Kichay leenaykipaq

Índice nisqaman riy

Llapa runakunata khuyapayasun

Llapa runakunata khuyapayasun

JESUSPA willasqan jina manan llapa runachu predicasqanchistaqa sumaqta chaskikunan karan (Luc. 10:3, 5, 6). Wakin runakunaqa phiñasqallañan punkunkutapas kichakamunku, wakinqa hasta maqayta imaraqmi munawanchispas. Chhaynataq kanku chayqa manapaschá facilchu kanqa paykunata khuyapayay.

Ichaqa, ¿imataq khuyapayakuq kayri? Khuyapayakuq runaqa jujkunapin piensan, sufrisqankuta rikuspan yanapan. Mana khuyapayakuqchus kasunman chayqa, manan ganasninchis kanmanchu predicananchispaq ni jujkunata yanapananchispaqpas. Chaytan comparasunman ninawan, nina mana wañunanpaqqa llant’atan yapashanalla ¿riki? Chhaynatan ruwananchis ganaswan predicananchispaqpas. Kallpachakushanallanchismi khuyapayakuq kanapaq (1 Tes. 5:19).

¿Imatan ruwasunman sasaña kaqtinpas khuyapayakuq kananchispaq? Chaypaq yachasun Jehová Diosmanta, Jesusmanta, apóstol Pablomantawan.

JEHOVÁ DIOS JINA KHUYAPAYAKUQ KASUN

Kay mundopi kausay qallarisqanmantapachan runakunaqa mana allinkunata Diosmanta rimashanku. Chaywanpas “payqa mana agradecekuqkunapaqpas millay runakunapaqpas sumaq sonqon” (Luc. 6:35). Chaymantapas llapa runakunawanmi pacienciakushan. Bibliaq nisqan jina “payqa llapa runapas salvasqa kanantan munan” (1 Tim. 2:3, 4). Cheqnikunña mana allin ruwaykunata chaypas runakunataqa munakunmi, manataqmi munanchu pipas wañunanta (2 Ped. 3:9).

Chaymantapas Diosqa allintan yachan runakunaq yuyaynin tutayachisqa kasqanta (2 Cor. 4:3, 4). Arí, wawa kasqankumantapachan paykunaq yuyayninqa tutayasqa kashan, pantasqatan Diosmantapas yachanku. Chaychá mana faciltachu Diospa simintapas chaskikunku. Ichaqa yanapaytan Diosqa munashan. ¿Cheqaqchu chay kanman?

Chaypaq yachasun Nínive llaqta runakunamanta. Chay runakunaqa sinchi millayllañan karanku. Chaywanpas paykunamantan Dios niran: “¿Manachu noqaqa chay jatun Nínive llaqtata khuyapayayman? Chaypin pachaj iskay chunka waranqa kuraj runakuna kashan, paykunaqa manan reparankuchu allinkaqta mana allinkaqmanta”, nispa (Jon. 4:11). Chaypi rikusqanchis jina Diosqa allintan yacharan imaraykuchus chay runakuna millay karanku chayta. Chaymi paykunataqa khuyapayaran.

Rikusqanchis jina Diospaqqa anchatan valen runakunaq vidanqa. Pay jinan noqanchispas runakunataqa qhawarinanchis. Chhaynapin manaña uyarikuyta munanqakuchu chaypas mana pisipaspa predicashallasun.

JESÚS JINA KHUYAPAYAKUQ KASUN

Papan jinan Jesusqa runakunata khuyapayaran. Biblia nin: “Runakunata rikuspan Jesusqa paykunata khuyapayaran, paykunatan rikuran mana michiqniyoq ovejakunata jina khuyay k’irisqata, ch’eqesqata”, nispa (Mat. 9:36). Chaypi rikusqanchis jina Jesusqa sonqomantan runakunata khuyapayaq. Ichaqa, ¿imaynapitaq chay runakunari k’irisqa ch’eqesqa kasharanku? Chay tiempopi umalliqkunan nishuta maltrataqku, pantasqatan Diosmantapas yachachiqku. Chaymi Jesusqa, manaña lliuchu payta qatikunanku karan chaypas,  paykunaman ‘imaymanakunata yachachiyta qallariran’ (Mar. 4:1-9).

Manaña runakuna Diospa siminta chaskikunkuchu chaypas manan pisipananchischu

Wakinqa yaqapaschá ima llakipipas tarikusqankurayku Diospa siminta uyariyta munanqaku

Pipas Diospa siminta mana chaskikuyta munanqachu chayqa, manan maltachu paymanta piensananchis. Aswanmi qhawarinanchis imaraykus mana munashanchu chayta. Yaqapaschá wakinqa falso cristianokunaq mana allin ruwasqankuta rikuranku. Jujkunaqa imaymana cuentokunatapaschá Testigokunamanta uyariranku. Wakinqa familiankuta vecinonkuta manchakuspapaschá mana uyarikuyta munankuchu.

Wakinqa imapipas sufrisqankuraykupaschá mana uyarikuyta munankuchu. Chaypaq yachasun Kim sutiyoq hermananchismanta, paymi nin: “Juj predicasqayku llaqtapi runakunan sinchi llakipi tarikusqaku. Llaqtankupin guerra pasasqa, chaypin tukuy imankuta chinkachisqaku. Nishu llakipunin karan. Manañan paykunaqa jujkunapiqa confiaqkuchu. Manan Diosmanta willasqaykutapas uyarikuyta munaqkuchu. Juj kutinqa yaqaraqmi maqawankupas”, nispa.

