Kichay leenaykipaq

Índice nisqaman riy

 5 ESTUDIO

¿Ima cualidadkunatan rikuchinchis juñunakuyman rispa?

¿Ima cualidadkunatan rikuchinchis juñunakuyman rispa?

“Señorpa wañusqantan willashankichis, pay jamunankama” (1 COR. 11:26)

18 TAKI Gracias librawasqaykikumanta

KAYKUNAMANTA YACHASUN *

1, 2. a) ¿Imatan Jehová Dios astawan qhawarin Señorpa cenanman riq runakunapi? (1 paginapi fotota qhaway). b) ¿Imatan kay estudiopi yachasunchis?

JESUSPA wañupusqanta yuyarinapaqqa mundontinpin askha runakuna juñunakunchis. Jehová Diosmi ichaqa chay juñunakuyman jamuq sapanka runakunapi interesakun. Ejemplopaq, payqa rikumunmi mana faltayta Jesuspa wañupusqanta yuyarinankupaq riqkunata, wakinqa yaqapaschá qatiykachasqa tarikusparaq juñukunku wakintaq ichaqa mana sapa kutichu juñunakuykunaman jamunku, chaywanpas Jesuspa wañupusqanta yuyarinankupaqqa jamunkupunin. Jujkunataq jamunku chay juñunakuy imayna kasqanta yachanankupaq.

2 Jehová Diosqa anchatachá kusikun Jesuspa wañupusqanta yuyarinankupaq askha runakunaq jamusqanta rikumuspa (Luc. 22:19). Ichaqa manan askha runaq jamusqantachu astawanqa qhawarin aswanpas imaraykuchus jamusqankutan. Noqanchisqa manan Jesuspa wañupusqanta yuyarinallapaqchu juñunakunchis, aswanpas Diospa kamachiwasqanchis llapa juñunakuykunamanmi rinchis. ¿Imaraykun chayta ruwanchis? ¿Ima cualidadkunan yanapawanchis juñunakuykunaman rinanchispaq? Chaykunamantan kay estudiopi yachasun.

Mundontinpi runakunan Jesuspa wañupusqanta yuyarinapaq juñunakuypi kashanku, hermanonchiskunataq sumaqta paykunata chaskishanku (1, 2 parrafokunata qhaway)

HUMILDE KAYMI YANAPAWANCHIS JUÑUNAKUYMAN RINAPAQ

3, 4. a) ¿Imaraykun juñunakuykunaman rinchis? b) ¿Imayna kasqanchistan rikuchinchis juñunakuykunaman rispa? c) 1 Corintios 11:23-26 textopi nisqanman jina, ¿imaraykun mana faltakunanchischu Señorpa cenanman?

3 Juñunakuykunamanqa rinchis Jehová Diosta adorananchispaqmi  chaymantapas chay juñunakuykunapin Jehová Diospa yachachisqan kanchis. Orgulloso runakunaqa ninkun: “Manan pipas imatapas yachachiwananchu”, nispa (3 Juan 9). Noqanchismi ichaqa munanchis Jehová Diospas, llaqtanpas yachachiwananchista (Is. 30:20; Juan 6:45).

4 Juñunakuykunaman rispan rikuchinchis humilde kasqanchista, Jehová Diospa yachachisqan kayta munasqanchistapas. Jesuspa wañupusqanta yuyarinapaq juñunakuymanqa rinchis importante kasqanraykun. Chaymantapas humilde kaspan Jesuspa kamachisqanta kasukunchis, paymi niran: “Kaytaqa ruwallankichispunin noqata yuyariwanaykichispaq”, nispa (leey 1 Corintios 11:23-26). Chay juñunakuyqa kallpachawanchismi suyakuyninchispi, yuyarichiwanchistaq Jehová Dios anchata munakuwasqanchista. Ichaqa sapa kutillanmi kallpachasqa kayta necesitanchis. Chaymi Diosqa juñunakuykunata qowanchis, kamachiwanchistaq rinanchispaq. Humilde kaspan kasukunchis, chaymi sapa semana juñunakuyman rinanchispaq preparakunanchispaqpas tiempota orqonchis.

