Kichay leenaykipaq

Índice nisqaman riy

¿Imaynatan cuidakusunman Satanaspa jujnin trampanmanta?

¿Imaynatan cuidakusunman Satanaspa jujnin trampanmanta?

ISRAEL runakunaqa ñan Jordán mayuta chimpaspa Diospa prometesqan allpaman jaykunankupaqña kasharanku. Jinan juj p’unchay waj nacionmanta warmikuna qharikunata invitaranku jatun mijuyman. Wakinqa nirankuchá: “Mijumuypas, tusumuypas jujkunawan amistaqta ruwaypas munaymi kanqa”, nispa. Paykunaqa yacharankun chay warmikunaqa mana Diospa kamachisqanman jinachu kausasqankuta. Chaywanpas wakinqa niranchá: “Cuidakusaqmi, manan imapas pasawanqachu”, nispa.

 Ichaqa, ¿iman pasaran? Biblian nin: “Israel qharikunaqa Moab suyu warmikunawan qhelli jucha ruwayta qallariranku”, nispa. Chay warmikunaqa diosninkuta adoranankutan munaranku, chaytataqmi Israel qharikunaqa ruwaranku. Chaychá Jehová Diosqa Israel runakunawan k’araqta phiñakuran (Núm. 25:1-3).

Chay israelitakunaqa Diospa iskay kamachikuynintan p’akiranku: Yanqa diostan adoraranku, qhelli juchatataq ruwaranku. Jinan Diosta mana kasukusqankumanta waranqanpi wañuranku (Éx. 20:4, 5, 14; Deut. 13:6-9). ¿Imaraykun llakikunapaq karan ruwasqanku? Paykunaqa ñan Diospa prometesqan allpaman jaykunankupaqña kasharanku, ichaqa chay kutipi mana kasukusqankuraykun mana jaykurankuchu (Núm. 25:5, 9).

Chay kutipi pasasqanta yuyarichispan apóstol Pablo niwanchis: “Paykunata chaykuna pasasqanqa noqanchis yachananchispaqmi qelqasqa karan, chhaynapi kay tiempoq tukukuyninpi kausaqkunaqa manaña paykuna jinachu kananchispaq”, nispa (1 Cor. 10:7-11). Maytachá Satanasqa kusikuran israelitakuna jatun juchata ruwasqankumanta, chay jawa prometesqa allpaman mana jaykusqankumantapas. Cuidakunanchismi ama paykuna jina urmananchispaq, yachasqanchis jina Satanasqa manan munanchu mosoq pachaman jaykunanchista.

PORNOGRAFIAQA PELIGROSON

Satanasqa cristianokunatan urmachiyta munan, chaypaqmi utilizan qhelli jucha ruwayta, chaywanqa askhatañan urmachiran. Rikusqanchis jina israelitakunapas qhelli jucha ruwaypin urmaranku. Chay trampaqa peligroson. ¿Iman tanqawasunman chay trampaman urmananchispaq? Jujninqa pornografiata qhawaymi.

Ñaupaq watakunapiqa pornografiata qhawanankupaqqa cinemanraqmi rinanku karan, otaq rantinankuraq karan pornografiamanta revistakunata librokunatapas. Askha runakunan ichaqa mana chayta ruwarankuchu chay lugarkunapi jujkunaq rikunanmanta p’enqakuspa. Kay tiempopin ichaqa jujkunaq mana yachasqallan pornografiata qhawayta atinku. Internet-ta utilizaqqa chaykunatan qhawanman llank’ananpi, carronpi otaq maypipas kashaspa. Askha nacionkunapin qharikunapas warmikunapas wasinkupi chayta qhawayta atinku.

Chaymantapas kunanqa celularninkupi otaq tabletninkupin pornografiata qhawankuman callepi purishaspa, carropi viajashaspapas.

Jujkunaq mana rikusqallan pornografiata qhawayta atikusqanraykun, askha chayta ruwashanku. Chay jawan matrimonionkupi problemakuna kan, manaña allinpaqchu qhawarikunku, concienciankutaq juchachan. Astawanqa Jehová Dioswanmi mana allinpichu kanku. Rikusqanchis jina pornografiata qhawayqa sinchi millaymi. Wakinqa askha watakunan mana allinchu sientekunku otaq umankumanta rikusqanku imagenkuna mana lloqsiyta atinchu.

Jehová Diosmi ichaqa yanapayta munawanchis chay trampamanta cuidakunanchispaq. Chaypaqmi ichaqa tukuypi niwasqanchista kasukunanchis, chaytan israelitakunaqa mana ruwarankuchu (Éx. 19:5). Diosqa cheqnikunmi pornografía qhawaytaqa, chaytan entiendenanchis. ¿Imaraykun chayta ninchis?

