Kichay leenaykipaq

Índice nisqaman riy

 25 ESTUDIO

Jehová Diospin confiananchis sinchi llakipi tarikuspa

Jehová Diospin confiananchis sinchi llakipi tarikuspa

‘Llakikuymantan nanasqa sonqoyoq mañakushani’ (1 SAM. 1:15)

30 TAKI Qanmi kanki taytay, Diosniy, amigoypas

KAYKUNAMANTA YACHASUN *

1. ¿Imaraykun Jesuspa nisqanta kasukunanchis?

TUKUKUY p’unchaykunamanta rimashaspan Jesusqa niran: ‘Qankuna kikiykichista allinta cuidakuychis amapuni jayk’aqpas sonqoykichis kay kausaypa llakipakuyninkunawan afanasqa kashananpaq’, nispa (Luc. 21:34). ¿Imaraykun chay nisqanta kasukunanchis? Llapa runakuna jina problemakunapi tarikusqanchisrayku.

2. ¿Ima problemakunapin hermanonchiskuna tarikuranku?

2 Mayninpiqa kaq tiempollapin askha problemakunapi tarikunchis. Jhon * hermanonchismanta rimasun, esclerosis múltiple onqoyniyoqmi kapuran, jinan pisi-pisimanta cuerpon manaña kuyuripuranchu, esposanpas saqepuranmi 19 watakunaña casarasqa kasharanku chaypas. Chaymantapas iskaynin ususinkunan manaña Jehová Diosta servirankuchu. Roberto, Linda sutiyoq matrimoniomantañataq rimasun, paykunaqa mana llank’anayoqmi kapuranku, qhepamantaq bancoman mana pagasqankurayku wasinkuta pierdepuranku. Jinaspapas esposanqa corazonninmantan mal kapuran, chaywanqa qonqayllan wañunman, chaymantapas juj onqoytawanmi tarillarankutaq.

3. Filipenses 4:6, 7 textopi nisqanman jina, ¿imamantan seguro kashanchis?

3 Kamaqninchis, munakuq papanchisqa entiendenmi problemakunapi tarikuspa imayna sientekusqanchista. Jinaspa yanapayta munawanchis problemanchiskunata atipananchispaq (leey Filipenses 4:6, 7). Bibliapin willashan  askha serviqninkuna problemakunapi tarikusqankumanta, imaynatas Jehová Dios paykunata yanaparan chaymantapas. Wakinmanta yachasun.

ELIASQA NOQANCHIS JINA RUNALLAN KARAN

4. ¿Imakunapin Elías tarikuran? ¿Imaynan sientekuran Jehová Diospa yanapasqanwan?

4 Eliasqa sasa tiempopin Jehová Diosta serviran, jinaspa llakikuykunapi tarikuran. Chay tiempopin Diosta mana kasukuq Ajab Israelpi rey karan, payqa Baal diosta adoraq Jezabelwanmi casarakuran. Jinan paykunaqa runakunata tanqaranku Baal diosta adoranankupaq, wañuchirankutaqmi Jehová Diospa askha profetankunata, Eliasmi ichaqa salvakuran. Chaymantapas chay tiempopin jatun yarqay karan, Diospi confiasqanraykun ichaqa mana wañuranchu (1 Rey. 17:2-4, 14-16). Chaymantapas Baalpa profetankunata chay diosta adoraq runakunatawanmi anyaran, kallpacharantaq cheqaq Diosta adoranankupaq (1 Rey. 18:21-24, 36-38). Eliasqa rikuranmi Jehová Dios imaymanapi payta yanapasqanta cuidasqantapas.

Diosqa juj angeltan kacharan Eliasta yanapananpaq (5, 6 parrafokunata qhaway) *

5, 6. 1 Reyes 19:1-4 textopi nisqanman jina, ¿imaynan Elías sientekuran, imatan Jehová Dios ruwaran munakusqanta rikuchinanpaq?

