynatan chay regalo yanaparan Jesuspa discipulonkunata? c) ¿Ima regalokunan kallpata qowanchis rurushanallanchispaq?

17 Mañakusqanchistan Dios uyariwasun. Jesusmi niran: “Yayaqa sutiypi imatapas mañakuqtiykichisqa qosunkichismi”, nispa (Juan 15:16). Chay simikunaqa allintachá kallpacharan apostolkunataqa. * Jesusqa wañupunan patapiñan kasharan, ichaqa manan sapankutachu saqenan karan. Jehová Diosmi paykunataqa yanapanan karan. Paymi predicanankupaq kallpata qonan karan. Chaypaqmi ichaqa mañakunanku karan. Chhaynataqmi karanpas, arí Diosqa qoranmi paykunaman espiritunta (Hech. 4:29, 31).

Jehová Diosqa uyariwasunpunin mañakusqanchistaqa (18 parrafota qhaway)

18 Chhaynan kunan tiempopas kanqa. Sichus kallpachakusun rurushanallanchispaq chayqa Jesuswanmi allin amigontin kasun. Jehová Diospas yanapawasunmi predicacionpi ima sasachakuytapas aguantananchispaq. Chaypaqmi ichaqa mañakunanchis yanapayninta (Filip. 4:13). Maytachá kusikunchis Jehová Dios mañakusqanchista uyarisqanmanta, Jesús amigonchis kasqanmantapas. Chhaynaqa kallpachakushallasun allinta rurunanchispaq (Sant. 1:17).

19. a) ¿Imaraykun predicashanallanchis? b) ¿Iman yanapawasun Diospa llank’ana qowasqanchista tukunanchispaq?

19 Kay estudiopi yachasqanchis jina, predicashanallanchismi. Chhaynapin Diospa sutinta jatunchasun ch’uyanchasun ima, Diostapas Jesustapas munakusqanchista rikuchisun. Rikuchisunmi runakuna yanapay munasqanchista paykuna munakusqanchistapas. Chaymantapas Diosqa kusikuyta, thaj kayta, Jesuswan amigontin kayta iman qowasun, mañakusqanchistapas uyarimunqan. Chay regalokunan yanapawasun ama manchakuspa predicananchispaq. Maytachá Diosninchisqa kusikun tukuy sonqowan rurushasqanchista rikuspa.

^ párr. 17 Jesusqa askha kutitan apostolninkunata niran: “Yayaqa sutiypi imatapas mañakuqtiykichisqa qosunkichismi”, nispa (Juan 14:13; 15:7, 16; 16:23).