JEHOVÁ DIOS JINAN CHEQNIKUNANCHIS PORNOGRAFIATA

Israel nacionman Diospa qosqan leykunaqa jujniraymi karan chay tiempopi tiyaq waj llaqtakunaq leyninkumantaqa. Diospa qosqan leykunaqa juj perqa jinan israelitakunata jark’aran waj nacionmanta runakunaq qhelli ruwayninkunata ama ruwanankupaq (Deut. 4:6-8). Chay leykunaqa sut’itan rikuchiran Jehová Dios qhelli ruwaykunata cheqnikusqanta.

Diosqa willaranmi israelitakunaman Canaán runakuna qhelli ruwaykunapi  kausasqankuta, jinaspan niran: “Aman pusaykushasqay Canaán suyupi ruwasqankuta jinapas ruwankichischu [...]. Chay suyu allpataqmi qhellichasqa karan, chaymi noqaqa mana chanin ruwasqankumanta muchuchirani”, nispa. Ch’uya Diospaqqa Canaán runakunaq qhelli kausayninkuqa sinchi millaypunin karan, chaymi tiyasqanku allpatapas qhellita jina qhawariran (Lev. 18:3, 25).

Jehová Diosqa castigaranmi Canaán runakunata, chaywanpas runakunaqa qhelli kausaypin purishallaranku. 1.500 watakuna pasasqan qhepamanmi Pabloqa willaran cristianokunaq tiyasqanku nacionkunapi runakunaqa ‘mana p’enqarikuspa juchapakusqankuta’. ‘Tukuy millakuna kaqkunatapas sinchi munapayaywan ruwashasqankuta’ (Efes. 4:17-19). Kunanpas runakunaqa mana p’enqarikuspan qhelli juchapi purinku. Cheqaq cristianokunan ichaqa tukuyta kallpachakunanku qhelli ruwaykunata ama qhawanankupaq.

Jehová Diosqa payman rijch’akuqtan kamawaranchis, chaymi reparayta atinchis imachus allin mana allin kasqanta. Yachayniyoq kaspan Diosqa kamachiran casarasqakunalla warmi-qhari puñuypi kusirikunankuta (Gén. 1:26-28; Prov. 5:18, 19). Pornografiata ruwaqkunapas chayta qhawanankupaq tanqaqkunapas manan Diospa kamachikusqanta respetankuchu. Chaymi Diosqa chay runakunata juzganqa (Rom. 1:24-27).

Chaymantapas askha runakunan decidinku pornografía qhawayta. Yaqapaschá piensanku chayta ruwayqa mana peligrosochu kasqanta. Ichaqa chayta ruwaspaqa Diospa kamachikuyninta mana kasukuqkunatan apoyashanku, manaña chayta reparankuchu chaypas. Diosta serviqkunan ichaqa cheqnikunanchis chay ruwayta. Biblian kamachiwanchis: “Señor Diosta munakuqkuna, mana allin kaqta cheqnikuychis”, nispa (Sal. 97:10).

Pornografiata ama qhawayqa sasan llapanchispaqpas. ¿Imarayku? Juchayoq kasqanchisraykun mayninpi kallpachakunanchis qhelli munapayaykunata umanchismanta orqonanchispaq. Chaymantapas sonqonchismi  engañawasunman: “Pornografiata qhawayqa manan juchachu”, nispa (Jer. 17:9). Ichaqa askha runakunan pornografía qhawayta saqepuranku cristianoman tukuspa. Chayta yachayqa kallpachanmi pornografiata ama qhawananpaq kallpachakuq runata. Qatimuqpi yachasun imaynatas Biblia yanapawasunman chay trampata atipanapaq chayta.

MANAN QHELLI RUWAYKUNATA MUNAPAYANANCHISCHU

Qallariypi willasqanchis jina israelitakunaqa qhelli ruwaykunatan astawan munapayaranku jinan llakipi tarikuranku. Kunanpas chayqa pitapas pasawasunmanmi. Jesuspa hermanon Santiagon niran: ‘Sapankan imachus munasqanwan tentasqa kaspa sonqonta suwachikun. Wiñaruspataq chay munapayayqa juchata paqarichin’, nispa (Sant. 1:14, 15). Sichus mana allin ruwaykunata astawan munapayasunman chayqa juchallikusunmanmi. Chaymi kallpachakunanchis qhelli ruwaykunapi ama piensananchispaq. 

Sichus reparakunki qhelli ruwaykunapi piensashallasqaykita chayqa, Jesuspa nisqantan kaqpacha ruwanayki, paymi niran: “Makiykichus otaq chakiykichus juchaman urmachishasunki chayqa, wit’urukuspa wijch’upuy [...]. Ñawiykitaqchus juchaman urmachishasunki chayqa, orqorukuspa wijch’upuy”, nispa (Mat. 18:8, 9). Jesusqa yacharanmi wakin ruwaykuna mana allinkunapi piensachiwasqanchista. Chaymi chay ruwaykunata usqhayta saqepunanchis. ¿Imaynatan Jesuspa nisqanta kasukusunman pornografía qhawayta atipanapaq?