5 (Leey 1 Reyes 19:1-4). Jezabelqa Eliastan amenazaran wañuchinanpaq, jinan payqa mancharikuspa Beer-seba ladoman ayqekuran. Llakiq ñit’isqan kasqanraykun wañuytaraq munaran. ¿Imaraykun chhayna sientekuran? “Noqanchis jinalla” pantaq runa kasqanrayku (Sant. 5:17). Sinchi  llakisqa sinchi sayk’usqan kasharan. Yaqapaschá khaynata piensaran: “Jehová Diosta adoranankupaq runakunata kallpachasqayqa yanqapaqmá kasqa. Israel runakunaqa kaqllan kashanku, noqallañan Jehová Diostaqa servishani”, nispa (1 Rey. 18:3, 4, 13; 19:10, 14). Yaqapaschá tapukushanchis: “¿Imaraykun chhaynata sientekuran?”, nispa. Jehová Diosmi ichaqa entienderan imayna sientekusqanta.

6 Diosqa manan Eliaswan phiñakuranchu, aswanmi mijunata qoran kallpanman kutinanpaq (1 Rey. 19:5-7). Chaymantataq sumaqllata Eliaspa imayna piensasqanta corregiran atiyninta rikuchispa. Chaymantapas willaranmi 7.000 israelitakuna Baal diosta mana adorasqankumanta (1 Rey. 19:11-18). Chaykunata ruwaspan Jehová Diosqa Eliasman rikuchiran munakusqanta.

¿IMAYNATAN JEHOVÁ DIOS YANAPAWASUN?

7. Jehová Diosqa entienderanmi Eliasta, ¿imaraykun chayta yachay kallpachawanchis?

7 ¿Elías jinachu sinchi llakipi tarikushanki? Diosqa entienderanmi Eliaspa imayna sientekusqanta. Chayta yachayqa anchatan kallpachawanchis. Sichus llakisqa kashanchis chayqa Jehová Diosqa entiendenmi imayna sientekusqanchista. Payqa yachanmi imachus piensasqanchista, imayna sientekusqanchista, maykama imatapas ruway atisqanchista (Sal. 103:14; 139:3, 4). Sichus Elías jina Jehová Diospi confiasun chayqa, paymi yanapawasun llakikuyninchiskunata atipanapaq (Sal. 55:22).

8. ¿Imaynatan Jehová Dios yanapawasun llakipi tarikuqtinchis?

8 Sinchi llakipi tarikuspaqa mana allinkunapin piensasunman pisikallpayasunmantaqmi. Chhaynapi tarikuspaqa Jehová Diospa yanapaynintan mañakunanchis. Willakunanchismi problemanchiskunata imayna sientekusqanchistapas. Jinan mañakusqanchisman kutichimuwasun (Sal. 5:3; 1 Ped. 5:7). Chhaynaqa sapa kutillanmi problemanchiskunata willakunanchis. Jehová Diosqa Eliasman jinan kutichimuwasun, chaytaqa ruwan simin qelqawan hermanonchiskunawan iman. Bibliata leespan consolasqa suyakuyniyoq ima kanchis. Hermanonchiskunapas kallpachawanchismi llakipi tarikuqtinchis (Rom. 15:4; Heb. 10:24, 25).

9. ¿Imaynatan confiasqanchis amigonchis yanapawasunman?

9 Jehová Diosqa Eliastan niran Eliseoman wakin llank’ananta qonanpaq. Chhaynapin Eliasman juj amigota qoran llakisqa kaqtin yanapananpaq. Noqanchistapas chay jinatan confiasqanchis amigonchisqa yanapawasun llakisqa kaqtinchis (2 Rey. 2:2; Prov. 17:17). Sichus mana pimanpas problemanchiskunata willayta atinchischu chayqa, Diosmantan mañakunanchis allin iñiyniyoq hermanota tarinanchispaq, chhaynapi llakikuyninchista payman willakunanchispaq.

10. a) ¿Imaynatan kallpachawanchis Eliasta Jehová Diospa yanapasqan? b) Isaías 40:28, 29 textopi leesqanchis promesa, ¿imaynatan yanapawanchis?

