Sichus warmi-qhari imatapas rimanayukuspa ruwankichis chayqa iskaymanta avionta manejaq runakuna jinan kankichis. Paykunaqa manan sapankankuchu munasqankuta ruwanku, aswanpas yanapanakuspa llank’anku ima sasachakuypiña tarikuspapas.

BIBLIAPIN NISHAN: “Manan iskayñachu kanku, aswanpas juj aychallañan”, nispa (Mateo 19:6).

Christopher nin: “Iskayninkun yanapanakunanku kusisqa kausanankupaqqa”, nispa.

Sichus warmipas qharipas munasqankuman jinalla imatas ruwanqaku chayqa, sasachakuy kaqtinmi mana allichayta atinqakuchu, paykunapurataq phiñachinakapunqaku.

Alexandra nin: “Warmi-qhariqa rimanaykuspan imatapas ruwananku. Sichus qosaywan noqawan munasqaykuman jinalla ruwaykuman chayqa, iskay solterokunapas tiyashaykuman jinan kanman, jinaspa mana juj yuyayllachu imatapas ruwaykuman”, nispa.

KAYKUNATAN TAPUKUNAYKI

• ¿Sapallaychu llank’asqay qolqeta gastani?

• ¿Amigoykunallawanchu kusikuni?

• ¿Allintachu kausani qosaypa otaq esposaypa familianwan?

WARMI-QHARI PARLARIYCHIS

• ¿Imakunatan iskayninchismanta yanapanakuspa allinta ruwashanchis?

• ¿Imakunapin yanapanakunanchis kashan?

• ¿Imakunatan ruwasunman yanapanakuspa imatapas ruwananchispaq?

KAYKUNATAN RUWAWAQ

• Casado kausayqa bola jayt’aypi pujllay jinan. Ichaqa kaq equipollamanta pujllanaykichispaqqa yanapanakunaykichismi, chhaynapin ganankichis.

• Sapallayki imatapas ruwanaykimantaqa, qosaykiwan otaq esposaykiwan kuska ruwanaykichispin piensanayki.

Edgar nin: “Imaña pasaqtinpas, thajpi sumaqta kausanaykichispaqmi kallpachakunaykichis”, nispa.

BIBLIAPIN NISHAN: “Amataq munaynillaykichistaqa maskhaychischu, aswanpas jujkunaq munaynintawan maskhaychis”, nispa (Filipenses 2:3, 4).