5. ¿Imaynatan humilde runakuna chaskikunku juñunakuykunaman rinapaq invitacionta?

5 Jehová Diosqa sapa watanmi runakunata invitan paypa yachachisqan kanankupaq. Chay invitaciontaqa humilde runakunallan aceptanku (Is. 50:4). Paykunaqa Jesuspa wañupusqanta yuyarinanku juñunakuyman rispan kusikunku. Chay qhepamantaq sapa semana juñunakuykunaman riyta qallarinku (Zac. 8:20-23). Chayllaraq jamuqkunapas noqanchispas kusikunchismi Jehová Diospa yachachiwasqanchiswan, payllan yanapawanchispas salvawanchispas (Sal. 40:17). ¡Juñunakuyman rinapaq invitacionqa may allinmi ima invitaciomantapas! Chaypin Jehová Diospas munakusqan wawanpas yachachiwanchis (Mat. 17:5; 18:20; 28:20).

6. ¿Imaynatan juj runata yanaparan humilde kasqan?

6 Jesuspa wañupusqan p’unchayta yuyarinanchispaqqa, sapa watanmi kallpachakunchis askha runakunata invitamunanchispaq. Chay juñunakuyman jamuq humilde runakunaqa beneficiakurankun. Chaypaq qhawarisunchis juj ejemplota: Juj hermanon juj runata invitamuran, ichaqa chay runan niran: “Manan jamuyta atisaqchu”, nispa. Hermanonchismi ichaqa admirasqa kasharan chay runata juñunakuypi rikuspa. Chay runapas admirakuranmi hermanokuna sumaqta chaskisqankumanta, chaymantapachan mana faltakuspa juñunakuykunamanqa rillaqpuni, watapiqa kinsa kutillatan faltakusqa. ¿Iman chay runata yanaparan? Invitamusqan hermanon niran: “Payqa humilde runan”, nispa. Chay runataqa Jehová Diospunin pusamuran llaqtanpi kananpaq, kunanqa bautizasqa Testigoñan (2 Sam. 22:28; Juan 6:44).

7. ¿Imaynatan juñunakuykuna Biblia leesqanchispas yanapawanchis humilde kananchispaq?

7 Juñunakuykunapi yachasqanchis Bibliata leesqanchispas yanapawanchismi humilde kananchispaq. Jesuspa wañupusqanta yuyarinapaq semanakuna ñaupaqtan juñunakuykunapi yachanchis Jesuspa ejemplomanta, humilde kaspa vidanta noqanchisrayku qosqanmantawan. Chay p’unchaykunapitaq Bibliata leellanchistaq Jesuspa wañupusqan p’unchaykunapi imachus pasasqanta yachananchispaq. Chaykuna ruwasqanchismi yanapawanchis Jesuspa sacrificakusqanmanta agradecekunanchispaq. Yanapawallanchistaqmi humilde kananchispaq, ima  sasachakuypiña tarikuspapas Diospa munayninta ruwananchispaq (Luc. 22:41, 42).

MANA MANCHAKUQ KAYMI YANAPAWANCHIS JUÑUNAKUYMAN RINAPAQ

8. ¿Imaynatan Jesús rikuchiran mana manchakuq kasqanta?

8 Jesusqa mana manchakuqmi karan, noqanchispas pay jinan kananchis. Jesusqa yacharanmi pisillamanta enemigonkuna sinchita pisichaspa soq’aspa ima wañuchinankuta (Mat. 20:17-19). Chayta yachashaspapas decidisqan kasharan wañunanpaq. Chay p’unchay chayamuqtinmi Getsemaní huertapi kashaspa apostolkunata niran: “Jatariychis, jaku, jap’ichiwaqniyqa ñan chayaramunña”, nispa (Mat. 26:36, 46). Askha runakuna payta jap’inankupaq jamusqankuta rikuspa ñaupaqman puririspa willaran pichus kasqanta, soldadokunatataq niran apostolkunata ama jap’inankupaq (Juan 18:3-8). Chaykunata ruwasqanpin Jesusqa rikuchiran mana manchakuq kasqanta. Janaq pachapaq ajllasqa cristianokuna waj ovejakunapas kallpachakunkun Jesús jina mana manchakuq kanankupaq. ¿Imaynata?

