Kichay leenaykipaq

Índice nisqaman riy

 34 ESTUDIO

Mosoq asignacionniykiman yachakuy

Mosoq asignacionniykiman yachakuy

“Diosqa chaninpunin, payqa manapunin qonqanqachu imachus ruwasqaykichista sutinta munakusqaykichistapas” (HEB. 6:10)

38 TAKI Paymi kallpachasunki

KAYKUNAMANTA YACHASUN *

1-3. ¿Imaraykun wakin iñiqmasikuna tukuy tiemponkuwan Dios serviyninkuta saqepunku?

ROBERTWAN Marywanmi 21 watata misionero karanku. Chay qhepamanmi ichaqa tawantin onqosqa tayta-mamankuta cuidaranku. Paykunan ninku: “Kusikuraykun paykunata cuidaspa, chaywanpas sonqoykuqa nanawankuraqmi misionero kasqaykuta yuyariqtiyku”, nispa.

2 Williamwan Teresawantaq ninku: “Onqopusqaykuraykun manaña asignacionniykuman kutiyta atiraykuchu. Maytan sonqoyku nanawaranku waj llaqtakunapi Diosta mana servisqaykumanta”, nispa.

3 Aleksey nin: “Yacharaykun autoridadkuna Betel wasita wisq’ayta munasqankuta, chay p’unchay chayamuqtinmi ichaqa mana imanakuyta atiraykuchu Betelpi manaña llank’asqaykumanta”, nispa.

4. ¿Ima tapuykunamantan kay estudiopi yachasun?

4 Chaymantapas tukuy tiemponkuwan Diosta serviq askha iñiqmasikunan mosoq asignacionta chaskiranku. * Paykunapaqqa sasachá karan sumaq llank’ayninkuta saqeyqa. ¿Iman yanapanman mosoq asignacionninkuman yachakunankupaq? ¿Imaynatan paykunata yanapasunman? Chaykunamanta yachayqa yanapawasunmi llapanchistapas imaña pasawaqtinchispas.

 ¿IMATAN RUWASUNMAN CAMBIOKUNA KAQTIN?

¿Imaraykun sasa kanman tukuy tiemponkuwan Diosta serviqkunapaq asignacionninku cambiaqtin? (5 parrafota qhaway) *

5. ¿Imapin wakin hermanokuna tarikunku asignacionninku cambiaqtin?

5 Betelpiña otaq predicaspaña Diosta servinchis chaypas, anchatan munakunchis asignacionninchista iñiqmasinchiskunatapas. Chaymi sonqonchis nanan ripuqtinchis, llakikunchistaq saqesqanchis hermanokunamanta, astawanqa qatikachasqa kaqtinku (Mat. 10:23; 2 Cor. 11:28, 29). Chaymantapas sasan kanman waj llaqtaman yachakuyqa. Llaqtanchismanña kutisunman chaypas sasan kanman. Robertwan Marywanmi ninku: “Sasan karan llaqtaykuman yachakuy, rimasqayku simipi predicaypas, manapas llaqtaykuchu kanman jinatan qhawarirayku”, nispa. Wakinqa asignacionninku cambiaqtinmi juj gastokunapi tarikuspa llakisqa, manchasqa sientekunku. Chhaynaqa, ¿iman paykunata yanapanman?

Diospa yanapaynintan mañakunanchis, paypitaq confiananchis (6, 7 parrafokunata qhaway) *

6. ¿Imatan ruwasunman Jehová Diosman jap’ipakunanchispaq?

6 Jehová Diosman jap’ipakuy (Sant. 4:8). Manan iskayananchischu mañakusqanchista uyarisqanmantaqa (Sal. 65:2). Salmos 62:8 textopin niwanchis: “Sonqoykichista payman mast’ariychis”, nispa. Jehová Diosninchisqa ‘imachus mañakusqanchismantapas aswantaraqmi ruwanqa’ (Efes. 3:20). Chaymantapas ima sasachakuyninchistapas allichanmanmi, mana allichakuy atiyña kanman chaypas.

7. a) ¿Iman yanapawasunman Diospa sonqonpaq jina kausananchispaq? b) Hebreos 6:10-12 textopi nisqanman jina, ¿iman kanqa junt’aq sonqowan Jehová Diosta servishallaqtinchis?