¿Imatan chay hermananchis ruwan ama pisipananpaq? Paymi nillantaq: “Runakuna mana sumaqta chaskiwaqtinkuqa Proverbios 19:11 textotan yuyarini, chaypin nin: ‘Runaq allin yuyayniyoq-kayninqa phiñakuytan jark’an’ nispa. Chaymantapas chay runakuna imapichus tarikusqankupin piensani. Chaykunan yanapawan paykunata khuyapayashanallaypaq. Wakinña millay kanku chaypas, manan llapa runachu chhayna kanku. Chay predicasqayku llaqtapipas kanmi allin sonqo runakunaqa”, nispa.

Chaymantapas yaqapaschá tapukusunman: “Manachus Testigo kayman chayqa, ¿imaynatan Testigokunata chaskiyman karan? Sapa kutillantaq Testigokunamanta malta rimawankuman karan chayqa, ¿allinpaqchu paykunata qhawariyman karan?”, nispa. Chaykunapi piensasun chayqa faciltan runakunata khuyapayasun. Jesuspa nisqan jina, runakuna imayna qhawariwananchistachus munanchis chhaynallatataq noqanchispas paykunata qhawarisun (Mat. 7:12).

PABLO JINA KHUYAPAYAKUQ KASUN

Pabloqa llapa runatan khuyapayaq, wakin maqarankuña chaypas khuyapayaqmi paykunatapas, ¿imarayku? Paypas khuyapayasqa kasqanrayku. Pay kikinmi niran: “Ñaupaqpi Diosta pisichaspa rimaqña karani, jujkunata qatikachaqña karani, millay k’amiqña karani chaypas. Arí, khuyapayasqan noqaqa karani, mana yachaspa mana iñispa imatapas ruwasqayrayku”, nispa (1 Tim. 1:13). Chaypi willakusqan jina Jehová Diospas Jesuspas khuyapayaranmi Pablotaqa. Predicaspaqa yaqapaschá mayninqa tuparan pay jina runakunawan.

 Mayninpiqa pantasqa yachachikuykunapi iñiqkunawanmi Pabloqa tupaq. Juj kutinpas Atenas llaqtaman chayaspan payqa rikusqa imaymana idolokunata, chaywansi Pabloqqa ‘sonqonraq t’impurisqa’ (Hech 17:16). Ichaqa chay idolokunamanta rimaspallataqmi Pabloqa chay llaqtapi runakunata yachachiran (Hech. 17:22, 23). Chaymantapas Pabloqa sapanka runapas imaynachus kasqanman jinan predicaq, “chhaynapi imaynallamantapas paykunata salvananpaq” (1 Cor. 9:20-23).

Pablo jinan noqanchispas ruwananchis. Manachus runakuna uyarikuyta munanqaku chayqa, imaynachus kanku imakunapichus creenku chayman jinan predicananchis (Is. 52:7). Chaypaq yachasun Dorothy sutiyoq hermananchismanta. Paymi nin: “Predicasqayku ladokunapi runakunaqa maltan Diosmanta piensanku, paykunaq nisqankuman jinaqa Diosqa mana khuyapayakuqsi. Chaymi noqaqa manaraq paykunawan rimashaspa ñaupaqta felicitani Diospi creesqankumanta. Chaymantataq Diospa munakuyninmanta promesanmanta ima willani”, nispa.

“ALLIN KAQWAN MANA ALLIN KAQTAQA ATIPASHALLAY”

Watakunaq pasasqanman jinan runakunaqa astawanraq cambianqaku, aswan millaymanmi tukupunqakupas (2 Tim. 3:1, 13). Ichaqa manan pisipananchischu manataqmi khuyapayakuq kayninchispas ni kusikuyninchispas pisiyananchu. Diospa yanapayninwanqa vencellasunmi mana allin kaqkunata (Rom. 12:21). Jessica sutiyoq precursoran nin: “Wakin runakunaqa nishu orgulloson kanku, pisichankun Diospa simintapas. Chhayna runakunawan tupasunman chayqa yaqapaschá llakikusunman. Chaymi piwanpas rimaspayqa Diospa yanapayninta mañakuni pay jina pitapas qhawarinaypaq. Chaymi yanapawan ama noqallapichu piensanaypaq aswanpas runakunapi piensanaypaq”, nispa.

Maskhashanallanchismi Diospa siminta yachay munaqkunata

Tiempowanqa yaqapaschá mana uyarikuyta munaqkunaqa uyariwasun

Predicaqmasinchiskunatapas yanapananchismi. ¿Imaynatan chayta ruwasunman? Hermananchis Jessican nillantaq: “Mayqen iñiqmasitapas predicacionpi malta tratanku chayqa, manan nishutachu chaymanta rimayku aswanmi imakunapichus allinkuna pasawasqankumanta masta rimayku”, nispa.

Diosninchisqa allintan yachan imakunachus predicasqanchispi pasawanchis chayta. Chaymantapas payqa kusikunmi pay jina khuyapayakuq kasqanchismanta (Luc. 6:36). Ichaqa manan Diosqa wiñaypaqchu runakunata suyanqa. Payqa yachanñan jayk’aqchus kay millay kausay tukunqa chayta. Chay p’unchay chayamunankaman ichaqa predicashanallanchis (2 Tim. 4:2). Chhaynaqa rikuchishallasun khuyapayakuq kasqanchista amataq pisipasunchu.