Kichay leenaykipaq

Índice nisqaman riy

 5 YACHACHIKUY

Pusakapuwayku

Pusakapuwayku

“Noqaykun uyariyku qankunawan Dios kashasqanta, chayrayku pusakapuwayku” (ZAC. 8:23)

26 TAKI “Noqapaqmi ruwarankichis”

KAYKUNAMANTA YACHASUN *

Waj ovejamanta kaqkuna otaq chunka runakunaqa kusisqan kanku ajllasqa cristianokunawan kuska Jehová Diosta servisqankumanta (1, 2 parrafokunata qhaway)

1. ¿Kay tiempopi ima pasanantan Jehová Dios willaranña?

JEHOVÁ DIOSMI willaranña kay tiempopi imachus pasananta, niranmi: “Chay p’unchaykunapin suyukunapi kaq imaymana rimay rimaqkunamanta chunka runa juj judío runata capanmanta qaqata jap’iykuspa ninqa: ‘Noqaykun uyariyku qankunawan Dios kashasqanta, chayrayku pusakapuwayku’”, nispa (Zac. 8:23). Chay “judío” runaqa Jehová Dios santo espiritunwan ajllasqa cristianokunatan representan, paykunan ‘Diospa Israel llaqtan kanku’ (Gál. 6:16). Chay ‘chunka runakunataq’ kanku kay pachapi wiñaypaq tiyanankupaq suyakuyniyoqkuna. Paykunaqa yachankun Jehová Dios janaq pachaman rinankupaq cristianokunata ajllasqanta, chaymi kusikunku paykunawan kuska servispanku.

2. ¿Imaynapin ‘chunka runakuna’ ajllasqa cristianokunawan kuska rinku?

2 Manaña yachanchischu sapanka ajllasqa cristianokunaq sutinta * chaypas, kay pachapi suyakuyniyoqkunaqa paykunawanmi rishanku. ¿Imaynapi? Biblian willan chunka runakuna juj judioq capanmanta jap’ispanku kayta nisqankuta: “Noqaykun uyariyku qankunawan Dios kashasqanta, chayrayku pusakapuwayku”, nispa. Chay versiculopiqa juj judiollamantan riman. Ichaqa chunka runakunan payta ninku: ‘Qankunawanmi Dios kashan’, nispa. Chaywanmi yachanchis chay judio runaqa llapa ajllasqa cristianokunata  representasqanta. Chaymi kay pachapi suyakuyniyoqkunaqa paykunawan kuskan servinku. Ichaqa manan kamachiqninkunata jinachu rikunku aswanpas Cristollan kamachiqninkuqa (Mat. 23:10).

3. ¿Ima tapuykunamanta kaypi yachasun?

3 Kay pachapiqa kashanraqmi ajllasqa cristianokuna. Chaymi wakinninchisqa tapukusunman: “¿Imaynatan qhawarikunanku janaq pachapaq ajllasqa cristianokuna? ¿Imaynatan qhawarinanchis Jesuspa wañupusqanta yuyarina p’unchaypi t’antamanta vinomanta participaqkunata? ¿Llakikunanchischu t’antamanta vinomanta participaqkuna sapa wata yapakusqanmanta?”, nispa. Chay tapuykunamantan kaypi yachasun.

¿IMAYNATAN QHAWARIKUNANKU AJLLASQA CRISTIANOKUNA?

4. ¿Imanishanmi 1 Corintios 11:27-29 texto ajllasqa cristianokunamanta? ¿Imaraykun chayta allinta yuyarinanku?

4 1 Corintios 11:27-29 (leey) textopi nisqantan janaq pachapaq ajllasqa cristianokunaqa allinta yuyarinanku. Sichus juj ajllasqa cristiano Jesuspa wañupusqanta yuyarina p’unchaypi vinomanta ujashanman t’antamanta mijushanman, manataq  kasukushanmanchu Diospa kamachikuyninkunata chayqa juchallikushanmi (Heb. 6:4-6; 10:26-29). Ajllasqa cristianokunaqa yachankun ‘Diospa qosqan janaq pacha premioman aypanankukama junt’aq kanankuta’ (Filip. 3:13-16).

5. ¿Imaynatan ajllasqa cristianokuna qhawarikunanku?

