Kichay leenaykipaq

Índice nisqaman riy

Bautizaq Juanmi yanapawanchis kusisqalla Diosta servinanchispaq

Bautizaq Juanmi yanapawanchis kusisqalla Diosta servinanchispaq

YAQAPASCHÁ iñiq t’aqapi juj hermanoq ruwasqanta jina ruwayta munanki otaq ñaupaqpi jina Diosta serviyta munanki ichaqa kuraq kasqaykirayku, onqosqaykirayku, qolqeyki mana kasqanrayku otaq familiaykita cuidanaykirayku mana llapa munasqaykitachu ruwayta atinki. Otaq Diospa llaqtanpi cambiokuna kasqanwan asignacionniykita saqepuranki. Chaykunapi tarikuspan mayninpiqa llakikusunman. Ichaqa, ¿imatan ruwasunman ama llakisqalla, phiñasqalla, otaq ama sintipakuspa Diosta servishanallanchispaq? ¿Iman yanapawasun kusisqa sonqowan Diosta servinanchispaq?

Bautizaq Juanqa kusisqa sonqowanmi Diosta serviran. Diosmi payman ancha sumaq llank’ayta qoran, ichaqa qonqayllamantan vidanqa cambiaran, jinaspa carcelpi wisq’asqa karan. Payqa manachá piensaranchu chhaynapi tarikunantaqa. Chaywanpas kusisqa sonqowanmi tukuy kausasqan p’unchaykuna Diosta serviran. ¿Iman yanaparan? ¿Imaynatan kusisqa sonqowan Diosta servisunman imapiña tarikuspapas?

KUSISQALLAN DIOSTA SERVIRAN

29 wata abril killapin Juanqa Diospa nisqanman jina runakunaman willaran Mesías chayamunanta, niranmi “Janaq pacha gobiernon qayllaykamunña, chayrayku juchaykichismanta pesapakuychis”, nispa (Mat. 3:2; Luc. 1:12-17). Askha llaqtakunamantan jamuranku Juanpa nisqanta uyarinankupaq askhataq bautizakuranku. Jinaspapas mana manchakuspan fariseokunata saduceokunatapas niran: “Yau mach’aqway miraykuna, ¿pin nirasunkichis: ‘Atiwaqchismi Diospa phiñakuynin p’unchaymanta ayqeyta’”, nispa? (Mat. 3:5-12). 29 wata octubre killapitaq Jesusta bautizaran, jinaspa runakunata niran Jesusta qatikunankupaq Mesías kasqanrayku (Juan 1:32-37).

Jesusqa allinpaqmi qhawariran Juanpa ruwasqanta chaymi niran: “Warmimanta naceqkunamantaqa manan pipas bautizaq Juanmanta aswan kuraqqa kanchu”, nispa (Mat. 11:11). Juanqa kusisqachá kasharan chay jinata Diosta servisqanmanta  bendicionkunata chaskisqanmantapas. Kunan tiempopipas askha hermanonchiskunan pay jina munay privilegiokunata chaskikuranku, chaymi pasaran hermanonchis Terryta, payqa 50 wata masñan esposanwan kuska tukuy tiemponkuwan Jehová Diosta servishanku, paymi nin: “Diospaq llaqtanpi llank’aspan karani precursor regular, betelita, precursor especial, watukuq umalli ima, kunantaq yapamanta precursor especial kashayku”, nispa. Jehová Diospa llaqtanpi llank’aspaqa kusikunchismi, ichaqa Bautizaq Juanpa ejemplonmi yanapawasun kusisqalla kananchispaq ima asignaciontaña chaskiqtinchispas.

TUKUY SONQOWAN AGRADECEKUQ KASUN

Bautizaq Juanqa ancha allinpaqmi privilegiontaqa qhawariran chaymi kusisqalla Jehová Diosta serviran. Jesusta bautizasqan qhepamanmi askha runakuna Jesusta qatikuranku, chaymi Juanpa discipulonkunaqa niranku: ‘Jesusmi kunanqa bautizashan, llapa runakunataqmi payman rishanku’, nispa (Juan 3:26). Juantaq niran: “Noviaq dueñonqa novion. Chaywanpas novioq amigonqa ladonpi sayaykuspan payta uyarin, jinaspa anchatapuni kusikun novioq kunkanta uyarisqanrayku. Chayraykun noqapas anchatapuni kusikuni”, nispa . (Juan 3:29). Juanqa manan Jesuspa ruwasqanwan envidiakuranchu, nitaq llank’ayninta pisipaqchu qhawariran aswanpas anchatan valoraran, chaymi kusisqa kasharan ‘novioq amigon’ kasqanmanta.

Juanqa ancha allinpaqmi qhawariran llank’ayninta sasaña karan chaypas. Payqa nacesqanmantapachan nazareo karan, chaymi vinota mana ujayta atiranchu (Luc. 1:15). Jesuspas niranmi: “Juanqa mana mijuspa mana ujaspan jamuran”, nispa. Jesusmi ichaqa mana nazareochu karan nitaq discipulonkunapas, chaymi juj runakuna jina kausaranku (Mat. 11:18, 19). Chaymantapas Juanqa manan milagrokunata jayk’aqpas ruwaranchu, Jesuspa discipulonkunan ichaqa ruwaranku (Mat. 10:1; Juan 10:41). Juanmi ichaqa mana envidiakuranchu, aswanmi Jehová Diospa qosqan llank’ayninta tukuy yuyaywan ruwashallaran.

