Kichay leenaykipaq

Índice nisqaman riy

¿Iman Diospa sutin?

¿Iman Diospa sutin?

Pitapas reqsiyta munaspaqa ñaupaqtaqa sutintan tapunchis. Diosta sutinta tapuwaq chayri, ¿imanispataq kutichisunkiman?

“Jehová Diosmi kani, chaymi sutiyqa” (Isaías 42:8, Traducción del Nuevo Mundo [NM])

¿Yacharankichu chay sutita? Manapaschá, askha traductorkunan Bibliapiqa maynillanpiña churanku mayninpitaq mana. Aswanpas Diospa sutin rantinpin “SEÑOR” nispa churanku. Original Bibliakunapin ichaqa Diospa sutinqa rijurin 7.000 más kutikunataraq. Chay Bibliakunapiqa hebreo simimantan traducikuran kay letrakunaman “YHWH otaq JHVH” nispa, quechuapitaq “Jehová” nispa traducikun.

Hebreo simi Bibliakunapin Diospa sutinqa rijurin, kaqllataqmi juj Bibliakunapipas.

Kachi qochapi Salmos rollokuna (primer siglopi m.J.j., HEBREO SIMIPI)

Tyndale runaq traducisqan (1530, INGLÉS SIMIPI)

Versión Reina-Valera (1602, ESPAÑOL SIMIPI)

Union Version (1919, CHINO SIMIPI)

¿IMARAYKUN IMPORTANTE DIOSPA SUTIN?

Diosqa ancha importantepaqmi sutinta qhawarin. Manan pipaschu Diosmanqa chay sutita churaran; pay kikinmi churakuran. Jehová Diosmi nin: “Kay sutiymi wiñaypaq, kay sutiywanmi wiñay-wiñaypaq reqsiwanqaku”, nispa (Éxodo 3:15). Bibliapiqa askha kutitan Diospa sutin rijurin: tukuy atiyniyoq, yaya, Señor otaq Dios nisqa titulokunamantaqa; manan Abrahán, Moisés, David otaq Jesús sutikunapas aswan askhachu rijurin Jehová sutimantaqa. Jehová Diospunin munan sutinmanta reqsinanchista. Biblian nin: “Llapan runakuna yachachunku sutiykiqa Jehová kasqanta, qanllapuni mundontinpi ancha jatun Dios kasqaykita reqsichunku”, nispa (Salmos 83:18, NM).

Jesusqa ancha importantepaqmi papanpa sutinta qhawarin. Jesusmi discipulonkunaman yachachiran yayayku oracionpi khaynata Diosmanta mañakuyta: “Sutiyki ch’uyapaq jap’isqa kachun”, nispa (Mateo 6:9). Jesuspunin papanmanta mañakuran: “Yayáy, sutiykita jatunchay”, nispa (Juan 12:28). Jesuspaqqa papanpa sutinta jatunchayqa ancha importanten karan, chaymi niran: “Sutiykita reqsichini, reqsichishallasaqtaqmi kanpas”, nispa (Juan 17:26).

Diosta serviqkunapaqpas nishu importanten. Ñaupaqpi Diospa serviqninkunapas Diospa sutinta wajakuspan pakaykusqa salvasqa sientekuqku. Chaymi juj serviqnin niran: “Jehová Diospa sutinqa juj torre jinan. Chaymanmi Dios sonqo runaqa  phawan, chaypin pakaykusqa kanqa”, nispa. Juj serviqninpas nillarantaq: “Jehová Diospa sutinta llapa wajakuqkunaqa salvasqan kanqaku”, nispa (Proverbios 18:10, NM; Romanos 10:13). Diospa sutinta wajakuqtinkun siervonkunaqa reqsisqa kananku karan, Bibliapin chayta nishan: “Waj llaqtakunaqa diosninkuq sutinkupi purichunku, noqanchismi ichaqa Jehová Diosninchispa sutinpi wiñaypaq purisunchis”, nispa (Miqueas 4:5, NM; Hechos 15:14).

¿IMATAN YACHACHIWANCHIS CHAY SUTI?

Sapallan cheqaq Dios kasqantan rikuchin. Askha estudiosokunan “paymi ruwachin imapas kananta” nispa Jehová suti significasqanwanqa acuerdopin kashanku. Jehová Dios pay kikinmanta Moiseswan rimasqanpin astawan entiendechiwanchis imachus Diospa sutin significasqanta. Diosmi niran: “Noqan munasqayman jina kasaq”, nispa (Éxodo 3:14, NM). Chaymantapas sutinqa kamaq kasqantan rikuchin. Chaymantapas rikuchillantaqmi Jehová Diosqa imatapas ruwayta atinmi otaq kamasqankunatan imatapas ruwachinman otaq imamanpas tukuchinman munaynin junt’ananpaq. Titulonkunaqa rikuchinmi autoridadniyoq otaq atiyniyoq kasqanta, Jehová sutin ichaqa tukuyta willan Diosmanta, imapas ruway atiq kasqanmantawan.

Diosqa noqanchispi preocupakusqanta rikuchiwanchis. Imata sutin significasqanpin reparanchis kamasqankunata noqanchistapas munakuwasqanchista. Sutinta willawasqanchispin reparanchis paypuni reqsinanchista munasqanta. Diosqa manan munanchu yanqa diosta jina rikunanchista otaq nishu karupi kasqanta, aswanpas payqa munan cheqaq Dios kasqanta, qayllaykunapaq jina kasqanta rikunanchistan (Salmos 73:28).

Sutinta utilizaspan rikuchinchis paypi interesakusqanchista. Piwanpas amigontin kayta munaspaqa sutiykimantan wajanasuykita munanki riki. ¿Imaynan sientekuwaq mana sutiykimanta wajasuqtiyki? Yaqapaschá piensawaq “manachá amigon kanayta munanchu” nispa. Kaqllatataqmi Jehová Diospas piensanman. Pay kikinmi sutintaqa willawaranchis, munantaqmi sutinmanta wajananchistapas. Sutinmanta wajakuspan rikuchinchis payman qayllaykuy munasqanchista. Diosqa yachanmi pikunachus sutinpi piensashanku chaytapas (Malaquías 3:16, NM).

Diospa sutinta yachayqa importanten payta reqsinanchispaq. Ichaqa manan chayllawanchu contentakunanchis. Aswanpas allintan reqsinanchis Jehová sutiyoq Diosta, imayna Dios kasqantapas.

¿IMAN DIOSPA SUTIN? Diospa sutinqa Jehová. Chay sutinmi reqsichin paylla tukuy imapas ruway munasqanta junt’aq kasqanta.