Valorta jap’ispa juñunakuykunaman risqanchismi hermanonchiskunata kallpachan (9 parrafota qhaway) *

9. a) ¿Imaraykun mayninpi valorta necesitanchis juñunakuykunaman rinapaq? b) ¿Imaynatan ejemplonchis carcelpi kaq hermanonchiskunata yanapanman?

9 Mayninpi juñunakuykunaman mana faltayta rinapaqqa manapaschá facilchu kanqa. ¿Imarayku? Wakin hermanonchiskunaqa llakiq ñit’isqanmi tarikushanku jujkunataq onqosqa kashanku, wakintataq familianku otaq autoridadkuna jark’anku juñunakunankuta. Chaymi valorta necesitanku juñunakuyman rinankupaq. Jehová Diosta servisqankurayku carcelpi kaq hermanokunapi piensasun. (Heb. 13:3). Imapiña tarikuspapas Diosta servisqanchista uyarispan paykunaqa kallpachasqa sientekunku, mana manchakuspataq tukuy sonqowan Diosta servishallanku. Chaymi pasaran apóstol Pablowan. Romapi preso kashaqtinmi anchata kusikuran hermanokuna tukuy sonqowan Diosta servisqankuta uyarispa (Filip. 1:3-5, 12-14). Carcelmanta lloqsipusqan qhepallamanmi hebreo hermanokunaman juj cartata qelqaran. Chaypi kamachiran juñunakuykunata ama saqenankupaq, nillarantaq: “Munanakushallaychispuni wayqe-panantin jina”, nispa (Heb. 10:24, 25; 13:1).

10, 11. a) ¿Pikunatan invitamunanchis Jesuspa wañupusqanta yuyarinapaq juñunakuyman? b) Efesios 1:7 textopi nisqanman jina, ¿imaraykun chayta ruwananchis?

10 Chaymantapas valorta necesitallanchistaq Jesuspa wañupusqanta yuyarinapaq juñunakuyman familianchiskunata, llank’aqmasinchiskunata vecinonchiskunatapas invitamunanchispaq. ¿Imaraykun chayta ruwananchis? Ancha agradecesqa kashanchis Jehová Diospas Jesuspas noqanchisrayku ruwasqankumanta. Chaymantapas munanchismi chay runakuna “Diospa ancha sumaq sonqo” kayninmanta imaynatas beneficiakunkuman chayta yachanankuta (leey Efesios 1:7; Apo. 22:17).

 11 Juñunakuykunaman rispaqa rikuchillanchistaqmi munakuq kasqanchista. Chaytan Jehová Diospas Jesuspas allinta rikuchiranku.

MUNAKUQ KAYMI YANAPAWANCHIS JUÑUNAKUYMAN RINAPAQ

12. a) ¿Imaynatan juñunakuykuna yanapawanchis Jehová Diosta Jesustapas astawan munakunanchispaq? b) 2 Corintios 5:14, 15 textopi nisqanman jina, ¿imaynatan Jesuspa ejemplonta qatikusunman?

12 Jehová Diosta Jesustapas munakusqanchismi kallpachawanchis juñunakuykunaman rinapaq. Chay juñunakuykunataq yanapawanchis astawanraq paykunata munakunanchispaq. Chaypin sapa kutilla yuyarichiwanchis noqanchisrayku ruwasqankuta (Rom. 5:8). Jesuspa wañupusqanta yuyarinapaq juñunakuymi astawanqa yuyarichiwanchis llapa runakunata anchata munakuwasqanchista. Chaymi Jesuspa ejemplonta sapa p’unchay qatikunchis (leey 2 Corintios 5:14, 15). Chaymantapas Diosta jatunchanchis wawanta noqanchisrayku qosqanmanta. ¿Imaynatan chayta ruwanchis? Tukuy sonqomanta juñunakuykunapi comentaspa.

13. ¿Imaynatan rikuchisunman Jehová Diosta Jesustapas anchata munakusqanchista?