5 Jehová Diospa espiritunmi runakunata yanapan aswan k’umuykukuq kanankupaq (Efes. 4:1-3; Col. 3:10, 12). Chaymi ajllasqa cristianokunaqa mana jujkunamantaqa aswan allinpaqchu qhawarikunku. Jehová Diosqa manan paykunallamanchu santo espiritunta qon, kay pachapi suyakuyniyoq cristianokunamanpas qollantaqmi, chaytan paykunaqa allinta yachanku. Jinaspapas paykunaqa manan ninkuchu: “Jujkunamanta aswan allintan Bibliamanta yachayku”, nispaqa. Manataqmi pitapas ninkumanchu: “Qanpas ajllasqa cristianon kanki, participanaykin t’antamanta vinomantawan”, nispa. Aswanmi k’umuykukuq kanku, yachankutaq Jehová Dioslla pitapas janaq pachaman rinanpaq ajllasqanta.

6. 1 Corintios 4:7, 8 textopi nisqanman jina, ¿imaynan kananku ajllasqa cristianokuna?

6 Ajllasqa cristianokunaqa anchatan valoranku ajllasqa kasqankuta, ichaqa manan chayraykuchu suyanku jujkunaq jatunchananta (Filip. 2:2, 3). Chaymantapas yachankun mana askha runaq qayllanpichu Jehová Dios paykunata ajllasqanta. Chaymi ajllasqa cristianoqa mana sintipakunchu qallariypi jujkuna Diospa ajllasqa kasqanmanta mana creeqtinku. Paypas yachanmi Bibliaq nisqanman jina mana pitapas usqhaychu creenanchis kasqanta, “Diosmantan sumaq llank’ayta chaskini” nispa niqtinku (Apo. 2:2). Chaymantapas paykunaqa manan pimanpas willankupachachu ajllasqa kasqankuta. Manataqmi jatunchakunkuchu ajllasqa kasqankumanta (leey 1 Corintios 4:7, 8).

7. ¿Imatan mana ruwanankuchu ajllasqa cristianokuna? ¿Imaraykun chayta mana ruwanankuchu?

7 Ajllasqa cristianokunaqa manan paykunapurallachu juñunakunku. Manataqmi juj ajllasqa cristianokunawan wajanakunkuchu imayna ajllasqa kasqankumanta rimanankupaq nitaq grupokunata ruwankuchu sapaqpi Bibliata estudianankupaq (Gál. 1:15-17). Sichus chayta ruwankuman chayqa, manan yanapakushankumanchu iñiq t’aqapi juj jinalla kausay kananta. Santo espirituq contranpitaq ruwashankuman, chay espiritun  Diospa llaqtanta yanapan thajpi juj nisqalla kausanankupaq (Rom. 16:17, 18).

¿IMAYNATAN AJLLASQA CRISTIANOKUNATA QHAWARINANCHIS?

Manan ajllasqa cristianokunata nitaq juj umalliqkunatapas allin reqsisqa runakunapas kankuman jinataqa qhawarinanchischu (8 parrafota qhaway) *

8. ¿Imanaqtinmi allin yuyaywan ajllasqa cristianota qhawarinanchis? (Qhawallaytaq willakuyta.)

8 ¿Imaynatan ajllasqa cristianokunata qhawarinanchis? Ajllasqa cristianoña kanman chaypas, manan paytaqa jatunchananchischu (Mat. 23:8-12). Umalliqkunamanta rimaspan Biblia nin: ‘Paykuna jina iñiyniyoq kaychis’, nispa. Ichaqa manan chaypiqa ninchu runakunata qatikuychis nispaqa (Heb. 13:7). Bibliaqa willanmi wakin cristianokuna allin respetasqa kanankuta iñiq t’aqata umallisqankurayku, yachachispa allinta llank’asqankurayku ima, manan ajllasqa cristiano kasqankuraykuchu (1 Tim. 5:17). Sichus ajllasqa cristianokunata jatunchasunman chayqa, p’enqachisunmanmi * otaq jatunchakuqman tukupunkuman (Rom. 12:3). Manan munasunmanchu mayqen ajllasqa cristianopas juchaman urmanantaqa riki (Luc. 17:2).

9. ¿Imaynatan rikuchisunman ajllasqa cristianokunata respetasqanchista?

