Kichay leenaykipaq

Índice nisqaman riy

 13 YACHACHIKUY

Timoteoqa runakunatan yanaparqan

Timoteoqa runakunatan yanaparqan

Timoteo waynaqa kusikuywanmi runakunata yanaparqan. Askha llaqtakunamanmi viajarqan runakunata yanapananpaq. Chayta ruwasqanraykun payqa kusisqa kawsarqan. ¿Munawaqchu Timoteomanta yachayta?...

Timoteotaqa mamanwan abuelanpiwanmi Jehová Diosmanta yachachirqanku

Timoteoqa Listra llaqtapin wiñarqan. Paytaqa huch’uychanmantapachan abuelan Loida maman Eunicepiwan Jehová Diosmanta yachachirqanku. Chayraykun Timoteoqa huch’uychanmantapacha munarqan hukkunaman Jehová Diosmanta yachachiyta.

Waynaña Timoteo kashaqtinmi apóstol Pablo payta nirqan huk llaqtakunaman viajaspa kuska predicamunankupaq. Timoteoqa “¡arí!” nirqanmi. Payqa liston kasharqan runakunata yanapananpaq.

 Timoteoqa Pablowanmi viajarqan Tesalónica llaqtaman. Chayman chayanankupaqqa nishu karutan purinanku karqan, chaymantataq barcopi rinanku karqan. Chayman chayaspaqa askha runakunatan Jehová Diosmanta yachachirqanku. Ichaqa wakin runakunan phiñakuspa paykunata mana allinta ruwayta munarqanku. Chaymi Pablopas Timoteopas chaymanta lloqsispa huk llaqtakunapi predicarqanku.

Timoteoqa kusisqan kawsarqan

Wakin killakuna qhepatan Timoteota Pablo nirqan Tesalónica llaqtaman kutinanpaq, chhaynapi iñiqmasikuna imayna kasqanta yachamunanpaq. Chay llaqtaman kutiyqa manchakunapaqmi karqan. Ichaqa Timoteoqa rirqanmi, payqa llakisqan kasharqan iñiqmasinkunamanta. Chay qhepamanmi payqa allin willakuykunawan Pabloman kutirqan. Tesalónica llaqtapi iñiqmasikunaqa Jehová Diostan servishallasqaku.

Timoteoqa askha watakunan Pablowan llank’arqan. Huk kutinmi Pablo Timoteomanta kayta qelqarqan: “Timoteotan kachasaq iñiqmasikunata yanapananpaq. Pay hinaqa manan pipas kanchu. Payqa Diostapas runakunatapas munakunmi”, nispa.

¿Munakunkichu runakunata? ¿Munankichu Jehová Diosmanta paykunaman yachachiytapas?... ¡Chayta ruwaspaqa Timoteo hinan kusisqa kawsanki!