Kichay leenaykipaq

Índice nisqaman riy

Tayta-mamakuna ¿yanapashankichischu wawaykichista bautizoman chayanankupaq?

Tayta-mamakuna ¿yanapashankichischu wawaykichista bautizoman chayanankupaq?

“Usqhaylla sayariy, jinaspa bautizakuy” (HECH. 22:16)

51, 135 TAKIKUNA

1. ¿Imatan tayta-mamakuna allinta qhawarinanku?

BLOSSOM Brandt sutiyoq hermanan nin: “Sapa kutillanmi papayta mamaytawan niq kani ‘bautizakuytan munashani’ nispa. Paykunapas sapa kutillanmi chaymanta noqawan rimaqku. Paykunaqa allintan yachayta munasharanku, allintachus imatapas entiendeshani icha manachus chayta. Jinan 1934 watapi 31 diciembre killapi bautizakapurani. May kusikuymi noqapaqqa chay p’unchay karan”, nispa. Chay hermanaq tayta-maman jinan kunan tiempopas Diosta serviq tayta-mamakunaqa imaymanapi wawankuta yanapashanku imatapas allinta ruwanankupaq. Manan yanqapas qasichu jark’anku bautizakunankutapas (Sant. 4:17). Ichaqa, manaraq bautizakushaqtinkun paykunaqa allinta qhawarinanku preparasqañachus wawanku kashan Jesuspa discipulon kananpaq icha manaraqchus chayta.

2. a) ¿Imamantan wakin watukuq umalliqkuna llakisqa kashanku? b) ¿Imamantan kaypi yachasunchis?

 2 Wakin watukuq umalliqkunan llakisqa kashanku. “¿Imamanta?” nishankichispaschá. Wakin wayna-sipaskunas 20 watankupiña kashanku chaypas manaraq bautizakunkuchu. Astawanqa llakikunku chay wayna-sipaskuna Testigo familiapi uywasqa kashaspa manaraq bautizakusqankumantan. Paykunaqa yaqa llapankus juñunakuykunaman rinku, predicaqpas lloqsinkus; Testigo jinas qhawarikunkupas. Ichaqa, ¿imaraykun manaraq bautizakushankumanchu? Wakintaqa tayta-mamankus jark’anku. ¿Imaraykun tayta-mamakuna jark’ashankuman? Tawa razonkunas kan jark’anankupaq. Chaykunamantan kaypi yachasun.

¿ÑACHU WAWAY EDADNINPIÑA KASHAN BAUTIZAKUNANPAQ?

3. ¿Imamantan llakikuq Blosson hermanaq tayta-maman?

3 Blossom hermanaq willakusqan jina, tayta-mamanqa allintas yachayta munasqaku ñachus wawanku listoña kasharan, edadninpiñachus kasharan chayta. ¿Imaynatan tayta-mamakuna yachankuman ñachus wawanku preparasqaña kashan icha manaraqchus chayta?

4. ¿Imatan tayta-mamakuna yachankuman Mateo 28:19, 20 textomanta?

4 (Leey Mateo 28:19, 20). Ñaupaq estudiopi yachasqanchis jina Bibliaqa manan willanchu jayk’a watanpichus pipas bautizakunan chaytaqa. Chhaynaña kaqtinpas tayta-mamakunaqa allintan entiendenanku imas Jesuspaq discípulo ruway chayta. Mateo 28:19 textopin nishan: “Yachachimuychis discipuloykuna kanankupaq”, nispa. Chhaynaqa pipas Jesuspa discipulon kananpaqqa yachachinanchismi. ¿Imata? Jesuspa yachachisqankunatan paykunaman allinta entiendechinanchis. Chhaynapin paykunaqa kikillankumanta kasukuq kanqaku. Chaytan tayta-mamakunapas wawankuwanqa ruwananku. Juch’uychanmantapachan yachachinanku Jesuspa discipulon kanankupaq. Juj wawaqa manapaschá bautizakuyta atinqachu. Ichaqa Bibliaq willasqan jina wakinqa juch’uyllaraq kashaspapas atinkumanmi Bibliapi yachachikuykuna entiendeyta.

