Kichay leenaykipaq

Índice nisqaman riy

 2 YACHACHIKUY

Rebecaqa Jehová Diostan kusichirqan

Rebecaqa Jehová Diostan kusichirqan

Rebecaqa Jehová Diosta munakuq warmin karqan. Qosanpa sutinmi karqan Isaac. Paypas Jehová Diostan munakurqan. ¿Imaynapin Rebeca Isaacta reqsirqan? ¿Imaynatan rikuchirqan Jehová Diosta kusichiy munasqanta? Astawan paymanta yachasun.

Isaacpa taytanmi Abraham karqan mamantaq Sara. Llapankupas Canaán llaqtapin tiyarqanku, chay llaqtapi runakunaqa manan Jehová Diostachu yupaycharqanku. Abrahamqa munarqanmi Jehová Diosta yupaychaq warmiwan Isaac casarakunanta. Harán llaqtapin Abrahampa wakin familian tiyarqan. Chayraykun huk kamachinta Harán llaqtaman kacharqan Isaacpaq huk warmita tarinpunanpaq, yaqapaschá chay kamachiqa Eliezer karqan.

Rebecaqa Eliezerwanmi Canaanman rirqan Isaacwan casarakunanpaq

Eliezerqa Abrahampa huk kamachinkunawan iman karuta viajarqan. Paykunaqa chunka camellokunapin aparqanku mikhunata regalokunatapas. ¿Imaynatan Eliezer yachanman mayqen warmichus Isaacwan casarakunanpaq allin kasqanta? Harán llaqtaman chayaspankun paykunaqa unu p’uytuq qayllanpi samaykurqanku. Eliezerqa yacharqanmi chay horata runakuna unuman lloqsimusqankuta. Chaymi Jehová Diosta mañakuspa nirqan: “Sichus mayqen sipaspas unuta mañakuqtiy qowanqa camelloykunamanpas ukyachinqa chayqa, chay kachun patronniypa  churinpaq akllapusqayki warmi”, nispa.

Chay qhepamanmi Rebeca sipas p’uytuman hamurqan. Biblian willan sumaq rikch’ayniyoq kasqanta. Unuta ukyachinanpaq Eliezer valekuqtinmi payqa nirqan: “Ukyaykuy, camelloykikunapaqpas unuta wisisaq”, nispa. Camellokunaqa askha unutan ukyanku, chaymi Rebecaqa askha kutita p’uytumanta unuta wisirqan. ¿Imatan chay dibujopi Rebeca ruwashan?... Arí, payqa llank’ashanmi. Eliezerqa anchatan admirakurqan mañakusqanman Jehová Dios kutichisqanta rikuspa.

Eliezerqa askha sumaq regalokunatan Rebecaman qorqan. Rebecataq Eliezerta paywan riqkunatapas taytanpa wasinpi qhepakunankupaq nirqan. Chaypin Eliezerqa willarqan imapaqchus Abraham kachamusqanta, mañakusqanta imaynata Jehová Dios kutichisqantapas. Chayta uyarispan Rebecaq familianqa anchata kusikurqan.

Rebecaqa kuti-t’ikraspan p’uytumanta unuta wisirqan

Ichaqa, ¿munarqanchu Rebeca Isaacwan casarakuyta?... Isaacwan casarakunanpaq familian tapuqtinqa, payqa “arí” nispan kutichirqan. Rebecaqa yacharqanmi Eliezerta Jehová Dios kachamusqanta. Chayraykun payqa Canaán llaqtaman rirqan Isaacwan casarakunanpaq.

Kasukuq kasqanraykun Diosqa allinta Rebecata cuidarqan. Jesuspas paypa familianmantan karqan. Sichus Rebeca hina Diosta kasukunki chayqa qantapas allintan Diosqa cuidasunki, hinaspapas Diospa sonqontan kusichinki.

BIBLIAYKIPI LEEY

  • Génesis 12:4, 5; 24:1-58, 67