Kichay leenaykipaq

Índice nisqaman riy

 19 CAPÍTULO

¿Maqanakunachu jujkunawan?

¿Maqanakunachu jujkunawan?

WAKIN erqekunaqa kallpayoqman tukuspan jujkunawan maqanakushallanku. ¿Reqsinkichu chhayna erqekunata?... ¿Pikunawanmi kayta munanki? ¿Maqakuq erqekunawanchu icha llamp’u sonqo erqekunawanchu?... Jesusmi niran: ‘Kusisqan kanku thaj kausayta maskhaqkuna, paykunan “Diospa wawankuna” nisqa kanqaku’, nispa (Mateo 5:9).

Wakinqa mana allinkunata ruwaspan phiñachiwanchis ¿riki?... Chaymi mayninqa paykunamanta vengakuyta munanchis. Juj kutinmi Jesuspa qatikuqninkunata chay sucederan Jerusalenta viajashaqtinku. Chayta kunan willasayki.

Samaria llaqtaman chayashaqtinkun Jesús iskay amigonkunata kacharan juj alojamientota  maskhamunankupaq. Samaritanokunaqa juj religionniyoqmi karanku. Manataqmi allinpaqchu qhawariranku Jerusalenpi Dios adoraqkunata. Chaymi mana pipas munaranchu alojayta.

¿Imatan Santiagopas Juanpas Jesusta niranku vengakunankupaq?

Chhaynata qanta tratasunkikuman chayri, ¿imatan ruwawaq? ¿Phiñakuspachu vengakuwaq?... Chaytan Santiagopas Juanpas ruwayta munaranku. Chaymi Jesusta niranku: ‘Señor, niwayku cielomanta ninata uraykachimunaykupaq, chhaynapi kay runakunata rupharunanpaq’, nispa. