Kichay leenaykipaq

Índice nisqaman riy

 1 YACHACHIKUY

Runakunata yachachimuychis discipuloykuna kanankupaq

Runakunata yachachimuychis discipuloykuna kanankupaq

2020 WATAPAQ TEXTO: Riychis, yachachimuychis jinaspa bautizamuychis (MAT. 28:19)

79 TAKI Paykunata iñiyninkupi kallpachay

KAYKUNAMANTA YACHASUN *

1, 2. ¿Imatan juj ángel Jesuspa sepulturanman riq warmikunata niran? ¿Imatan Jesuspas paykunata niran?

ASKHA warmikunan sinchi llakisqa 33 watapi 16 nisán killapi Jesuspa ayanta sumaq q’apaq aceitewan jawinankupaq rishanku, Jesuspa ayanqa iskay p’unchayñan sepulturapi kasharan. Sepulturanman chayaspan ichaqa admirakunku ch’usaqta rikuspanku. Jinan juj angelqa paykunaman willan Jesús kausarichisqa kasqanta, chaymantataq nin: “Payqa ñauparinñan Galileaman, chaypin payta rikumunkichis”, nispa (Mat. 28:1-7; Luc. 23:56; 24:10).

2 Sepulturamanta ripushaqtinkun Jesús kikinpuni paykunawan tupaspa nin: “Phawaychis, wayqeykunaman willamuychis Galileaman rinankupaq, chaypin rikumuwanqaku”, nispa (Mat. 28:10). Jesusqa kausarimpusqan qhepamanmi discipulonkunata kamachiran Galileapi juñukunankupaq, chay juñunakuypin ancha importante kamachikuyta qonan karan.

¿PIKUNATAN KAMACHIRAN RUNAKUNATA YACHACHINANKUPAQ?

Jesusmi apostolninkunawan juj discipulonkunawan ima Galilea llaqtapi juñukuran, chaypin niran: “Riychis, yachachimuychis jinaspa bautizamuychis”, nispa (3, 4 parrafokunata qhaway)

3, 4. ¿Imanaqtinmi ninchis: “Mateo 28:19, 20 textopi Jesuspa kamachisqanqa mana apostolkunallapaqchu karan”, nispa? (Qhaway tapanpi kaq dibujota.)

3 (Leey Mateo 28:16-20). Chay juñunakuypin Jesusqa discipulonkunata kamachiran ancha importante llank’ayta ruwanankupaq, chay llank’aytan kunankamapas ruwashanchis. Jesusmi paykunata niran: “Llapa nacionmanta runakunaman riychis, jinaspa yachachimuychis discipuloykuna kanankupaq, [...] llapa kamachisqaykunata paykunaman yachachimuychis kasukunankupaq”, nispa.

 4 Jesusqa llapa discipulonkunatan kamachiran runakunaman Diosmanta willanankupaq. Chaytaqa manan 11 apostolninkunallachu kasukunanku karan. ¿Imaraykun chayta ninchis? Galilea orqopi chay juñunakuyta Jesús ruwashaqtinqa manan apostolkunallachu kasharanku. Chaychá angelqa warmikunata niran: ‘Galileapin payta rikumunkichis’, nispa. Chay jinaqa chay juñunakuypiqa Diosta serviq warmikunapas chaypin kashankuman karan.

5. 1 Corintios 15:6 textopin willashan Jesús askha discipulonkunawan juñukusqanta, ¿imaraykun ninchis chay juñunakuyqa Mateo capítulo 28:19, 20 textopi juñunakuymanta rimashasqanta?

