Kichay leenaykipaq

Índice nisqaman riy

 3 YACHACHIKUY

Jehová Diosqa anchatan valorawanchis

Jehová Diosqa anchatan valorawanchis

“Paymi llakiq ñit’isqan kashaqtinchis yuyarikuwaranchis” (SAL. 136:23)

33 TAKI Llakipakuyniyta qanman saqesayki

KAYKUNAMANTA YACHASUN *

1, 2. ¿Ima sasachakuykunapin Diosta serviqkuna tarikunku? ¿Imaynan chaywan sientekunkuman?

JUJ wayna hermanonchismi millay onqoyniyoq kaspa manaña ruwayta atinchu ñaupaqpi ruwasqanta jina. 50 más watayoq hermanonchistaq llank’ananmanta qarqosqa kapun, kallpachakunña chaypas manan llank’anata tarinchu. Juj kuraq hermananchistaq payayapusqanrayku manaña ñaupaqpi jinañachu Jehová Diosta serviyta atin.

2 Chhayna sasachakuykunapi tarikuspaqa nisunmanpaschá: “Manañan imapaqpas valeniñachu”, nispa. Jinaspa manaña kusisqachu kausasunman, jujkunamantataq t’aqakusunman.

3. ¿Imaynatan Satanaspas runankunapas runakunaq vidanta qhawarinku?

3 Diosta mana serviq runakunaqa Satanás jinan runaq vidanta mana valorankuchu. Satanasqa manapas vidanchis valenmanchu jinatan qhawarin. Chaymi Evaq wañunanta yachashaspapas llullakuspa niran: “Diosta mana kasukuspaqa aswan allinmi kanki”, nispa. Satanaspa makinpin kashan gobiernokuna, jatun negociota ruwaqkuna, pantasqa religionkunapi umalliqkunapas. Chaymi paykunaqa Satanás jina runamasinkuta mana khuyapayankuchu, nitaq runakunaq vidantapas valorankuchu.

4. ¿Imamantan kaypi yachasun?

4 Jehová Diosmi ichaqa anchata valorawanchis, munanmi chayta entiendenanchista, yanapawanchistaqmi sasachakuypi tarikusqanchisrayku mana valeqpaq qhawarikusqanchista atipananchispaq (Sal. 136:23; Rom. 12:3). ¿Imaynatan Jehová Dios yanapawanchis sinchi onqoyniyoq  tarikuqtinchis, qolqenchis pisiyapuqtin, machuyapusqanchisrayku manaña ñaupaqpi jinañachu Jehová Diospaq llank’aqtinchis? Chaykunamantan kaypi yachasun. Ñaupaqtan ichaqa kutichisun kay tapuyta: ¿Imaraykun mana iskayananchischu Jehová Dios ancha allinpaq qhawariwasqanchismanta?

DIOSQA ANCHA ALLINPAQMI QHAWARIWANCHIS

5. ¿Imaraykun Jehová Dios runakunata ancha allinpaq qhawarin?

5 Jehová Diosqa ñut’u allpamantaña ruwawaranchis chaypas, ancha allinpaqmi qhawariwanchis (Gén. 2:7). ¿Imaraykun ancha allinpaq qhawariwanchis? Pay jina munakuq, khuyapayakuq, sumaq sonqo kasqanchisrayku (Gén. 1:27). Chaymi runakunaqa aswan valorniyoq kanchis kay allpapi llapa kamasqakunamanta, kamachiwaranchistaqmi allpatapas animalkunatapas cuidananchispaq (Sal. 8:4-8).

6. ¿Imaynapin yachallanchistaq juchayoq kaqtinchispas Jehová Dios ancha allinpaq qhawariwasqanchista?

6 Adanpa juchallikusqan qhepamanpas Jehová Diosqa runakunatan ancha allinpaq qhawashallaran. Chaymi churin Jesusta kachamuran juchanchisrayku wañunanpaq (1 Juan 4:9, 10). Jesuspa sacrificakusqanraykun Diosqa allin runakunatapas mana allin runakunatapas kausarichinqa (Hech. 24:15). Bibliaq nisqan jina Diosqa ancha allinpaqmi qhawariwanchis onqosqaña, wajchaña, kuraqña kaqtinchispas (Hech. 10:34, 35).

