Kichay leenaykipaq

Índice nisqaman riy

 3 YACHACHIKUY

Rahabqa Jehová Diospin confiarqan

Rahabqa Jehová Diospin confiarqan

Yachasun Rahab sutiyoq warmimanta. Payqa Jericó llaqtapin tiyarqan, chay llaqtaqa Canaán nacionpin karqan, chaypi tiyaq runakunaqa manan Jehová Diosta munakurqankuchu. Ichaqa Rahabqa manan chay runakuna hinachu karqan.

Sipaschallaraq kashaspan Rahabqa uyarisqa puka qochata imaynata Jehová Dios iskayman t’aqasqanta, israelitakunata Egipto nacionmanta imayna horqomusqantapas. Kunantaqmi payqa uyarin Jericó llaqtaq qayllanpi israelitakuna kashasqankuta.

Jehová Diospi confiasqanraykun Rahabqa qhamiyaqkunata pakarqan

Huk tutan iskay israelitakuna Jericó llaqtaman rirqanku pakallapi llaqtata qhawanankupaq, paykunatan nikun “qhamiyaqkuna” nispa. Paykunan Rahabpa wasinman chayarqanku. Hinan payqa wasinpi qhepakunankupaq nirqan. Ichaqa chay tutan reyqa yacharusqa qhamiyaqkuna Rahabpa wasinpi kashasqankuta. Chayraykun reyqa runankunata kacharqan paykunata hap’imunankupaq. Rahabmi ichaqa chay iskay qhamiyaqkunata wasin patapi pakarqan, reypa runankunatapas nirqanmi: “Chay runakunaqa pasapunkuñan llaqtamanta. Qhepanta phawankichis chayqa, taripankichisraqmi”, nispa. ¿Munawaqchu yachayta imarayku chay qhamiyaqkunata Rahab pakasqanta?... Rahabqa Jehová Diospin confiarqan, payqa yacharqanmi israelitakunaman Canaán llaqtata Dios qopunanta.

Qhamiyaqkunaqa Rahabtan prometerqanku Jericó llaqta thunisqa kaqtin paypas familianpas mana wañunankupaq. ¿Imatan Rahabta nirqanku?... Paykunan nirqanku: “Kay puka waskhata ventanaykimanta warkunki. Chayta ruwaqtiykiqa llapa wasiykipi kaqkunan salvasqa kanqaku”, nispa. Rahabqa nisqankuman hinapunin ruwarqan. ¿Munawaqchu yachayta chay qhepaman imachus pasasqanta?...

Jehová Diosmi salvarqan Rahabta familiantapas

Chay qhepamanmi israelitakunaqa sapa p’unchay Jericó llaqtata huk kutita muyurqanku. Chaytaqa soqta p’unchaytan ch’inlla ruwarqanku. Ichaqa qanchiskaq p’unchaypin qanchis kutita llaqtata muyurqanku, chay qhepamantaqmi kallpawan qaparirqanku. Hinan Jehová Diosqa llaqta muyuriq perqankunata thunichipurqan.  Ichaqa ventananpi puka waskhayoq wasiqa manan thunikurqanchu. ¿Rikushankichu chay waskhata dibujopi?... ¡Rahabpas familianpas manan wañurqankuchu!

¿Pita kasukusqanraykun Rahab salvakurqan?... Arí, Jehová Diosta kasukusqanraykun. Rahabqa yacharqanmi Diospa imakuna ruwasqanmanta, chayraykun Diospi confiarqan. Qanpas yachashankin Diospa ruwasqankunamanta. ¿Rahab hinachu Diosta kasukunki?... Arí, kasukunaykin.

BIBLIAYKIPI LEEY