Kichay leenaykipaq

Índice nisqaman riy

 37 CAPÍTULO

Yuyashallasun Jehová Diosta Jesustapas

Yuyashallasun Jehová Diosta Jesustapas

SICHUS juj runa ancha valorniyoq regalota qosunkiman chayri, ¿imaynan sientekuwaq?... ¿Gracias nisqayki qhepamanchu chay runata qonqapuwaq? ¿Icha yuyashallawaqchu chay runata regalo qosqasuykitapas?...

Jehová Diosmi ancha valorniyoq regalota qowaranchis. Payqa wawantan kay pachaman kachamuran noqanchisrayku wañunanpaq. ¿Imaraykun Jesús wañunan karan?... Chaytan allintan entiendenanchis. Chaymanta kunan yachasun.

23 capitulopi yachasqanchis jina, Diospa kamachikuyninta mana kasukusqanraykun Adanqa juchayoq kapuran. Paymi karan llapa runakunaq taytan, chaymi llapanchispas juchayoq nacenchis. Chhaynaqa, ¿imatan llapanchispas necesitanchis?... Mana juchayoq ch’uya taytatan. ¿Pin karan chay tayta?... Jesusmi.

Jehová Diosmi payta kachamuran Adanpa rantinpi papanchis kananpaq. Biblian nin: ‘Ñaupaq kaq Adanqa kausaq runan karan. Qhepa kaq Adanmi ichaqa kausay qoq espíritu kapun’, nispa. ¿Pin karan ñaupaq kaq Adán?... Allpamanta Diospa kamasqan runan. ¿Qhepa kaq Adanri?... Jesusmi karan. Biblian nin: “Ñaupaq kaq runaqa kay pachamantan karan, allpamanta ruwasqataqmi karanpas; qhepa kaq runan ichaqa janaq pachamanta karan”, nispa (1 Corintios 15:45, 47; Génesis 2:7).

 Jehová Diosmi Jesuspa ch’uya kausayninta Mariaq wijsanman astamuran. Chaymi Jesusqa mana juchayoq naceran (Lucas 1:30-35). Chayraykun juj ángel oveja michiqkunata niran: “Juj salvaqmi nacepusunkichis”, nispa (Lucas 2:11). Ichaqa, ¿imatan chay wawa ruwanan karan salvawananchispaq?... Wiñananraqmi karan. Wiñaspañan “qhepa kaq” Adán kapunan karan.

Jinaspapas Biblian nillantaq Jesús “Wiñay Yaya” kapunanta (Isaías 9:6, 7). Jesusqa mana juchayoq runan karan, chaymi payqa juchallikuq Adanpa rantinpi yayanchis otaq papanchis kapunqa. Chayraykun Jesusta ajllakunanchis papanchis kananpaq. Ichaqa Jesuspas papayoqmi, paypa papanqa Jehová Diosmi.

¿Imapin Adanpas Jesuspas kaqlla karanku? ¿Imaraykun chay allinninchispaq?

Jesusmi salvawaqninchisqa. Ichaqa, ¿imamantan salvawanchis?... Juchamanta wañuymanta iman. Salvawananchispaq Jesuspa kausay qosqantan nikun “kacharichiy” nispa. Jehová Diosmi Jesusta kachamuran juchamanta kacharichiwananchispaq (Mateo 20:28; Romanos 5:8; 6:23).

¿Qonqananchischu Jehová Diospas Jesuspas noqanchisrayku ruwasqankuta?... Manan ¿riki? Jesusmi qatikuqninkunaman yachachiran imaynatan paypa ruwasqanta yuyarinkuman chayta. Chaymanta kunan yachasun.

 Jerusalén llaqtapin juj tuta Jesuswan apostolninkunapiwan altos wasipi juñukuranku. Mesapin kasharan oveja kanka, t’anta, vinopiwan. Chaytan paykunaqa mijusharanku. ¿Imaraykun chaykunata mijusharanku?...

Ñaupaq tiempopi Jehová Dios llaqtanrayku ruwasqantan yuyarisharanku. Israel runakuna esclavo kashaqtinkun Jehová Dios Egipto llaqtamanta paykunata orqomuran. Chay tutan Diosqa paykunata kamachiran: ‘Familiaykichispaq juj ovejata wañuchiychis jinaspa wasi punkuq  k’aspinta yawarninwan ch’aqchuychis. Chaymantataq aychanta mijunkichis’, nispa.

¿Imapin ovejaq yawarnin Israel runakunata yanaparan?