7. ¿Imakunapin rikullanchistaq Jehová Dios ancha allinpaq qhawariwasqanchista?

7 ¿Imakunapin rikullanchistaq Dios ancha allinpaq qhawariwasqanchista? Paymi llaqtanman pusamuwaranchis repararantaqmi paymanta yachay munasqanchista (Juan 6:44). Munakuqtinchistaq astawanraq payqa munakuwanchis (Sant. 4:8). Chaymantapas imaymanatan ruwan yachachiwananchispaq. Diosqa yachanmi imayna kasqanchista, jamuq tiempopi aswan allin kananchistapas. Munakuwasqanchistan rikuchillantaq wanachiwaspanchis (Prov. 3:11, 12). Chaykunawanmi yachanchis Jehová Dios ancha allinpaq qhawariwasqanchista.

8. ¿Imaynatan Salmos 18:27-29 textopi nisqan yanapawasunman sasachakuypi tarikuspa ama pisipananchispaq?

8 Rey Davidqa yacharanmi Jehová Dios munakusqanta yanapasqantapas. Chaymi yanaparan jujkuna mana valeqpaq qhawarisqankuta aguantananpaq (2 Sam. 16:5-7). Sinchi llakisqa tarikuqtinchisqa Diosmi yanapawasunman ama pisipananchispaq sasachakuyninchista atipananchispaqpas (leey Salmos 18:27-29). Diospa yanapayninwanqa manan imapas jark’awasunchu kusisqa sonqowan payta servinanchista (Rom. 8:31). ¿Imakunapi tarikuspan yuyarinanchis Jehová Dios ancha allinpaq qhawariwasqanchista? Wakinmanta qatimuqpi yachasun.

ONQOYNIYOQ TARIKUQTINCHIS

Bibliapi kaq sumaq simikunata leeymi yanapawasun onqosqanchisrayku mana allin piensasqanchista atipananchispaq (9-12 parrafokunata qhaway)

9. ¿Imaynan sientekusunman onqosqa kaqtinchis?

9 Onqosqa tarikuspaqa llakikunchismi, piensasunmantaq manaña pitapas yanapayta atinanchispaq. P’enqakusunmantaqmi jujkuna onqosqa kasqanchista rikuwasqanchismanta. Jujkuna manaña reparankumanchu onqosqa kasqanchista chaypas, yaqapaschá llakikusunman manaña ñaupaqpi jina ruwasqanchismanta. Chhaynapi  tarikuqtinchismi Jehová Diosqa kallpachawanchis, ¿imaynatan chayta ruwan?

10. Proverbios 12:25 textopi nisqanman jina, ¿iman yanapawasunman onqosqa kaqtinchis?

10 Onqosqa kaqtinchis pipas sumaq simikunawan rimaykuwaqtinchisqa kallpachasqan sientekunchis (leey Proverbios 12:25). Jehová Diosmi Bibliapi askha sumaq rimaykunawan yuyarichiwanchis valorniyoq kasqanchista onqosqaña kaqtinchispas (Sal. 31:19; 41:3). Sichus chay sumaq simikunata sapa kutilla leesun chayqa, Diosmi yanapawasun onqosqanchisrayku mana allin sientekusqanchista atipananchispaq.

11. ¿Imaynatan Jehová Dios juj hermanonchista yanaparan?

