Kichay leenaykipaq

Índice nisqaman riy

 VIDANMANTA WILLAKUN

“Ancha valorniyoq perlata” tariyku

“Ancha valorniyoq perlata” tariyku

WINSTON Pamelawanqa Australasia sucursalpin yanapakushanku. Paykunaqa ancha kusisqan kashanku, ichaqa imaymana sasachakuykunapin tarikuranku. Juj runakunaq imayna kausasqankumanmi yachakunanku karan, wawankupas wañupuranmi. Chaywanpas munakushallankun Jehová Diosninchista hermanonchiskunatapas. Tukuy sonqowantaqmi predicashallanku, kay entrevistapin paykunamanta astawan yacharisunchis.

Winston, ¿imaynatan Jehová Diosninchista reqsiranki?

Queensland llaqtapin (Australia) wiñarani manataqmi ima religionmanpas perteneceraykuchu. Campopi tiyasqayraykun mana juj runakunawan reqsinakuranichu. 12 wataypi kashaqtiymi Diostaqa reqsiyta munarani jinan paymanta cheqaq kaqta yachanaypaq mañakurani. Tiempowanqa Adelaida llaqtamanmi (Australia Meridional) llank’aq ripurani, 21 wataypi kashaqtiytaq Sydney llaqtata vacacioniypi rirani. Chaypin Pamelata reqsirani, paymi israelismo británico nisqa religionmanta willawaran, paykunaq creesqankuman jinaqa Britania nacionpi llaqtakunaqa ñaupa israelpa ayllunkunamantas kankuman. Astawanqa 10 ayllukunamanta, chay ayllukunaqa 740 watakunapi jinan chinkachisqa karanku. Adelaida llaqtaman kutimuspaymi llank’anaypi compañeroyman chayta willarani, payqa Jehová Diospa testigonkunawanmi Bibliata estudiashasqa. Testigokuna imapichus creesqankumanta parlasqaykuman jinan repararani Diosninchis mañakusqayman kutichimuwasqanta, chaytaqa erqellaraq kashaspan mañakurani. Paymi cheqaq kaqta Diosmanta gobiernomantawan willasharan. Chayqa, ¡‘ancha valorniyoq perlata tariy’ jinan karan! (Mat. 13:45, 46.)

Pamela, qanpas sipasllaraq kashaspan chay ancha valorniyoq perlataqa maskharanki, ¿imaynapin chay perlata tariranki?

Coffs Harbour (Nueva Gales del Sur) llaqtapin wiñarani, tayta-mamaypas abueloykunapas israelismo británico nisqa religionmanmi pertenceranku. Chaypin sulk’a hermanoyta kuraq hermanayta primoykunatapas yachachiwaranku: “Diosqa Britania nacionmanta kaqkunallatan allinpaq qhawarin”, nispa. Ichaqa iskayaranin  chay yachachisqankumanta, Diostapas mana reqsisqay runata jinan qhawarirani. 14 wataypi kashaqtiymi rirani Anglicana religionman, Bautista religionman, Adventista religionman ima, ichaqa manan Diosta reqsinaypaq yanapawarankuchu.

Tiempowanqa Sydney llaqtamanmi familiantin ripurayku, chaypin Winstonta reqsirani vacacionninpi kashaqtin. Paypa willasqan jina, chay kutipi religionmanta rimasqaykuraykun Jehová Diospa testigonkunawan Biblia estudiayta qallariran. Sapa kuti cartata apachimuwaspan askha textokunata qelqamuq, qallariypiqa chayta rikuspan llakikurani phiñakurani ima, pisi-pisimantan ichaqa repararani Diosmanta cheqaqta yachashasqayta.

1962 watapin Adelaida llaqtaman ripurani. Winstonqa juj casarasqa Testigokunatan valekusqaña paykunawan tiyanaypaq. Chay hermanokunan karan Thomaswan Janicewan, paykunaqa Papúa Nueva Guinea llaqtapin misionero karanku. Paykunaqa munakuwarankun yanapawarankutaqmi Diosta astawan reqsinaypaq, noqaqa 18 watallaypiraqmi kasharani. Bibliata estudiasqayman jinan repararani Diosmanta cheqaqta yachasqayta. Winstonwan casarakusqay qhepamanqa ancha kusisqan Jehová Dios serviyta qallarirayku. Imaymana sasachakuykunapiña tarikurayku chaypas astawanmi tarisqayku perlata valorarayku.

