Kichay leenaykipaq

Índice nisqaman riy

 8 ESTUDIO

¿Imaraykun agradecido kasqanchista rikuchinanchis?

¿Imaraykun agradecido kasqanchista rikuchinanchis?

“Agradecekuq kaychis” (COL. 3:15)

46 TAKI Gracias, Jehová Diosniyku

KAYKUNAMANTA YACHASUN *

1. ¿Imaynatan Samaria llaqtamanta runa agradecekuq kasqanta rikuchiran?

CHUNKA runakunan lepra onqoyniyoq karanku, paykunaqa manañan piensarankuchu qhaliyanankupaq. Ichaqa Jesusmantan uyarisqaku ima onqoytapas qhaliyachisqanta. Jinan confiaranku qhaliyachisqa kanankupi. Juj kutinmi Jesusta karumanta rikuspa alto kunkawan niranku: “¡Jesús, yachachikuq, khuyapayaykuwayku!”, nispa. Jesustaq paykunata khuyapayaspa llapankuta qhaliyachiran. Paykunaqa anchatachá agradecekuranku qhaliyasqankumanta. * Ichaqa jujnillanmi agradecekuq kasqanta rikuchiran. Chay runaqa Samaria llaqtamantan kasqa, paymi alto kunkawan Diosta jatuncharan (Luc. 17:12-19).

2, 3. a) ¿Imaynapin qonqasunman agradecekuyta? b) ¿Imakunamantan kay estudiopi yachasun?

2 Chay Samaria llaqtayoq runa jinan noqanchispas agradecekuq kasqanchista rikuchiyta munanchis, allinkuna ruwapuwaqninchis runakunaman. Mayninpin ichaqa qonqasunman agradecekuyta.

3 Kay estudiopin yachasun imaraykus agradecekuq kananchis chayta. Yachallasuntaqmi wakin runakuna agradecekuq kasqankumanta, wakintaq mana agradecekuq kasqankumanta. Chaymantapas yachasunmi imaynatas agradecekuq kasqanchista rikuchisunman chayta.

 ¿IMARAYKUN “GRACIAS” NINANCHIS?

4, 5. ¿Imaraykun agradecekuq kasqanchista rikuchinanchis?

4 Jehová Diosmi yachachiwanchis agradecekuq kayta. Payqa agradecekuq kasqantan rikuchin pay sonqo runakunata bendecispa (2 Sam. 22:21; Sal. 13:6; Mat. 10:40, 41). Biblian niwanchis: “Dios jina kaychis paypa munasqa wawankuna kasqaykichisrayku”, nispa (Efes. 5:1). Noqanchisqa Jehová Dios jinan kayta munanchis, chaymi agradecekuq kasqanchista rikuchinanchis.

5 ¿Imaraykun agradecekuq kasqanchista rikuchinallanchistaq? Amigonchiskunaman mijunata invitaspaqa kusisqan sientekunchis. Chay jinallataqmi imachus ruwasqanchismanta pipas agradecewaqtinchisqa kusisqa sientekunchis. Paykunapas kusisqan sientekunku agradecekuqtinchis. Chaywanmi paykunaqa yachanku imatapas noqanchispaq ruwasqankuqa mana yanqapaqchu kasqanta. Chhaynapitaq astawanraq paykunawan amigontin kapunchis.

6. ¿Imaynapin agradecekusqanchis comparakun qori manzanaman?

6 Agradecekusqanchisqa ancha allinpunin. Biblian nin: “Qolqepi ch’olqochisqa qori manzana jinan tiemponpipuni rimasqa simiqa”, nispa (Prov. 25:11). Qolqewan adornasqa qori manzanaqa ancha valorniyoqmi ¿riki? Pipas chay jina regalota qowaqtinchisqa anchatachá kusikusunman. Agradecekusqanchispas chay jina valorniyoqmi kanman. Chaymantapas qorimanta manzanaqa unay tiempotan duran, chay jinallataqmi jujkunaqa wañupunankukama agradecekusqanchista jap’ikunkuman.

 AGRADECEKUQ KASQANKUTA RIKUCHIRANKU

7. a) Salmos 69:30 textopi nisqan jina, ¿imaynatan David rikuchiran agradecekuq kasqanta? b) ¿Imaynatan Asafpa mirayninpas chayta rikuchiran?