5 Apóstol Pablon willaran Jesús 500 iñiqmasikunaman juj kutipi rijurisqanta (1 Cor. 15:6). ¿Maypin rijurinman karan? Apóstol Pabloqa rimashanman karan Mateo 28 capitulopi Galilea orqopi Jesús discipulonkunawan juñukusqankumantan. ¿Imaynapin chayta yachanchis? Ñaupaq kaq, Jesuspa discipulonkunaqa yaqa llapankun Galileamanta karanku, chaymi allinpuni kanman karan llapankuta Galilea orqopi juñuyqa Jerusalenpi juj wasipi juñunakuymantaqa. Iskay kaq, kausarisqan qhepamanqa Jesusqa ñan 11 apostolninkunawan juñukuranña Jerusalenpiqa. Sichus apostolninkunallata kamachiyta munanman karan Diosmanta willanankupaq yachachinankupaqpas chayqa, Jerusalenpin kamachinman karan, manan ninmanchu karan paykunapas juj discipulonkunapas Galileapi juñukunankuta (Luc. 24:33, 36).

6. ¿Imaynapin yachanchis Mateo 28:20 textopi Jesuspa kamachisqanta kunan tiempopi discipulonkunapas kasukunanku kasqanta? ¿Imaynapin yachanchis kasukushasqankuta?

6 ¿Imaraykun nillanchistaq: “Jesusqa manan 11 apostolninkunallatachu kamachiran runakunata yachachinankupaq”, nispa? Jesusmi niran: “Noqaqa sapa p’unchaymi qankunawan kashasaq kay tiempoq tukukapunankama”, nispa (Mat. 28:20). Chaypi nisqan jina, kunan tiempopin askha iñiqmasinchiskuna runakunata yanapashanku Jesuspa discipulon kanankupaq. Chaymi kunanqa sapa wata yaqa 300.000 runakuna bautizakunku Jesuspa discipulonkuna kanankupaq.

7. ¿Imamantan qatimuqpi yachasun?

7 Bibliamanta yachachisqanchis askha runakunan bautizakushanku. Wakinmi ichaqa iskayashanku Jesuspa discipulon kanankupaq. Paykunaqa munankun yachachinanchista, ichaqa manan vidankuta cambiankuchu. Llapa yachachisqanchis runakunatan yanapayta munanchis yachasqankuman jina kausanankupaq, chhaynapi Jesuspa discipulon kanankupaq. ¿Imaynatan yachachisqanchis runakunata yanapasunman Jehová Diosta munakunankupaq, allin iñiyniyoq kanankupaqpas? ¿Imakunatan qhawarinanchis Bibliamanta yachachisqanchis runata saqepunanchispaq? Chay tapuykunaman qatimuqpi yachasun.

YANAPASUN JEHOVÁ DIOSTA MUNAKUNANKUPAQ

8. ¿Imanaqtinmi wakin yachachisqanchis runakuna sasata entiendenku Jehová Dios munakuwasqanchista?

8 Jehová Diosqa payta munakusqanchisrayku servinanchistan munan. Chaymi yachachisqanchis runakunata entiendechinanchis Jehová Dios sapankankuta anchata munakusqanta. Diosninchisqa ‘mana tayta-mamayoqkunaq taytanmi, viudakunaq amachaqninmi’, chhaynatan paykunapas Jehová Diosta rikunanku (Sal. 68:5). Sichus yachachisqanchis runakuna allinta  yachanqaku Jehová Dios paykunata anchata munakusqanta chayqa, paykunapas Diostan astawan munakunqaku. Wakin runakunapaqmi ichaqa sasa kanman munakuq Papanta jina Diosta rikuyqa, wawa kaqtinku papanku mana munakusqanrayku (2 Tim. 3:1, 3). Chaymi yachachisqanchis runakunaman yapa-yapamanta willananchis Jehová Dios munakuq, khuyapayakuq kasqanta. Munakuq Papanchisqa maytan yanapayta munawanchis wiñaypaq kausananchista, chaytan yachachisqanchis runaman entiendechinanchis. ¿Imakunatan chaypaq ruwasunman?

9, 10. ¿Ima librokunawanmi Bibliamanta yachachinanchis? ¿Imaraykun chay librokunallawan yachachinanchis?

