SUT’IN KASHAN:

Pachantinpin rikukun runakuna mana aguantanakusqanku, chhaynaqa kanku cheqninakusqankurayku, nacionninkuta, religionninkuta, llaqtankuta nishuta munakusqankuraykun.

¿IMA NINMI BIBLIA?

Jesuspa tiemponpipas runakunaqa manan aguantanakuqkuchu. Judiokunaqa nishutan cheqninakuqku samaritanokunawan (Juan 4:9). Warmikunatapas pisichaqkun, religionpi umallikunapas pisichaqkun común runakunata (Juan 7:49). Jesucriston ichaqa mana chhaynachu karqan, chayraykun enemigonkunapas criticaqku: “Kayqa huchasapakunatan chaskin, paykunawantaq mikhunpas”, nispa (Lucas 15:2). Jesusqa llamp’u sonqo, pacienciayoq, hukkunata aguantaq iman karqan; runakunataqa manan huchachaqchu, aswanpas yanaparqanmi Diosta reqsinankupaq. Chaykunataqa ruwaq runakunata munakusqanraykun (Juan 3:17; 13:34).

Munakuq kaspaqa hukkunatan aguantasun, munakuyqa yanapawanchismi pantasqanta huk hina kasqankutapas aguantananchispaq. Biblia niwanchis: “Qankunapura paciencianakuychis, pipas hukpa contranpi imatapas riman chayqa, pampachaykunakuychis”, nispa (Colosenses 3:13).

“Aswantaqa tukuy sonqo munanakuychis. Munakuyqa askha huchakunatan pampachan” (1 Pedro 4:8)

SUT’IN KASHAN:

Gobiernokunaqa ordenpi kawsananchispaqmi niwanchis imakuna ruwananchista.

¿IMA NINMI BIBLIA?

Munakuyqa “manan mana ruwanakunatachu ruwan” (1 Corintios 13:5). Jesusqa hukkunatan aguantaq, ichaqa manan chayraykuchu allinpaq qhawarirqan qhelli huchata, llullakuyta, iskay uya kayta, millay kaytapas. Chaykunataqa huchacharqanmi (Mateo 23:13). Chayraykun nirqan: “Pipas mana allinkaqta ruwaqqa [cheqaqmanta] k’anchaytan cheqnikun”, nispa (Juan 3:20).

Apóstol Pablon nirqan: “Mana allinkaqta cheqnikuychis, allinkaqtataq ruwaychis”, nispa (Romanos 12:9). Payqa chhaynatan kawsarqan. Huk kutinmi repararqan judío cristianokuna mana judío cristianokunawan mana huñunakuy munasqankuta. Pabloqa judiomasinkunatan llamp’u simillawan sut’ita nirqan pantasqankuta (Gálatas 2:11-14). Payqa yacharqanmi Diosqa mana “rikch’ayninta qhawaspachu” runakunata akllasqanta, chayraykun Diospaqqa mana allinchu karqan marginanakusqankuqa (Hechos 10:34).

Jehová Diospa testigonkunaqa Bibliaq nisqantan kasukunchis (Isaías 33:22). Chayraykun mana hinallatachu qhawanchis ñoqanchis ukhupi ima mana allin kaqtinpas. Diospa llaqtan limpio kananpaqqa manan samaykachikunanchischu mana kasukuqkunawan. Chayraykun kasukunchis: “Chay huchallikuq runataqa qankuna ukhumanta qarqoychis”, nisqata (1 Corintios 5:11-13).

“Señor Diosta munakuqkuna, mana allinkaqta cheqnikuychis” (Salmo 97:10)

¿IMA NINKUN RUNAKUNA?

Runakunaqa chhaynapunin kanchis, chayraykun kallanqapuni millay runakunaqa.

¿IMA NINMI BIBLIA?

Profeta Habacucmi Diosta tapurqan imaraykuchus millay kawsayta hinallata aguantasqanta, nirqantaqmi: “Runa ch’utiqllatan runa maqaqllatan rikushani, quejanakushankun churanakushankun”, nispa (Habacuc 1:3). Chay profeta mana chhayna llakisqa kashananpaqmi Diosqa prometerqan chay millay runakunata juzgananpaq, asegurarqantaqmi: “Suyallay, tiemponpipunin chayamunqa”, nispa (Habacuc 2:3).

Diosta mana kasukuq runakunapaqqa kashanraqmi tiempo cambianankupaq. Jehová Diosqa ninmi: “¿Ñoqari huchayoqpa wañunanta munanichu? Manan, aswanmi munani yuyayta hap’ispa kutirikamuwananta hinaspa kawsananta”, nispa (Ezequiel 18:23). Chayraykun millay kawsayninkuta saqepuspa Diosman kutirikuqkunaqa kusikunanku. Proverbios 1:33 texton nin: “Uyariwaqniymi ichaqa mana imanasqalla tiyanqa, mana imatapas manchakuspalla kawsanqa”, nispa.

“Pisi tiempomantaqa chinkapullanqan millay runakunaqa [...]. Llamp’u sonqokunan ichaqa kay hallp’ata chaskinqaku, sumaq thak-nisqataq tiyakunqaku” (Salmo 37:10, 11)