7 Askhan rikuchiranku agradecekuq kasqankuta. Jujninmi karan David (leey Salmos 69:30). Payqa anchatan agradecekuran Diosta servisqanmanta. Chaytan rikuchiran templota ruwakunanpaq kaqninkunata qospa. Asafpa mirayninpas rikuchirankun agradecekuq kasqankuta. Chayta rikuchiranku Salmos takikunata Jehová Diosta jatunchanapaq ruwaspa. Jujnin kaq takipi Diosta agradecekunku musphanakunata ruwasqanmanta (Sal. 75:1). Davidpas Asafpa mirayninpas kusisqan kasharanku Jehová Dios bendecisqanmanta, chaymi agradecekuq kasqankuta rikuchiranku. Noqanchisri, ¿imaynatan agradecekuq kasqanchista rikuchisunman?

Romapi cristianokunaman Pabloq apachisqan carta, ¿imatan yachachiwanchis agradecekuq kaymanta? (8, 9 parrafota qhaway) *

8, 9. a) ¿Imaynatan apóstol Pablo rikuchiran hermanokunata valorasqanta? b) ¿Iman karan apóstol Pablo agradecekuq kasqanrayku?

8 Apóstol Pablopas anchatan valoraran hermanokunata, chaytan rikuchiran Diosmanta sapallanpi mañakuspa. Cartankunapipas qelqaranmi paykunata anchata munakusqanta. Ejemplopaq, Romanos 16:1-15 textopin 27 hermanokunamanta willaran. Priscamanta Aquilamantawan qelqaspan niran: “Noqaraykun wañuy patamanraq churakuranku”, nispa. Febe hermanamantataq niran: “Imaymanapin jujkunata yanapaq, noqatapas yanapawaqmi”, nispa. Rikusqanchis jina Pabloqa kallpacharanmi hermanokunata Diosta servisqankumanta.

9 Apóstol Pabloqa yacharanmi chay hermanokuna pantaq kasqankuta. Chaywanpas Romapi kaq hermanokunaman qelqayta tukushaspan rimaran allinkuna ruwasqankumanta. Chay hermanokunaqa anchatachá kusikuranku chay cartata iñiq t’aqaman leekuqtinqa, astawanraqchá Pablotaqa munakuranku. Noqanchisri, ¿Pablo jinachu sapa kutilla hermanokunata agradecekunchis allinkuna rimasqankumanta ruwasqankumantapas?

10. ¿Imatan yachanchis Jesús agradecekuq kasqanmanta?

10 Asia Menor ladopi iñiq t’aqakunamanmi Jesusqa juj cartata apachiran, chaypin Diosta servisqankumanta agradecekuran. Tiatira llaqtapi kaq iñiq t’aqatan niran: “Yachanin imachus ruwasqaykita, imayna munakuqchus kasqaykita, imayna iñiqchus kasqaykita, Diospaq llank’ayniykipas imaynachus kasqanta, imayna aguantaqchus kasqaykitapas; chaymantapas kunankuna imapas ruwasqaykiqa ñaupaqpi ruwasqaykimantapas aswan allinraqmi kashan”, nispa (Apo. 2:19). Manan llank’asqallankumantachu felicitaran, aswanpas imayna kasqankumantawanmi felicitaran. Wakin cristianokunataña corregiran chaypas, rimayta qallarishaspa tukushaspapas kallpachananpaq jinan rimaran (Apo. 2:25-28). Jesusmi llapa iñiq t’aqakunata umallin. Payqa manan imachus ruwasqanchismantaqa agradecewananchischu. Chaywanpas yachanmi agradecekuyta. Jesusqa, ¡allin ejemplon umalliqkunapaq!

MANA AGRADECEKUQKUNA

11. Hebreos 12:16 textopi nisqan jina, ¿imaynapin Esaú mana agradecekuq karan?

11 Wakin Dios serviqkunaqa mana agradecekuqmi karanku. Jujninmi karan Esaú. Tayta-mamanña Diosta munakuran respetaran chaypas, payqa Diospa kaqnintan pisicharan (leey Hebreos 12:16). ¿Imaynatan  chayta rikuchiran? Phiwi kaynintan sullk’a hermanon Jacobman vendepuran juj plato mijunallawan (Gén. 25:30-34). Qhepaman chay ruwasqanmanta mana allinña sientekuran chaypas, manañan phiwi kayninmanta herencianta chaskiyta atiranchu.

12, 13. ¿Imaynatan Israel runakuna rikuchiranku mana agradecekuq kasqankuta? Chay jawa, ¿iman paykunata pasaran?

