Kichay leenaykipaq

Índice nisqaman riy

 9 CAPÍTULO

Tentacionkunamanta cuidakusun

Tentacionkunamanta cuidakusun

¿YAQACHU jayk’aqllapas compañeroyki otaq pipas nirasunki: “Chayta suwarukuy”, nispa?... ¿Yaqachu nirasunki: “Chay ruwayqa allillanmi, chayta ruwaspaqa kusikunkin”, nispa?... Chaykunata niq runaqa tentashasunkin.

¿Imatan ruwananchis pipas chhaynata tentawaqtinchis? ¿Payta kasuspachu mana allinkunata ruwananchis?... Mana allinkunata ruwasunman chayqa Jehová Diosmi llakikunman. Ichaqa, ¿pin kusikunman?... Arí, Satanasmi.

Satanasqa Jehová Diospa enemigonmi, chaymantapas llapa runakunaq enemigonmi. Payqa espíritu cuerpoyoqmi chaymi mana rikunchischu, paymi ichaqa rikuwanchis. Juj kutinmi Satanás Jesusta tentaran. Chaymanta kunan yachasun, chaymi yanapawasun tentacionkunamanta cuidakunapaq.

¿Imatan Jesús yuyarinman karan bautizakusqan qhepaman?

Jesusqa Diospa munasqantapunin ruwaran. Chaymi Jordán mayupipas bautizakuran. Unumanta lloqsimushaqtinmi ‘cielo kicharikuran’ (Mateo 3:16). ¿Imatan nisharan ‘cielo kicharikuran’ nisqanwan? Chay ratopin Jesusqa janaq pachapi papanwan kausasqanta yuyarinman karan, chaytan nisharan. Chay qhepamanmi Satanasqa Jesusta tentaran.

 Jesusqa bautizakusqan qhepamanmi ch’inneq ladota riran yuyarisqanpi piensananpaq. Chaypin qhepakuran 40 p’unchay 40 tuta mana imata mijuspa. Jinan sinchita yarqachikuran. Chayta rikuspan Satanasqa tentayta qallariran.

¿Imaynatan Satanás kaypi Jesusta tentaran?

Satanasmi niran: “Diospa Churinchus kanki chayqa, kay rumikunata niy t’antaman tukunanpaq”, nispa. Maytachá Jesusqa t’antata mijuyta munaran. Ichaqa, ¿karanchu atiynin rumita t’antaman tukuchinanpaq?... Arí, karanmi. Diosmi atiyta qoran ima milagrotapas ruwananpaq.

¿Imatan qan ruwawaq karan Satanás chayta nisuqtiyki?... Jesustaqa sinchitan yarqasharan. ¿Juchachu kanman karan juj t’antallatapas mijuykuy?... Manan ¿riki? Ichaqa runakunata yanapananpaqmi Diosqa Jesusman atiyta qoran, manan paypaq milagrokunata ruwananpaqchu. Chaytan Jesusqa allinta yacharan.

Chaymi Jesusqa Satanasta niran: “Manan t’antallawanchu runaqa kausanqa, aswanpas Jehová Diospa llapa nisqankunawan iman”, nispa. Arí, Jesuspaqqa Diosta kasukuymi aswan importante karan mijunamantaqa.

 Satanasqa yapamantan Jesusta tentaran. Jerusalenman apaspan temploq perqan patapi sayaykachiran. Chaypin niran: “Diospa Churinchus kanki chayqa, kaymanta saltaykuy; qelqasqan kashan: ‘Paymi angelninkunata kamachinqa cuidanasuykikupaq’”, nispa.

¿Imaraykun Satanás chayta niran?... Payqa munasharanmi Jesuspa k’irikunanta. Ichaqa manan chay kutipipas Jesusqa kasuranchu, aswanmi niran: ‘Qelqasqan kashan: “Aman Jehová Diosniykita pruebaman churankichu”’, nispa. Arí, chay perqamanta saltaykuspaqa Diostan prueban churashanman karan.

