Kichay leenaykipaq

Índice nisqaman riy

 48 CAPÍTULO

Qanpas paraisopin tiyawaq

Qanpas paraisopin tiyawaq

JEHOVÁ DIOSMI Adanta Evatawan Edén huertapi churaran sumaqta kausanankupaq. Ichaqa mana kasukuq kasqankuraykun wañupuranku. Chaywanpas Diosmi munan paykunaq wawankuna paraisopi tiyanankuta. Chaymi Biblia nin: ‘Chanin runakunaqa kay allpatan jap’ikapunqaku, chaypin wiñaypaq tiyanqaku’, nispa (Salmo 37:29).

Biblian willashan ‘mosoq janaq pachamanta’ ‘mosoq allpa pachamantawan’ (Isaías 65:17; 2 Pedro 3:13). Kay pachapi kamachikuqkunatan mayninpi Biblia nin “janaq pacha” nispa. Chhaynaqa, ¿imataq ‘mosoq janaq pachari’? Diospa gobiernonmi, chaypin Jesuswan juj runakunawan kuska kamachikunqaku. May munaychá kanqa chay tiempopi kausayqa.

¿Imataq ‘mosoq allpa pachari’?... Chaypiqa manan kay tiyasqanchis allpamantachu rimashan. Mayninpin Biblia “allpa” nispa nin kay allpapi tiyaq runakunata. Chaymi ‘mosoq allpa pacha’ nispa nikun Dios munakuq runakunata (Génesis 11:1; Salmo 66:4; 96:1). Paykunan kay allpanchis paraíso kapuqtin chaypi tiyanqaku.

Chay tiempopaqqa manañan kanqachu kay allpapi millay runakuna. Noepa tiemponpipas llapa millay runakunan wañupuranku. Armagedón guerrapipas llapa millay runakunan wañupunqaku. ¿Imaynan kausay kanqa chay qhepaman? Chayta kunan yachasun.

¿Munawaqchu kay allpa paraíso kapuqtin chaypi tiyayta?... Manan mayqen medicopas yanapawasunmanchu wiñayta  kausananchispaq. Manan ima pastillapas wañuymanta salvawasunmanchu. Wiñay kausaytaqa Diosta servispallan chaskisun. Chaytan Jesús yachachiwaranchis.

Bibliapi maskhasun Juan librota, 17 capitulota, 3 versiculota. Chaypin Jesús niran: “Wiñay kausayta chaskinankupaqqa qan sapallan cheqaq Diostan reqsinanku, reqsinallankutaqmi kachamusqayki Jesucristotapas”, nispa (Juan 17:3).

Chhaynaqa, ¿imatan ruwananchis wiñay kausayta chaskinapaq?... Ñaupaqtaqa Jehová Diostan allinta reqsinanchis, noqanchisrayku kausayninta qoq wawan Jesucristotawan. Chaypaqqa Bibliatan estudiananchis. JESUSPA YACHACHISQANTA UYARIKUSUN nisqa libronchismi yanapawasun Bibliata estudianapaq.

¿Imaynata Jehová Diosmanta yachasqanchis yanapawasunman wiñayta kausanapaq?... Kausananchispaqqa sapa p’unchaymi mijunanchis ¿riki? Chhaynatan Diosmantapas sapa p’unchay yachananchis. Biblian nin: “Manan t’antallawanchu runaqa kausanqa, aswanpas Jehová Diospa llapa nisqankunawan iman”, nispa (Mateo 4:4).

Jesucristotapas astawanmi reqsinanchis. Diosmi payta kachamuran juchamanta kacharichiwananchispaq. Biblian nin: “Payllan salvawaqninchisqa”, “Churipi iñiqqa wiñay kausayniyoqmi kanqa”, nispa (Hechos 4:12; Juan 3:36). ¿Imaynatan Jesuspi iñisunman?... Paypi creespan, payrayku wiñay kausayta chaskinanchispi creespa ima. ¿Creenkichu qan chaykunapi?... Creenki chayqa astawanmi paymanta yachanayki, kamachikusqanman jinataqmi imatapas ruwanayki.

Kay libron yanapasunki Jesusmanta astawan yachanaykipaq. Chaypaqmi ichaqa yapa-yapamanta leenayki. Sapanka  dibujokunata qhawaspa chaykunapi piensay. Chaypi kaq tapuykunata umallaykimanta kutichiy. Chay librotaqa papaykiwan otaq mamaykiwanmi leewaq. Paykuna mana kaqtinqa juj kuraq runawanmi leewaq. Leewaqmi juj wawakunawanpas. Juj runakunaman Jesusmanta yachachispan yanapawaq wiñay kausayta chaskinankupaq. May allinmi chayqa kanman ¿riki?...

Biblian willawanchis ‘kay pachapi kausay pasashasqanta’, ichaqa willanmi wiñayta kausanapaq imakuna ruwananchistapas. Ninmi: ‘Diospa munayninta ruwaqmi ichaqa wiñaypaq kausanqa’, nispa (1 Juan 2:17). ¿Imatan ruwananchis wiñay kausayta chaskinapaq?... Jehová Diosmanta Jesusmantawanmi astawan yachananchis, chayman jinataqmi kausananchis. Chaykunata yachanaykipaqmi kay libro yanapasunki.