Kichay leenaykipaq

Índice nisqaman riy

 36 ESTUDIO

Armagedonqa kusikunanchispaqmi kanqa

Armagedonqa kusikunanchispaqmi kanqa

“Chay reykunatan juñuranku hebreo rimaypi “Armagedón” nisqa partepi” (APO. 16:16)

150 TAKI Librawaqninchis Diosta maskhasun

KAYKUNAMANTA YACHASUN *

1, 2. a) ¿Imaraykun Armagedón guerra runakunaq allinninpaq kanqa? b) ¿Ima tapuykunamantan kaypi yachasun?

ASKHA runakunan Armagedón guerramanta uyarispa piensanku kay allpa terremotokunawan otaq bombakunawan chinkachisqa kananta. Biblian ichaqa Armagedonmanta willaspa kusikunapaq willan (Apo. 1:3). Chay guerraqa runakunaq allinninpaqmi kanqa, ¿imaraykun chayta ninchis?

2 Biblian willan Armagedón guerrapi llapa gobiernokuna, millay runakuna, kay allpa qhellichaqkunapas chinkachisqa kanankuta, Dios serviq runakunan ichaqa salvasqa kanqaku (Apo. 11:18). Chaykunamanta astawan yachanapaq kay tapuykunamanta yachasun: ¿Imataq Armagedonri? ¿Imakunan pasanqa manaraq chayamushaqtin? ¿Imakunatan ruwananchis salvakunanchispaq? ¿Imatan ruwananchis junt’aq sonqolla kananchispaq?

¿IMATAQ ARMAGEDONRI?

3. a) ¿Iman Armagedón nisqa simi? b) Apocalipsis 16:14, 16 textopi nisqanman jina, ¿imanaqtinmi ninchis: “Armagedonqa manan juj llaqtachu”, nispa?

3 (Leey Apocalipsis 16:14, 16). Armagedón nisqa simiqa juj kutillatan Bibliapi rijurin. Hebreo rimaypitaq “Meguidó orqo” ninanta nin (Apo. 16:16, willakuyta qhaway). Meguidó llaqtaqa Israel nacionpin tarikuran (Jos. 17:11). Llapa nacionkunamanta reykunan juñukuspanku Diospa llaqtan contra jatarinqaku, chaytan Armagedón nispa nikun (Apo. 16:14). Ichaqa kay yachachikuypin Armagedonmanta rimaspa rimallasuntaq Diospa guerranmanta, chayqa qallarinqa reykuna Diospa llaqtan contra juñukusqanku qhepamanmi. Armagedonqa manan juj llaqtachu. ¿Imanaqtinmi chayta ninchis? 1) Meguidó orqoqa manan  kanchu. 2) Israelpi tarikuq Meguidó llaqtaqa juch’uyllan, chaypiqa manan pachantinmanta ‘llapa reykunaqa’ ejercitonkunawanqa jaykunkumanchu. 3) Armagedón guerraqa qallarinqa llapa reykuna pachantinpi tiyaq hermanonchiskuna contra phawaykuqtinkun. Diospa guerran manaraq qallarishaqtinmi imaymanakuna pasanqa chaytan Armagedón nispa nikun. Chaymanta astawanraq yachasun.

4. ¿Imaraykun Jehová Dios jatun guerranta comparan Meguidó llaqtapi pasasqanwan?

4 ¿Imaraykun Jehová Dios jatun guerranta comparan Meguidó llaqtapi pasasqanwan? Meguidó llaqtaq wayq’onpi askha guerrakuna aparikusqanrayku. Mayninpin chay guerrakunapi Jehová Dios llaqtanta yanaparan. Juj kutinmi Meguidó qayllapi mayuwan juez Baracta yanaparan Sísarata Canaán ejercitontawan ch’usaqyachinanpaq. Jinan Baracpas profetisa Deborapas Jehová Diosta agradecekuranku enemigonkuta vencesqankumanta. Chaymi takispa niranku: ‘Janaq pachamantan qoyllurkuna [Sísara contra] maqanakamurqanku. Cisón mayun llapanta apapuran’, nispa (Juec. 5:19-21).

5. ¿Imapin jujniray Armagedonwan Baracpa maqanakusqan guerrawan?

5 Baracwan Deborawanmi takiyta tukushaspa niranku: “Wañuchisqapuni kachun llapan auqaykikunaqa. Qan munakuqtaq k’ancharichun, inti jinaraq wach’irichunku”, nispa (Juec. 5:31). Armagedonpipas Jehová Diospa enemigonkunan wañuchisqa kanqaku, serviqninkunan ichaqa salvakunqaku. Ichaqa, ¿imapin jujniray Armagedonwan Baracpa maqanakusqan guerrawan? Diospa serviqninkunaqa manan Armagedonpi maqanakunqakuchu nitaq armantinchu kanqaku. Aswanpas paykunaqa confianqaku Jehová Diospi ejercitonpi ima, chaymi mana manchakunqakuchu (Is. 30:15; Apo. 19:11-15).

