Kichay leenaykipaq

Índice nisqaman riy

 10 ESTUDIO

“¿Manachu bautizasqa kayta atiyman?”

“¿Manachu bautizasqa kayta atiyman?”

“Felipewan kuska unuman uraykuranku, chaypin Felipeqa payta bautizaran” (HECH. 8:38)

52 TAKI Wiñaypaqmi servisayki

KAYKUNAMANTA YACHASUN *

1. ¿Imakunapin Adanpas Evapas tarikuranku mana allinta decidisqankumanta?

¿PILLAN ninman imas allin imachus mana allin kasqanta? Jehová Diosllan. Adanwan Evawanmi ichaqa Diospa jark’asqan sach’a ruruta mijuspanku rikuchisharanku Jehová Diospi, kamachikuyninkunapipas mana confiasqankuta. Chaywanmi paykunallamanta decidisharanku imachus allin imachus mana allin kasqanta (Gén. 3:22). Ichaqa, ¿imapin tarikuranku chayta decidisqankumanta? Jehová Diosmantan t’aqakapuranku, manañan wiñaypaq kausayta atirankuchu, wawankumantaq juchata wañuytawan saqeranku (Rom. 5:12). Chay decidisqankuqa manan allinchu karan.

Etiopía llaqtamanta kamachikuqmi Jesús Mesías kasqanta entiendespa bautizakuran (2, 3 parrafokunata qhaway)

2, 3. a) ¿Imatan juj kamachikuq ruwaran Felipe predicaqtin? b) ¿Ima bendicionkunatan chaskinchis bautizakuspa? c) ¿Ima tapuykunatan kutichisun?

2 Felipen juj kamachikuqman predicaran, chay runaqa manan Adán Eva jinachu decidiran. Payqa ancha agradecesqan kasharan Jehová Diospas Jesuspas payrayku ruwasqankumanta, jinan kaqpacha bautizakuran (Hech. 8:34-38). Noqanchispas Diosta servinapaq prometekuspa bautizakuspan, rikuchinchis Jehová Diostapas Jesustapas noqanchisrayku ruwasqankumanta agradecekusqanchista, Jehová Diospi confiasqanchista, paylla imachus allin mana allin kasqanta ninanpaq derechoyoq kasqantapas.

3 ¿Imakunatan chaskinchis Jehová Diosta serviqkuna?  Adán Evaq chinkachisqanku bendicionkunatan Diosqa qowasun, jujninqa wiñaypaq kausaymi. Jesucristopi iñisqanchisraykun Diosqa juchanchismanta perdonawanchis, limpio concienciayoqtaq kanchis (Mat. 20:28; Hech. 10:43). Jinaspapas juj familia jinallan jujkunawan Diosta servinchis, paykunaqa Diospa sonqonpaq jinan kausanku, sumaq kausaytataq suyakushanku (Juan 10:14-16; Rom. 8:20, 21). Wakinqa yachankun Diosta servispa chay bendicionkunata chaskinankuta, chaywanpas manchakunkun bautizakuyta. ¿Imakunan jark’an bautizakunankupaq? ¿Imaynatan chaykunata atipankuman?

¿IMAKUNAN JARK’AN BAUTIZAKUNANKUTA?

¿Imakunatan jujkuna atipananku bautizakunankupaq?

“Manan atiymanchu” nispan ninku (4, 5 parrafokunata qhaway) *

4, 5. ¿Imapin tarikuranku Averypas Hannahpas?

4 “Manan atiymanchu” nispan ninku. Avery waynaq tayta-mamanqa Testigokunan kanku, papanqa umalliqmi, allin taytataqmi kanpas. Chaywanpas Averyqa manchakuranmi bautizakuyta. Payqa khaynatan piensaran: “Manan papay jina allin cristiano kayta atiymanchu. Jinaspapas bautizakuqtiyqa niwanqakun askha runaq ñaupanpi mañakunaypaq, discursokunata qonaypaq, predicacionta diriginaypaqpas”, nispa.

5 Hannah hermananchisqa 18 watanpin kashan, paypa familianqa Testigokunan kanku, chaywanpas mana valeqpaq jinan qhawarikuran, niranmi: “Manan atiymanchu Diospa kamachikuyninkunaman jina kausaytaqa”, nispa. Mayninpiqa cuerpontaraqmi k’irikuran. Nillantaqmi: “Manan pimanpas ni tayta-mamaymanpas k’irikusqaytaqa willaranichu. Chhayna k’irikusqayraykun piensarani: ‘Jehová Diosqa manan serviqninta jinaqa chaskiwanmanchu’”, nispa.