10 Jehová Diosmi Eliastaqa yanaparan askha watakuna tukuy sonqowan payta servishanallanpaq. Chayta yachayqa kallpachawanchismi. Yaqapaschá mayninpi sinchi llakisqa sayk’usqa ima tarikusun, ichaqa Jehová Diospi confiasun chayqa kallpatan qowasun junt’aq sonqowan payta servishanallapaq (leey Isaías 40:28, 29).

 ANAPAS, DAVIDPAS, SALMISTAPAS JEHOVÁ DIOSPIN CONFIARANKU

11-13. ¿Ima llakikuykunapin tarikuranku ñaupaq tiempopi Diosta serviqkuna?

11 Bibliaqa willanmi askha runakuna nishuta sufrisqankumanta. Anamanta rimasun, payqa manan atiranchu wawayoq kayta, qosanpa juj esposanpas chhayna kasqanmanta sinchita paymanta burlakuran (1 Sam. 1:2, 6). Chaymi sinchita llakikuspa waqaran manañataq mijuytapas munaranchu (1 Sam. 1:7, 10).

12 Rey Davidpas imaymana llakipin tarikuran. Wakinmanta yachasun, sonqonmi sinchita ñit’iran jatun juchakunapi urmasqanmanta (Sal. 40:12). Chaymantapas munakusqan wawan Absalonmi pay contra jatariran, jinaspa chayta ruwasqanmanta wañuchisqa karan (2 Sam. 15:13, 14; 18:33). Chaymantapas confiasqan amigonmi traicionaran (2 Sam. 16:23–17:2; Sal. 55:12-14). Salmo takikunapin qelqaran llakikuyninkunata, ichaqa qelqallarantaqmi tukuy sonqonwan Jehová Diospi confiasqantapas (Sal. 38:5-10; 94:17-19).

¿Iman salmistata yanaparan jujmanta kusisqa sonqowan Jehová Diosta servinanpaq? (13-15 parrafokunata qhaway) *

13 Davidpa kausasqan qhepamanmi juj salmista Jerusalén llaqtapi ‘Diospa ch’uya wasinpi’ llank’aran. Payqa Leví ayllumanta Asafpa mirayninmantan kanman karan, payqa millay runakunaq imayna kausasqankuta qhawarispan envidiakuran, jinan phiñasqa llakisqa sientekuran. Nirantaqmi: “Yanqapaqmá Diostaqa servishani”, nispa (Sal. 73:2-5, 7, 12-14, 17, 21).

14, 15. ¿Imatan yachanchis Bibliaq willasqan kinsa runakunamanta?

14 Chay kinsantin Diosta serviqkunaqa Jehová Diospa yanapaynintan maskharanku. Mana manchakuspan willakuranku imaraykuchus sinchita llakikusqankuta.  Jehová Diosta adorananku wasimanpas rishallarankun (1 Sam. 1:9, 10; Sal. 55:22; 73:17; 122:1).

15 Khuyapayakuq Diosninchisqa llapankuq mañakusqantan kutichimuran. Anaqa manañan llakikuranchu (1 Sam. 1:18). Davidtaq qelqaran: “Askhan chanin runaq llakikuyninqa, chaypas Señor Diosmi tukuy chaykunamanta qespichin”, nispa (Sal. 34:19). Salmistataq repararan Jehová Dios paña makinmanta jap’iykusqanta, consejonkunawan sumaqllata pusarisqantapas. Jinan takiran: “Noqapaq aswan allinqa Diospa qayllanpi kayniymi [...] qanmi pakakunayqa kanki”, nispa (Sal. 73:23, 24, 28). ¿Imatan paykunawan pasasqanmanta yachanchis? Mayninpiqa sinchi llakisqan tarikusun problemanchiskunawan. Ichaqa chaykunata atipanapaqqa yuyarinanchismi Jehová Dios serviqninkunata imayna yanapasqanta, jinaspa yanapayninta mañakunanchis tukuypitaq payta kasukunanchis (Sal. 143:1, 4-8).

