Kichay leenaykipaq

Índice nisqaman riy

 28 ESTUDIO

Jehová Diosta servishallasun qatikachasqaña kaspapas

Jehová Diosta servishallasun qatikachasqaña kaspapas

“Manapuni imachus rikusqaykumanta imachus uyarisqaykumantawan willaytaqa upallakusaqkuchu” (HECH. 4:19, 20)

122 TAKI “Qaqata sayaychis”

KAYKUNAMANTA YACHASUN *

1, 2. a) ¿Imaraykun mana admirakunanchischu Jehová Dios servinanchista autoridadkuna jark’awaqtinchis? b) ¿Imamantan kay estudiopi yachasun?

ASKHA nacionkunapin 2018 watapi 223.000 hermanonchiskunata jark’aranku Jehová Dios servinankuta, wakintaqa tukuy ruwanankutan jark’aranku. Chaywanqa manan admirakunanchischu, ñaupaq estudiopi yachasqanchis jina cheqaq cristianokunaqa qatikachasqan kananchis karan (2 Tim. 3:12). Maypiña tiyanchis chaypas autoridadkunaqa qonqayllan jark’awasunman Jehová Dios servinanchista.

2 Autoridadkuna Dios servinanchista jark’awaqtinchisqa, yaqapaschá tapukusunman: “¿Manañachu Jehová Dios allinpaq qhawarin servisqanchista? ¿Manañachu Jehová Dios adorayta atisunchis? ¿Juj nacionmanchu ripunay Jehová Diosta mana jark’asqalla adoranaypaq?”, nispa. Kay estudiopin chay tapuykunata kutichisunchis. Yachallasuntaqmi qatikachasqaña kaspapas Jehová Diosta servishanallapaq imata ruwananchista imata mana ruwananchistapas.

¿MANAÑACHU JEHOVÁ DIOS ALLINPAQ QHAWARIN SERVISQANCHISTA?

3. 2 Corintios 11:23-27 textopi nisqanman jina, ¿imakunapin apóstol Pablo tarikuran? ¿Imatan yachanchis paywan pasasqanmanta?

3 Autoridadkuna Dios servinanchista jark’awaqtinchisqa yaqapaschá piensasunman Jehová Dios servisqanchista manaña allinpaqchu qhawarinanpaq. Ichaqa manan chhaynachu. Rimasun apóstol Pablomanta, Jehová Diosqa kusikuranmi paypa ruwasqanwan. Chaymi 14 cartakunata Mosoq Testamentopi qelqaran, waj nacionkunaman predicananpaqtaq  ajllaran. Chaywanpas sinchi qatikachasqan karan (leey 2 Corintios 11:23-27). Chaywanmi yachanchis junt’aq sonqo serviqninkuna qatikachasqa kananchista.

4. ¿Imaraykun runakuna cheqnikuwanchis?

4 Jesusqa willaranmi qatikachasqa kananchista, kay pacha runakuna jina mana kasqanchisrayku cheqnisqa kananchistapas (Juan 15:18, 19). Chaymi mana ninanchischu: “Diosqa manan bendeciwashanchischu”, nispaqa. Aswanmi qatikachasqa kasqanchis rikuchin allin kaqta ruwashasqanchista.

¿MANAÑACHU JEHOVÁ DIOS ADORAYTA ATISUNCHIS?

5. ¿Imaraykun ninchis: “Runakunaqa manan Jehová Dios servisqanchista chinkachiyta atinkuchu”, nispa? Juj ejemplota willay.

5 Runakunaqa manan tukuy atiyniyoq Dios servisqanchista chinkachiyta atinkumanchu. Askhaña chayta ruwayta munaranku chaypas manan atirankuchu. Rimasun segunda guerra mundialpi imachus pasasqanmanta. Askha gobiernokunan mana khuyapayaspa hermanonchiskunata qatikacharanku Alemania, Australia, Canadá, juj nacionkunapipas. Chaytaña ruwaranku chaypas Jehová Diospa yanapayninwanmi Diosta serviqkunaqa astawan yapakuran. 1939 watapi chay guerra qallariqtinqa 72.475 Testigokunan karanchis, 1945 watapi chay guerra tukushaqtinmi ichaqa 156.299 más Testigokunaña karanchis.