Winston willawayku, ¿imaynan karan chayllaraq Jehová Diosta servishaqtiyki?

A. A Watukuq umalli kashaspa viajasqayku mapa

B. Wakin islakunamanta foto. Kiribati, Tuvalu islakunatan ñaupaqpi Gilbert, Ellice sutikunawan reqsikuran

C. Tuvalu nacionpi tarikun kay isla, sutinmi Funafuti. Kay islata juj islakunatawanmi visitarayku manaraq misionero kashaqtiyku

Pisi tiempollaraq casarasqa kashaqtiykun Diosta servinaykupaq juj jatun punku kicharikuran (1 Cor. 16:9). Jack Porter hermanon chay punkutaqa rikuchiwaranku, payqa watukuq umallin karan paymi iñiq t’aqaykuta watukamuq. Kunanqa paywan kuskan Australasia sucursalpi servishayku. Chay tiempopiqa paymi esposanpiwan kallpachawaranku precursor regular kanaykupaq, pisqa watan precursor karayku. 29 wataypi kashaqtiymi Pacífico sur islakunapi watukuq umalli kanaypaq invitawaranku, chay islakunapi predicakusqantaqa Fiyi nacionpi sucursalmi qhawarisharan. Kay islakunatan visitarayku: Kiribati, Nauru, Niue, Samoa, Samoa Norteamericana, Tokelau, Tonga, Tuvalu, Vanuatu.

Karu islakunapi kaq runakunaqa manan faciltachu Testigokunapi confiaqku, chaymi allin yuyaywan imatapas ruwanayku karan (Mat. 10:16). Chaypi tiyaq wakin hermanonchiskunaqa manan alojawayta atiqkuchu. Chaymi chaypi kaq runakunata tapukuq kayku wasinkupi alojakuyta atiykumanchus manachus chayta. Paykunaqa sumaqtan chaskiwaqku.

Winston, ¿imaynapin traducción nisqa llank’aypi interesakuyta qallariranki?

Winston Samoa islapi yachachishan umalliqkunata

Tongano simipi tratadokunapas folletokunapas pisillan karan. Runakunata Bibliamanta yachachinankupaqqa inglés simipi La verdad que lleva a vida eterna nisqa librowanmi yachachiranku. Chaymi kinsa umallikuna chay librota tongano simiman traducinankupaq decidiranku. Paykunaqa pisillatan inglés simita yacharanku umallikunapaq escuelapitaqmi kasharanku. Chay escuelaqa tawa semanan karan, chay semanakunapin traduciyta tukuranku. Pamelan maquinapi copiaran chaytataqmi Estados Unidos nacionpi imprimimuranku chaykamaqa pusaq semanan pasaran. Manaña allin traducisqachu karan chaypas askha runakunatan yanaparan Diosmanta yachanankupaq. Noqapas esposaypas manan traductorkunachu kayku, ichaqa chay librota imayna traducikusqanta rikusqaykuwanmi chay llank’aypi interesakurayku.

Pamela, qanqa Australia llaqtapin tiyaranki. Ichaqa, ¿imaynan karan islakunapi tiyay?

Watukuq umalli kashaspan kaypi alojakurayku

Tukuypas jujniraymi karan, chaypiqa q’osñi jinaraqmi ch’uspikuna kaq, nishu calormi kaq, ratakunapas kaqmi. Chaymantapas imaymana clase onqoykunan kaq, mijunaykupaqpas pisillan kaq. Tardenkunatan karpa wasiykumanta lamar-qochata qhawaspa samariq kayku.  Samoano simipin chay jina wasita ninku fale nispa. Tutakunapitaq killa k’anchamuqtin palmerakunaq llanthunta qhawaq kayku, lamar-qochapi munayta killaq k’anchamusqantapas. Chaykuna ruwasqaykun yanapawaranku Diospi piensanaykupaq mañakunaykupaqpas, chhaynapin allin kaqkunapi piensaq kayku.