5, 6. a) ¿Jayk’a watanpi jinan Timoteo bautizakunman karan? b) ¿Imatan tayta-mamakuna mana ruwanankuchu?

5 Timoteomanta yachasun, payqa jovenllaraq kashaspan Diosman entregakuran. Apóstol Pabloq nisqan jina, Timoteoqa ‘wawacha kasqanmantapachas’ Diospa yachachikuyninkunata yachasqa. ¿Pin payman chaykunata yachachinman karan? Manan papanchu. Aswanpas mamanwan abuelanwan imas yachachisqaku (2 Tim. 1:5; 3:14, 15). Chaychá 20 watanpi kashaqtinqa listoña kasharan apóstol Pablota puriysinanpaq (Hech. 16:1-3).

6 Ichaqa, manan wawakunaqa llapankupas igualchu kanku. Wakinqa juch’uyllaraq kashaspan allin iñiyniyoq kapunku; bautizakuyta iman munankupas. Wakintaq unaymanta chayta ruwanku. Chaymi tayta-mamakunaqa mana mat’ipayanankuchu bautizakunankupaq, aswanmi pacienciawan yanapashanallanku. Chaymantapas, Proverbios 27:11 (leey) textopi  nisqan jina, Diostan wawakunaqa kusichinanku manan tayta-mamankutachu. Chaywanpas tayta-mamakunaqa kallpachakushanallankun wawankuta Jesuspa discipulonman tukuchinankupaq. Yaqapaschá tapukunkuman: “¿Ñachu waway allin iñiyniyoqña Diosman entregakuspa bautizakunanpaq?”, nispa.

¿ALLINTAÑACHU WAWAY IMATAPAS YACHAN?

7. ¿Bibliapi llapa yachachikuytachu allinta yachana bautizakunapaq? Explicay.

Lliupas bautizakusqan qhepamanqa estudiashanallanmi Diosta allinta reqsinanpaq

7 Tayta-mamakunaqa maytachá munanku wawanku Diosmanta allinta yachanankuta. Chayqa allinmi, chay yachasqankun wawankuta yanapanqa Diosman entregakunankupaq. Ichaqa, ¿Bibliapi llapa yachachikuytachu allinta yachananku bautizakunankupaq? Manan. Chaywanpas bautizakusqanku qhepamanqa estudiashanallankun Diosta allinta reqsinankupaq (leey Colosenses 1:9, 10). Chhaynaqa, ¿maykaman imatapas yachana bautizakunapaq?

8, 9. ¿Iman pasaran Filipos llaqtapi juj carcelerowan? ¿Imatan chaymanta yachasunman?

8 Chayta yachanapaq apóstol Pabloq tiemponpi imachus pasasqanmanta yachasun (Hech. 16:25-33). 50 watapin Pabloqa Silaswan kuska Filipos llaqtata chayasqaku. Chaypin paykunataqa imaymanamanta tumpaspa carcelman wisq’asqaku. Wisq’asqanku p’unchay tutallas juj terremoto pasasqa. Carcelpa punkunkunapas kicharikapusqas. Chayta rikuspas carceleroqa “lloqsirapunkuchá presokunaqa” nispa wañuchikuyta munasqa. Pablos ichaqa mana dejasqachu chay ruwananta. Chhaynapis paykunaqa Diosmanta imaymanata yachachisqaku chay runaman familianmanwan. Chayta yachasqankus paykunaq sonqonkuman chayasqa, jinas bautizakapusqaku. ¿Imatan chaymanta yachasunman?

9 Chay carceleroqa yaqapaschá Roma llaqtamanta jubilasqa soldado karan. Chhayna karan chayqa allintachá yachanan karan Diosmanta qallariy yachachikuykunata; yachachirankuchá imas Diosta serviy, imaraykus Jesusta kasukunan chaytapas. Chhaynapin payqa pisi tiempollapi Diosmanta imaymanata yacharan, chay yachasqanmi kallpacharan bautizakunanpaq. Chay qhepamanqa llapa cristianokuna jinachá payqa yachashallaran Diosmanta. Chhaynaqa, ¿imatan tayta-mamakuna ruwankuman wawanku bautizakuyta munaqtin? Umalliqkunawan rimanankupaqmi kallpachananku. Paykunan qhawarinqaku ñachus bautizakunankupaq jinaña kashanku icha manaraqchus chayta. * Bautizakunqa chayqa juj  discipulokuna jinan Diosmanta yachashanallan kanqa (Rom. 11:33, 34).