12 Israelitakunaqa imaymanamantan Diosta agradecekunanku karan. Chunka plagakunawanmi Egipto llaqtata castigaran Israel runakunata esclavo kasqankumanta orqomunanpaq. Chay qhepamantaq paykunata salvaran Puka lamar-qochapi Egipto soldadokunata wañuchispa. Chay kutipiqa Diosta agradecekuspan llapallanku takiranku. Qhepamanmi ichaqa manaña agradecekuqchu karanku.

13 Sasachakuykunapi tarikuspan qonqapuranku paykunarayku Jehová Diospa tukuy ruwasqanta (Sal. 106:7). Biblian willan “llaqtallantin Moisés contra Aarón contra” rimapakusqankuta, chayta ruwaspaqa Dios contran rimapakusharanku (Éx. 16:2, 8). Mana agradecekuq kasqankuraykun Jehová Diosqa paykunapaq sinchita phiñakuran, jinan niran chay runakuna llapallanku ch’inneq pampapi wañunankupaq, Josuewan Calebllawanmi mana wañunankuchu karan (Núm. 14:22-24; 26:65). ¿Imaynatan cuidakusunman ama paykuna jina kanapaq? ¿Imaynatan agradecekuq runakunaq ejemplonta qatikusunman? Chaymanta kunan yachasun.

AGRADECEKUQ KASQANCHISTA RIKUCHISUN

14, 15. a) ¿Imaynatan casarasqakuna agradecekuq kasqankuta rikuchinkuman? b) ¿Imaynatan tayta-mamakuna wawankuta yanapankuman agradecekuq kanankupaq?

14 Familiapi. Sichus agradecekuq kanchis chayqa, familianchismi beneficiakun. Sichus sapa kutilla qosapas esposapas agradecekuq kasqankuta rikuchinqaku chayqa, astawanmi munanakunqaku, facil-llatataq imapi pantasqankutapas perdonanakunqaku. Agradecekuq qosaqa esposanpa allin rimasqanta ruwasqanta qhawaspan “gracias” nin (Prov. 31:10, 28). Agradecekuq esposapas qosanmanmi willan imakunatas allinta ruwan chayta.

15 Tayta-mamakuna, ¿imaynatan wawaykichista yachachiwaqchis agradecekuq kanankupaq? Wawaykichisqa imatas ruwankichis imatas rimankichis chaytan ruwanqaku. Chaymi qankunapaq imatapas  wawaykichis ruwaqtinqa “gracias” ninaykichis. Jinaspapas jujkuna agradecekuytan yachachinayki, entiendechinaykitaqmi sonqomanta agradecekuy allinpuni kasqanta. Clary sutiyoq hermanan nin: “Mamitaymi 32 watanpi kashaspa qonqayllamanta sapallan kinsa wawankunata uywanan karan. 32 wataypi kashaqtiymi piensarani mamaypa imayna uywawasqankupi, jinan mamayta nirani: ‘Anchatan agradecekuyki noqaykuta uywawanaykikupaq sacrificakusqaykimanta’, nispa. Qaynallan willawan chay nisqayta sonqonpi jap’isqanta, sapa kutillas nisqaypi piensan, chaysis yanapan kusisqa kananpaq”, nispa.

Wawanchista yachachisun agradecekuq kayta (15 parrafota qhaway) *

16. ¿Imaynatan hermanonchiskunata kallpachanman agradecekuq kasqanchis? Juj ejemplota willay.

16 Iñiq t’aqapi hermanokunata. Hermanonchiskunata agradecekuspan paykunata kallpachashanchis. Jorge sutiyoq umalliq hermanomanta rimasun, payqa 28 watanpin kashan. Nishuta onqospan killantin juñunakuykunaman mana riyta atiranchu. Juñunakuykunaman riyta qallarispapas manan atiranchu discursokuna qoyta. Paymi nin: “Manan atiranichu iñiq t’aqapi ruwanaykunawan junt’ayta chaymi mana valeqpaq jina qhawarikurani. Ichaqa juj kutinmi juj hermano juñunakuy tukuyta niwaran: ‘Agradecekuytan munayki familiayta ejemploykiwan yanapasqaykimanta. Kay watakunapi discursoykikunaqa anchatan yanapawaranku iñiyniykupi astawan wiñanaykupaq’, nispa. Chay niwasqanqa sonqoymanmi chayaran, jinan waqaraniraq, chaytapunin necesitasharani”, nispa.