Mana allin amigokunayoq kanku (6 parrafota qhaway) *

6. ¿Imaraykun Vanessa mana bautizakuyta atiranchu?

6 Mana allin amigokunayoq kanku. Vanessaqa 22 watanpin kashan, paymi willakun: “Karanmi juj amigay paywanqa chunka wata jinañan reqsinakurayku. Payqa manan Jehová Dios serviyta munaranchu, chaymi mana yanapawaranchu bautizakunaypaq, chaywanmi mal sientekuq kani. Noqapaqqa sasan karan amigokunata tariyqa. Chaymi mana munaranichu paymanta t’aqakuyta. Niranin: ‘Payta jinaqa manan jayk’aqpas tarisaqchu’”, nispa.

“Juchamanpaschá urmasaq” nispan ninku (7 parrafota qhaway) *

7. ¿Imamantan Makayla manchakuran? ¿Imaraykun manchakuran?

7 “Jatun juchamanpaschá urmasaq” nispan ninku. Makayla pisqa watanpi kashaqtinmi hermanon iñiq t’aqamanta  expulsasqa karan. Hermanonpa mana allinkuna ruwasqanqa tayta-mamantan nishuta llakichiran, chayta rikuspan payqa niran: “Bautizakusaq chayqa, hermanoy jinapaschá jatun juchaman urmaspa expulsasqa kasaq, chaywanqa astawanraqchá tayta-mamayqa llakikunman”, nispa.

Jujkunata manchakunku (8 parrafota qhaway) *

8. ¿Imatan Miles manchakuran?

8 Jujkunata manchakunku. Miles sutiyoq waynamanta yachasun. Papanwan madrastanwanqa Testigokunan kanku, mamanmi ichaqa mana Testigochu. Milesmi nin: “Mamaywanqa 18 watakunan tiyarani, bautizakuytaña munarani chaypas manchakuranin willayta. Papay Testigo kananpaq willaqtinmi mamayqa sinchita phiñakuran, chayta yuyarispan nirani: ‘Noqapaqpas chhaynatachá phiñakunqa’”, nispa.

¿IMAYNATAN ATIPANKUMAN?

9. Jehová Dios munakuq pacienciakuq kasqanta yachaspa, ¿imata ruwanaykipaqmi decidikuwaq?

9 Adanwan Evawanqa manan tukuy sonqonkuwanchu Jehová Diosta munakuranku, chaymi decidiranku Diosta mana servinankupaq. Chaywanpas Diosqa permitiranmi wawakunayoq kanankuta, chay wawankuta paykunallamanta uywanankupaqpas. Diosmanta t’aqakusqankuqa mana allinpunin karan, kuraq wawankun sullk’anta wañuchiran, tiempowantaq runakunaqa egoistaman tukupuranku (Gén. 4:8; 6:11-13). Jehová Diosmi ichaqa payta serviyta munaq runakunata salvananpaq wawanta qoran (Juan 6:38-40, 57, 58). Chayta ruwaspan Jehová Diosqa munakuq pacienciakuq kasqanta rikuchiran. Chayta reparaspaykiqa astawanmi Diosta munakunki, jinaspa payta servinaykipaq decidikunki, manataq Adán Eva jinachu kanki.

¿Imaynatan atipawaq manchakuyniykita?

(9, 10 parrafokunata qhaway) *

10. ¿Imaraykun Salmos 19:7 textopi piensay yanapasunkiman Jehová Diosta servinaykipaq?

10 Jehová Diosmanta yachashallay. Diosmanta astawan yachaspaqa manan manchakunkichu Dios serviyta. Averyqa Salmos 19:7 (leey) textotan estudiaran chaypitaq piensaran, chaymi yanaparan mana manchakunanpaq. Chaypi nisqanta  kasukuypas yanaparanmi vidanpi, jinan Jehová Diosta astawan munakuran. Diosta munakuyqa manan manchakuynillanchistachu chinkachin, yanapawallanchistaqmi Diospa munasqanta ruwananchispaq. Hannah nin: “Bibliata estudiaspan entienderani cuerpoyta k’irikuspaqa Jehová Diospa sonqonta k’irisqayta”, nispa (1 Ped. 5:7). Chaymi payqa kallpachakuran Bibliapi estudiasqanman jina ruwananpaq (Sant. 1:22). ¿Imaynatan Hannahta yanaparan? Paymi willakun: “Diosta kasukuyqa yanapawaranmi, chayta rikuspan Diosta astawan munakurani. Kunanqa manañan iskayanichu Diospa yanapawananmantaqa”, nispa. Hannahqa manañan cuerponta k’irikunchu, Jehová Diosman prometekuspataq bautizakuran.