13 Jehová Diosta Jesustapas anchata munakusqanchista rikuchinchis imaymana sacrificiota ruwaspa. Yaqa llapa iñiq t’aqakunan chaupi semana tardenta juñunakunku, wakin hermanokunaqa ch’isiyaqta llank’aspa sayk’usqaña kashaspapas rinkun chay juñunakuyman. Semana tukuyta juñunakuykunamanpas rinchismi samana p’unchayña kaqtinpas. ¿Reparanchu Jehová Dios sayk’usqaña kashaspapas juñunakuyman risqanchista? Arí, payqa rikumushanmi imaymana sacrificiota ruwaspa juñunakuyman risqanchista, anchatataqmi valoran chay ruwasqanchista (Mar. 12:41-44).

14. ¿Ima ejemplotan Jesús qowaranchis?

14 Jesusqa runakunata munakuspan imaymana sacrificiota ruwaran. Manan vidallantachu entregaran, aswanpas sapa p’unchaymi rikuchiran jujkunaq allinninta ñaupaqman churasqanta. Ejemplopaq sayk’usqaña llakisqaña kashaspapas discipulonkunawanmi juñukuran (Luc. 22:39-46). Payqa manan imachus chaskinanpichu preocupakuran aswanpas jujkunaman qoypin (Mat. 20:28).  Sichus noqanchispas Jesús jina Jehová Diosta hermanonchiskunatapas munakusun chayqa, tukuy atisqanchistan ruwasun Jesuspa wañupusqanta yuyarinapaq juñunakuyman llapa juñunakuykunamanpas rinanchispaq.

15. ¿Pikunatan astawan yanapananchis?

15 Diospa llaqtanpi cristianokunaqa juj familia jinan kanchis. Tiemponchistataq t’aqanchis Diospa llaqtanman jujkunata invitamunanchispaq. Astawanqa iñiyninkupi chiriyapuq hermanonchiskunatan yanapayta munanchis (Gál. 6:10). Paykunata munakusqanchistan rikuchinchis juñunakuykunaman, Jesuspa wañupusqanta yuyarinapaq juñunakuymanpas invitamuspa. Jehová Dios jina Jesús jinan anchata kusikunchis iñiyninpi chiriyapuq hermanonchis Diospa llaqtanman kutimpuqtinqa (Mat. 18:14).

16. a) ¿Imata ruwananchispaqmi kallpachanakunanchis? ¿Imapin yanapawasun juñunakuykuna? b) Juan 3:16 textopi nisqanta, ¿imaraykun yuyarinanchis Señorpa cenanta ruwananchis tiempopi?

16 Jamuq semanakunapin askha runakunata invitamunanchis kanqa Jesuspa wañupusqanta yuyarinapaq juñunakuyman jamunankupaq. Chayqa aparikunqa 2019 wata 19 abril tutapi (qhaway “¿Invitamusunchu runakunata?” nisqa recuadrota). Sapa kutillanmi kallpachanakunanchis juñunakuykunaman rinanchispaq. Tukukuy p’unchaykunapin kashanchis, chaymi juñunakuykunamanqa rinanchispuni, chaykunan yanapawasun humilde, mana manchakuq, munakuq kashanallanchispaq (1 Tes. 5:8-11). Jehová Diospas Jesuspas anchatan munakuwanchis chaymi noqanchispas agradecekusqanchista rikuchinanchis (leey Juan 3:16).

126 TAKI ‘Rijch’asqalla kashaychis, allinta kallpachakuychis’

^ párr. 5 2019 wata 19 abril killapin Jesuspa wañupusqanta yuyarisunchis, chay juñunakuymi noqanchispaqqa aswan importante. ¿Imaraykun chay juñunakuyman rinanchis? Jehová Diosta kusichinanchisrayku. ¿Ima cualidadkunatan rikuchisun Jesuspa wañupusqanta yuyarinapaq juñunakuyman rispa, juj juñunakuykunaman rispapas? Chaytan kay estudiopi yachasun.

^ párr. 52 FOTOMANTA WILLAKUYKUNA: Carcelpi kaq hermanonchismi familianpa carta apachisqanta leespa kallpachasqa sientekun. Kusikunmi payta mana qonqasqankumanta, yachantaqmi familianpas tukuy sonqowan Jehová Diosta servishasqankuta sasachakuykunapiña tarikuspapas.