17. Colosenses 3:15 textopi nisqanman jina, ¿imaynatan Jehová Diosta agradecekusunman?

17 Diosninchista. Jehová Diosqa allin iñiyniyoq kananchispaqmi askhanpi espiritual mijunata qowanchis. Chaykunatan chaskinchis juñunakuykunapi, revistakunapi, internet paginanchispipas. Juj discursota uyarispa, revistanchista leespa otaq JW Broadcasting canalpi imatapas qhawaspaqa niranchischá: “Kayqa noqapaqpunin”, nispa. Chhaynaqa, ¿imaynatan rikuchisunman chay regalokunamanta agradecekusqanchista? (Leey Colosenses 3:15.) Diosmanta mañakushaspan sapa kutilla “gracias” ninanchis (Sant. 1:17).

Juñunakunanchis wasita limpiaspan rikuchillanchistaq agradecekuq kasqanchista (18 parrafota qhaway)

18. ¿Imakunata ruwaspan rikuchinchis juñunakuna wasita anchata valorasqanchista?

18 Jehová Dios agradecekusqanchistan rikuchillasunmantaq juñunakunanchis wasita limpiaspa allichaspa ima. Chaymi sapa  kutilla yanapakunanchis chaykuna ruwaypi. Jinaspapas audio y video nisqa aparatokunata manejaqkunaqa cuidadowanmi chaykunata utilizananku. Juñunakunanchis wasita cuidashallasun chayqa manan imapas ratollaqa thantakunqachu. Chhaynapin juj juñunakuna wasikunata ruwanankupaq allichanankupaqpas qolqe kanqa.

19. ¿Iman juj watukuq umalliqta esposantawan pasaran, imatan chaymanta yachanchis?

19 Noqanchisrayku llank’aqkunata. Agradecekuq kasqanchisqa yanapanmanmi jujkunata ima problematapas atipanankupaq. Rimasun juj watukuq umalliqmanta esposanmantawan. Juj kutinmi paykunaqa chiri p’unchaypi ch’isiyaqta predicasqankurayku sayk’usqa cuartonkuman kutiranku. Sinchita chirisqanraykun esposanqa abrigontinraq puñuran. Tutamantanmi qosanta niran: “Manañan atiymanchu kay llank’aypi yanapakuytaqa”, nispa. Chay tutamantanmi ichaqa juj cartata sucursalmanta esposanman apachimusqaku. Chay cartapin hermananchista sumaqta felicitaranku chay llank’aypi mana pisipaspa yanapakusqanmanta, nirankutaq: “Yachaykun sapa semana juj ladonman astakuy sasa kasqanta”, nispa. Qosanmi nin: “Chayta leesqanqa sonqonmanpunin chayaran, chaymi manaña jayk’aqpas niwaranchu llank’ayniykuta saqenaykupaq. Mayninpi chay llank’ayta saqenaykupaq niqtiymi payñataq animawaran”, nispa. Yaqa 40 watakunan kay hermanoqa esposanwan kuska iñiq t’aqakunata watukuranku.

20. ¿Imata ruwanapaqmi sapa p’unchay kallpachakunanchis? ¿Imaraykun kallpachakunanchis?

20 Sapa p’unchaymi kallpachakunanchis agradecekuq kasqanchista rikuchinapaq. Rimaspa otaq imata ruwaspapas jujkunata agradecekusqanchisqa yanapanmanmi kay sasa tiempopi. Jinaspapas agradecekuq kasqanchista rikuchispan jujkunawan wiñaypaq amigontin kasunman. Astawanqa Jehová Diosninchistan qatikushanchis, payqa agradecekuq Diosmi.

20 TAKI Munasqa wawaykitan qowarankiku

^ párr. 5 Jehová Diospas, Jesuspas, lepra onqoyniyoq Samaria llaqtayoq runapas agradecekuq kasqankutan rikuchiranku. Kay estudiopin yachasun paykunaq ejemplonkumanta jujkunamantapas. Yachallasuntaq imaraykus agradecekuq kasqanchista rikuchinanchis, imaynatas rikuchisunman chaytapas.

^ párr. 1 ASTAWAN YACHANAPAQ: Agradecekuq runaqa anchatan valoran jujkuna imatapas paypaq ruwapusqanta, jinaspa “gracias” nispa nin.

^ párr. 55 DIBUJOMANTA WILLAKUY: Roma llaqtapi cristianokunamanmi Pabloq apachimusqan cartata leeshanku; Áquila, Prisca, Febe, juj hermanokunapas kusisqan kashanku sutinkuta uyarispa.

^ párr. 57 FOTOMANTA WILLAKUY: Juj maman ususinta yachachishan kuraq hermananchista agradecekuyta.