11 Rimasunchis Jorgemanta. Wayna kashaqtinmi sinchi millay onqoy jap’iran jinaspa mana valeqpaq qhawarikuran. Paymi willakun: “Onqosqayraykun mana valeqpaq qhawarikurani p’enqakuranitaqmi jujkunaq qhawawasqanwan. Astawan onqopuqtiymi imayna kanaymanta sinchita llakikurani, chaymi Jehová Diosta rogakurani yanapawananpaq”, nispa. ¿Imaynatan Jehová Dios yanaparan? Paymi willakun: “Llakisqalla kaqtiymi mana entiendeqchu kani leesqayta, chaymi niwaranku Jehová Dios munakuwasqanchismanta Salmos libropi pisillata rimaq textokunata leenaypaq. Chay textokunatan sapa p’unchay yapa-yapamanta leerani. Chaykunan yanapawaran thaj kanaypaq. Tiempowanqa jujkunan rikuwaranku kusisqa kashasqayta, chaymi wakinqa niwaranku: ‘Chhayna kasqaykin kallpachawanku’, nispa. Chaypin rikurani Jehová Dios mañakusqayman kutichimusqanta. Paymi yanapawaran amaña  mana valeqpaq qhawarikunaypaq. Onqosqaña kashaqtiypas Diosqa munakuwanmi, chaypin masta piensarani”, nispa.

12. ¿Imatan ruwasunman onqosqa kashaqtinchis Jehová Dios yanapawananchispaq?

12 Jehová Diosqa yachanmi onqosqa kashaqtinchis imayna tarikusqanchista. Chaymi paytan rogakunanchis ama onqoyninchispi nishuta piensananchispaq. Bibliapin tarinchis kallpachawananchispaq sumaq simikunata, chaytan leenanchis. Astawanqa leenanchis may tukuyta Jehová Dios munakuwasqanchismanta textokunatan. Chayta ruwaspan rikusun Jehová Dios llapa serviqninkunaman allinkuna qosqanta (Sal. 84:11).

QOLQENCHIS MANA AYPAWAQTINCHIS

Jehová Diosqa mana saqerpariwasunchu llank’anata mana tariqtinchisqa, chayta yuyariymi kallpachawanchis (13-15 parrafokunata qhaway)

13. ¿Imaynan familiapi umalliq sientekunman mana llank’anayoq tarikuqtin?

13 Familiapi umalliqkunaqa llakikunkun familiankuman imachus necesitasqankuta qonankumanta. Yaqapaschá juj hermanonchista llank’ananmanta qarqopunkuman, jinaspa tukuy atisqantaña ruwashaspapas mana juj llank’anata tarinmanchu. Chhaynapi tarikuspaqa yaqapaschá mana valeqpaq qhawarikunman. ¿Imaynatan Jehová Diospa promesanta yuyariy payta yanapanman?

14. ¿Imanaqtinmi Jehová Dios imachus prometesqanta junt’an?

14 Jehová Diosqa junt’anpunin prometesqanta (Jos. 21:45; 23:14). Chaytaqa ruwan sutinrayku. Diosmi junt’aq serviqninkunata prometeran cuidananpaq, chaymi obligasqa sientekun rimasqanta junt’ananpaq (Sal. 31:1-3). Chaymantapas, sichus Jehová Dios prometesqanta mana junt’anmanchu chayqa, serviqninkunan  llakikunkuman. Chaymi serviqninkunaman imachus necesitasqankuta qon kausanankupaq, payta junt’aq sonqowan servishanallankupaqpas (Mat. 6:30-33; 24:45).

15. a) ¿Ima sasachakuypin apostolkunaq tiemponpi cristianokuna tarikuranku? b) ¿Imaynatan yanapawanchis Salmos 37:18, 19 textopi nisqan?

15 Sichus yuyarisun imaraykus Jehová Dios promesankunata junt’asqanta chayqa, manan iskayasunchu qolqenchis mana aypawaqtinchis yanapawananchismanta. Yuyarisun apostolkunaq tiemponpi cristianokunata, Jerusalenpi kaq iñiq t’aqata sinchita qatikachayta qallariqtinkun paykunaqa juj llaqtakunaman ch’eqeriranku, apostolkunallan manaqa (Hech. 8:1). Chhaynapi tarikuspaqa manachá qolqenku karanchu. Yaqapaschá wasinkuta, llank’anankuta, negocionkutapas saqepuranku, chaywanpas Jehová Diosqa manan paykunata saqerpariranchu, chaymi kusisqalla kasharanku (Hech. 8:4; Heb. 13:5, 6; Sant. 1:2, 3). Chay cristianokunata jinan noqanchistapas yanapawasun (leey Salmos 37:18, 19).