6. ¿Imakunata ruwaspan Jehová Dios enemigonkunata Armagedonpi ch’usaqyachinqa?

6 ¿Imaynatan Jehová Dios enemigonkunata Armagedonpi ch’usaqyachinqa? Yaqapaschá terremotokunawan, chijchikunawan otaq rayokunawanpas (Job 38:22, 23; Ezeq. 38:19-22). Otaq enemigonkuna paykunapura wañuchinakunqaku (2 Crón. 20:17, 22, 23). Otaq angelninkuna enemigonkunata wañuchinqa (Is. 37:36). Imataña ruwanqa chaypas ch’usaqyachinqapunin enemigonkunataqa. Llapa enemigonkunan chinkachisqa kanqaku, chanin runakunataq salvakunqaku (Prov. 3:25, 26).

¿IMAKUNAN PASANQA MANARAQ ARMAGEDÓN CHAYAMUSHAQTIN?

7, 8. a) 1 Tesalonicenses 5:1-6 textopi nisqanman jina, ¿ima nispan pachantinpi kamachikuqkuna ninqaku? b) ¿Imaraykun chay nisqanku mana allinpuni kanqa?

7 “Thajmi kasunchis, allin waqaychasqan kasunchispas” nispan ninqaku manaraq Diospa p’unchaynin chayamushaqtin (leey 1 Tesalonicenses 5:1-6). 1 Tesalonicenses 5:2 textopi ‘Jehová Diospa p’unchayninmanta’ rimaspaqa “manchay ñak’ariy” tiempomantan rimashan (Apo. 7:14). ¿Imaynapin yachasun ‘manchay ñak’ariy p’unchay’ qallarinanpaqña kashasqanta? “Thajmi kasunchis, allin waqaychasqan kasunchispas” nispa willaqtinku, chaymi juj señal jina kanqa “manchay ñak’ariy” tiempo chayamushasqanmanta.

8 Pachantinpi kamachikuqkunan ninqaku: “Thajmi kasunchis, allin waqaychasqan kasunchispas” nispa. ¿Imarayku chayta ninqaku? ¿Religionpi umalliqkunapas  yanapakunqakuchu? Yaqapaschá. Ichaqa chay nisqankuqa supaykunamantan jamunqa. Thajmi kasunchis nisqankuqa mana allinpunin kanqa. ¿Imarayku? Runakunatan creechinqa thaj kausay kashananpaq, chaymi mana reparanqakuchu “manchay ñak’ariy” tiempo chayamushasqanta. Jinan “qonqaylla ch’usaqyachisqa kanqaku, imaynan onqoq warmitapas qonqaylla nanay jap’in chhaynata”. Diosta serviqkunan ichaqa manchay ñak’ariy p’unchay chayamuqtin preparasqa kashanqaku.

9. ¿Jujpaqkamachu Jehová Dios Satanaspa kamachisqan pachata chinkachinqa?

9 Jehová Diosqa manan Noepa tiemponpi jinachu Satanaspa kamachisqan pachata jujpaqkama chinkachinqa. Ñaupaqtan llapa pantasqa religionkunata chinkachinqa, paykunatan “jatun Babilonia” nispa nikun. Qhepamantaq Armagedón guerrapi Satanaspa kamachisqan puchuqta chinkachipunqa: kamachikuqkunata, ejercitonkunata, negociantekunatapas. Astawanraq yachasun imayna kananmanta.

10. Apocalipsis 17:1, 6; 18:24 textopi nisqanman jina, ¿imanaqtinmi Jehová Dios pantasqa religionkunata chinkachipunqa?

10 ‘Qhelli kausaypi puriq warmi castigasqa kanqa’ (leey Apocalipsis 17:1, 6; 18:24). Pantasqa religionkunan Jehová Diospa sutinta sinchitapuni qhellichanku. Diosmantan mana cheqaqtachu yachachinku, Diosta qhepanchaspataq kamachikuqkunata apoyanku. Runakunamantataq qolqenkuta suwanku sarunchanku ima. Jinaspapas askha runakunatan wañuchiranku Diospa serviqninkunata ima (Apo. 19:2). ¿Imaynatan Jehová Dios pantasqa religionkunata chinkachinqa?