9 ¿Imatan Biblia yachachin? Diospa munakuynillanpi kashay librokunawan yachachiy. Chay librokunatan ruwakuran yachachisqanchis runakunaq sonqonman chayananchispaq. ¿Imatan Biblia yachachin? libropi 1 capitulopin kay tapuykunamanta rimashan: ¿Dioschu sufrichiwanchis? ¿Imaynan Dios sientekun sufriqtinchis?  ¿Atiwaqchu Diospa amigon kayta? Diospa munakuynillanpi kashay librotaq yachachisqanchis runata yanapan Bibliapi yachasqanman jina kausananpaq Jehová Diosta astawan munakunanpaqwan. Jujkunataña chay librokunawan yachachiranchis chaypas, preparakunanchismi sapa kuti yachachinanchispaq, yanapananchistaq kasukunanpaq.

10 Yaqapaschá yachachisqayki runa nisunkiman: “Juj qelqaykichispin tariruni juj sumaq yachachikuyta, chaymantan munayman yachachiwanaykita”, nispa. Chhayna kaqtinqa niwaqmi sapallanpi chay qelqata leenanpaq, jinaspa Bibliamanta yachachisqanchis librowan yachachishallawaq.

Diosmanta mañakuspa yachachisun (11 parrafota qhaway)

11. ¿Jayk’aqmantapachan yachachisqanchis runawan Diosmanta kuska mañakusunman? ¿Imaynatan yanapasunman Diosmanta mañakuy allinpuni kasqanta yachananpaq?

11 Diosmanta mañakuspa qallariy. ¿Jayk’aqmantapachan yachachisqanchis runawan Diosmanta kuska mañakusunman? Chaytaqa ruwasunman pisi kutillataraq yachachisqanchis qhepamanmi. Yachachisqanchis runaqa yachananmi Bibliata entiendenapaqqa Diospa espiritunta necesitasqanchista. Chaypaqmi wakinqa Santiago 1:5 textota estudiantenwan leenku, chaypin nishan: “Mayqenniykichispas yachayniyoq kayta necesitashankichis chayqa, Diosmanta mañakushallaychis”, nispa. Chaymantataq tapunku: “¿Imatan ruwasunman estudiasqanchista entiendenapaq?”, nispa. Chaywanmi reparanman Diospa yanapayninta mañakuy allinpuni kasqanta.

12. ¿Imaynatan Salmos 139:2-4 textowan yachachisqanchis runata yanapasunman mana manchakuspa Diosmanta mañakunanpaq?

12 Diosmanta mañakuyta yachachiy. Yachachisqanchis runatan entiendechinanchis sonqomanta mañakusqanchista Dios uyarisqanta. Nisunmanmi: “Diosmanqa willawaqmi mana pimanpas willasqaykita, imayna sientekusqaykitapas. Payqa yachanñan imachus piensasqaykita, chaymi mana p’enqakunaykichu payman willakuyta”, nispa (leey Salmos 139:2-4). Chaymantapas nisunmanmi: “Mañakuwaqmi Diospa yanapayninta mana allin piensasqaykita, mana allin ruwasqaykitapas atipanaykipaq”, nispa. Yaqapaschá yachachisqanchis runaqa pantasqa religionpa fiestankunata ruwaytaraq munashan. Chhayna kaqtinqa nisunmanmi: “Diosman willakuy imayna sientekusqaykita, rogakuytaq munayninta ruwanaykipaq yanapanasuykipaq”, nispa (Sal. 97:10).

Juñunakuyman jamunankupaq invitasun (13 parrafota qhaway)

13. a) ¿Imanaqtinmi qallariymantapacha yachachisqanchis runata invitananchis juñunakuykunaman? b) ¿Imatan ruwasunman juñunakuykunapi yachachisqanchis runa allin sientekunanpaq?

13 Qallariymantapacha invitasun juñunakuykunaman rinanpaq. Juñunakuypi yachachimusqankuta uyarispa, iñiqmasikunaq imayna portakusqankuta qhawaspan yachachisqanchis runaqa Jehová Diosta astawan munakunqa allin iñiyniyoqtaq kanqapas. Chaypaqqa ¿Imaynatan juñunakuyniyku aparikun? videota qhawachispan juñunakuyman invitasunman. Nisunmantaq: “Jamuymanmi wasiykita kuska rinanchispaq”, nispa. Chaymantapas Bibliamanta yachachiq rispaqa juj-juj hermanokunatan pusasunman, chhaynapin hermanokunata reqsispa juñunakuykunapi manaña manchakunqachu.

