Kichay leenaykipaq

Índice nisqaman riy

Runakunaqa yachanankun Diospa phiñakuynin p’unchay chayamushasqanta

Jehová Dios juicionta apamunanpaq, ¿ñaupaqmantaraqchu willachin?

Jehová Dios juicionta apamunanpaq, ¿ñaupaqmantaraqchu willachin?

WAYRAMANTA terremotokunamanta yachaq runan maquinankunata qhawashallan, jinan yacharun jatun wayra llaqtanman chayamunanta. Payqa llakikunmi runakunaq wañunankumanta, chaymi tukuy atisqanta ruwan runakunaman willamunanpaq.

Chay runa jinan Jehová Diospas llapa runakunaman willachimushan manchakunapaq ñak’ariy tiempo chayamushasqanmanta. ¿Imaynatan chayta ruwan? ¿Ñaupaqmantachu chayta willachimun? Chay tapuykunata kutichinapaq qhawarisun imaynatas Jehová Dios ñaupaqpi juicionta apamunanpaq ruwaran chayta.

ÑAUPAQ TIEMPOPIPAS WILLACHIRANMI

Ñaupaq tiempopipas Jehová Diosqa mana kasukuqkunata castigananpaqqa ñaupaqmantaraqmi willachiran (Prov. 10:25; Jer. 30:23). Willachillarantaqmi imatachus ruwananku karan Diospa khuyapayasqan kanankupaq chayta (2 Rey. 17:12-15; Neh. 9:29, 30). Junt’aq sonqo serviqninkunawantaq kallpacharan allin kaqta ruwanankupaq, chhaynapi mana allin ruwayninkuta saqepunankupaq (Amós 3:7).

Jujnin kaq serviqninmi karan Noé, payqa askha watakunan mana manchakuspa millay kausayniyoq runakunaman willaran jatun parawan Jehová Dios kay pachata millp’uchinanta (Gén. 6:9-13, 17). Willallarantaqmi imatachus ruwananku karan salvakunankupaq chayta. Allintan kallpachakuran, chaymi Bibliaqa nin: ‘Noeqa chanin kaqmanta willaqmi karan’, nispa (2 Ped. 2:5).

Noepa tiemponpi kausaq runakunan ichaqa mana iñiyniyoq karanku, manataqmi kasurankuchu Noepa willasqanta. Chaymi millp’uq para unu chayamuqtin llapallanku wañupuranku (Mat. 24:39; Heb. 11:7). Paykunaqa manan niyta atirankuchu: “Manan yacharaykuchu”, nispaqa.

Juj kutikunapitaq Jehová Diosqa runakunaman willachiran juicionta apamunanpaq pisi tiempo faltashaqtin. Chhaynaña kaqtinpas runakunamanmi tiempota qoran salvakunankupaq. Chaytan ruwaran chunka plagakunawan Egipto llaqtata castigashaspa. Ejemplopaq, manaraq qanchis plagata apamushaspan Jehová Diosqa Moisesta Aarontawan kacharan faraonman runankunamanpas willamunankupaq. Chay plagaqa chijchin karan, chayqa qatimuq p’unchaymi chayamunan karan, chaymi runakunaqa kamachinkunata uywankunatapas waqaychayta atiranku, Biblian nin: “Rey faraonpa wakin oficialninkunamanta, Señor Diospa siminta manchakuqllan wasinman ayqechiran kamachinkunatapas, uywankunatapas. Señor Diospa siminta mana kasuqmi ichaqa, campopi saqeran kamachinkunatapas uywankunatapas”, nispa (Éx. 9:18-21). Jehová Diosqa tiempotan runakunaman qoran, chaymi willachisqanta kasukuqkunaqa mana wañurankuchu.

Diosqa willallarantaqmi faraonman runankunamanpas chunka kaq plagata manaraq apamushaspa. Paykunan ichaqa mana kasukurankuchu (Éx. 4:22, 23). Chaymi phiwi wawanku wañuchisqa karan. Chayqa llakikunapaqmi karan (Éx. 11:4-10; 12:29). ¿Karanchu tiemponku librakunankupaq? Arí karanmi, chaymi Moisesqa Israel runakunaman willaran chay plagamanta, familiankuta salvanankupaq imata ruwanankutapas  (Éx. 12:21-28). ¿Jayk’an kasukuranku? Yaqachus jina kinsa millón más runakuna, chaypin kashallarankutaq waj llaqtakunamanta askha runakunapas, wakinqa Egipto runakunan karanku (Éx. 12:38).

Chay ejemplokunawanmi yachanchis Jehová Diosqa juicionta apamunanpaq runakunaman ñaupaqta willachisqanta (Deut. 32:4). ¿Imaraykun chayta ruwan? Apóstol Pedron niran: “[Diosqa] manan munanchu pipas wañunantaqa, aswanmi munan lliupas juchankumanta pesapakunanta”, nispa (2 Ped. 3:9). Arí, Diosqa khuyapayanmi runakunata, payqa munanmi manaraq juicionta apamushaspa juchankumanta pesapakuspa cambianankuta (Is. 48:17, 18; Rom. 2:4).

UYARIKUSUN DIOSPA WILLACHISQANTA

Kay tiempopipas runakunaqa uyarinankun manchakunapaq tiempo chayamushasqanmanta willakuyta. Kay pachapi kashaspan Jesusqa willaran millay runakuna manchay ñak’ariy p’unchaypi wañuchisqa kanankuta (Mat. 24:21). Willaranmi manaraq chay p’unchay chayamushaqtin discipulonkuna imakunata rikunankuta, imakunachus paykunawan pasanantapas. Willarantaqmi pachantinpi imaymanakuna pasananmanta, chaykunatan kay tiempopi rikushanchis (Mat. 24:3-12; Luc. 21:10-13).

Chaymi Jehová Diosqa llapa runakunata kallpachan payta servinankupaq kasukunankupaqpas. Payqa munanmi llapa kasukuqkuna sumaqta kausanankuta, jamuq tiempopi bendicionkunata chaskinankutapas (2 Ped. 3:13). Jehová Diosqa runakunatan yanapayta munan promesankunapi iñinankupaq. Chaypaqmi allin willakuykunata paykunaman willachin. Jesusqa niranñan ‘allin willakuykuna pachantinpi willasqa kananta llapa nacionkuna yachananpaq’ (Mat. 24:14). Chaymi Diosqa llaqtanta pusarishan, jinan 240 nacionkunapi jina runakunaman willashanku. Payqa munanmi askha runakuna chay willakuyta uyarispa manchay ñak’ariy p’unchaypi salvakunankuta (Sof. 1:14, 15; 2:2, 3).

Rikusqanchis jina Jehová Diosqa juicionta apamunanpaqqa ñaupaqmantaraqmi willachin. Chaymi runakunamantaña kanqa kasukunankupaqqa. Noqanchismi ichaqa Diospa kamachinkuna jina, yanapashallasun llapa uyarikuy munaqta Diospa k’araq phiñakuynin p’unchaypi salvakunanpaq.