Kichay leenaykipaq

Índice nisqaman riy

 27 CAPÍTULO

¿Pin Diosninchis?

¿Pin Diosninchis?

¿PIN Diosniyki?... Yaqa llapa runakunan askha dioskunata adoranku (1 Corintios 8:5). Juj kutinmi Pablo Diospa atiy qosqanwan mana puriy atiq runata qhaliyachiran. Chayta rikuspan runakuna niranku: ‘¡Dioskunan runaman tukuspa uraykamun!’, nispa. Jinan Pablota Bernabetawan adorayta munaranku. Pablotan Hermes niranku, Bernabetataq Zeus nispa. Chay sutikunaqa pantasqa dioskunaq sutinmi karan.

Pablowan Bernabewanqa manan munarankuchu adoranankuta. Chaymi runakunata niranku: ‘Kausaq Diosman kutirikuychis’, nispa (Hechos 14:8-15). ¿Pitaq ‘kausaq Diosri’?... Arí, Jehová Diosmi, paymi ‘teqsimuyuntinpi ancha jatun Diosqa’. Paytan Jesús niran: ‘Sapallan cheqaq Dios’, nispa. Chhaynaqa, ¿pillatan adorananchis?... Arí, Jehová Diosllatan (Salmo 83:18; Juan 17:3; Apocalipsis 4:11).

¿Imaraykun Pablo, Bernabé mana munarankuchu adorasqa kayta?

Askha runakunan mana ‘cheqaq Diostachu’ adoranku. Aswanmi k’aspimanta, rumimanta, fierromanta dioskunata adoranku (Éxodo 32:4-7; Levítico 26:1; Isaías 44:14-17). Wakinqa allin reqsisqa runakunatan idolota otaq diosta jina qhawarinku. ¿Allinchu kanman chayta ruway?...

Pablon qelqaran: “Mana iñiqkunaq yuyaynintan kay pacha kamachiq dios tutayachipun”, nispa (2 Corintios 4:4). ¿Pin chay dios?... Arí, Satanasmi. Paymi runakunata engañashan imaymanata adoranankupaq.

 Juj kutinmi Satanás Jesusta niran: ‘Adoraway’, nispa. Ichaqa, ¿ima niranmi Jesús?... Niranmi: ‘Jehová Diosniykitan adoranayki, pay sapallantan servinaykipas’, nispa (Mateo 4:10). Chaypin Jesús niran Jehová Diosllata adorana kasqanta. Chaytan ñaupa tiempopi Sadrac, Mesac, Abednego waynakunapas ruwaranku. Paykunamanta kunan yachasun.

Chay waynakunaqa Jehová Diostan adoraranku. Ichaqa Babilonia llaqtamanmi prisionerota jina apapuranku. Chay llaqtapi rey Nabucodonosormi qorimanta jatunkaray idolota ruwachiran. Jinan llapa runakunata kamachiran: ‘Musicata uyarispa jinan qonqorikuspa chay idolota adorankichis. Mana kasukuqqa raurashaq hornomanmi wijch’uykusqa kanqa’, nispa. ¿Imatan qan ruwawaq karan?...

¿Imaraykun kay waynakuna mana adorarankuchu chay idolota?

 Sadrac, Mesac, Abednegoqa kasukuq runakunan karanku. Ichaqa manan reypa ruwachisqan idolota adorayta munarankuchu. ¿Imarayku?... Jehová Diosta kasukusqankurayku. Diosmi kamachiran: ‘Aman waj dioskunayoqchu kanki. Aman ima idolotapas ruwakunkichu’, nispa (Éxodo 20:3-5). Chaymi paykunaqa reyta mana kasurankuchu.