9 ¿Imaynatan rikuchisunman ajllasqa cristianokunata respetasqanchista? Manan tapunanchischu: “¿Imaynapin ajllasqa karanki?”, nispaqa. Manataqmi jujkunaq ruwanankuman chapukunanchischu (1 Tes. 4:11; 2 Tes. 3:11). Nitaq ninanchischu: “Janaq pachapaq ajllasqataq kanki chayqa familiaykipas ajllasqachá kanku”, nispaqa. Janaq pachapaq ajllasqa kaytaqa manan herenciata jinachu chaskikun, aswanmi Jehová Dios deciden pitachus ajllanqa chayta (1 Tes. 2:12). Chaymantapas manan tapunanchischu mana allinta sientechinapaq jinaqa. Manan jayk’aqpas ajllasqa cristianoq esposanta tapunanchischu: “¿Imaynataq kay allpapi wiñaypaq tiyanki mana qosallaykiwanri?”, nispaqa. Mosoq pachapiqa Jehová Diosmi llapa runakunaq sonqonpa munasqanta ruwanqa (Sal. 145:16).

10. ¿Imanaqtinmi mana pi cristianotapas alabananchischu?

10 Chaymantapas ajllasqa cristianokunata mana jatunchaspaqa kikinchistan cuidakushanchis. Bibliaq nisqanman jina wakin ajllasqa cristianokunaqa Jehová Diostan qhepanchankuman (Mat. 25:10-12; 2 Ped. 2:20, 21). Sichus mana pitapas alabasunchu chayqa, manan runakunata qatikusunchu ajllasqa cristianoña kanman, askha wataña Jehová Diosta servishanman chaypas (Jud. 16). Chayta ruwaqtinchisqa manan iñiyninchispi pisipasunchu nitaq Jehová Diosmanta karunchakusunchu iñiq t’aqamanta paykuna karunchakuqtinku.

¿LLAKIKUNANCHISCHU VINOMANTA T’ANTAMANTA PARTICIPAQKUNAQ YAPAKUSQANWAN?

11. ¿Pisiyashankuchu vinomanta t’antamanta participaqkuna?

11 Ñaupaq watakunapiqa vinomanta t’antamanta participaqkunaqa pisiyasharanmi. Kay watakunapin ichaqa yapakushan. ¿Llakikunanchischu chaymanta? Manan. Qatimuqpi qhawarisun imarayku mana llakikunanchischu kasqanta.

12. ¿Imaraykun mana llakikunanchischu t’antamanta vinomanta participaqkunaq yapakusqanwan?

12 “Jehová Diosqa reqsinmi paypa kaqkunataqa” (2 Tim. 2:19). Diosqa yachanmi  pikunachus ajllasqa cristianokuna kasqanta, Jesuspa wañupusqanta yuyarinapaq juñunakuypi t’antamanta vinomanta participaqkunata yupaqkunan ichaqa mana yachankuchu. Chay yupasqanku ukhupin kashallankutaq ajllasqa cristiano kanankupaq piensaqkuna. Chaymi wakinqa manaña participankuchu. Wakintaq umankumanta mal kasqankurayku piensanku Jesuswan kuska kamachimunankupaq. Chaymi mana yachakunchu jayk’a ajllasqa cristianokunachus kay pachapi kashasqanta.

13. ¿Bibliapi willanchu manchay ñak’ariy tiempo qallariqtin jayk’a ajllasqa cristianokuna kananta?

13 Kay pachapiqa kanqaraqmi ajllasqa cristianokuna janaq pachaman Jesús apapunanpaq (Mat. 24:31). Bibliapin willan tukukuy p’unchaykunapi kay pachapi wakin ajllasqa cristianokuna kashanantaraq (Apo. 12:17). Ichaqa manan willanchu jayk’araqchus kanqaku manchay ñak’ariy tiempo qallariqtin.

¿Imatan mana ruwananchischu vinomanta t’antamanta Jesuspa wañupusqanta yuyarinapaq juñunakuypi pipas participayta qallariqtin? (14 parrafota qhaway)

14. ¿Imatan Romanos 9:11, 16 texto yachachiwanchis janaq pachapaq cristianokuna imayna ajllasqa kasqankumanta?

