Kichay leenaykipaq

Índice nisqaman riy

 43 ESTUDIO

Jehová Diosllata servisun

Jehová Diosllata servisun

“Jehová Diosniykitan adoranki, pay sapallantataqmi servinkipas” (MAT. 4:10)

51 TAKI Qanllapaqñan kausasaqku

KAYKUNAMANTA YACHASUN *

1. ¿Imanaqtinmi Jehová Diosllata servinanchis?

JEHOVÁ DIOSMI kamawaranchis, chaymi payllata servinanchis (Apo. 4:11). Chay ruwaymi ichaqa sasa. Jehová Diosta munakunchisña respetanchisña chaypas, imaymanan jark’awasunman payllata servinanchista. ¿Imaynapin chay pasawasunman? Chayta kutichinapaq ñaupaqta yachasun imachus Jehová Diosllata serviy kasqanta.

2. Mateo 4:10 textopi nisqanman jina, ¿imaynatan rikuchinchis Jehová Diosllata servisqanchista?

2 Bibliapin willan Jehová Diosta tukuy sonqowan munakuq runakuna payllata servisqankuta. Chaymi mana pipas ni imapas sonqonchispiqa kananchu (leey Mateo 4:10).

3. ¿Iman kallpachawaranchis Jehová Diosllata servinanchispaq?

3 ¿Iman kallpachawaranchis Diosllata servinanchispaq? Sumaq sonqoyoq munakuq Dios kasqanta yachasqanchismi. Chaymantapas yacharanchismi imachus kusichisqanta mana kusichisqantapas, jinaspa pay jina kayta munanchis. Chaymantapas yacharanchismi imatachus runakunapaq munasqanmanta, jinaspa payta apoyanchis. Anchatataq kusikunchis paypa amigon kasqanchismanta (Sal. 25:14). Tukuy chaykunata yachaspan astawanraq kamaqninchista munakuranchis (Sant. 4:8).

4. a) ¿Imatan Satanás ruwan Jehová Diosta pisillataña munakunanchispaq? b) ¿Imamantan kaypi yachasun?

 4 Satanasmi kay pachata kamachishan, chaymi tanqawanchis imachus necesitasqanchista ñaupaqta maskhananchispaq, mana allinkunata munapayananchispaqpas (Efes. 2:1-3; 1 Juan 5:19). Payqa munanmi chaykunata masta munakunanchista. Kaypin yachasun iskay trampankunamanta. Ñaupaq kaq, munanmi imaymanayoq kayta maskhananchista. Iskay kaq, munanmi mana allin kusirikuykunawan kusirikunanchista.

AMA QOLQE SONQOCHU KASUN

5. ¿Imanaqtinmi cuidakunanchis imaymanayoq kayta munaymanta?

5 Llapanchispas necesitanchismi mijunata, p’achata, wasitapas tiyananchispaq. Chaywanpas cuidakunanchismi ama qolqe sonqo kananchispaq. Kay tiempopi runakunaqa qolqe sonqon kanku, imaymanayoq kaytataq munanku (2 Tim. 3:2). Jesusqa yacharanmi discipulonkunapas qolqe sonqoman tukuyta atisqankuta, chaymi niran: “Manan pipas iskay patrontaqa serviyta atinmanchu, jujnintan cheqnikunman jujnintataq munakunman, jujninmanmi k’askakunman jujnintataq pisichanman. Manan qankunaqa Diostawan qhapaq kaytawanqa serviyta atiwaqchischu”, nispa (Mat. 6:24). Sichus pipas Jehová Diosta servishaspa qolqeyoq kaypi afanasqa kashanman chayqa iskaynin patrontan servishan.

Laodicea hermanokunan khaynata qhawarikuranku... Jehová Diospas Jesuspas khaynata qhawariranku (6 parrafota qhaway)

6. ¿Imatan Jesús niran Laodicea llaqtapi hermanokunata? ¿Imatan chaymanta yachanchis?