11. ¿Pitaq k’anchaq puka colorniyoq animalri? ¿Imaynatan Jehová Dios chay millay animalwan jatun Babiloniata ch’usaqyachinqa?

11 Jehová Diosmi chunka waqrakunayoq k’anchaq puka colorniyoq animalwan pantasqa religionkunata chinkachinqa. Chay millay  animalqa Organización de las Naciones Unidas nisqan, chunka waqrankunataq chay organizacionman perteneceq gobiernokuna. Diosmi señalasqan tiempopi chay gobiernokunata tanqanqa jatun Babiloniata chinkachinankupaq. ‘Lliutan ch’utinqaku, jinaspa q’alallata saqerparinqaku’, chaywanqa nishan lliu kaqninta qechunankumanta, millay ruwasqantapas sut’iman orqonankumantawan (Apo. 17:3, 16). Ratollan ch’usaqyachinqaku juj p’unchayllapi jinalla, chaymi yanapaqninkunapas musphanqakuraq. ¿Imarayku? Payqa sapa kutillanmi niq: “Noqaqa reinan kani, manan viudachu kasaq, manataqmi jayk’aqpas waqasaqchu”, nispa (Apo. 18:7, 8).

12. ¿Imaraykun Jehová Dios serviqninkunata pakaykunqa?

12 Diosta serviqkunaqa jatun Babiloniamantan lloqsiranku, mana p’enqakuspataqmi Diospa sutinta apanku, chaymi Diosqa paykunata enemigonkunamanta pakaykunqa (Hech. 15:16, 17; Apo. 18:4). Chaymantapas Diosta serviqkunaqa jujkunatan yanaparanku jatun Babiloniamanta lloqsipunankupaq, chaymi mana castigasqachu kanqaku. Chaywanpas allin iñiyniyoqmi kananku kanqa.

Gog Diospa llaqtan contra phawaykuqtinqa Jehová Diosta serviqkunaqa Diospin confianqaku (13 parrafota qhaway) *

13. a) ¿Pitaq “Gog” nisqari? b) Ezequiel 38:2, 8, 9 textopi nisqanman jina, ¿imaraykun Gog Diospa llaqtan contra phawaykunqa?

13 Gog nisqa Diospa llaqtan contra phawaykunqa (leey Ezequiel 38:2, 8, 9). Imaynan jatun wayraq pasasqan qhepaman mayninpi juj sach’alla sayashaq qhepan, chay jinatan Diospa llaqtanpas sapallan qhepanqa llapa pantasqa religionkuna chinkachisqa kaqtin. Chaymi Satanasqa sinchitapuni phiñakunqa, jinaspa llulla willakuykunawan llapa gobiernokunata tanqanqa Diospa llaqtan contra phawaykunankupaq (Apo. 16:13, 14). ¿Pitaq “Gog” nisqari? Chayqa llapa juñunasqa gobiernokunan. Paykuna Diospa llaqtan contra phawaykuqtinkun Armagedón guerra qallarinqa (Apo. 16:16).

14. ¿Imatan Gog yachanqa?

 14 Gogqa ejercitonkunapin confianqa (2 Crón. 32:8). Noqanchismi ichaqa Jehová Diosninchispi confiasun. Kamachikuqkunan ninqaku: “¿Imanantaq kaykunatari? Manamá riki jatun religionkunatapas diosninkuqa salvaranchu, chaychu confianku Diosninku salvananpi”, nispa (Apo. 17:16). Chaymi gobiernokunaqa piensanqaku ratolla Diospa llaqtanta ch’usaqyachinankupaq. Chayrayku pacha phuyu jinaraq phawaykamunqaku (Ezeq. 38:16). Chayllamanmi ichaqa reparakunqaku Jehová Dioswan maqanakushasqankuta jinaspa mana maymanpas ayqekuyta atinqakuchu, imaynan faraonpas Puka lamar-qochapi kashaspa reparakuran jinata (Éx. 14:1-4; Ezeq. 38:3, 4, 18, 21-23).

15. ¿Imatan Jesús Armagedón guerrapi ruwanqa?

15 Criston ejercitonwan Diospa llaqtanta defiendenqaku, llapa gobiernokunatataq ejercitontawan chinkachinqaku (Apo. 19:11, 14, 15). Ichaqa, ¿iman pasanqa Satanasta? Jesusmi paytapas supaykunatapas chinkay-chinkay ukhuman wijch’uykunqa waranqa watapaq (Apo. 20:1-3).

¿IMAKUNATAN RUWANANCHIS SALVAKUNANCHISPAQ?

16. a) ¿Imakunatan ruwananchis Dios reqsisqanchista rikuchinanchispaq? b) ¿Iman pasanqa Diospa sonqonpaq jina kausaqkunawan Armagedón guerra chayamuqtin?

