Kichay leenaykipaq

Índice nisqaman riy

 11 ESTUDIO

Jehová Diospa kunkanta uyarisun

Jehová Diospa kunkanta uyarisun

“Kaymi munakusqay Churiyqa [...], payta uyariychis” (MAT. 17:5)

89 TAKI Jehová Diosta kasukuy

KAYKUNAMANTA YACHASUN *

1, 2. a) ¿Imaynatan Jehová Dios runakunawan rimaran? b) ¿Imatan kay estudiopi yachasunchis?

JEHOVÁ DIOSQA munanmi runakunawan rimayta. Ñaupaq tiempopin profetakunata angelkunata churin Jesustapas utilizaran imachus piensasqanta runakunaman willananpaq (Amós 3:7; Gál. 3:19; Apo. 1:1). Kay tiempopitaq Bibliawan willawanchis imachus piensasqanta imachus ruway munasqantapas.

2 Jesús kay allpapi kashaqtinmi Jehová Diosqa kinsa kutita janaq pachamanta rimamuran. ¿Imatan nimuran? ¿Imatan chaymanta yachasunman? ¿Imatan ruwananchis Jehová Diospa nisqan beneficiawananchispaq? Chaykunamantan qatimuqpi yachasun.

“QANMI CHURIYQA KANKI, QANTAN MUNAKUYKI”

3. Marcos 1:9-11 textopi nisqan jina, ¿imatan Jehová Dios niran Jesús bautizakushaqtin?

3 (Leey Marcos 1:9-11). Jehová Diosmi janaq pachamanta nimuran: “Qanmi Churiyqa kanki, qantan munakuyki, qanqa sonqoypaq jinan kanki”, nispa. Chaymi karan ñaupaq kutipi rimamusqan. Maytachá Jesusqa kusikuran papan munakusqanta paypi confiasqanta uyarispa. Kay estudiopin astawan chay simikunamanta yachasun, chaypi nisqan jina Jehová Diosqa munakunmi Jesusta, kusisqataqmi paywan kashan.

4. ¿Ima suyakuyniyoqmi Jesús karan bautizakuspa?

4 “Qanmi Churiyqa kanki”. Manaraq kay allpaman jamushaspan  Jesusqa Diospa Churinña karan. Bautizakusqanwanmi ichaqa Diospa santo espiritunwan jawisqa karan, chaywanmi payqa jujmanta janaq pachaman rinanpaq suyakuyniyoq karan, jinaspapas Diosmi payta ajllasharan rey kananpaq uma sacerdote kananpaqwan. Chay jinapin Jesusqa “Diospa Churin” nisqa kallarantaq (Luc. 1:31-33; Heb. 1:8, 9; 2:17). Chaychá Jehová Diosqa Jesusta bautizakushaqtin niran: “Qanmi Churiyqa kanki”, nispa (Luc. 3:22).

Kusisqan sientekunchis pipas felicitawaqtinchis kallpachawaqtinchispas (5 parrafota qhaway) *

5. ¿lmatan Jehová Dios jina ruwananchis?

5 “Qantan munakuyki”. Jehová Diosqa niranmi Jesusta munakusqanta, chaymi noqanchispas kallpachakunanchis jujkunata animananchispaq (Juan 5:20). Munakusqanchis runa ima ruwasqanchismantapas felicitawaqtinchisqa t’ika jinan kausarinchis. Hermanonchiskunapas familianchispas necesitankun munakunanchista kallpachananchistapas. Chayta ruwaspan iñiyninkupi kallpachashanchis yanapashanchistaq Diosta servishanallankupaq. Astawanqa tayta-mamakunan wawaykichista kallpachanaykichis felicitanaykichispas, chhaynapin paykunaqa aswan allin kanqaku.

6. ¿Imaraykun Jesucristopi confiananchis?

6 “Qanqa sonqoypaq jinan kanki”. Jehová Diosqa manan iskayaranchu Jesús munayninta ruwananmantaqa, chaymi chayta niran. Chay jinaqa noqanchispas manan Jesusmantaqa iskayananchischu, confiananchismi Diospa llapa promesankunata Jesús junt’ananta (2 Cor. 1:20). Sichus Jesuspa junt’aq kasqanpi allinta piensasun chayqa, paymantan astawan  yachasun, jinaspa ejemplonta qatikusun. Chaymantapas Jehová Diosqa confianmi serviqninkuna Jesuspa ejemplonta qatikushanallankuta (1 Ped. 2:21).