6 Pachaj watapi jinan Laodicea llaqtamanta hermanokuna qhapaq karanku, jinaspa piensaranku mana imatapas necesitanankupaq. Jehová Diospa Jesuspa  qhawarimunankupaqmi ichaqa mana imayoq, khuyapayana, wajcha, ñausa, mana ima p’achayoq q’alalla kasharanku. Jesusqa manan qhapaq kasqankuraykuchu chaytaqa niran, aswanpas chay jawa Jehová Diosta mana allintachu servishasqankurayku (Apo. 3:14-17). Sichus reparakunchis imaymanayoq kayta munashasqanchista chayqa, usqhayllan piensasqanchista cambiananchis (1 Tim. 6:7, 8). Mana chayqa astawanmi munapayasunman jinaspa Diosqa manaña chaskinmanchu adorasqanchista. Payqa munan payllata servinanchistan (Mar. 12:30). ¿Imaynapin qolqe sonqoman tukupusunman?

7-9. ¿Imatan yachanchis umalliq Davidwan imachus pasasqanmanta?

7 Umalliq Davidmanta yachasun, payqa Estados Unidos nacionpin tiyan. Llank’asqan empresapin kallpachakuran allinta llank’ananpaq, chaymi reqsiranku allin llank’aqmanta, allin puestomantaq churaranku. Paymi nin: “Jehová Dios yanapawananpaqmi piensarani”, nispa. Ichaqa manan chhaynachu karan.

8 Davidqa repararanmi nishuta llank’asqanrayku manaña Jehová Diosta allintachu servishasqanta. Paymi nin: “Juñunakuykunapipas Diosmanta willaq lloqsispaypas llank’anaypi sasachakuykuna kasqanpin masta piensasharani. Askha qolqetaña ganarani chaypas, aswan sayk’usqan sientekurani, esposaywanpas phiñachinakuspa kausarayku”, nispa.

9 Jinan Davidqa pisillataña llank’ananpaq decidikuran. Chaypaqmi jayk’a horachus llank’ananpaq horariota ruwakuran, chaytataq jefenman qhawachiran.  Jefenmi ichaqa empresamanta qarqopuran. Ichaqa, ¿imatan ruwaran? Paymi nin: “Qhepastin p’unchaymi solicitudta junt’arani precursor auxiliar kanaypaq”, nispa. Jinaspa mantenekunankupaq paypas esposanpas limpiezapi llank’aranku. Qhepamanmi Davidqa precursor regular kapuran, chaymantataq esposanpas precursora regular kallarantaq. Paykunaqa jujkunaq mana ruwananku llank’aypin llank’aranku, ichaqa manan chaywan llakikurankuchu. Ñaupaq llank’ananpi ganasqanmantaqa pisillatan kunanqa ganan, chaywanpas qolqenkuqa aypanmi imachus necesitasqankuta rantinankupaq. Paykunaqa Jehová Dios serviytan ñaupaqman churaranku, jinaspa rikuranku imaynatachus Dios paykunata cuidasqanta (Mat. 6:31-33).

10. ¿Imatan ruwananchis sonqonchista cuidananchispaq?

10 Askhaña otaq pisiña qolqenchis kanman chaypas, sonqonchistan cuidananchis. ¿Imaynatan chayta ruwasunman? Chaypaqqa manan munapayanachu imaymanayoq kayta, nitaq llank’ananchistachu ñaupaqman churananchis. Imayna kashasqanchista yachanapaqmi tapukunanchis: “¿Juñunakuypipas Diosmanta willaq lloqsispaypas llank’anaypichu masta piensani? ¿Nishutachu llakikuni jamuq tiempopi mana imapas faltawananmanta? ¿Phiñachinakuykuchu esposaywan qolqerayku? ¿Llank’aymanchu pisipaq qhawarisqa llank’anakunapi Jehová Diosta astawan servinayrayku?”, nispa (1 Tim. 6:9-12). Chaykunapi piensashaspaqa yuyarinanchismi Jehová Dios munakuwasqanchista, paymi serviqninkunata prometewanchis: “Manan jayk’aqpas saqesaykichu, manan jayk’aqpas qonqasaykichu”, nispa. Chaychá apóstol Pabloqa niwaranchis: “Aman qolqe sonqoqa kankichischu”, nispa (Heb. 13:5, 6).