Chayta yacharuspan reyqa sinchita phiñakuran. Chaymi paykunata wajachimuspa niran: ‘¿Cheqaqchu qankuna diosniykunata mana adorankichis? Kunanmi yapamanta música tocamunqa. jinan qonqorikuspa ruwachisqay idolota adorankichis. Mana chayqa raurashaq hornomanmi wijch’uykusqa kankichis. Manan ima diospas makiymantaqa salvasunkichischu’, nispa.

¿Imatan chay waynakuna ruwaranku? ¿Imatan qan ruwawaq karan chaypi tarikuspa?... Chay waynakunan reyta niranku: ‘Adorasqayku Diosniykuqa atiyniyoqmi salvawanankupaq. Ichaqa manaña salvawanqakuchu chaypas, manan diosniykitaqa adorasaqkuchu’, nispa.

Reyqa astawanmi phiñakuran. Jinan runankunata kamachiran: ‘¡Hornota qanchis kutitawanraq ruphachiychis!’, nispa.  Aswan kallpayoq soldadonkunatataq niran: ‘¡Sadracta, Mesacta, Abednegotawan wataspa raurashaq hornoman wijch’uykuychis!’, nispa. Hornoqa sinchitapunin ruphasharan, chaymi waynakunata wijch’uykuq runakunata rupharpariran. Ichaqa, ¿iman pasaran kinsa waynakunawan?

Sadrac, Mesac, Abednegopas horno ukhupin kasharanku. Ichaqa manan nina rupharanchu, manan watasqapaschu kasharanku. ¿Iman pasasharan?... Reymi hornota qhawaykuspa mancharikuran. Jinan runakunata niran: ‘¿Manachu kinsa qharita t’eqesqatakama hornoman wijch’uykuranchis?’, nispa. Paykunataq niranku: ‘Arí, jinapunin reyniyku’, nispa.

¿Imaynatan Dios salvaran kay waynakunata?

Reymi niran: ‘¡Qhawariychis! Paskasqa tawa qharikunatan rikushani. Nina ukhupin mana imanasqalla purishanku’, nispa. ¿Pin karan chay tawa kaq runa?... Diospa angelninmi. Paymi waynakunata cuidaran mana imapas pasananpaq.

Chayta rikuspan reyqa waynakunata wajaran: ‘¡Sadrac, Mesac, Abednego, ancha jatun Diospa  kamachinkuna, lloqsimpuychis!’, nispa. Hornomanta lloqsiqtinkun llapa runakuna rikuranku nina mana imanasqanta. Manan nina-ninallamanpas asnarankuchu. Chaymi reyqa niran: ‘¡Yupaychasqa kachun kay waynakunaq Diosnin! Paymi angelninta kachamuran serviqninkunata salvananpaq. Paykunaqa manapunin juj dioskunata adorayta munarankuchu’, nispa (Daniel 3 capítulo).

¿Pikunan dios jina qhawarisqa kanku?

¿Imatan chaymanta yachanchis? Kay tiempopipas askha runakunan k’aspimanta, rumimanta, fierromanta, telamanta ruwasqa idolokunata adoranku. Juj libron nin: “Banderapas cruzpas dios jinan”, nispa (The Encyclopedia Americana). Cristianokunaqa manan jayk’aqpas Roma reyta adorarankuchu. Chaytan historiamanta willaq runa tupachiran “bandera napaykuyta, llaqtarayku juramento ruwayta negakuywan” (Daniel P. Mannix).

Runakunaq adorasqan idolokuna rumimanta, telamanta, k’aspimanta otaq fierromantaña kanman chaypas, ¿imaynatan Dios qhawarin chay idolokunata?... ¿Allinchu kanman chaykunata adoray?... Sadrac, Mesac, Abednegopas manan adorarankuchu. Chaywanmi Diosqa anchata kusikuran. ¿Imaynatan paykunaq ejemplonta qatikuwaq?...

Diosta serviq runakunaqa manan idolokunata adoranankuchu. Chaypaq leesun Josué 24:14, 15, 19-22; Isaías 42:8; 1 Juan 5:21; Apocalipsis 19:10.