¿IMA EDUCACIONMI ASWAN ALLIN?

10, 11. a) ¿Imatan wakin tayta-mamakuna piensanku? b) ¿Imata ruwaspan wawakuna cheqaq kusikuyta tarinqaku?

10 Wakin tayta-mamakunan munanku wawanku manaraq bautizakushaspa allin profecionniyoq kanankuta, allin llank’anayoq kanankuta ima. Yaqapaschá chayqa allin kashan. Ichaqa, ¿chaywanchu wawanku cheqaq kusisqa kausanqaku? ¿“Chayta ruwaychis” ninchu Biblia? ¿Ima ruwananchistan Diosninchis munan? (Leey Eclesiastés 12:1.)

11 Yachasqanchis jina kay mundopiqa Diospa contranpin tukuy imapas kashan (Sant. 4:7, 8; 1 Juan 2:15-17; 5:19). Chhaynataq kashan chayqa, ¿imatan wawakuna ruwankuman Satanasmanta, kay mundomantawan cuidakunankupaq? Diospa amigonmi kananku, paymanmi tukuy sonqo jap’ipakunanku. Ichaqa, tayta-mamakunachus estudiayman qolqe ganayman tanqanqaku chayqa, ¿atinqakuchu Diospa amigon kayta? ¿Allinpaqchu qhawarinqaku Dios serviyta? Chaypin tayta-mamakunaqa allinta piensananku. Dios sonqo tayta-mamakunaqa Diospa amigon kanankupaqmi wawankuta kallpachananku. Payta servispallan wawakunaqa kusisqa kausanqaku (leey Salmo 1:2, 3).

¿IMA JUCHAMANPAS WAWAY URMANQA CHAYRI?

12. ¿Imaraykun wakin tayta-mamakuna jark’anku wawankuq bautizakunanta?

12 Juj hermananchismi mana munasqachu wawan bautizakunanta, ¿imarayku? Pay kikinmi nin: “P’enqasqan kashani chay ruwasqaymanta. Noqaqa ‘expulsasqapaschá kanqa’ nispan mana munaranichu”, nispa. Chay hermana jinan wakin tayta-mamakunapas manchakunku wawanku expulsasqa kananta, chayraykun mana munankuchu bautizakunankuta (Gén. 8:21; Prov. 22:15). Paykunaqa yaqapaschá nishanku:  “Mana bautizakunqachu chayqa manan jayk’aqpas expulsasqachu kanqa”, nispa. Ichaqa engañakushankun chhaynata piensaspaqa (Sant. 1:22).

13. Pipas manaraq bautizakunchu chayqa, ¿manachu chay runa Diosman cuentata qonqa? Explicay.

13 Tayta-mamakuna wawankumanta llakikuspaqa allintan ruwashanku. “Allin yuyayniyoq kaspaña bautizakuchun” nispankupas allintan nishanku. Ichaqa bautizasqaña manaña bautizasqachu kanqaku chaypas Diosmanqa qonqakupunin cuentata. Arí, yachankutaq allin kaqta mana allin kaqtapas chayqa paykunamantapas Diosqa mañanqapunin cuentata (leey Santiago 4:17). Chaymi tayta-mamakunaqa wawankuta jark’anankutaqa ejemplota qonanku paykunapas allin kaqkunata ruwanankupaq. Juch’uychankumantapachan yachachinanku Dios munakuyta kamachinkuna kasukuytapas (Luc. 6:40). Chhaynapin allin cuidasqa kanqaku allin kausaytataqmi tarinqakupas (Is. 35:8).

¿IMAYNATAN YANAPASUNMAN WAWAYOQKUNATA?

14. ¿Imaynatan umalliqkuna tayta-mamakunata yanapankuman?