7 Diospa sonqonpaq jina kausananchispaqqa sapa p’unchaymi Bibliata leenanchis yachasqanchispitaq piensananchis. Juj hermanon ñaupaqpi misionero karan, paymi nin: “Ñaupaq asignacionniykupi jinan mana saqeykuchu juñunakuykunapaq preparakuyta, familiantin Dios adoraytapas”, nispa. Chaymantapas tukuy atisqankutan predicaypi yanapakunku iñiq t’aqankupi. Jehová Diosqa manan qonqanchu junt’aq sonqowan serviqninkunata, manaña ñaupaqpi jinañachu ruwaqtinkupas (leey Hebreos 6:10-12).

8. ¿Imaynatan yanapawanchis 1 Juan 2:15-17 textopi nisqan?

 8 Pisillawan kausay. Sichus imaymanayoq kayta munasun chayqa, Jehová Dios serviytan saqepusunman (Mat. 13:22). Diosta mana serviq runakunapas, familianchiskunapas otaq amigonchiskunapas niwasunmanmi: “Qolqeyoq kaspallan allin kanki”, nispa, ichaqa ama kasukusunchu (leey 1 Juan 2:15-17). Diospi confiasun, payqa yanapawasunmi allin iñiyniyoq kananchispaq, thaj sientekunanchispaq, necesitasqanchistataq qowasunpas (Heb. 4:16; 13:5, 6).

9. Proverbios 22:3, 7 textopi nisqanman jina, ¿imaraykun mana comunta manukunachu? ¿Iman yanapasunkiman allinta decidinaykipaq?

9 Ama qolqeta comunta manukuychu (leey Proverbios 22:3, 7). Juj ladoman astakuspaqa askhatan gastasunman, facil-llatataqmi manu rijurisunman. Chaymi mana rantinanchischu mana necesitasqanchis cosaskunata. Ima llakipipas tarikuspaqa mana allinta piensaykuspan qolqeta manukusunman. Ejemplopaq, familianchis onqosqa tarikuqtin. Chhaynapi tarikuspaqa Diosmantan rogakunanchis. Jinaspa pay yanapawasun thaj sientekunanchispaq, chhaynapitaq allinta imatapas decidisun (Filip. 4:6, 7; 1 Ped. 5:7).

10. ¿Imatan ruwasunman mosoq amigokunayoq kananchispaq?

10 Allin amigokunayoq kasun. Paykunawanmi rimawaq imayna sientekusqaykimanta ima sasachakuykunapi tarikusqaykimantapas, qan jina tarikuq amigokunan astawanqa yanapasunkiman ama nishuta llakikunaykipaq (Ecl. 4:9, 10). Ñaupaq asignacionniykipi amigoykikunaqa manan saqesunkikuchu, chaywanpas maskhanaykin mosoq amigokunata. Chaypaqqa qanmi ñaupaqta amigo kanayki, paykunamanmi willawaq Jehová Diosta servispa imakunata ruwasqaykimanta. Manaña wakin hermanokuna entiendenqakuchu tukuy tiempoykiwan Diosta servisqaykita chaypas, wakinqa munankumanmi astawan yachayta, jinaspa amigoykikuna kankuman. Ichaqa ama nishuta qanllamanta rimaychu, Diosta servispa imakunata ruwasqaykimantapas. Manataqmi willanaykichu mana willanapaq jina kaqkunamantaqa.

11. ¿Imatan casarasqakuna ruwananku sumaqta kausashanallankupaq?

11 Sichus asignacionniykichista saqepurankichis qosayki otaq esposayki onqosqanrayku chayqa, ama chaymanta payta tumpaychu. Sichus qan onqoranki chayqa ama niychu: “Noqaq kausaypin saqepurayku  asignacionniykuta”, nispaqa. Qankunaqa juj aychallañan kankichis, Diospa ñaupaqenpitaq prometenakurankichis imaña kaqtinpas munanakushanallaykichispaq (Mat. 19:5, 6). Wawayoq kasqaykichisrayku saqepurankichis chayqa, paymanmi entiendechinaykichis kunanqa payta uyway aswan importante kasqanta. Sut’itan willanayki Diospa regalon kasqanta (Sal. 127:3-5). Chaymantapas tukuy tiempowan Diosta servisqaykichismanta sumaq experienciakunatan willawaq, chayqa wawaykitan yanapanman Diosta tukuy tiemponwan serviyta munananpaq.