6. ¿Imaynatan qatikachasqa kasqanku hermanonchiskunata yanaparan? Juj ejemplota willay.

6 Qatikachasqa kasqanchisqa Diosta astawan servinapaqmi yanapawasunman. Juj matrimoniomanta rimasun. Paykunaqa juj wawayoqmi karanku tiyasqanku nacionpitaq gobierno Dios servinanchista jark’ayta qallariran. Paykunaqa manan manchakurankuchu, aswanmi precursor regular jina Diosta serviranku. Esposanqa llank’anantaraqmi saqeran precursora kananpaq. Qosanmi nin: “Qatikachasqa kasqaykuraykun askha runakuna Testigokunamanta yachayta munaranku, jinan facil-llata Bibliamanta estudiota askhaman qoyta qallarirayku”, nispa. Hermanokunatapas yanaparanmi, juj umalliqmi nin: “Askha hermanonchiskunan Jehová Dios serviyta saqepusharanku, ichaqa qatikachay qallariqtinmi jujmanta juñunakuykunaman jamuranku predicaqpas lloqsiranku”, nispa.

7. a) ¿Imatan Levítico 26:36, 37 textopi nisqanmanta yachanchis? b) ¿Imatan ruwanki qatikachasqa kaqtiyki?

 7 Yaqapaschá enemigonchiskunaqa llullakuspa noqanchismanta rimanqaku, guardiakunata kachamunqaku wasinchispi imachus kasqanta maskhanankupaq, juezkunaman apawasunman, otaq wakin hermanonchiskunata carcelman wisq’anqaku. Paykunaqa piensankun: “Carcelman wakinta wisq’asun chayqa mancharikunqakun”, nispa. Sichus imachus ruwawananchismanta manchakusunman chayqa manañan ñaupaqpi jinachu Diosta servisunman otaq Dios serviyta saqepusunman. Noqanchisqa manan Levítico 26:36, 37 (leey) textopi willasqan runakuna jinaqa kayta munanchischu. Manan permitinanchischu Dios servinanchista pisiyachinankuta, tatichinankutapas. Tukuy sonqowanmi Diospi confiananchis manataqmi manchakunanchischu (Sal. 27:1). Diosmantan mañakunanchis pusawananchispaq, paypa yanapayninwanqa manan mayqen gobiernopas Diosta tukuy sonqowan servinanchistaqa jark’awasunchu (Heb. 13:6).

¿JUJ NACIONMANCHU RIPUNAY?

8, 9. a) ¿Imatan familiapi umalliqkuna decidinanku? b) ¿Iman yanapawasunman allinta decidinapaq?

8 Dios servinanchista jark’akuq nacionkunapi tiyaq hermanokunaqa yaqapaschá piensankuman juj nacionman ripuyta chaypi Jehová Diosta libre servinankupaq. Chaytaqa sapankan decidinan. Wakinqa yaqapaschá piensankuman apostolkunaq tiemponpi imatachus cristianokuna ruwaranku qatikachasqa kaqtinku chaypi. Judiokuna Estebanta wañuchisqanku qhepamanmi cristianokunaqa Jerusalenmanta ripuranku Judea, Samaria ladopi kaq llaqtakunaman, wakinqa Fenicia, Chipre, Antioquía llaqtakunamanraqmi ripuranku (Mat. 10:23; Hech. 8:1; 11:19). Wakinqa yaqapaschá apóstol Pabloq ruwasqanpi piensankuman, payqa qatikachasqa llaqtakunapi qhepakunanpaqmi decidiran, chay llaqtakunapi predicananpaq qatikachasqa hermanokunata kallpachananpaq ima (Hech. 14:19-23).