YANAPASUN ALLIN IÑIYNIYOQ KANANKUPAQ

14. ¿Iman yachachisqanchis runata yanapanqa iñiyninpi wiñananpaq?

14 Yachachisqanchis runatan yanapananchis allin iñiyniyoq kananpaq (Efes. 4:13).  Qallariypiqa yachachisqanchis runaqa imaynatas yachasqan yanapanman chayllapin piensan. Jehová Diosta astawan munakuspan ichaqa jujkunata yanapaypi piensan (Mat. 22:37-39). Chaymi qhawarisqanchisman jina nisunman: “Diospa gobiernonta yanapananchispaq sonqomanta qolqenchista churayqa allinmi”, nispa.

Yanapanchismi ima sasachakuytapas allichayta yachanankupaq (15 parrafota qhaway)

15. ¿Imaynatan yachachisqanchis runata yanapasunman piwanpas phiñachinakusqanta allichananpaq?

15 Yachachisun ima sasachaytapas allichayta. Yaqapaschá yachachisqanchis runa willawasunman juj hermano sonqonta k’irisqanta. ¿Imaynatan yanapananchis? Manan pimanpas sayapakunanchischu, aswanpas imatas Bibliapi niwanchis ruwananchista chaytan qhawachinanchis. Paytan niwaq: “Kaykunatan ruwawaq: Atispaqa perdonawaqmi, sinchitapuni sonqoykita k’irisuqtiykitaq paywan sumaqllata parlawaq allichanaykichispaq”, nispa (Mateo 18:15 textowan tupanachiy). Yanapasunmantaqmi imaynata ruwananpaq. Chaypaq paywan kuska yanapaykunata maskhasunman JW Library®; Jehová Diospa testigonkuna Bibliata t’aqwinankupaq qelqapi; jw.org® nisqapipas. Sichus manaraq bautizakushaspa yachanqa piwanpas phiñachinakusqanta allichayta chayqa, sumaqtan hermanokunawan kausanqa bautizakusqan qhepamanpas.

16. Yachachisqanchis runata yanapananchispaq, ¿imaraykun allinpuni kanman jujkunata pusay?

16 Watukuq umalliqta, juj hermanokunatawan pusasun. ¿Imaraykun chayta ruwananchis? Mayninpiqa juj iñiqmasinchiskunan aswan allinta yachachisqanchis runata yanapankuman. Yaqapaschá yachachisqanchis runaqa askha kutipi cigarro fumayta saqeyta munaran, ichaqa mana atishanchu. Chhayna kaqtinqa chay viciota saqepuq hermanotan nisunman paywan kuska rinanchispaq. Payqa willanmanmi imakunatas ruwaran chay vicionta saqepunanpaq chayta. Ichaqa sichus manchakunchis allin yachachiq hermanoq ñaupanpi yachachiyta chayqa, paytan nisunman chay kutipi yachachinanpaq. Llapanchismi munanchis yachachisqanchis runakuna allin iñiyniyoq kanankuta, chaymi allinpunin kanman chay hermanokunata pusayqa.

¿IMAKUNATAN QHAWARINANCHIS SAQEPUNANCHISPAQ?

17, 18. ¿Imakunatan qhawarinanchis manaña juj runaman Bibliamanta yachachinanchispaq?

17 Sichus yachachisqanchis runa mana imayna kausasqanta cambianchu chayqa, tapukunanchismi: “¿Yachachishanallaychu icha manachu?”, nispa. Chaypaqqa qhawarinanchismi may tukuyta yachachisqanchis runa entiendesqanta. Wakinqa unaypin entiendenku, chaymi tapukunanchis: “¿Yachachisqanchis runa imayna kausasqanta cambianchu pisi-pisimantaña yachashaspapas? ¿Kasukushanchu yachasqanta?”, nispa (Mat.  28:20). Pisi-pisimantaña yachanman chaypas cambiananmi imayna kausasqanta.