Sichus qonqaylla qhelli ruwaymanta imagenta rikusunman chayqa, manan ninanchischu: “Manan imapas pasawanqachu”, nispaqa. Aswanpas kaqpachan juj ladota qhawananchis, jinaspa kaqpacha televisorta, computadorata otaq celularninchista wañuchinanchis, allin kaqpitaq piensananchis. Chayta ruwaymi yanapawasun imachus piensasqanchista controlananchispaq, jinaspa mana permitisunchu qhelli munapayaykuna umanchispi kananta.

 ¿IMATAN RUWANA QHELLI IMAGENKUNA UMANCHISMAN JAMUQTIN?

Pornografiamanta imagenkunaqa askha watakunan umanchispi qhepanman, jinaspa qonqaylla yuyarisunman. Chay pasaqtinqa yaqapaschá wakinqa masturbakuyta otaq ima qhelli ruwayta munankuman. Sichus pornografía qhawayta saqepurankiña chayqa, ¿imatan ruwanayki chay imagenkuna umaykiman jamuqtin? ¿Imaynatan chaykunata atipawaq?

Decidikunaykin Diospa munasqanman jina piensanaykipaq ruwanaykipaqpas. Apóstol Pabloq nisqantan kasukunayki, paymi niran: “Cuerpoyta maqani jinaspa kamachita jina purichini”, nispa (1 Cor. 9:27). Kallpachakuy qhelli ruwaykunapi ama piensanaykipaq. Romanos 12:2 textopi nisqantan kasukunayki: “Yuyayniykichista mosoqyachispa imayna kasqaykichista cambiaychis, chhaynapin allinta yachankichis Diospa munayninqa allinpuni, junt’asqapuni, sonqonpaq jinapuni kasqanta”, nispa. Manan kayta qonqanaykichu: Thaj concienciayoqqa sientekunki Diospa munasqanman jina piensaspa ruwaspallan, manan qhellipi kausaspachu.

Diospa munasqanman jina piensaspa ruwaspan thaj sientekusun qhelli kausaypi puriymantaqa

Kallpachakuy Bibliamanta wakin textokunata umaykipi jap’inaykipaq, chaykunan yanapasunki Jehová Dios jina pornografiata cheqnikunaykipaq, yachankitaq imachus ruwanaykita munasqanta. Chhaynaqa mana allin piensaykuna umaykiman jamuqtinqa kay textokunaq nisqanpin piensanayki: Salmos 119:37, Isaías 52:11, Mateo 5:28, Efesios 5:3, Colosenses 3:5, 1 Tesalonicenses 4:4-8.

Mayninpin qhelli ruwaykuna qhawayta otaq chaykunapi piensayta nishuta munapayawaq. Chhaynaqa, ¿imatan ruwanayki? Jesuspa ruwasqanta (1 Ped. 2:21). Bautizakusqan qhepamanmi Satanasqa askha kutipi tentaran, Jesusmi ichaqa pay contra qaqata sayashallaran. Satanaspa tentasqantan rechazaran Bibliamanta textokunata willaspa. Niranmi: “¡Ripuy kaymanta, Satanás!”, nispa. Jinan payqa ripuran. Jesús jinan mana pisipanaykichu Satanaswan maqanakuspaqa (Mat. 4:1-11). Satanaspas kamachisqan runakunapas qhelli ruwaykunapi piensanaykipaqmi tanqashallasunki, ichaqa manan pisipanaykichu. Atiwaqmi pornografía saqepuytaqa. Jehová Diospa yanapayninwanqa atipankin enemigoykita.

JEHOVÁ DIOSMANTAN MAÑAKUNANCHIS KASUKUQTAQ KANANCHIS

Jehová Diosmantan mañakushanallanchis yanapayninta. Pablon niran: “Diosman willakuychis imachus necesitasqaykichista. Jinan Diosqa runaq mana entiendey atisqan thaj kayta qosunkichis, chhaynapin sonqoykichista yuyayniykichista ima Cristo Jesuswan waqaychanqa”, nispa (Filip. 4:6, 7). Diosmi thaj kayta qowasunchis, chaymi yanapawasun ama juchallikunanchispaq. Diosman achhuykuqtinchisqa paypas noqanchismanmi achhuykamuwasun (Sant. 4:8).

Satanaspa trampankunaman ama urmananchispaqqa, Diosninchiswanmi amigontin kashanallanchis. Jesusmi Satanasmanta niran: “Kay pacha kamachikuqqa ñan jamushanña [...]. Payqa manan imanaytapas atiwanmanchu”, nispa (Juan 14:30). Jesusqa manan manchakuranchu, chaymi niran: “Kachamuwaqniyqa noqawanmi kashan, manan sapallaytachu payqa saqerpariwan, imatapas sonqonpaq jinapuni tukuy tiempo ruwasqayrayku”, nispa (Juan 8:29). Sichus Diospa sonqonpaq jina ruwasun chayqa, manan sapallanchistachu saqerpariwasun. Chhaynaqa karunchakusun pornografiamanta, jinan Satanasqa mana atipawasunchu.