ALLINTA AJLLAKUSUN KUSIRIKUYKUNATA

11. ¿Iman pasawasunman mana allin kusirikuykunawan kusirikuqtinchis?

11 Kusirikuykunaqa yanapawanchismi kusisqa kausananchispaq, chaytan Jehová Diosqa munan. Chaymi Bibliapi nin: “Runapaq aswan allinqa mijuyllanmi, ujayllanmi, llank’asqanpipas kusikuynillanmi”, nispa (Ecl. 2:24). Kay tiempopin ichaqa mana  allin ruwaykunaman apaq kusirikuykuna astawan kashan, chaymi askha runakuna Bibliapi juchachasqan ruwaykunata allinpaq qhawaripunku.

¿Piqpa ruwasqan kusirikuykunawanmi kusirikunchis? (11-14 parrafokunata qhaway) *

12. 1 Corintios 10:21, 22 textopi nisqanman jina, ¿imanaqtinmi allinta ajllananchis kusirikuykunata?

12 Noqanchisqa Jehová Diosllatan serviyta munanchis, chaymi mana mijusunmanchu ‘Jehová Diospa mesanmanta supaykunaq mesanmantawanqa’ (leey 1 Corintios 10:21, 22). Piwanpas kuskaqa mijunchis paywan amigontin kasqanchisraykun. Sichus maqanakuymanta, supaykunaq ruwayninmanta, qhelli ruwaykunamanta kusirikuykunawan kusirikusunman chayqa, Diospa enemigonwanpas mijushasunman jinan kanman. Chayta ruwaspaqa kikinchistan dañota ruwakunchis Diosmantataq t’aqakusunman.

13, 14. Santiago 1:14, 15 textopi nisqanman jina, ¿imanaqtinmi yachananchis allin kusirikuykunata ajllayta? Juj ejemplota willay.

13 ¿Imaynapin tupanman kusirikuykuna mijunawan? Manaraq mijushaspaqa ajllasunmanmi imatachus mijunanchispaq. Ichaqa wijsanchisman jaykuqtinqa manañan jark’ayta atinchischu cuerponchista allinta mana allinta ruwanantaqa. Allin mijunakunata mijuspaqa qhalin kanchis, mana allin mijunakunata mijuspan ichaqa onqopunchis. Chayqa mana kaqratochu reparakun, aswanpas tiempowanñan.

14 Manaraq kusirikushaspapas ajllasunmanmi imawanchus kusirikuyta. Ichaqa kusirikusqanchis qhepamanqa chayman jinan piensasun sientesunpas. Allin kusirikuyta ajllaspaqa allinkunapin piensasun mana allin kusirikuywanmi ichaqa mana allinkunapi piensasun (leey Santiago 1:14, 15). Manapaschá ratollachu reparasun mana allinman apawasqanchista, tiempowanmi ichaqa sut’ita rikukunqa. Chaymi Bibliapi niwanchis: “Ama engañakuychischu: Dioswanqa manan pipas pujllakunmanchu. Imatachus runaqa tarpunqa chayllatataqmi cosechanqapas. Aychaq munasqanman jina tarpuqqa mana allin kaqtan chay tarpusqanmanta cosechanqa”, nispa (Gál. 6:7, 8). Chaymi Jehová Diospa cheqnisqan ruwaykunawanqa manapuni kusirikunanchischu (Sal. 97:10).

15. ¿Ima regalotan Jehová Dios qowanchis?

15 Askha hermanonchiskunan JW Broadcasting® nisqata qhawaspa kusikunku. Marilyn hermananchismi nin: “Chayta qhawaymi yanapawaran allinkunapi piensanaypaq, llapantataq qhawayta atini. Llakisqa sientekuspaymi uyarini Bibliamanta hermanokunaq rimamusqankuta. Chaymi yanapawan Jehová Diosta llaqtantawan astawan munakunaypaq. JW Broadcasting nisqan vidaypi allinta yanapawan”, nispa. Noqanchisri, ¿qhawashanchischu JW Broadcasting nisqata? Chayqa sapa killanmi lloqsimushan, chaymantapas chaypin tarikullantaq juj videokuna, uyarinapaq takikunapas.

