Kichay leenaykipaq

Índice nisqaman riy

 24 CAPÍTULO

Manan suwakunanchischu

Manan suwakunanchischu

¿JAYK’AQLLAPAS suwarasunkikuchu imaykitapas?... ¿Imaynan sientekuranki?... Chay ruwaqtaqa “suwa” nikunmi. Suwa runataqa llapapas cheqnikunmi. ¿Imaynapin juj runa suwaman tukupun? ¿Suwapunichu naceran?...

Ñaupaqpin yacharanchis llapa runapas juchayoq nacesqanchista. Chaymi mayninpi mana allinkunata ruwanchis. Ichaqa manan pipas suwa kananpaqchu nacen. Yaqapaschá suwa runaq tayta-maman hermanonkunapas honrado kanku. Ichaqa qolqeta munaspa, imaymanayoq kayta munaspan suwaman tukupun.

¿Pin qallariypi suwaman tukupuran?... Jesusqa janaq pachapi kashasparaqmi chay suwata reqsiran. ¿Pin karan chay suwa? Juj angelmi. Diosqa llapa angelkunatan allinkunata ruwanankupaq kamaran. Chhaynaqa, ¿imaraykun chay ángel suwaman tukupuran?... Jujpa kaqninta munasqanraykun, chaytan pusaq capitulopi yacharanchis. ¿Imatan munaran?...

Adanwan Evawanqa Jehová Diosllatan adorananku karan. Ichaqa chay angelmi munaran adorasqa kayta. Chaymi llullakuspa Adanwan Evawan adorachikuran. Chhaynapin suwaman tukupuran. Chaymantapachan Saqra Satanás kapuran.

¿Imata munaspan juj runa suwaman tukupun?... Jujpa kaqninta munaspan. Jujpa kaqninta sinchita munaymi allin runatapas mana allin ruwaykunaman tanqanman. Wakin suwa runakunaqa manan pesapakunkuchu ruwasqankumanta, chaymi  mana allinkunata ruwashallanku. Chay runakunamanta jujninmi karan Judas Iscariote, payqa Jesuspa apostolninmi karan.

Judasqa wawa kasqanmantapachan Diospa kamachikuyninta yacharan. Chaymi payqa yacharan suwakuy jucha kasqanta. Ñaupa tiempopiraqmi Jehová Dios llaqtanta niran: “Aman suwakunkichu”, nispa (Éxodo 20:15). Judasqa kuraq kapuspan Jesusta reqsiran jinaspa apostolnin kapuran.

Jesusqa apostolninkunawan kuskan viajaranku mijuranku ima. Chaymi llapa gastokunapaq qolqeta juj cajapi waqaycharanku. Chay qolqetan Jesús Judasman qoran waqaychananpaq. Ichaqa, ¿imatan Judas chay qolqewan ruwaran?...

¿Imaraykun Judas suwaman tukupuran?

Judasqa chay cajapi qolqetan orqoyta qallariran. Ichaqa manan pipas chay ruwasqanta rikuranchu. Jinaspapas imaymanatan ruwaran aswan askha qolqeta jap’ispa suwakunanpaq. Payqa tukuy tiempon qolqellapi piensaran. ¿Imatan qhepaman ruwaran?

Juj kutinmi Lazaroq panan María juj sumaq perfumeta Jesuspa chakinman jich’aykuran. Judasmi ichaqa phiñakuran chay ruwasqanmanta. ¿Imaraykun phiñakuran?... Payqa niranmi: ‘¿Manachu chay sumaq perfumeta vendesunman karan wajchakunaman chay qolqeta qonapaq?’, nispa. Chaytaqa nisharan chay qolqeta cajaman churaqtinku suwakunanpaqmi (Juan 12:1-6).

Jesusmi ichaqa niran: ‘Jinalla kachun, payqa allintan ruwashan’, nispa. Chayta niqtinmi Judasqa sinchita phiñakuspa Jesuspa enemigonkunaman riran. Chay sacerdotekunan Jesusta jap’iyta munaranku, ichaqa runakunaq mana rikunanpaqmi tutallapi chayta ruwayta munaranku.

 Judasmi sacerdotekunata niran: ‘Qolqeta qowankichis chayqa nisaykichismi imaynatachus Jesusta jap’inkichis chayta. A ver, ¿jayk’a qolqetan qowankichis?’, nispa.