16 Armagedón guerrapi salvakunanchispaqqa Jehová Diostan reqsinanchis, Jesusmanta allin willakuykunatataq kasukunanchis (2 Tes. 1:7-9). Diosta reqsinanchispaqqa yachananchismi imachus kusichisqanta, mana kusichisqanta, mayqenkunachus kamachikuyninkuna kasqantapas. Chaymantapas paytan munakunanchis, kasukunanchis, adorananchispas (1 Juan 2:3-5; 5:3). Sichus chaykunata ruwasun chayqa, Diosmi allinpaq qhawariwasun (1 Cor. 8:3). Jinaspa Armagedón guerrapi salvawasun.

17. ¿Imaynatan rikuchinchis Jesusmanta allin willakuykunata kasukusqanchista?

17 ¿Imataq Jesusmanta allin willakuykunari?  Chayqa Jesuspa llapa yachachisqanmi, Bibliapitaq tarikun. Jesuspa yachachisqanta kasukusqanchistan rikuchinchis chayman jina kausaspa, Jehová Dios serviyta ñaupaqman churaspa, Diospa gobiernonmanta willaspa ima (Mat. 6:33; 24:14). Chaymantapas janaq pachapaq ajllasqa cristianokunatan yanapananchis, paykunaq ruwayninkuqa ancha importanten (Mat. 25:31-40).

18. ¿Imaynatan janaq pachaman riq cristianokuna yanapanqaku waj ovejakunata?

18 Pisi tiempollamantan janaq pachaman riq cristianokuna waj ovejakunata yanapanqaku paykunata yanapasqankurayku (Juan 10:16). Manaraq Armagedón guerra qallarishaqtinmi 144.000 cristianokunaqa Jesuspa ejercitonpiña kashanqaku mana wañuq cuerpoyoq, jinaspa Gogta chinkachinqaku, ovejaman rijch’akuq ancha askha cristianokunatataq pakaykunqaku (Apo. 2:26, 27; 7:9, 10). Waj ovejakunaqa maytachá kusikunqaku janaq pachaman riq cristianokunata kay pachapi kashaqtinku yanapasqankumanta.

¿IMATAN RUWANANCHIS JUNT’AQ SONQOLLA KANANCHISPAQ?

19, 20. ¿Iman yanapawasun ima sasachakuypiña tarikuspapas junt’aq sonqolla kashananchispaq?

19 Kay tukukuy tiempopin Dios serviqkunaqa imaymana sasachakuykunata aguantashanku. Ichaqa, ¿iman yanapawasun kusisqa sonqowan aguantananchispaq? (Sant. 1:2-4). Tukuy sonqomanta Diosmanta mañakuymi (Luc. 21:36). Chaymantapas sapa p’unchaymi Bibliata estudiananchis, yachasqanchispitaq piensananchis. Ejemplopaq, estudiasunmanmi jamuq tiempomanta profeciakunata (Sal. 77:12). Sichus chaykunata ruwasun, tukuy sonqomantataq Diosmanta runakunaman willasun chayqa, allin iñiyniyoq suyakuyniyoq iman kasunchis.

20 Maytachá kusikusun pantasqa religionkuna manaña kaqtin Armagedón guerra tukuqtinpas. Astawanqa kusikusun llapa runakuna Jehová Diospa sutinta jatunchaqtinku, kamachikusqanta respetaqtinku ima (Ezeq. 38:23). Chaymi Armagedón guerra chayamuqtin kusikunqaku Diosta reqsiqkuna, Jesusta kasukuqkuna, tukukuykama aguantaqkunapas (Mat. 24:13).

143 TAKI Makilla suyakusun

^ párr. 5 Askha watakunañan suyakushanchis Armagedón chayamunanta. ¿Imataq Armagedonri? ¿Imakunan pasanqa manaraq chayamushaqtin? ¿Imakunatan ruwananchis Armagedón chayamunankama junt’aq sonqo kashanallanchispaq? Chaykunamantan kaypi yachasunchis.

^ párr. 71 FOTOMANTA WILLAKUY: Jamuq tiempopi imaymanakuna pasashaqtinpas noqanchisqa: 1) Atisqanchisman jinan runakunaman Diosmanta willashallasun, 2) Bibliata estudiashallasun, 3) Jehová Dios pakaykuwananchispi confiasun.

^ párr. 85 DIBUJOMANTA WILLAKUY: Guardiakunan juj familiaq wasinman jaykunankupaqña kashanku, paykunan ichaqa confianku Jesuspas angelninkunapas yanapanankumanta.