¿IMAYNATAN JUJKUNA YANAPAKUNKUMAN?

12. a) ¿Imaynatan yanapasunman tukuy tiemponkuwan Diosta serviqkunata asignacionninkupi kashanallankupaq? b) ¿Imaynatan hermanokunata yanapasunman mosoq asignacionninkuman ratolla yachakunankupaq?

12 Askha hermanokunan tukuy tiemponkuwan Diosta serviq hermanokunata yanaparanku asignacionninkupi kashanallankupaq. Chaytaqa ruwanku kallpachaspa, qolqeta qospa, necesitasqanku cosaskunata qospa, familiankuta cuidaspa ima (Gál. 6:2). Sichus asignacionninku cambiasqanrayku iñiq t’aqanchisman hermanokuna jamunku chayqa, manan piensananchischu: “Manachá allintachu llank’aranku otaq imatachá ruwaranku”, nispaqa. * Aswanmi yanapananchis ratolla iñiq t’aqanchisman yachakunankupaq. Sumaqtan chaskinanchis, gracias ninanchistaq tukuy tiemponkuwan Diosta servisqankumanta, onqosqankurayku manaña igualtachu ruwaqtinkupas. Paykunamantaqa askhatan yachasunman  experienciankumanta, capacitasqa kasqankumantapas.

13. ¿Imaynatan yanapasunman mosoq asignacionniyoq hermanota?

13 Qallariypin chay hermanokunaqa necesitankuman maypi tiyanankupaq wasita, llank’anata, ima carropi viajanankupaq yanapananchista. Chaymantapas yanapananchistan munankuman hospitalpi segurota orqonankupaq juj ruwaykunapipas. Astawanqa necesitanku entiendenanchistan. Yaqapaschá onqosqa kashanku otaq familiankuta cuidashanku. Otaq familiankuq wañupusqanwan llakisqa kashanku. * Chaymantapas manaña rimankumanchu chaypas llakisqan kashankuman ñaupaq asignacionninkupi amigonkuta saqesqankumanta. Unaypitaqmi llakikuyninkuqa chinkanman.

14. ¿Imaynatan juj hermanata iñiq t’aqapi hermanokuna yanaparanku?

14 Chaymantapas paykunawan predicaspan ejemplonchiswan kallpachasunman. Juj hermananchismi ñaupaqpi waj nacionpi Diosta serviran, paymi nin: “Chay nacionpi predicashaspaqa sapa p’unchaymi estudiokunata qorani. Kunanmi ichaqa Bibliamanta mana juj textollatapas qhawachiyta atinichu nitaq videokunatapas. Ichaqa hermanokunan pusawaranku estudionkuman. Paykunaqa tukuy sonqowanmi predicanku yachachinku ima, chayta rikusqaymi kallpachawaran. Kunanqa uyariwanankupaq jinan predicayta yachashani, chaymi jujmanta kusisqa sonqowan Diosta servishani”, nispa.

¡TUKUY ATISQAYKITA RUWASHALLAY!

Kallpachakuy astawan predicanaykipaq (15, 16 parrafokunata qhaway) *

15. ¿Imatan ruwananchis mosoq asignacionninchispi kusisqa llank’ananchispaq?

15 Atiwaqmi mosoq asignacionpi kusisqa kayta. Mana ninaykichu: “Manan allintachu ñaupaqpi llank’arani, kunan ruwasqayqa manan valenchu”, nispaqa. Aswanmi reparanayki Jehová Diospa yanapasqasuykita. Ñaupa tiempopi cristianokuna jinataq predicashanallayki.  Paykunaqa risqanku llaqtapin ‘allin willakuykunata willashallaranku’ (Hech. 8:1, 4). Sichus predicashallanki chayqa, sumaq experienciakunatan tarinki. Ejemplopaq, askha precursorkunatan juj nacionmanta autoridadkuna expulsaranku, jinan paykunaqa qayllanpi kaq nacionman riranku predicaqkunata necesitakusqanrayku. Chaymi pisi killakunallapi rimasqanku simipi grupokunata kicharanku.