“PAYTA UYARIYCHIS”

7. Mateo 17:1-5 textopi nisqanman jina, ¿jayk’aqmi Jehová Dios rimamullarantaq? ¿Imatan nimuran?

7 (Leey Mateo 17:1-5). Juj kutinmi Jesusqa Pedrota, Santiagota Juantawan niran orqoman riysinankupaq. Chaypin Jesuspa uyanqa inti jinaraq k’anchariran, p’achanpas yuraqman tukuran. Jinaspa Moiseswan Eliaswan rijurispanku Jesuswan rimasharanku wañuchisqa kananmanta kausarimpunanmantawan. Apostolninkuna puñuy-puñuyña kasharanku chaypas chayta rikuspankun rijch’ariranku (Luc. 9:29-32). Chay qhepallamanmi k’anchashaq phuyu paykunata llanthuykuran, chay ukhumantataq Diospa kunkan nimuran: “Kaymi munakusqay Churiyqa, payqa sonqoypaq jinan, payta uyariychis”, nispa. Chay kutipin karan Jehová Diospa iskay kaq rimamusqan.

8. ¿Imaynatan Jesusta discipulonkunatapas yanaparan orqopi rijuriyta rikusqanku?

8 Chay rijuriymi rikuchiran Jesús Diospa gobiernonpi ancha atiyniyoq kananta. Jesusqa yacharanmi ñak’arichispa wañuchinankuta, chay rijuriymi ichaqa kallpacharan chayta aguantananpaq. Chaymantapas discipulonkunatan iñiyninkupi kallpacharan, chhaynapin paykunaqa jamuq pruebakunata aguantaranku, mana pisipaspataq Diospaq llank’aranku. Apóstol Pedroqa kinsa chunka wata qhepamanmi chay rijuriymanta willaran, chaytaqa qaynallapas pasanman jinatan yuyariran (2 Ped. 1:16-18).

9. ¿Imakunatan Jesús niran discipulonkunata?

9 “Payta uyariychis”. Jehová Diosqa sut’itan niran Jesuspa yachachisqanta uyarispa kasukunanchista. Jesuspa yachachisqanta kasukuyqa importanten. Ejemplopaq, payqa yachachiranmi discipulonkunata Diospa gobiernonmanta predicananku kasqanta, sapa kutillataq niran rijch’asqalla kanankupaq (Mat. 24:42; 28:19, 20). Chaymantapas niranmi: “Tukuy atisqaykichista kallpachakuychis”, nispa (Luc. 13:24). Jinaspapas niranmi munanakunankupaq, juj nisqalla kausanankupaq, kamachikuyninkunata kasukunankupaqpas (Juan 15:10, 12, 13). Chaykuna nisqanqa yanaparanmi ñaupaq tiempopi cristianokunata, kunanpas yanapawanchismi.

10, 11. ¿Imaynatan rikuchinchis Jesusta uyarisqanchista?

10 Jesusmi niran: “Pipas cheqaq kaqman jina kausaqqa uyarinmi simiyta”, nispa (Juan 18:37). Jesusta uyarisqanchistan rikuchinchis kay consejota kasukuspa: “Qankunapura paciencianakuychis, perdonanakuychis razonwanña pipaqpas phiñasqa kashankichis chaypas”, nispa (Col. 3:13; Luc. 17:3, 4). Chaymantapas allin tiempopi mana allin tiempopi tukuy sonqowan predicaspan rikuchillanchistaq Jesusta uyarisqanchista (2 Tim. 4:2).

11 Jesusmi niran: “Ovejaykunaqa uyarinkun kunkayta”, nispa (Juan 10:27). Jesusta uyarisqanchista rikuchinchis imachus niwasqanchista kasukuspa. Manan llakikuyninchiskunata allichaypichu afanasqa kashanchis (Luc. 21:34). Noqanchispaqqa Jesusta kasukuymi aswan importante. Askha hermanonchiskunan qatiykachasqa kashanku,  mana imayoq tarikushanku otaq ima desgraciapipas tarikushanku. Chaywanpas Jehová Diospaqmi junt’aq sonqolla kashanku. Jesusmi llapallanchista asegurawanchis: “Pipas kamachikuyniykunata jap’ikuspa chayman jina ruwaqmi munakuwaqniyqa, munakuwaqniytaq Yayaypa munakusqan kanqa”, nispa (Juan 14:21).