Chaypi wawakunaqa anchatan gustawaqku, imaymanata ruwaspan asichiwaqku juj llaqtamanta juj colorniyoq runakunata rikuspapas admirasqan qhawaqku. Juj kutinmi Niue islapi juj erqecha Winstonpa brazonkunapi pelonkunata jap’ispa, niran: “Phuruykikunan gustawan”, nispa. Chay wawaqa manan jayk’aqpas chhayna peloyoq brazokunataqa rikusqachu, chaymi mana yacharanchu imachus kasqanta.

Yaqa llapankun wajcha karanku chayta rikuspan llakikuq kayku. Munayña chay llaqta rikukuq chaypas manan allintachu onqosqakunata atiendeqku unutapas wakinqa p’onqollamantan tomaqku. Chaypi hermanonchiskunaqa manan chaykunawanqa llakikuqkuchu, aswanpas ancha kusisqan kasharanku familiankuwan kaspa, juñunakuna wasipi Diosta adorasqankuwanpas. Chayta rikuymi yanapawaranku Diosta ñaupaqta servishanallaykupaq imachus necesitasqallaykuwan kausanaykupaqpas.

Pamela, mayninqa manan unu kaqchu wayk’unaykipaq riki, ¿imatan ruwaq kanki chhaynapi tarikuspa?

Pamela p’achata t’aqsashan Tonga islapi

Papaymi yachachiwaran nina jap’ichiyta, chaypi imayna wayk’uyta, pisi cosaskunawan imayna kausaytapas, chaymantaqa anchatan payta agradecekuni. Kiribati islapi hermanokunata visitashaqtiykun pajamanta ruwasqa techoyoq wasipi qhepakurayku. Imallatapas wayk’unaypaqmi pampata t’oqospa ninata jap’ichirani, cocoq qarankunawantaq raurachirani. Unuta apamunaypaqtaq p’onqota rirani, chaypin juj warmikunapas colapi unuta orqoshasqaku chaymanmi noqapas colakurani. Chay p’onqomanta unuta orqonankupaqqa iskay metro jina sayayniyoq k’aspitan utilizaqku, k’aspiq puntanpitaq juj lata watasqa karan. Chayta jap’ispan sapanka warmi unuta orqoq. Chayta “ruwayqa facil-llamá” nispa nirani, noqaman tupamuwaqtinmi ichaqa mana atiranichu. Chayta rikuspan chaypi warmikunaqa asiykuranku, chay qhepamanmi ichaqa jujnin kaq warmi yachachiwaran imayna orqoyta. Chay islakunapi runakunaqa sumaq sonqon karanku sapa kutillanmi yanapawaqku.

Chay islakunapi Diosta serviyqa may munaymi karan riki. Ichaqa, ¿imakunamanmi yachakunaykichis karan?

Winston nin: Imayna costumbreyoq kasqankutan mana faciltachu entiendeq kayku. Ejemplopaq, hermanonchiskunaqa mijunaykupaq invitawaqtinkun llapa mijunankuta servimuwaqku. Noqaykuqa llapantan mijuruq kayku, manan yacharaykuchu mijunata puchuchinayku kasqanta. Qhepamanqa yacharaykun chaymi mana llapantañachu mijuq kayku. Chaykunataña ruwarayku chaypas hermanonchiskunaqa entiendewaqkun, anchatataqmi kusikuqku sapa soqta killamanta jina watukuq riqtiyku. Chay watakunapiqa manan waj llaqtakunamanta Testigokunataqa reqsirankuraqchu noqallaykutan reqsiwaranku.

Winston juj hermanokunata pusashan Niue islapi predicanankupaq

Chay islapi runakunaqa manan yacharankuchu mundontinpi Testigokuna kasqanta. Chaymi chaypi tiyaq hermanonchiskunataqa juj grupota jinalla qhawariqku. Esposaywan hermanokunata visitaqtiykun ichaqa repararanku Testigokunaqa jatun organización kasqanta jinan admirakuranku.