Satanasqa urmachiytapunin munaran. Chaymi jatunkaray orqomanñataq Jesusta aparan. Chaypin kay pachapi llapa qhapaq kaykunata rikuchiran. Jinaspa niran: “Qonqorikuspachus juj kutillata adorawanki chayqa, llapan kaykunatan qopusayki”, nispa.

A ver, kaypi piensasun: ¿Satanaspachu karan kay pachapi llapa qhapaq kaykuna?... Arí, paypan. Mana chayqa Jesusmi ninman karan: “Manan qanpachu chaykunaqa”, nispa. Bibliapunin nin: ‘Satanasmi kay pacha kamachikuqqa’, nispa (Juan 12:31).

¿Imaraykun Satanás kay pachapi qhapaq kaykunata Jesusman munachiran?

Sichus Satanás adoranaykirayku imatapas munachisunkiman chayri, ¿kasunaykichu?... Jesusqa manapunin adorayta munaranchu imataña Satanás munachiran chaypas. Chaymi niran: ‘¡Ripuy Satanás! Biblian nin: “Jehová Diosniykitan adoranki, pay sapallantataqmi servinkipas”’, nispa (Mateo 4:1-10; Lucas 4:1-13).

¿Imatan ruwanki tentacionpi tarikuspa?

Noqanchistapas Satanasqa imaymanapin tentayta munawanchis. ¿Imakunapin tentawanchis?... A ver, kaypi piensay: Mamayki juj sumaq tortata ruwaruspa nisunki: “Aman mijunkichu, mijunanchis horatañan mijusun”, nispa. ¿Kasukunaykichu?...  Sichus nishuta yarqashasunki chayqa, Satanasmi tentasunkiman mamaykita mana kasunaykipaq.

Ichaqa Jesustan yuyarinayki. Paytapas sinchitan yarqasharan, chaywanpas Diospa nisqantan kasukuran. Sichus qanpas mamaykita kasukunki chayqa, Jesús jinan kanki.

Yaqapaschá compañeroykikuna juj yuraq jak’uta qosunkikuman: “Kayta mijuspaqa  kusikunkin”, nispa. Chayqa drogan kanman, chayta mijuspaqa onqowaqmi otaq wañuwaq. Jujkunaqa cigarrotan qosunkikuman: “Akis mana fumayta atinkichu”, nispa. ¿Imatan ruwanki?...

Jesustan yuyarinayki. Paytapas Satanasmi niran templomanta saltaykunanpaq, Jesusmi ichaqa mana kasuranchu. ¿Imatan qan ruwawaq pipas chhaynata nisuqtiyki?... Arí, Jesús jinan qanpas mana kasunaykichu.

¿Imaraykun mana santokunata adorananchischu?

Diosqa manan munanchu santokuna adorananchista. Ichaqa escuelaykipi fiesta kaqtinmi profesorkuna nisunkikuman santokunata adoranaykipaq (Éxodo 20:4, 5). Mana adorayta munaqtiykin nisunkikuman: “Escuelamantan qarqosqa kanki”, nispa. Chay kaqtin, ¿imatan ruwawaq?...

Mana allinkunata ruwayqa facilmi, allinkunata ruwaymi ichaqa sasa. Yaqapaschá runakunaqa mana allinkuna ruwasqankumanta niwasun: “Chayqa manan juchachu, allillanmi”, nispa. Ichaqa Jehová Diostan kasukunanchis, paymi runakunamantaqa astawan yachan.

Imataña runakuna niwasun chaypas, manapunin mana allinkunataqa ruwanachu, mana chayqa Satanasmi kusikunman. Allin kaqllatapuni ruwasun chayqa Diosmi kusikunqa.

¿Imatawanmi ruwasunman tentacionkunamanta ayqekunapaq? Chaypaq leesun Salmo 1:1, 2; Proverbios 1:10, 11; Mateo 26:41; 2 Timoteo 2:22.