(11 parrafota qhaway) *

11. a) ¿Imatan Vanessa ruwaran allin amigokunayoq kananpaq? b) ¿Imatan chaymanta yachanchis?

11 Allin amigokunata ajllakuy. Vanessaq amiganqa manan Diosta servinanpaq yanaparanchu, chayta reparaspan payqa amiganmanta t’aqakapuran. Chaymantapas iñiq t’aqapi amigokunayoq kananpaqmi kallpachakuran. Noepa familiamanta yachaymi astawan yanaparan, paymi nin: “Noepa familianqa Jehová Diosta mana serviq runakuna ukhupin tiyaran, chaymi paykunapura amigontin karanku”, nispa. Kunanqa ñan bautizasqaña kashan precursora jinataqmi servishanpas. Paymi nillantaq: “Kunanqa manan iñiq t’aqallaypichu amigoykunaqa kan, juj iñiq t’aqakunapipas kanmi”, nispa. Sichus qanpas tukuy atisqaykita kallpachakunki predicaypi participanaykipaq chayqa, allin amigokunayoqmi kanki (Mat. 24:14).

(12-15 parrafokunata qhaway) *

12. ¿Imayna manchakuytan mana yacharankuchu Adanwan Evawan? ¿Imapin chay jawa tarikuranku?

12 Manan munanchischu Dios llakichiytaqa, chaypi piensayqa allinpunin (Sal. 111:10). Sichus Adanwan Evawan chay jina manchakuyniyoq kankuman karan chayqa, manan Jehová Dios contra jatarinkumanchu karan. Adanwan Evawan juchallikusqanku qhepamanqa ‘ñawinkun kicharikuran’ otaq juchayoq runaman  tukupusqankutan reparakuranku. Paykunaqa llapa wawankumanmi juchata wañuytawan saqeranku. Jinaspapas reparakurankun q’alalla kasqankuta, jinaspa p’enqakuymanta tapakuranku (Gén. 3:7, 21).

13, 14. a) 1 Pedro 3:21 textopi nisqanman jina, ¿imaraykun wañuyta mana sinchita manchakunanchischu? b) ¿Imaraykun Jehová Diosta munakunchis?

13 Manchakunchismi Diosta llakichiytaqa, wañuytan ichaqa mana sinchita manchakunachu. Jehová Diosqa wiñaypaq kausananchispaqmi wawanpa vidanta qoran. Ima juchataña ruwasunman chaypas, Jesuspa sacrificakusqanpi iñispa juchanchismanta arrepientekuqtinchisqa perdonawasunmi. Jesuspi iñisqaykitaqa astawanqa rikuchinki Diosman prometekuspa bautizakuspa iman (leey 1 Pedro 3:21).

14 Jehová Diosqa imaymanatan noqanchisrayku ruwaran, chaymi paytaqa munakunchis. Sapa p’unchaymi imaymanata qowanchis kausananchispaq, jinaspapas paymanta munayninmantawanmi yachachiwanchis (Juan 8:31, 32). Iñiq t’aqawan pusawanchis, problemanchiskunapi yanapawanchis, wiñay kausaytataq prometewanchispas (Sal. 68:19; Apo. 21:3, 4). Jehová Diosqa munakuwasqanchisraykun imaymanataña qowaranchis, sichus chaypi piensasun chayqa astawanmi payta munakusun, manchakusuntaqmi llakichiyta. Chhayna manchakuyqa allinmi.

15. ¿Imaynatan Makayla manchakuyninta atiparan?

15 Jehová Diosqa liston kashan juchanchista perdonawananchispaq, chayta entiendespan Makaylaqa manchakuyninta atiparan. Paymi nin: “Juchayoq runa kasqanchisraykun llapallanchis pantanchis, Jehová Diosmi ichaqa munakuwanchis, Jesuspa sacrificakusqanwantaq perdonawanchis”, nispa. Diosta munakusqanmi kallpacharan Diosman prometekuspa bautizakunanpaq.

(16 parrafota qhaway) *

16. ¿Iman Milesta yanaparan mamanta ama manchakunanpaq?