18 Ichaqa, ¿imatan ruwananchis yachachisqanchis runa Bibliamanta yachasqanta mana valoraqtin? Yaqapaschá ¿Imatan Biblia yachachin? librota estudiayta tukuspa Diospa munakuynillanpi kashay librota estudiayta qallarispapas mana juj kutillatapas juñunakuyman riranchu, nitaq Jesuspa wañupusqanta yuyarinapaq juñunakuymanpas. Sapa kutillataq niran: “Manan tiempoy kanchu estudianaypaq”, nispa chayqa, paywanmi sut’inta rimananchis saqepunanchispaq. *

19. ¿Imatan niwaq yachachisqayki runa iñiyninpi mana ñaupariqtin? ¿Imatan allinta qhawarinayki yachachisqayki runata saqepunaykipaq?

19 Yaqapaschá kay jinata tapusunman: “¿Iman jark’ashasunki Jehová Diospa testigon kanaykipaq?”, nispa. Yaqapaschá unayña estudiaq runa nisunkiman: “Gustawanmi Bibliamanta yachachiwasqaykiqa, ichaqa manan jayk’aqpas Jehová Diospa testigonqa kasaqchu”, nispa. Chhayna kaqtinqa saqepuwaqmi. Wakinmi ichaqa chayraq nisunkiman imachus jark’ashasqanta, yaqapaschá nisunkiman: “Manchakunin wasin-wasinta Diosmanta willayta”, nispa. Chayta yachaspan aswan allinta payta yanapayta atiwaq.

Jehová Diosta mana serviy munaqkunataqa manañan yachachinanchischu (20 parrafota qhaway)

20. ¿Imaynatan Hechos 13:48 texto yanapawasunman pikunatachus yanapananchis kasqanta yachanapaq?

20 Wakin yachachisqanchis runakunaqa Ezequielpa tiemponpi runakuna jinan kanku. Jehová Diosmi chay runakunamanta rimaspa niran: “Paykunaqa sumaq takiqta, munay kunkawan takiqta, allin arpa tocaqta jinallan qhawarisunkiku. Rimasqaykitapas uyarinkun, ichaqa manan ruwaytapuniqa munankuchu”, nispa (Ezeq. 33:32). Tiempoqa pisillañan kashan, chaymi sasaña kaqtinpas yachachiqninchis runata “manañan yachachisaykiñachu” nispa ninanchis (1 Cor. 7:29). Tiemponchistaqa usananchis pikunachus ‘wiñay kausayman apaq ñanninta puriy munaqkunata’ yanapananchispaqmi (leey Hechos 13:48).

Yaqapaschá juj runakuna Diosmanta mañakushanku yanapananchispaq (20 parrafota qhaway)

21. ¿Ima textotan 2020 watapaq ajllakuran? ¿Imaraykun allinpuni kanqa chayta yuyariy?

21 Galilea orqopin Jesusqa discipulonkunata niran: “Riychis, yachachimuychis jinaspa bautizamuychis”, nispa (Mat. 28:19). Chay texton 2020 watapaq kashan, chayta qhawarispan kallpachakusun aswan allinta yachachisqanchis runata yanapananchispaq.

Kallpachakusun aswan allinta yachachisqanchis runakunata yanapananchispaq, chhaynapi bautizakunankupaq (21 parrafota qhaway)

70 TAKI Allin sonqoyoqkunata maskhasun

^ párr. 5 2020 watapaq texton niwanchis runakuna Jesuspa discipulon kanankupaq yachachinanchista. Chay kamachikuytaqa Diospa llapa serviqninkunan kasukunanchis. ¿Imaynatan yachachisqanchis runaq sonqonman chayasunman Jesuspa discipulon kananpaq? ¿Imaynapin yachasunman juj runaman Bibliamanta yachachishanallanchischu icha manachus chayta? Chaykunamantan kaypi yachasun.