Pamela nin: Kiribati islapi Itinikai Matera hermanonchispa ruwasqantan manapuni qonqanichu, chay islapiqa pisillan hermanonchiskunaqa karan. Itinikai Matera hermanollanchismi umalli karan, payqa imaymanatan ruwaq allinta atiendewanankupaq. Juj kutinmi juj runtuta canastapi apamuwasqaku: “Kayqa qankunapaqmi”, nispa. Chay tiempopi wallpa runtuta mijuyqa sumaq mijunata mijuy jinan karan, chaywanmi anchata kusikurayku.

 Pamela, qonqayllan wawachaykita abortaranki. ¿Iman yanaparasunki chay llakikuyniykita aguantanaykipaq?

Pacífico sur islakunapi kashaqtiykun 1973 watapi onqoq kapurani, chaymi Australiaman kutimpurayku, tawa killaña chaypi kashaqtiykun wawayqa wañupuran, qosaypas sinchitan llakikuran. Pisiyaranña llakikuyniy chaypas sonqoyqa nanashallaranmi. 2009 watamanta 15 abril killamanta Qhawaq revistapi “Leeqkunaq tapukusqan” nisqa partepi niran: “Huk warmiq wiksanpi wawa wañunman chayri, ¿kawsarimpunmanchu chay wawa?”, nispa. Chay revistapi nisqan jina Jehová Diosllan yachan kausarimpunqachus manachus chaytaqa, payqa imatapas chanillantan ruwan. Jinaspapas payllan chinkachinqa tukuy llakikuyninchista, Jesuswanmi “Saqraq imachus ruwasqankunata ch’usaqman tukuchinqa” (1 Juan 3:8). Chayta yachasqaykun yanapawaranku Diospa promesankunata astawan valoranaykupaq. Manachus Diospa gobiernonta suyakusunman chayqa, ¿imachá noqanchismantaqa kanman?

Wawachaykuq wañupusqan qhepamanqa jujmantan tukuy tiempoykuwan Jehová Diosta serviyta qallarirayku. Australia Betelpi pisi killakunalla servisqayku qhepamanmi iñiq t’aqakunata visitanaykupaq niwaranku. Nueva Gales del Sur, Sydney llaqtakunapi tawa wata servishaqtiykun 1981 watapi Australasia sucursalman invitawaranku, kunankamapas chaypin servishayku.

Winston, ¿Pacífico sur islakunapi Diosta servisqayki yanaparasunkichu Australasia sucursalpi?

Arí, imaymanapin yanapawaran. Ñaupaqpiqa, Australian encargakuran Samoa, Samoa Norteamericana islakunapi predicación aparikunanpaq. Chaymantataq, Nueva Zelandapi kaq sucursal juñukapuran Australiawan. Chaymi kunanqa Australasia sucursal encargakushan Australia, las islas Cook, Niue, Nueva Zelanda, Samoa, Samoa Norteamericana, Timor Oriental, Tokelau, Tonga nacionkunamanta. Sucursalmanta watukuq umalli jinan yaqa llapa chay nacionkunata visitarani. Chay islakunapi tiyaq hermanokunawan llank’asqayqa anchatan yanapawaran sucursalpi llank’anaypaq.

Pamelawan Winstonwan Australasia sucursalpi

Tukunaypaq kaytan niyta munaykichis: Esposaypas noqapas allintan repararayku mana kuraqkunallachu Diostaqa maskhasqankuta, noqayku jinan askha wayna-sipaskuna ancha valorniyoq perlata maskhashanku wakin familianña mana munaqtinkupas (2 Rey. 5:2, 3; 2 Crón. 34:1-3). Jehová Diosninchisqa munakuqllañan, chaymi munan llapallanchis kuraqkunapas wayna-sipaskunapas salvakunanchista.

Esposaywan noqawan Diosta maskhasqaykumantaqa 50 más watakunañan pasarun, chay tiempopiqa manan yacharaykuchu Diosta maskhasqaykurayku bendicionkuna chaskinaykutaqa. Diospa gobiernonmanta cheqaq kaqta yachayqa ancha valorniyoq perla jinan. Chaymi tukuy kallpaykuwan cuidasaqku.