Predicasqanchisqa yanapawanchismi Jesusta uyarishanallanchispaq (12 parrafota qhaway) *

12. ¿Imakunata ruwaspan rikuchillanchistaq Jesusta uyarisqanchista?

12 Jesusta uyarisqanchistan rikuchillanchistaq paypa churasqan umalliqkunata kasukuspa (Heb. 13:7, 17). Qayna watakunallan Diospa llaqtanpi imaymana cambiokuna karan. Ejemplopaq, niwaranchismi jujniraymanta predicanapaq mosoq qelqakunata videokunata utilizanapaqpas. Kuska semana juñunakuyninchis imayna aparikusqanpas cambiaranmi, juñunakunanchis wasikunata imayna ruwaypas allichaypas cambiallarantaqmi. ¡Anchatan agradecekunchis chay cambiokuna kasqanmanta! Chay cambiokunataqa allinta piensaspankun ruwaranku. Sichus Diospa llaqtanta pusariqkunata kasukusun chayqa, Jehová Diosqa bendeciwasunmi.

13. ¿Imaynatan yanapawanchis Jesusta uyariy?

13 Jesuspa yachachisqanta uyariyqa allinninchispaqpunin. Jesuspa yachachisqanqa yanaparanmi discipulonkunata, paymi niran: “Noqan samachisaykichis [...]. Yugoyqa llamp’ullan, q’epiypas manan llasachu”, nispa (Mat. 11:28-30). Diospa palabranqa, chaypi kaq tawa evangeliokunapas kallpachawanchismi, yanapawanchistaqmi allin iñiyniyoq yachayniyoq kananchispaq (Sal. 19:7; 23:3). Chaymi Jesús niran: ‘Diospa siminta uyarispa waqaychaqkunaqa kusisqan kanku’, nispa (Luc. 11:28).

DIOSQA SUTINTAN JATUNCHANQA

14, 15. a) Juan 12:27, 28 textopi nisqanman jina, ¿jayk’aqmi Jehová Dios janaq pachamanta rimamuran? b) ¿Imaraykun Jehová Diospa rimamusqan Jesusta kallpacharan?

14 (Leey Juan 12:27, 28). Apóstol Juanpa qelqasqan libropin willashan kinsa kutipi Jehová Dios janaq pachamanta rimamusqanta. Wañupunanpaq pisi p’unchaykuna faltashaqtinmi Jesusqa Jerusalenpi kasharan Pascua fiestata ruwananpaq. Chay kutipin llakikuyninta Diosman willakuran, chay qhepamantaq niran: “Yayáy,  sutiykita jatunchay”, nispa. Chayllamanmi Jehová Diosqa payta nimuran: “Jatunchaniñan, wajmantataqmi jatunchasaqpas”, nispa.

15 Jesusqa llakikuranmi Jehová Diospaq junt’aq kananmanta, payqa yacharanmi ñak’arichispa wañuchinankuta (Mat. 26:38). Ichaqa astawanqa llakikuran Papanpa sutinta jatunchaypin. Jesustaqa sinchi juchallikuq runamanta tumpaspan wañuchinanku karan, chaywanqa Diostan mana allinpaq qhawarichinan karan. Jehová Diosmi ichaqa Jesusman willaran sutin jatunchasqa kananta. Chayta uyarispaqa kusikuranchá Jesusqa, kallpachasqataqchá sientekuran pruebakunata aguantananpaq. Diospa nisqantaqa manan jujkunaqa entiendenkumanchu karan, Jesusmi ichaqa allinta entienderan. Bibliapitaq Diosqa rimamusqanta qelqachiran noqanchista yanapawananchispaq (Juan 12:29, 30).

Jehová Diosqa jatunchanqan sutinta, salvanqataqmi llaqtanta (16 parrafota qhaway) *

16. ¿Imaraykun llakikusunman Jehová Diospa sutin mayninpi pisichasqa kananmanta?

