¿IMA NINMI BIBLIA?

Kay pachaq mana chanin munayninkunataqa Diosqa millakunmi, chayraykun “kay pacha” nispaqa mana kay allpa pachamantachu rimashan, aswanpas Diosta mana kasukuq runakunamantan, mana kasukusqankuwanmi Diospa enemigon kanku (Santiago 4:4). Chay runakunaqa wiñaypaqmi chinkachisqa kanqaku (Prov. 11:21). Jesucristota qatikuqkunan ichaqa wiñay kausayta chaskinqaku mana ‘kay pachamantachu kasqankurayku’ (Juan 15:19).

1 Juan 2:17 taxton nin: “Diospa munayninta ruwaqmi ichaqa wiñaypaq kausanqa”, nispa. Arí Diospa munayninta ruwaqkunan kay allpapi tiyanqaku, imayna Salmo 37:29 nisqan jina, ninmi: “Chanin runakunaqa kay allpatan jap’ikapunqaku, chaypin wiñaypaq tiyanqaku”, nispa.

“Ama kay pachata munakuychischu [...]. Pipas kay pachapi kaqkunata munakuqqa manan Yayata munakunchu” (1 Juan 2:15)

¿IMA NINMI BIBLIA?

Kay pachaq tukupuyninqa chayamunqa iskay etapapin. Ñaupaqtaqa, llapa pantasqa religionkunatan Dios chinkachinqa, Biblian chay pantasqa religionkunata comparan ‘rabona warmiwan’, sutichantaqmi “Jatun Babilonia” nispa (Apocalipsis 17:1-5; 18:8). “Diostan serviyku” ninkuña chaypas kay pachapi kamachikuqkunawanmi pantay ñanpi purin. Ichaqa chay kamachikuqkunallataqmi contranpi jatarinqaku, jinan “rabona warmita cheqninqaku. Jinaspa qechunqaku, llat’ananqaku, aychantapas mijunqaku, ninawantaq ruphaykachinqaku” (Apocalipsis 17:16).

Iskay kaq etapapiqa ‘Diospa jatun taripay p’unchayninpin’ kay pachapi gobiernokunapas millay runakunapas wañuchisqa kanqaku, chaytan Biblia sutichallantaq “Armagedón” nispa (Apocalipsis 16:14, 16).

“Llapa k’umuykukuqkuna [...] Diosman kutirikuychis. Chaninkaqta ruwaychis, juch’uyyaykukuychis, ichapas Señor Diospa k’araj phiñakusqan p’unchaypi pakaykusqa kawaqchis” (Sofonías 2:3)

¿IMA NINMI BIBLIA?

Diospa gobiernonmi kay pachapi llapa gobiernokunaq rantinpi kamachipunqa, chayta llapa runakunaman willakusqan qhepamanmi kay pachaq tukupuyninqa chayamunqa (Daniel 7:13, 14). Jesucriston niran: “Qhapaqsuyumanta [gobiernomanta] allin willakuykunan kay pachantinpi willasqa kanqa, llapa suyukunaq yachananpaq, jinaqtinmi p’uchukayqa chayamunqa”, nispa (Mateo 24:14). Predicakusqanqa Diospa justicianta khuyapayakuynintawanmi rikuchin; pachantinpi guerrakunapas, terremotokunapas, yarqaypas, onqoykunapas predicakusqanpas juj señalmi kay pacha chinkapunanpaq (Mateo 24:3; Lucas 21:10, 11).

Bibliaqa willallantaqmi ‘tukukuy qaylla p’unchaykunapi’ runakuna imayna kananta. Biblia nin: “Runakunan kanqa paykuna kikinkuta munakuqkuna, qolqe sonqokuna [...], tayta-mamankuta mana kasuqkuna [...], aychankuq munaynillanta ruwaqkuna, millay yana alma runakuna, tukuy allinkaqta cheqnikuqkuna [...] Dios munakunankutaqa aycha kusichiyllapin puriyta munanqaku”, nispa (2 Timoteo 3:1-5). a

Chay señalkunan rikukuyta qallariran 1914 watapi Primera Guerra Mundial kasqan qhepaman. Chaymantapas chay watamantapachan Diospa gobiernonmanta tukuy ladokunapi willakushan. Jehová Diospa testigonkunaqa reqsisqan kanku pachantinpi predicasqankuwan. Juj qelqankupas ninmi: Qhawaq. Jehová Diospa gobiernonmanta willashan nispa.

“Makilla kashaychis, manan yachankichischu ima p’unchaytachus ima horatachus Runaq Churin kutimunanta” (Mateo 25:13)