JEHOVÁ DIOSPI CONFIASPAQA AGUANTASUNMI

Hermananchisqa karunchakuytan munaran, ichaqa jujkunata yanapaspan manaña sinchitachu llakikuran (16, 17 parrafokunata qhaway)

16, 17. a) ¿Imaraykun mana karunchakunanchischu? b) ¿Ima ruwaykunan kallpata qowanchis aguantananchispaq?

16 Chay kinsantin runakunamantaqa kaytan yachallanchistaq: Manan Jehová Diosmanta  hermanonchiskunamantapas karunchakunanchischu (Prov. 18:1). Nancy hermananchismi sinchita sufriran qosan ripuqtin. Paymi willakun: “Askha p’unchaykunan mana pitapas rikuyta munaranichu, nitaq piwanpas parlayta munaranichu. Ichaqa chayta ruwaspaqa astawanmi llakisqa sientekuq kani”, nispa. Jujkunata problemankunapi yanapaspan ichaqa allin sientekuran. Paymi nin: “Imayna sientekusqankutan uyarirani, paykunamanta masta preocupakuspaqa pisillatañan problemaykunamanta llakikurani”, nispa.

17 Juñunakuykunaman riypas kallpachawanchismi. Chayta ruwaspan Jehová Diosta permitishanchis yanapawananchispaq consolawananchispaqpas (Sal. 86:17). Juñunakuykunapin Diosqa espiritunwan, Bibliawan, hermanonchiskunawanpas kallpachawanchis. Chaymantapas juñunakuykunapin hermanonchiskunawan kallpachanakunchis (Rom. 1:11, 12). Sofía hermananchismi niran: “Jehová Dioswan hermanonchiskunapiwan yanapawaranku aguantashanallaypaq. Juñunakuykunaqa ancha valorniyoqmi noqapaqqa. Astawan predicaspa juñunakuykunapipas masta participaspan repararani llakikuyniykunata aguantanaypaq kallpay kasqanta”, nispa.

18. ¿Imatan Jehová Dios qowasun llakisqa kaqtinchis?

18 Llakisqa kashaspaqa kaytan yuyarinanchis: Jehová Diosqa manan jamuq tiempopi llakikuykunata tukuchinallanpaqchu niwanchis. Payqa niwallanchistaqmi kunanpas yanapawananchispaq. Kallpatan qowasun llakikuyninchiskunata atipananchispaq (Filip. 2:13).

19. ¿Imatan prometewanchis Romanos 8:37-39 textopi?

19 (Leey Romanos 8:37-39). Apóstol Pablon niwanchis: “Manan imapas Diospa munakuyninmantaqa t’aqawasunchu”, nispa. Ichaqa, ¿imaynatan yanapasunman llakikuywan ñit’ichikuq hermanonchiskunata? Qatimuq estudiopin yachasun imaynatas Jehová Dios jina khuyapayakuq kaspa paykunata yanapasunman chayta.

44 TAKI Llakikuypin wajakamuyki

^ párr. 5 Unay tiempo llakisqalla kayqa saludninchistan perjudican. ¿Imaynatan Jehová Dios yanapawasunman? Kay estudiopin yachasun imaynatas Eliasta yanaparan chayta. Yachallasuntaqmi Bibliaq willasqan kinsa runakunamanta, imatas paykuna ruwaranku Diospa yanapayninta chaskinankupaq chaytapas.

^ párr. 2 Kay estudiopi sutikunaqa cambiasqan kashan.

^ párr. 53 DIBUJOMANTA WILLAKUY: Jehová Diospa angelninmi sumaqllata Eliasta rijch’arichispa t’antata unutawan jaywashan.

^ párr. 55 DIBUJOMANTA WILLAKUY: Yaqapaschá chay salmistaqa Asafpa mirayninmanta karan, paymi juj takita qelqashan, jinaspa juj levitakunawan qelqasqanta takishanku.