Sichus anchata valorasun Jehová Diospaq llank’asqanchista chayqa, kusisqa sonqowanmi Diosta servishallasun. Terryn nin: “Imachus ruwasqaymanmi tukuy yuyayniyta churarani”, nispa. Tukuy tiemponwan Diosta servisqanta yuyarispan nin: “Manan imamantapas pesapakunichu, aswanpas kusisqan yuyarini”, nispa.

Jehová Diosta servinanchispaq ima ruwasqanchispas ancha sumaq llank’aymi. ¿Imarayku? ‘Diospa llank’aqmasinkuna kasqanchisrayku’, chayta yuyashallasun chayqa kusisqan payta servisun (1 Cor. 3:9). Kay ejemplopi piensasun: Juj regalo mosoqlla rikukunanpaqqa cuidashanallanchismi. Chay jinallataqmi Dioswan llank’asqanchista ancha allinpaq qhawarishallasun chayqa, kusisqan servisunchis. Manataqmi nisunchu: “Jehová Diosta servisqayqa manan imapaschu jujkunaq ruwasqanwanqa”, nispa (Gál. 6:4).

DIOS SERVIYPI YUYAYNINCHIS KACHUN

Juanqa yacharanpaschá mana unaychu Diospaq llank’anan kasqanta, ichaqa manapaschá piensaranchu qonqaylla tukupunantaqa (Juan 3:30). 30 watapin rey Herodes carcelpi wisq’achiran, soqta killa jinallaraqmi pasaran Jesusta bautizasqanmantaqa. Chaywanpas willashallaranmi chanin kaqmanta (Mar. 6:17-20). ¿Iman yanaparan chhaynapiña tarikuspapas kusisqalla Diosta servinanpaq? Jehová Dios serviypi yuyayninta churasqanmi.

Carcelpi kashaspan Juanqa uyariran Jesuspa llapa ruwasqanmanta (Mat. 11:2; Luc. 7:18). Payqa yacharanmi Jesús Mesías kasqanta, chaywanpas yaqapaschá tapukuran: “¿Imaynatan junt’anqa llapa ruwananta? ¿Pisi tiempomantachu kamachikunqa? Chhayna kaqtinqa, ¿carcelmanta orqowanqachu?”,  nispa. Payqa allintan entiendeyta munaran Jesuspa ruwananta, chaymi iskay discipulonkunata kacharan tapumunankupaq: “¿Qanchu kanki jamunan karan chay, icha jujtachu suyakusaqku?”, nispa (Luc. 7:19). Jinan Jesusqa Juanpa discipulonkunaman niran: ‘Juanman willamuychis, ñausakunan qhawarinku, such’ukunan puririnku, lepra onqoyniyoqkunan qhaliyachisqa kanku, roqt’ukunan uyarinku, wañusqakunan kausarichisqa kanku, wajchakunamantaq allin willakuykunata willakushan’, nispa (Luc. 7:20-22). Kusisqachá Juanqa uyariran discipulonkunaq willasqanta.

Chay willakuyqa allintachá iñiyninpipas kallpacharan. Chaywanmi payqa yacharan Jesuspi Mesiasmanta llapa profeciakuna junt’akushasqanta. Manaña carcelmanta Jesús orqoranchu chaypas, Juanqa repararanmi llank’asqanqa mana yanqapaqchu kasqanta. Chaymi carcelpi kashaspapas kusisqalla kasharan.

Diospa llaqtan imakunatachus ruwashasqanta yachaymi yanapawasun Diosta kusisqa servinanchispaq

Juan jinan noqanchispas Jehová Dios serviypi yuyayninchista churananchis, chayta ruwaspaqa kusisqa sonqowanmi imatapas aguantasun (Col. 1:9-11). Dios servisqanchis mana yanqapaq kasqanta yuyarinanchispaqqa Bibliatan leenanchis yachasqanchispitaq piensananchis (1 Cor. 15:58). Sandra nin: “Sapa p’unchay Bibliapi juj capitulota leesqaymi yanapawaran Jehová Diospi masta piensanaypaq”, nispa. Chaymantapas yachasunmanmi Diospa llaqtan imatachus ruwashasqanmanta, chaymi yanapawasun ama noqallanchispi piensananchispaq. Sandra nillantaq: “Sapa killa JW Broadcasting® canalta qhawasqaykun yanapawanku Diospa llaqtanta astawan munakunaykupaq kusisqa servinaykupaqpas”, nispa.

Bautizaq Juan pisi tiempollaña Diosta serviran chaypas Elías jinan kallpawan atiywan serviran. Chaywanpas Juanqa ‘noqanchis jina runallan karan’ (Luc. 1:17; Sant. 5:17). Sichus pay jina agradecekuq kasun, tukuy yuyayninchistataq Dios servisqanchispi churasun chayqa, kusisqallan kausasun imapiña tarikuspapas.