Kichay leenaykipaq

Índice nisqaman riy

Pipas familiaykimanta wañukapuqtin

Pipas familiaykimanta wañukapuqtin

“Qonqayllan kuraq hermanoy wañukapuran, manan ima ruwaytapas atiranichu. Askha killakunaña pasaran chaypas yuyariqtiyqa sonqoytapas cuchillowan k’iriwashankuman jinan sientekurani. Mayninpiqa sinchitan renegakuq kani ‘imaraykutaq payri wañuran’ nispa. Mayninpiqa juchachakuqmi kani mana tiempota paywan pasasqaymanta” (Australiamanta Vanessa).

SICHUS pillapas familiaykimanta wañukapuran chayqa: sapallayki, sinchi llakisqa imapaschá sientekuranki. Yaqapaschá juchachakuranki, nirankipaschá “manañan kausayta munaniñachu” nispa.

Pipas familianchismanta wañupuqtin waqayqa allinmi. Chaywanmi rikuchishanki anchata chay runamanta sientesqaykita. Ichaqa, ¿atisunmanchu pisillatapas thaj sientekuyta?

¿IMATAN WAKIN RUNAKUNA RUWARANKU?

Yaqapaschá piensawaq “manan imapas thaj kaytaqa qowanmanchu” nispa, kaypi yachachikuykunan yanapasunkiman:

WAQAYQA ALLINMI

Manan llapan llakipi tarikuqkunachu igual-lla sientekunku. Waqayqa yanapawanchismi thaj sientekunapaq. Vanessan niran: “Noqaqa nishutan waqaq kani. Chaymi yanapawaq aguantashanallaypaq”, nispa. Sofiaq hermananpas qonqayllan wañupuran, Sofian nin: “Sinchi llakisqa tarikuyqa nishu sasan. K’iriykitapas jampinapaq kichasunkikuman jinatan nanan. Chay nanayqa mana aguantay atiymi, ichaqa allinmi k’iriyki jampikunanpaq”, nispa.

IMA PIENSASQAYKITA IMAYNA SIENTEKUSQAYKITA WILLAKUY

Mayninpiqa manapaschá piwanpas rimayta munankichu, ichaqa allinmi imayna sientekusqaykita  jujkunaman willakuyqa, chhaynapin llakikuyniykita q’epiysinasuykipaq. 17 watanpi kashaq Jared papan wañukapusqanmantan nin: “Yaqapaschá rimasqayqa mana valeqpaq jina karan, ichaqa jujkunawan rimayqa yanapawaranmi”, nispa. Ñaupaq articulopi rimamusqanchis Janet nillantaq: “Jujkunawan rimayqa anchatan yanapawaran. Manan sapayñachu sientekuq kani”, nispa.

JUJKUNAWAN YANAPACHIKUY

Juj doctoran nin: “Sinchi llakikuypi tarikushaspa familiankuwan amigonkuwan yanapachikuqkunaqa juj llakikuykunapiña tarikunqaku chaypas faciltan aguantanqaku”, nispa. Amigoykikunaman willay imaynatas yanapasunkikuman chayta. Yaqapaschá mana yachankuchu ima ruwayta yanapanasuykikupaq (Proverbios 17:17).

DIOSMAN QAYLLAYKUY

Dina willakun: “Qosay ratolla cáncer onqoywan wañurakapuqtinqa manañan pipas confianaypaq kapuranñachu, chaymi lliuta Diosman willakurani. Sapa tutamanta rijch’arispan mañakuq kani, chay p’unchaypi kallpata qowananpaq. Imaymanapin Diosqa yanapawaran...”, nispa. Tania 22 watanpi kashaqtinmi mamitan wañukapuran, paymi nin: “Sapa p’unchay Bibliata leesqaymi anchata consolawaran. Leesqaypin piensaq kani”, nispa.

IMAYNA MUNAYRAQCHÁ KANQA KAUSARIMPUY P’UNCHAYQA

Dina nillantaq: “Qosay wañurakapuqtinqa manan kausarimpuymanta yachayqa consolawaranchu. Noqaqa chay raton qosaytaqa necesitarani, wawaykunapas necesitarankun papankuta. Tawa wata pasaytañan chay suyakuypiqa astawanraq confiani. Chay suyakuyniymi kallpachawan. Jujmanta tupanaykupi piensaymi kusichiwan, thajta ima sientechiwan”, nispa.

Yaqapaschá qanpas kaq rato pachaqa mana consuelota tarinkichu, Vanessaq nisqanqa yaqapaschá yanapasunkiman. Paymi nin: “Mana aguantay jinan, ichaqa wakin p’unchaykunaqa allintan pasanki”, nispa.

Yuyariy: Manapaschá chay ratoqa imapas yanapasunkichu, ichaqa manan chaypichu vidaykiqa tukukapun. Diospa yanapayninwanqa atinkin amigoykikunawan sumaqta pasayta, manan yanqapaqchu kausanki. Pisi tiempollamantan Diosqa wañusqakunata kausarichimpunqa. Diosqa munanmi wañupuqniykikunawan jujmanta tupanaykita, kunan llakisqa, sonqo nanasqa tarikusqaykiqa manan kapunqañachu.