16 Milesqa munaranmi bautizakuyta ichaqa mamanta manchakuran, jinan watukuq umalliq yanapayninta mañakuran. Milesmi nin: “Paypa mamanpas manan Testigochu karan. Mamaymanmi entiendechinay karan noqamanta chayta decidishasqayta manataq papaychu obligawashasqanta, chayta ninaypaqmi chay umalliqqa yanapawaran”, nispa. Mamanqa phiñakuranmi, jinan Milesqa mamanpa wasinmanta ripuspa bautizakuran. Paymi nillantaq: “Jehová Diosqa imaymanatan noqarayku ruwaran, wawantapas noqaraykun entregaran, chaypi piensaspan repararani Jehová Dios anchatapuni munakuwasqanta, chaymi kallpachawaran Diosman prometekuspa bautizakunaypaq”, nispa.

 DECIDISQAYKIWAN JUNT’AY

Jehová Diostan agradecekunanchis noqanchisrayku tukuyta ruwasqanmanta (17 parrafota qhaway)

17. ¿Imatan llapanchispas rikuchiyta munanchis?

17 Edén huertapi Eva sach’aq rurunta mijuspan rikuchisharan Jehová Diosta mana munakusqanta. Adanpas Evata kasuspan rikuchisharan Jehová Dios tukuy imaymana ruwasqanmanta mana agradecekuq kasqanta. Noqanchisqa manan Adán Eva jinaqa kayta munanchischu, aswanpas agradecekuq kasqanchistan rikuchiyta munanchis. Diosllan derechoyoq imachus allin mana allin kasqanta ninanpaqqa, chaytan bautizakuspaqa rikuchishanchis. Rikuchillanchistaqmi payta munakusqanchista paypi confiasqanchistapas.

18. ¿Imatan ruwanayki Jehová Diosta allinta servinaykipaq?

18 Bautizakusqanchis qhepamanpas Jehová Diospa munasqanman jinan kausananchis. Sasaña chayta ruway chaypas millonninpi runakunan chhaynata kausanku. Qanpas atiwaqmi chay ruwayta, chaypaqqa allintan Bibliata estudianayki, hermanokunawan tiempota pasanayki, tukuy sonqowantaq munakuq Diosninchismanta yachasqaykita jujkunaman willanayki (Heb. 10:24, 25). Jehová Diosqa Bibliawan llaqtanwan iman consejokunata qowanchis, sichus chayman jina imatapas decidinki chayqa, allintan kausanki (Is. 30:21; Prov. 16:3, 20).

19. ¿Imatan yuyashanallanchispuni? ¿Imaraykun yuyashanallanchis?

19 Jehová Diospa munasqanman jina kausayqa allinninchispaqpunin, sichus chayta yuyashallanki chayqa, astawanmi Diosta munakunki kamachikuyninkunatapas kasukunki. Chhaynapin Satanasqa imata ruwaspapas Diosmanta mana t’aqayta atisunkichu. Waranqa watakuna pasaqtinpas bautizakusqaykita yuyarispan khaynata ninki: “Chay decidisqayqa allinpunin karan”, nispa.

28 TAKI ¿Pin Diospa amigon kanqa?

^ párr. 5 Bautizakunaykipaq decidikuyqa ima ruwaymantapas aswan importanten. ¿Imaraykun chayta decidiy importante? ¿Imakunan jujkunata jark’anman bautizakunankupaq? ¿Imaynatan chaykunata atipankuman? Chay tapuykunamantan kay estudiopi yachasun.

^ párr. 56 DIBUJOMANTA WILLAKUY: Confianza: Juj wayna manchakun comentayta.

^ párr. 58 DIBUJOMANTA WILLAKUY: Amigokuna: Juj sipasmi mana allin amigayoq kaspa hermanakunamanta p’enqakun.

^ párr. 60 DIBUJOMANTA WILLAKUY: “Juchamanpaschá urmasaq” nispan ninku: Juj sipaspa hermanonmi expulsasqa kaspa wasinmanta ripun, chaymi payqa manchakun bautizakuyta.

^ párr. 62 DIBUJOMANTA WILLAKUY: Jujkunata manchakunku: Juj waynan mamanpa ñaupanpi manchan-manchan Diosmanta mañakun.

^ párr. 65 DIBUJOMANTA WILLAKUY: Confianza: Juj wayna astawan estudian.

^ párr. 67 DIBUJOMANTA WILLAKUY: Amigokuna: Juj sipas hermananchismi kusisqa carritopi predicashan ñaupaqpi mana iñiq amiganmanta mana p’enqakuspa.

^ párr. 69 DIBUJOMANTA WILLAKUY: “Juchamanpaschá urmasaq” nispan ninku: Juj sipaspa Diosta munakusqanmi yanaparan bautizakunanpaq.

^ párr. 71 DIBUJOMANTA WILLAKUY: Jujkunata manchakunku: Juj waynan mana manchakuspa mamanta nin Dios serviy munasqanta.