Kichay leenaykipaq

Índice nisqaman riy

Churin Jesusta sacrificiopi Dios qosqanqa, tukuymantapas aswan allin regalon

 QALLARIYPI KAQ | ¿IMAN KANMAN ASWAN ALLIN REGALO?

¿Iman aswan allin regalo?

¿Iman aswan allin regalo?

“Tukuy allin kaqkunapas tukuy junt’asqa kaqkunapas janaq pachamantan, arí, cielopi k’anchaykunaq Yayanmantan chaykunaqa jamun” (Santiago 1:17). Chay textoqa Jehová Dios qoykukuq sonqo kasqanmantan rimashan. Runakunaman qosqan tukuy regalokunamantaqa, jujninmi aswan allin. ¿Mayqenmi chay? Juan 3:16 textopi Jesuspa rimasqan simikunan kutichin: “Diosqa anchatapunin runakunata munakuran, chaymi sapallan Churinta kachamuran, pipas paypi iñiqqa ama wañunanpaq aswanpas wiñay kausayniyoq kananpaq”.

Sapallan churinta Dios qowasqanchisqa imamantapas aswan allin regalon. Chaywanmi juchamanta, machuyay payayaymanta, wañuymanta ima librakunchis (Salmos 51:5; Juan 8:34). Anchataña kallpachakusunman chaypas manan noqallanchisqa librakuyta atisunmanchu. Ichaqa Diosmi anchata munakuwasqanchisrayku tukuy necesitakusqanta ruwaran librawananchispaq. Churin Jesucristota Dios kachamuspan juchamanta kacharichiwaranchis, chhaynapin runakunaman oportunidadta qoran wiñay kausayta aypanankupaq. Ichaqa, ¿imaynatan Jesuspa sacrificion pagaran juchamanta wañuymanta kacharichisqa kananchispaq? ¿Imaraykun necesario karan? ¿Imaynapin chay allinninchispaq kanman?

Jesuspa sacrificionqa juj precio jina pagasqan karan Adanpa pierdesqanta recuperananpaq. Biblian willan Diosqa ñaupaq tayta-mamanchista mana juchayoqta kamasqanta, chhaynapi mirayninkunapiwan kay pacha paraisopi wiñaypaq tiyanankupaq (Génesis 1:26-28). Ichaqa Diosta mana kasukusqankuraykun juchallikuranku, tukuytataq pierdepuranku. ¿Imapin chay tukuran? Biblian kutichin: “Juj runallawanmi juchaqa kay pachapi rijuriran, wañuytaq jucharayku rijuriran; chhaynapin wañuyqa llapa runaman chayaran llapallanku juchallikusqankurayku”, nispa (Romanos 5:12). Wawankunaman perfecto kausayta pasananmantaqa Adanqa juchatan pasaran, chhaynapitaq wañuypas paqariran.

Juchamanta wañuymantawan librasqa kananchispaq pagasqa precioqa igualmi kanan karan pierdesqa preciowan. Adanqa yachashaspan Diosta manan kasukuranchu, chhaynapitaq perfecto kausayninta pierdepuran. Bibliaq willasqan jina, chaymi Adanpa mirayninkunaqa juchaman wañuyman qaraykusqa karanku. Chaymanta librakunapaqqa juj perfecto kausaytan necesitakuran, chaytaqa Jesuspa perfecto kausaynillanmi pagayta atiran (Romanos 5:19; Efesios 1:7). Sichus munakuq Dios mana juchamanta librawasunmanchu karan chayqa, noqallanchisqa manapunin Adán Evaq pierdesqanku wiñay kausay recuperayta atisunmanchu (Apocalipsis 21:3-5).

Chhayna kaqtinqa, wiñay kausayman aypananchispaq Diospa qowasqanchis regaloqa tukuy imamantapas aswan allinmi. Kunan qhawarisunchis imaynapin allin regalo qonapaq ñaupaq articulopi rimamusqanchis recomendacionkunawan tupan chayta.

Munasqanchisman jina. Lliu runapas wiñaypaq kausaytan munanchis (Eclesiastés 3:11). Noqallanchismantaqa manan atisunmanchu wiñaypaq kausayta, Jesuspa sacrificionwanmi ichaqa atisunman. Biblian nin: “Juchaq pagayninqa wañuymi, Diospa qokuyninmi ichaqa wiñay kausay, chay qokuyqa Señorninchis Cristo Jesusraykun”, nispa (Romanos 6:23).

Necesitasqanchisman jina. Manan pi runapas juchamanta kacharichiyta atiwasunmanchu karan. Bibliaq nisqan jina, runaq kausaynin rantiyqa sinchitan cuestan, manan pipas pagayta atinmanchu (Salmos 49:8). Runakunaqa necesitaranchismi juchamanta wañuymantawan Dios librawananchista. Chaymi ‘juchamanta kacharichisqa kananchispaq Cristo Jesús juj preciota pagaran’, chaywanmi necesitasqanchista Dios qowaranchis (Romanos 3:23, 24).

 Tiemponpi chaskiranchis. “Criston ichaqa juchasaparaq kashaqtinchis noqanchisrayku wañuran” (Romanos 5:8). Diosqa juchasaparaq kashaqtinchismi Cristoq sacrificionwan librawanchis. Chaypin sut’ita yachanchis juchayoqña kanchis chaypas, maytapuni munakuwasqanchista. Jinaspapas ñak’arinchisña jucha jawa chaypas, Jesuspa sacrificionraykun jamuq tiempopi sumaq kausayta suyakusunman.

Allin intencionwan qoykukuq kasqanta rikuchin. ¿Imaraykun Dios churin Jesusta kachamuran? “Diosqa sapan Churinta kay pachaman kachamusqanwanmi munakuwasqanchista rikuchiran, chhaynapi chay Churinrayku kausayta chaskinanchispaq. Manan noqanchischu Diostaqa munakuranchis, aswanmi pay noqanchistaqa munakuwaranchis” (1 Juan 4:9, 10).

¿Imaynatan rikuchiwaq chay sumaq regalomanta agradecekusqaykita? Juan 3:16 textopi Jesuspa nisqan jina, “pipas paypi iñiqllan” salvakunqa. Bibliaq explicasqan jina, “iñiyqa imatachus suyashanchis chayta cheqaqpaqpuni jap’iymi” (Hebreos 11:1). Chhaynaqa jamuq tiempopaq suyakuyninchis cheqaq kananpaqqa Bibliamantan yachananchis. Chaymi animaykiku tiempota jap’ispa Diosmanta yachanaykipaq, paymi aswan allin regalotaqa qowanchis. Jinaspapas yachanaykin Jesuspa sacrificionrayku jamuq tiempopi wiñay kausayman aypanaykipaq imakuna ruwanaykita.

Chay yachachikuytan tariwaq www.jw.org. nisqa direccionman jaykuspa. Jehová Diospa testigonkunaqa kusikuywanmi yanapasaykiku. Chay regalomanta astawan yachaspa reparanki allinniykipaq kasqanta chayqa, ‘¡Diostan “gracias” ninki Señorninchis Jesucristowan librawasqanchismanta!’ (Romanos 7:25.)