Sacerdotekunataq niranku: ‘Kinsa chunka qolqeta qosaykiku’, nispa (Mateo 26:14-16).

Chay qolqeraykun Judasqa Jesusta traicionaran. ¿Ima ninkin chay ruwasqanmanta?... Chhayna millaymanmi tukupunku suwakuq runakunaqa. Qolqeta sinchita munasqankuraykun manaña runamasinkuta nitaq Diostapas munakunkuchu.

Yaqapaschá niwaq: “Noqaqa Jehová Diostan astawanqa munakuni”, nispa. Chay nisqaykiqa allinmi. Yaqapaschá Judaspas chhaynata piensaran apostolnin kananpaq Jesús ajllashaqtin. Jujkunapas chhaynatapaschá piensaranku manaraq suwa kashaspa. Wakinmanta yachasun.

¿Imatan Ajanpas Davidpas munaranku?

Ñaupaqta yachasun Ajan runamanta, payqa Diospa llaqtanmantan karan. Juj kutinmi Dios paykunata kamachiran qorita, qolqeta, jujkunatawan enemigokunamanta qechumunankupaq. Chaykunaqa Diospaqmi kapunan  karan. Ajanmi tariran juj sumaq p’achata, qorita, qolqetawan. Jinan chaykunata sinchita munapayaspa suwakuran (Josué 6:19; 7:11, 20-22).

Kunanqa Davidmanta yachasun. Jehová Diosmi Davidta ajllaran Israel llaqtapi rey kananpaq. Juj kutinmi Davidqa sumaq rijch’ayniyoq Bat-seba sutiyoq warmita rikuran. Nishuta qhawapayasqanraykun wasinman pusachimuyta munaran paywan puñunanpaq. Chay warmin ichaqa qosayoq karan. Chayta yachaspa, ¿imatan David ruwanan karan?...

Manañan chay warmita qhawananchu karan. Ichaqa nishuta chay warmipi piensasqanraykun wasinman pusachimuran jinaspa jujkunata kamachiran qosanta wañuchinankupaq. ¿Imaraykun  David chay millaykunata ruwaran?... Jujpa esposanta munasqanrayku (2 Samuel 11:2-27).

¿Imaynatan Absalón rikuchiran suwa kasqanta?

Davidqa pesapakuranmi chaykuna ruwasqanmanta, chaymi Jehová Diosqa mana wañuchiranchu. Ichaqa imaymana sasachakuykunapin tarikuran. Wawan Absalonmi paypa rantinpi rey kayta munaran. Chaymi Absalonqa Davidman jamuq runakunata abrazaykuspa much’aykuran. Biblian nin: ‘Absalonqa runakunaq sonqontan suwaran’, nispa. Chaymi runakunaqa munaranku Absalón rey kapunanta (2 Samuel 15:1-12).

¿Jayk’aqllapas Ajan, David, Absalón jina imatapas sinchita munapayarankichu?... Sichus jujpa kaqninta ch’inlla jap’ikapunki chayqa suwakushankin. ¿Yuyashankichu imatan Satanás munaran?... Payqa munaranmi Adanpas Evapas, llapa runakunapas adoranankuta. Chhaynapin Diospa kaqninta suwakuran.

Tukuy imapas dueñoyoqmi, chaymi imatapas oqarinaykipaqqa dueñonmanta permisota mañakunayki. Amigoykikunaq wasinta pujllaq rispa, ¿apakunaykichu pakallapi ima pujllanatapas?... Chayqa manan allinchu kanman. Amigoykiq papan otaq maman nisunkiman chayllan apawaq. Sichus pakallapi apanki chayqa suwakushankin.

¿Iman tanqasunkiman imatapas suwakunaykipaq?... Jujkunaq kaqninta munapayaymi. Yaqapaschá mana pipas rikusunkichu. Ichaqa, ¿pin llapanchista rikuwashanchis?... Arí, Jehová Diosmi. Diosqa cheqnikunmi suwakuyta. Sichus Diostapas runakunatapas munakunki chayqa, manan imatapas suwakunaykichu.

Biblian willan suwakuy mana allinchu kasqanta. Chaypaq leesun Marcos 10:17-19; Romanos 13:9; Efesios 4:28.