MACHUYAPUQTINCHIS

Machuña kashaspaqa imachus ruway atisqanchispin piensananchis, chhaynapin mana iskayasunchu Jehová Dios allinpaq qhawariwasqanchismanta (16-18 parrafokunata qhaway)

16. ¿Imaynapi tarikuspan piensasunman Jehová Dios manaña servisqanchista valorananpaq?

16 Machuyapuspaqa nisunmanpaschá: “Manañan Jehová Diosta serviyta atisaqñachu”, nispa. Yaqachus jina rey Davidpas chay jinata piensaran (Sal. 71:9). ¿Imaynatan Jehová Dios yanapawanchis chhaynapi tarikuqtinchis?

17. ¿Imatan yachanchis Yeny hermananchista pasasqanmanta?

17 Yeny hermanchismanta rimasun. Paytan invitaranku juñunakunanchis wasita allichanapaq cursoman, jinan payqa niran: “Payan kani, viudan kani, manataqmi  chay llank’aypi yanapakuyta atiymanchu”, nispa. Chay tutan ichaqa Jehová Diosman tukuy sonqomanta mañakuran. Qhepantin p’unchay chay juñunakuyman rispaqa iskayaranraqmi chay llank’aypi yanapakunanmanta. Chay cursopi yachachiq hermanon ichaqa niran: “Kay llank’aypi yanapakunanchispaqqa yachachisqa kaytan munananchis”, nispa. Chaymi Yenyqa niran: “Noqaqa munanin yachachisqa kayta”, nispa. Jinan waqaranraq Jehová Dios mañakusqanta uyarisqanmanta. Diosqa kaytapas niwashanman jinan karan: ‘Qanqa serviwankiraqmi, noqan yachachisayki’”, nispa. Yenyqa kaytan yuyarillantaq: “Chay cursomanqa manchasqa llakisqan jaykurani. Chaymantan ichaqa lloqsimurani kallpachasqa imallapipas yanapakuyta atisqayta yachaspa ima”, nispa.

18. Jehová Diosqa anchatan valoran kuraqkunaq llank’asqanta, ¿Biblia ima textokunan chayta nin?

18 Machuña kaqtinchispas Jehová Diosqa qowanchisraqmi llank’anata, manan chaymantaqa iskayananchischu (Sal. 92:12-15). Pisipaqña qhawarinchis Jehová Diospaq ruwasqanchista chaypas, Diosqa anchatan valoran, chaytan Jesusqa yachachiran (Luc. 21:2-4). Chay jinaqa imachus ruway atisqanchispin piensananchis. Jehová Diosmantan jujkunaman willasunman, hermanonchiskunapaq mañapusunman, jujkunatataq kallpachasunman junt’aq sonqowan Diosta servishanallankupaq. Diosqa llank’aqmasinta jina qhawariwanchis manan imaymanata ruwayta atisqanchisraykuchu aswanpas kasukuq kasqanchisraykun (1 Cor. 3:5-9).

19. ¿Imaynatan Romanos 8:38, 39 textopi nisqan yanapawanchis?

19 Jehová Diosqa ancha allinpaqmi qhawarin serviqninkunata, anchatan kusikunchis chhayna Diosta adorasqanchismanta. Payqa kamawaranchis munayninta ruwananchispaqmi, chayta ruwaspallan cheqaq kusikuytaqa tarinchis (Apo. 4:11). Diosta mana serviq runakunaqa mana valeqpaqmi qhawariwasunman, Jehová Diosmi ichaqa mana chhaynatachu qhawariwanchis (Heb. 11:16, 38). Onqosqaña, machuña otaq qolqenchis mana aypawaqtinchispas Diosqa munakuwashallanchismi (leey Romanos 8:38, 39).

^ párr. 5 ¿Jayk’aqllapas llakipi tarikuspa nirankichu: “Manan imapaqpas valenichu”, nispa? Jehová Diosqa valorawanchismi, chaytan kaypi yuyarisunchis. Yachallasuntaqmi imatas ruwananchis sasachakuykunapi tarikuspa ama mana valeqpaq qhawarikunanchispaq chayta.

30 TAKI Qanmi kanki taytay, Diosniy, amigoypas