Chaytan llapa Israel runakuna ruwaranku. Jinan chay tuta Diospa angelnin jamuspa yaqa llapa phiwi churikunata wañuchiran. Ichaqa yawarwan ch’aqchusqa wasikunataqa pasallaranmi. Chay wasikunapi llapa phiwi churikunan salvakuranku. Chayta rikuspan Egiptopi reyqa anchata mancharikuran, chaymi Israel runakunata niran: ¡‘Lloqsiychis Egipto llaqtamanta! ¡Ripuychis!’, nispa. Chaymi israelitakunaqa camellokunapi asnokunapi imaymanankuta cargaspa Egiptomanta lloqsipuranku.

Jehová Diosqa manan munaranchu chaykuna qonqanankuta. Chaymi paykunata kamachiran: ‘Sapa watanmi kay jina cenata juj kutita mijunkichis’, nispa. Chaytan suticharanku pascua nispa. Chay mijunata mijuspan yuyariranku Diospa angelnin ‘yawarwan ch’aqchusqa wasikunapi runakunata mana wañuchisqanta’ (Éxodo 12:1-13, 24-27, 31).

Chayta yuyarinankupaqmi Jesusqa apostolninkunawan chay cenata mijuranku. Chay cenata tukuruqtinku jinan Judás pasapuran. Chaypin Jesusqa juj especial cenata qallarichiran. Puchuq t’antata jap’ispan Diosmanta mañakuran, partispataq apostolninkunaman qoran. Kaytan niran: ‘Kay t’antaqa cuerpoytan representan, kay cuerpoytan qankunarayku qosaq’, nispa.

Chay qhepamanmi Jesusqa copapi vinota jap’ispa Diosmanta mañakuran. Jinan apostolninkunaman qospa niran: ‘Llapaykichis kay vinota ujaychis’. ‘Kay vinoqa yawarniytan representan, asllamanmi yawarniyta jich’asaq juchaykichismanta perdonasqa kanaykichispaq. Kaytaqa ruwallankichispunin noqata yuyariwanaykichispaq’, nispa (Mateo 26:26-28; 1 Corintios 11:23-26).

¿Imatan chaskisun Jesuspa yawar jich’arisqanwan?

 ¿Imatan Jesús chaypi kamachisharan?... Cena ruwasqanta ruwashanallankutan. Chay p’unchaymantapachan apostolkunaqa pascua cenaq rantinpi Jesuspa cena ruwasqanta yuyarinanku karan. Chaypiqa Jesuspa wañupusqantan watapi juj kutita yuyarinanku karan. Chaytan sutichakun: “Señorpa Cenan”, nispa. Kunantaq ninchis: “Jesuspa wañupusqanta yuyarina p’unchay”, nispa. ¿Imarayku?... Jehová Diospas Jesuspas noqanchisrayku ruwasqankuta yuyarisqanchisrayku.

T’antata rikuspan piensananchis Jesuspa cuerponpi. Chay cuerpontan Jesús qoran wiñay kausayniyoq kananchispaq. ¿Vinori?... Vinota rikuspaqa Jesuspa yawarninpin piensananchis. Jesuspa yawarninmi aswan valorniyoq Egiptopi ovejaq yawarnin jich’asqankumanta. ¿Imarayku?... Jesuspa yawarninwan runakunaq juchan perdonasqa kasqanrayku. Jucha chinkapuqtinqa manañan pipas machuyanqachu, onqonqachu nitaq wañunqachu. Jesuspa wañupusqanta yuyarina p’unchaypi juñukuspan chaykunapi piensananchis.

¿Llapanchischu chay p’unchaypi t’antata mijunanchis vinotapas ujananchis?... Manan. Jesusmi niran paywan kuska janaq pacha tronokunapi tiyaqkunalla mijunankuta ujanankutapas (Lucas 22:19, 20, 30). Janaq pachapaq ajllasqa runakunan reykuna kanqaku, paykunan Jesuswan kuska kamachimunqaku. Paykunallan t’antata mijunanku vinotapas ujananku.

Ichaqa llapallanchismi chay juñunakuyman rinanchis. ¿Imarayku?... Llapallanchispaq Jesús kausayninta qosqanrayku. Chay juñunakuyman rispan rikuchisun sacrificio ruwasqanta mana qonqasqanchista ancha valorniyoqpaq rikusqanchistapas.

Jesuspa sacrificion ancha valorniyoq kasqanta yachanapaq leesun 1 Corintios 5:7; Efesios 1:7; 1 Timoteo 2:5, 6; 1 Pedro 1:18, 19.