9 ¿Imatan chay willakuykunamanta yachanchis? Familiapi umalliqkunan chaytaqa decidinanku. Ichaqa manaraq decidishaspan Jehová Diosmanta mañakunanku allintataq qhawarinanku familianpa situacionninta, imakunapi allinninpaq kasqanta mana allinninpaq kasqantapas. Chaypiqa ‘sapankan q’epinta apanan’ (Gál. 6:5). Manataqmi pipas juzgananchu imatachus decidisqanmanta.

¿IMAYNATAN DIOSTA SERVISHALLASUNMAN QATIKACHASQAÑA KASPAPAS?

10. ¿Imata ruwananchispaqmi sucursalpi umalliqkuna iñiq t’aqapi umalliqkunapas niwasun?

10 ¿Imaynatan Jehová Diosta servishallasunman qatikachasqa kaspapas? Sucursalpi umalliqkunan iñiq t’aqapi umalliqkunaman willanqa imaynata qelqanchiskunata chaskinanchispaq, juñunakuypas predicacionpas imayna aparikunantawan. Sichus sucursalpi umalliqkuna mana iñiq t’aqakunapi umalliqkunawan rimayta atinqakuchu chayqa, iñiq t’aqakunapi umalliqkunan niwasun Bibliapi qelqanchiskunapi nisqanman jina imaynata Diosta servishanallapaq (Mat. 28:19, 20; Hech. 5:29; Heb. 10:24, 25).

11. a) ¿Imaraykun seguro kashanchis allin iñiyniyoq kanapaq imachus necesitasqanchista chaskinanchismanta? b) ¿Imatan ruwananchis qelqanchiskunata cuidanapaq?

11 Diosqa prometewanchismi iñiyninchispi allin kananchispaq necesitasqanchista qowananchispaq (Is. 65:13, 14; Luc. 12:42-44). Chaymi llaqtanqa tukuy atisqanta ruwanqa  imachus necesitasqanchista qowananchispaq. Ichaqa, ¿imatan ruwananchis qatikachasqa kaspa? Maskhananchismi juj lugarta Bibliata juj qelqanchiskunatapas pakananchispaq. Chay qelqanchiskunataqa manan maypipas comuntaqa churananchischu, papelpiña otaq celularninchispiña kaqtinpas, mana chayqa facil-llatan enemigonchiskuna tarinkuman. Sapankanchismi tukuy atisqanchista ruwananchis chay sasa tiempopi allin iñiyniyoq kanapaq.

Jehová Diospa yanapayninwanqa mana manchakuspan juñunakushallasun (12 parrafota qhaway) *

12. ¿Imatan umalliqkuna ninkuman juñunakuykuna imayna aparikunanmanta?

12 ¿Iman pasanman juñunakuyninchiskunawan? Umalliqkunan niwasunman mana pipas yachananpaq jina juñunakuykuna aparikunanta. Yaqapaschá juch’uy grupokunallapi juñunakunanchis kanqa, jinaspapas ima hora juñunakusqanchis maypi juñunakusqanchispas sapa kutillachá cambianqa. ¿Imatan ruwasunman guardiakuna hermanokunata ama jap’inankupaq? Manan alto kunkawanchu rimananchis, yaqapaschá común p’achawan churakuspalla rinanchispas kanqa, chhaynapi enemigonchiskuna mana yachananpaq.

Autoridadkunaña jark’akuqtinkupas predicashallasunmi (13 parrafota qhaway) *

13. ¿Imatan yachanchis antigua Unión Soviética nacionpi hermanokunamanta?