16 Noqanchispas llakikunchischá Jehová Diospa sutin pisichasqa kananmanta. Yaqapaschá noqanchispas Jesús jina mana allin tratasqa kasunman. Otaq enemigonchiskuna noqanchismanta llullakuspa rimankuman. Jinaspa nisunman: “Chaywanqa Jehová Diospas llaqtanpas mana allin qhawarisqan kanqaku”, nispa. Ichaqa manan nishutaqa llakikunanchischu, Jehová  Diospa nisqanmi sonqonchista tiyaykachin. Payqa jatunchanqapunin sutinta, gobiernontaq Satanaspa otaq kamachisqan runakunaq mana allinkuna ruwasqankuta chinkachipunqa (Sal. 94:22, 23; Is. 65:17). Biblian nin: “Diosqa runaq mana entiendey atisqan thaj kayta qosunkichis, chhaynapin sonqoykichista yuyayniykichista ima Cristo Jesuswan waqaychanqa”, nispa. Chay promesaqa junt’akunqapunin (Filip. 4:6, 7).

JEHOVÁ DIOSTA UYARIYQA BENEFICIAWANCHISMI

17. Isaías 30:21 textopi nisqanman jina, ¿imaynatan kay tiempopi Jehová Dios rimapayawanchis?

17 Kay tiempopipas Jehová Diosqa rimapayawashallanchismi (leey Isaías 30:21). Manaña janaq pachamanta kunkanta uyarinchischu chaypas Bibliawanmi rimapayawanchis. Chaymantapas santo espiritunmi ‘allin yuyayniyoq junt’aq mayordomota’ kallpachan tiempollanpi qelqakunata, videokunata internetpi qelqakunatapas qowananchispaq, chhaynapi allin iñiyniyoq kananchispaq (Luc. 12:42). ¡Kay tiempopiqa askhanpipunin chaytaqa chaskishanchis!

18. ¿Imaraykun Diospa rimapayawasqanchis yanapawanchis allin iñiyniyoq kanapaq mana manchakuq kanapaqpas?

18 Jehová Dios Churinman kinsa kutipi rimamusqantaqa yuyashanallanchismi. Imataña Satanaspas kamachisqan pachapas ruwawasunman chaypas, Jehová Diosmi chaytaqa allichanqa. Chaytan entiendenchis janaq pachamanta rimamusqanpi. Chay jinaqa kallpachakusun tukuy yuyaywan Jehová Diospa rimapayawasqanchista uyarinanchispaq, chayta ruwaspaqa ima pruebatapas aguantasunmi. Biblian yuyarichiwanchis: “Diospa promesanta chaskinaykichispaqqa aguantaqpunin kanaykichis, ñaupaqtan ichaqa paypa munaynintaraq ruwanaykichis”, nispa (Heb. 10:36).

4 TAKI ‘Jehová Diosmi michiwaqniyqa’

^ párr. 5 Jesús kay allpapi kashaqtinmi Jehová Dios kinsa kutita payta rimapayamuran. Jujnin kutipin Cristoq discipulonkunata kamachiran Churinta uyarinankupaq. Payta uyarispaqa Jehová Diostan uyarishanchis. Chaymantapas Jehová Diosqa Bibliawan llaqtanwan iman rimapayawanchis. Bibliapin tarikun Jesuspa yachachikuyninkuna. Kay estudiopin yachasun imaynatas beneficiawanchis Jehová Diosta Jesustapas uyariy chayta.

^ párr. 52 FOTOMANTA WILLAKUYKUNA: Umalliqkunata yanapakuq kamachin juñunakunanchis wasita limpiaypi yanapakushan, jinaspapas qelqakunata entregaypin yanapakullantaq, chayta rikuspan umalliqqa felicitan.

^ párr. 54 FOTOMANTA WILLAKUY: Sierra Leona nacionpin juj matrimonio challwaq runaman juñunakuypaq invitacionta qoshan.

^ párr. 56 FOTOMANTA WILLAKUY: Jehová Diosta servinanchispaq prohibisqanku nacionpin hermanonchiskuna juj wasipi juñunakunku, mana reparachikunankupaqtaq común p’achallawan churakunku.