14 Umalliqkunan ñaupaqtaqa tayta-mamakunata yanapananku. ¿Imaynata? Imaynatachus Diosta servinkuman chaytan wawankuman willarinanku. Juj hermanan nin: “6 wataypi kashaqtiymi hermano Russellwan rimarayku 15 minutota jina, chaypin payqa niwaran imaynatas Diosta tukuy tiempoywan serviyman chayta”, nispa. Chay hermanaqa 70 wata masmi precursora karan. Chhaynatan kunan tiempopi umalliqkunapas wayna-sipaskunata kallpacharinanku (Prov. 25:11). ¿Imatawanmi umalliqkuna ruwankuman? Yaqapaschá tayta-mamakunawan rimankuman wawanku ima ruwaypipas yanapakunankupaq. Wawakunamanpas atisqankuman jinan ima ruwanatapas qonanku.

15. ¿Imaynatan yanapasunman wayna-sipaskunata?

15 Wakin hermanokunari, ¿atisunmanchu yanapakuyta? Arí, atisunmanmi.  Chaypaqqa wawakunapin interesta churananchis. Allintan qhawarinanchis imaynas kashanku chayta. Yaqapaschá allin comentariota qoranku; chaupi semana juñunakuypipaschá allinta ruwaranku asignasqanku parteta; ima sasachakuytapaschá allinta aguantaranku; escuelapi compañeronkunamanpaschá predicaranku. Chaykunamantan paykunata tukuy sonqowan felicitananchis. Sapa kutillanmi paykunawanqa rimashananchis. Chhaynapin paykunaqa Diospa llaqtanpi kusisqa kanqaku (Sal. 35:18).

YANAPAY WAWAYKITA BAUTIZOMAN CHAYANANPAQ

16, 17. a) ¿Imaraykun wawakuna bautizakunanku? b) ¿Imaynan kanqaku tayta-mamakuna wawanku Diosman entregakuqtin? (9 paginapi fotota qhaway.)

16 Tayta-mamakunaqa “Jehová Diospa nisqanman jinan wanachispa, yachachispa ima” wawankuta uywananku. Chaymi ima ruwanankumantapas ñaupaqpi kanan (Efes. 6:4; Sal. 127:3). Kay tiempopi cristianokunaq wawanqa manan ñaupa tiempopi Israel runakunaq wawankuna jinachu Diosman entregasqaña nacenku. Chaymantapas Diosta serviyqa manan herencia jinachu. Chaymi tayta-mamakunaqa wawanku nacesqan p’unchaymantapacha yachachinanku Diosman entregakuspa bautizakunankupaq Jesuspa discipulon kanankupaqwan. Sichus wawanku bautizakunqaku Diostapas tukuy sonqo servinqaku chayqa, librasqan kanqaku manchay ñak’ariy chayamuqtin (Mat. 24:13).

Tayta-mamakunaqa wawanku Jesuspa discipulon kanankupaqmi kallpachananku (16, 17 parrafokunata qhaway)

17 Qallariypi yachamusqanchis jina Blossom Brandt hermanaq papanpas mamanpas allintas yachayta munasqaku ñachus wawanku preparasqaña kashan bautizakunanpaq icha manaraqchus chayta. Chayta yacharuspaqa apoyasqakus wawankuta. Bautizakunan tutapas juj munay mañakuytas papanqa ruwasqa. Chay hermanan nillantaq: “Llapaykuta qonqorichiwaspankun Diosta nin: ‘Kusisqan kashani kay waway qanman entregakusqanmanta’, nispa, may munaymi chay tutaqa karan”, nispa. Chay kutimanta 60 wata masña pasaruqtinmi chay hermanaqa nillarantaq: “Manan wañunay p’unchaykamapas chay tutataqa qonqasaqchu”, nispa. Tayta-mamakuna, maytan munashayku qankunapas wawaykichispa Diosman entregakuspa bautizakusqanwan kusisqa kanaykichista.

^ párr. 9 Tayta-mamakunaqa yaqapaschá wawankuwan estudiankuman Lo que los jóvenes preguntan. Respuestas prácticas (volumen 2) nisqa libropi, 304-310 paginakunata. Chaymantapas yaqapaschá leenkuman 2011 watapi abril killapi lloqsimuq Diosmanta Willasunchis nisqata 2 paginapi “Tapuykuna” nisqata.