13 Qatiykachasqa nacionkunapi hermanokunaqa manan kaqllatachu predicanku. Jehová Diosta munakuspa gobiernonmanta rimayta munasqanchisraykun imaynamantapas predicasunpuni (Luc. 8:1; Hech. 4:29). Testigokunamanta yachaq Emily Baran niran: “Antigua Unión Soviética nacionmanta autoridadkunan Testigokunata jark’aranku jujkunaman iñiyninkumanta predicanankuta, jinan Testigokunaqa vecinonkunaman, llank’ananpi compañeronkunaman, amigonkunamanpas predicaranku. Carcelpi wisq’asqaña karanku chaypas, presomasinkumanmi predicaranku”, nispa. Chay hermanonchiskunaqa predicashallarankun qatikachasqaña kaqtinkupas. Noqanchispas paykuna jinan decidikunanchis predicashanallanchispaq gobiernoña jamuq tiempopi jark’awaqtinchispas.

¿IMA TRAMPAKUNAMANTAN CUIDAKUNANCHIS?

Yachananchismi upallakuyta (14 parrafota qhaway) *

14. Salmos 39:1 textopi nisqanman jina, ¿imatan mana ruwanachu?

14 Manan jujkunaman willanachu mana yachanankutaqa. Diosta servinanchispaq jark’asqa kaqtinchisqa yachananchismi ‘upallakuyta’ (Ecl. 3:7). Manan autoridadkunaman, amigonchiskunaman nitaq familianchiskunamanpas willananchischu hermanokunaq sutinta, maypi juñunakusqanchista, imayna predicasqanchista, imaynata qelqanchiskunata chaskisqanchistapas. Sichus willasunman chayqa, hermanonchiskunaq vidantan peligropi churasunman (leey Salmos 39:1).

15. ¿Imatan Satanás noqanchiswan ruwayta munanqa? ¿Imaynatan chaymanta cuidakusunman?

 15 Ima jawallapas hermanonchiskunawan t’aqanakuyqa manan allinchu. Satanasqa yachanmi juj wasipi tiyaqkuna t’aqanasqa kaspaqa mana allinpi tukunankuta (Mar. 3:24, 25). Chaymi t’aqanasqa kausananchista munan. Chhaynata kausaspaqa noqanchispuran maqanakapusunman Satanaswan maqanakunamantaqa.

16. ¿Imatan yachanchis Gertrud hermananchispa ruwasqanmanta?

16 Allin iñiyniyoq hermanokunapas cuidakunankun. Rimasun Gertrud Poetzinger, Elfriede Löhr hermanakunamanta. Paykunaqa janaq pachaman rinankupaq suyakuyniyoqmi karanku, juj hermanakunawan kuskan Alemania nacionpi carcelpi jina wisq’asqa karanku. Gertrud hermanan ichaqa envidiakuyta qallariran Elfriede hermanamanta kallpachanapaq jina discursokunata qosqanwan. Qhepamanmi ichaqa mana allin ruwasqanta reparakuspa Diospa yanapayninta mañakuran. Paymi nin: “Entiendenaymi karan jujkuna noqamanta aswan allin yachachiq más responsabilidadniyoq kasqankuta”, nispa. ¿Iman yanaparan amaña envidiakunanpaq? Elfriede hermanaq sumaq sonqoyoq kasqanta rikusqanmi. Jinan paywan jujmanta allinpi kausaranku. Carcelmanta lloqsimuspataq Diosta wañupunankukama junt’aq sonqowan serviranku. Piwanpas problemapi tarikuspaqa kallpachakunanchismi allichananchispaq, chhaynapin manaña t’aqanasqachu kausasun (Col. 3:13, 14).

17. ¿Imaraykun kasukunanchis umalliqkunaq kamachisqankuta?