16, 17. ¿Imanaqtinmi reparananchis jayk’a hora kusirikusqanchista? ¿Imatan ruwasunman ama askha horata kusirikunanchispaq?

16 Imawanchus kusirikusqanchistaqa allintan ajllananchis, chaymantapas jayk’a tiempochus kusirikusqanchistapas reparananchismi. ¿Imaraykun chayta ruwananchis? Wakinqa mana reparakuspallan askha horakuna kusirikunku. Abigail hermananchismi  18 watanpi kashan, paymi nin: “Ch’isiyaqta llank’asqayraykun samarinaypaq televisionta qhawani. Mayninpin ichaqa mana reparaylla askha horakunata qhawani”, nispa. Samuel waynapas ninmi: “Mayninpiqa askha videokunatan internetpi qhawani. Jinaspa kinsa otaq tawa horata qhawaspa tiempoyta pierdeni”, nispa.

17 ¿Imatan ruwasunman jayk’a tiempotachus kusirikuykunapi kasqanchista yachananchispaq? Chaypaqqa almanaquepi anotasunman semanapi jayk’a horatachus televisionpi, internetpi, celularninchispi ima pasasqanchista. Sichus reparanchis askha horakunata pasasqanchista chayqa, juj horariotan ruwakusunman, chaypin ñaupaqman churananchis allin kaq ruwaykunata, chaypin qelqallasunmantaq jayk’a tiempo kusirikunanchistapas. Chaymantataq Jehová Diosta rogakunanchis chay horario ruwakusqanchista junt’ananchispaq. Chayta ruwasun chayqa kanqan tiemponchis kallpanchispas Bibliata estudianapaq, familiantin Diosta adoranapaq, juñunakuykunaman rinapaq, runakunaman Diosmanta willaq yachachiq rinapaqpas. Manataqmi llakikusunchu juj rato kusirikusqanchismanta.

JEHOVÁ DIOSLLATA SERVISHASUN

18, 19. ¿Imata ruwaspan Jehová Diosllata servisqanchista rikuchisun?

18 Apóstol Pedron qelqaran mosoq pacha kananmanta Satanás kamachisqan pacha tukupunanmantapas, chay qhepamantaq niran: “Munakusqay wayqe-panaykuna, chaykunatataq suyakushankichis chayqa, tukuy atisqaykichista ruwaychis Diosqa mana ima qhelliyoqta, mana k’iñasqata, paywan sumaq kausashaqta ima tukukuypi tarinasuykichispaq”, nispa (2 Ped. 3:14). Sichus kallpachakusun yuyayninchispipas Dios serviyninchispipas limpio kananchispaq chayqa, Jehová Diosllata servisqanchistan rikuchisun.

19 Satanaspas kamachisqan runakunapas tanqawashallasunmi juj ruwaykunata vidanchispi ñaupaqman churananchispaq (Luc. 4:13). Ima sasachakuypiña tarikusun chaypas noqanchisqa Jehová Diostan tukuy sonqonchiswan munakusun, jinaspa payllata servisunchis.

30 TAKI Qanmi kanki taytay, Diosniy, amigoypas

^ párr. 5 Jehová Diosllata servinanchispaqmi prometekuranchis. Ichaqa, ¿payllatachu servishanchis? Chaypaqqa qhawarinanchismi ima ruwaykunatachus vidanchispi ñaupaqman churasqanchista. Kay yachachikuypin rimasun qolqe maskhaymanta kusirikuykunamantawan.

^ párr. 53 DIBUJOMANTA WILLAKUY: Manan pipas munasunmanchu qhelli cocinapi wayk’usqa mijuna mijuytaqa. Chay jinallataqmi mana kusirikunanchischu maqanakuykunamanta, supaykunaq ruwayninmanta, qhelli ruwaykunamanta kusirikuykunawan.