14 Diosmi deciden jayk’aqchus mayqen cristianopas ajllasqa kananpaq (Rom. 8:28-30). Diosqa Jesuspa kausarimpusqan qhepamanmi wakin cristianokunata ajllayta qallariran. Apostolkunaq tiemponpiqa llapankuchus jina ajllasqa cristianokuna karanku. Chay qhepamanmi ichaqa yaqa llapa cristianon kayku niq runakuna mana cheqaq cristianokunachu karanku. Chaywanpas karanmi yupasqalla cheqaq cristianokuna, paykunatan Diosqa ajllashallaran  janaq pachaman rinankupaq. Paykunan trigo jina karanku qora ukhupi (Mat. 13:24-30). Tukukuy p’unchaykunapin Diosqa ajllashallaran 144.000 cristianokunata. * Chay jinaqa sichus manaraq tukukuy chayamushaqtin Jehová Dios wakinta ajllanman janaq pachaman rinanpaq chayqa, manan rimapakunanchischu (leey Romanos 9:11, 16). * Manan Jesuspa willasqan rijch’anachiypi runakuna jinachu kananchis, paykunan dueñota quejakuranku juj horallata llank’aqkunamanpas igualta pagasqanmanta (Mat. 20:8-15).

15. Mateo 24:45-47 textopi nisqanman jina, ¿imaynapin yachanchis mana llapa ajllasqa cristianokunachu allin yuyayniyoq junt’aq kamachi kasqankuta?

15 Manan llapa ajllasqa cristianokunachu allin yuyayniyoq junt’aq kamachiqa kanku (leey Mateo 24:45-47). Apostolkunaq tiemponpi jinan Jehová Diospas Jesuspas pisi runakunallawan askha runakunata yachachin. Ñaupaq tiempopiqa pisi ajllasqa cristianokunallan griego rimaypi qelqakunata qelqaranku. Kunanpas pisi ajllasqa cristianokunallan tiempollanpi Diospa llaqtanta yachachishan.

16. ¿Imatan kay yachachikuypi yacharanchis?

16 ¿Imatan kay yachachikuypi yacharanchis? Jehová Diosmi decidiran yaqa llapa serviqninkuna wiñaypaq kay allpapi tiyanankuta, pisillatataq ajllaran janaq pachamanta kamachimunankupaq. Diosqa llapa serviqninkunamanmi premiota qon, llapankutataq nin kaq kamachikuykunata kasukunankupaq junt’aq kanankupaqpas. Llapankutaq k’umuykukuq kananku, kallpachakunankutaqmi juj nisqalla thajpi iñiq t’aqapi llank’anankupaq. Tukukuy p’unchayqa chayamunqañan, chaymi Jehová Diosta servishanallanchis Jesustapas juj t’aqa ovejakuna jinalla qatikushananchis (Juan 10:16).

^ párr. 5 Kay watapiqa martes 7 abril p’unchaypin Jesuspa wañupusqanta yuyarisunchis. ¿Imaynatan qhawarinanchis chay juñunakuypi t’antamanta vinomanta participaqkunata? ¿Llakikunanchischu t’antamanta vinomanta participaqkuna sapa wata yapakusqanmanta? Chay tapuykunatan kay yachachikuypi kutichisun, kay yachachikuyqa 2016 wata enero killamanta Qhawaq revistaq nisqanman jinan kashan.

^ párr. 2 Salmos 87:5, 6 textopi nisqanman jina, yaqapaschá jamuq tiempopiqa Jehová Dios willawasun llapa ajllasqa cristianokunaq sutinta (Rom. 8:19).

^ párr. 8 Qhaway “Munakuqqa ‘manan mana ruwanakunatachu ruwan’” nisqa recuadrota, 2016 wata enero killa Qhawaq revistapi.

^ párr. 14 Hechos 2:33 textopi nisqanman jina, Jesusña santo espirituta qomun chaypas Jehová Diosllan sapanka runata ajllan janaq pachaman rinanpaq.

^ párr. 14 Astawan yachanaykipaq qhaway “Preguntas de los lectores” nisqata, 2007 wata 1 mayo killamanta La Atalaya revistapi.

34 TAKI Qan sonqon kausani, Diosníy

^ párr. 56 FOTOMANTA WILLAKUY: Juj asambleapin askha hermanokuna umalliq t’aqamanta jamuq hermanoman esposanmanwan montonakushanku fotota orqochikunankupaq, ¡chay ruwasqankuqa manan allinchu!