17 Kasunanchismi imachus kamachiwasqanchista. Sichus umalliqkunata imachus nisqankuta kasukusun chayqa, manan ima llakipipas tarikusunchu (1 Ped. 5:5). Juj nacionpin autoridadkuna hermanokunata jark’aranku Dios servinankuta, chaymi umalliqkunaqa hermanokunata kamachiranku predicashaspa ama pimanpas qelqanchiskunata saqenankupaq. Juj precursormi ichaqa yachaqman tukuspa mana kasukuranchu. ¿Iman qhepaman pasaran? Juj p’unchaymi runaq kasqanpi predicasqankumanta kutimpushaqtinku guardiakuna payta juj hermanokunatawan tapuranku qelqakuna saqesqankumanta. Yaqachus jina pikunamanchus saqesqankuta yachaspa paykunata jap’iranku. ¿Imatan chaymanta yachanchis? Umalliqkunaq kamachisqantan kasukunanchis jujniraymantaña ruwayta munasunman chaypas. Sichus umalliqkunaq nisqanta kasukusun chayqa Jehová Diosqa bendeciwasunmi (Heb. 13:7, 17).

18. ¿Imaraykun mana imaymanapaqchu kamachikuykunata churana?

 18 Manan imaymanapaqchu kamachikuykunata churana. Umalliqkuna imaymanapaq kamachikuykunata churankuman chayqa hermanokunapaqmi sasa kanman. Juraj Kaminský hermanon antigua Checoslovaquia nacionpi qatikachay kasqanmanta nin: “Askha umalliqkunata jap’iqtinkun, wakin umalliqkunaqa imaymanapaq kamachikuykunata churayta qallariranku, juj listatan ruwaranku imakunata ruwakunanpaq mana ruwakunanpaqpas”, nispa. Jehová Diosqa manan jujpa rantinpi decidinanchispaqqa kamachiwanchischu. Imaymanakunapaq kamachikuykunata churaspaqa manan iñiqmasinchiskunata cuidashanchischu, aswanpas iñiyninkupi kamachiqmi kashanchis (2 Cor. 1:24).

MANAN JAYK’AQPAS JEHOVÁ DIOS SERVIYTA SAQENANCHISCHU

19. 2 Crónicas 32:7, 8 textopi nisqanman jina, ¿imaraykun mana manchakunanchischu Satanasta imataña ruwaqtinpas?

19 Satanasqa sinchi millay enemigonchismi, payqa qatikachashallanqan Jehová Diospa serviqninkunata (1 Ped. 5:8; Apo. 2:10). Paypas yanapaqninkunapas jark’aytan munanqaku Jehová Dios adorananchista. Mayninpi manchakusunmanña chaypas manan Jehová Dios serviytaqa saqenanchischu (Deut. 7:21). Diosninchisqa noqanchiswanmi kashan, payqa yanapawashallasunmi autoridadkuna jark’akuqtinkupas (leey 2 Crónicas 32:7, 8).

20. ¿Imata ruwanaykipaqmi decidisqa kashanki?

20 Ñaupaq tiempopi hermanonchiskunatan qatikunanchis, paykunan autoridadkunata niranku: “Diosta uyarinaykumantaqa qankunata uyariykuman chayqa, ¿allinpaqchu Dios chayta qhawarinman? Chhaynatachus piensankichis chayqa, qankunamantañachá chayqa kanqa. Noqaykun ichaqa manapuni imachus rikusqaykumanta imachus uyarisqaykumantawan willaytaqa upallakusaqkuchu”, nispa (Hech. 4:19, 20).

73 TAKI Yanapaykuway ama manchakunaypaq

^ párr. 5 ¿Imatan ruwananchis Jehová Dios serviyninchista autoridadkuna jark’awaqtinchis? Kay estudiopin yachasun Jehová Diosta servishanallapaq imata ruwananchista imata mana ruwananchistapas.

^ párr. 59 FOTOMANTA WILLAKUY: Testigokunata qatikachasqanku llaqtakunamanta fotokuna. Kay fotopin juj hermanoq wasinpi juch’uy grupollapi hermanonchiskuna juñunakushanku

^ párr. 61 FOTOMANTA WILLAKUY: Juj hermananchismi mana reparachikuspalla juj warmiman Jehová Diosmanta willashan.

^ párr. 63 FOTOMANTA WILLAKUY: Juj hermanonchistan guardiakuna obligayta munashanku rimananpaq, paymi ichaqa mana imatapas willanchu.