16. ¿Imatan ruwanayki kusisqa sonqowan mosoq asignacionniykipi llank’anaykipaq?

16 Jehová Diosmi kusikuyta qowanchis (Neh. 8:10). Diospa sonqonpaq jina kausaspan astawanqa kusikunanchis, manan imaynata Diosta servisqanchiswanchu, anchataña valorasunman chaypas. Chaymi Jehová Diosmanta mañakunanchis yachayta qowananchispaq pusariwananchispaq ima. Ñaupaq asignacionniykitaqa valoraranki tukuy sonqowan llank’asqaykirayku runakunatapas munakusqaykirayku ima. Sichus kunanpas tukuy sonqowan llank’ashallanki, rikunkitaq Diospa yanapayninta chayqa, anchatan mosoq asignacionniykita valoranki (Ecl. 7:10).

17. ¿Imatan yuyarinanchis kunan asignacionninchismanta?

17 Ima asignacionninchispas juj tiempollapaqmi Jehová Diosta serviymi ichaqa wiñaypaq. Paraisopiqa llapanchispas juj asignaciontachá chaskisunchis. Aleksey hermanotaqa juj asignacionta chaskisqanmi yanapan jamuq tiempopi juj asignacionkunata chaskinanpaq. Paymi nin: “Ñaupaqpiqa manan iskayaranichu Jehová Dios kasqanmanta, paraisopi tiyananchismantapas. Kunanmi ichaqa Diospi astawan confiani, paraisopi kausaytapas ñan chayaramunanpaq jinataña qhawarini”, nispa (Hech. 2:25). Chay jinaqa imataña ruwashaspapas Diospa sonqonpaq jina kausashallasun. Payqa manan saqerpariwasunchu, aswanmi yanapawasun kusisqa sonqowan ima asignacionpipas llank’ashanallanchispaq (Is. 41:13).

90 TAKI Kallpachanakusunchis

^ párr. 5 Wakin hermanonchiskunan tukuy tiemponkuwan Jehová Dios servisqankuta saqepuranku wakintaq mosoq asignacionta chaskiranku. ¿Ima sasachakuykunapin tarikuranku? ¿Imaynatan chaykunata atipankuman? ¿Imaynatan iñiqmasikuna paykunata yanapankuman? ¿Imaynatan Bibliapi kaq yachachikuykuna yanapawasunman imapipas tarikuqtinchis? Chaykunamantan kay estudiopi yachasun.

^ párr. 4 Kuraq hermanokunapas waynakunamanmi llank’ayninkuta saqeranku. Qhaway “Hermanos mayores, Jehová valora su lealtad” nisqata, 2018 wata setiembre killamanta La Atalaya revistapi; “Vidanchispi cambiokuna kaqtinqa atisunmanmi thaj kayta” nisqatapas, 2018 wata octubre killamanta Qhawaq revistapi.

^ párr. 12 Umalliqkunaqa usqhaytan qelqananku waj iñiq t’aqaman riq hermanokunaq cartanta, chhaynapin paykunaqa servishallanqaku precursor jina, umalliq jina, yanapakuq kamachi jinapas.

^ párr. 13 Qhaway “Ayuda para quienes están de duelo” nisqata, (El dolor de perder a un ser querido, ¿Qué desafíos le esperan?, Cómo sobrellevar el duelo: Sugerencias prácticas, La mejor ayuda para quienes están de duelo) 2018 wata ¡Despertad! revistapi 3 numerota.

^ párr. 57 FOTOMANTA WILLAKUY: Juj matrimonion waj nacionpi predicasqankumanta expulsasqa kaqtinku waqaspa hermanokunamanta despedikushanku.

^ párr. 59 FOTOMANTA WILLAKUY: Nacionninkuman kutispan imaymana sasachakuykunapi tarikusqankurayku Diospa yanapayninta mañakushallanku.

^ párr. 61 FOTOMANTA WILLAKUY: Jehová Diospa yanapayninwanmi jujmanta tukuy tiemponkuwan Diosta servishanku. Waj nacionpi yachamusqanku simipitaq predicashanku chay nacionmanta jamuq runakunaman.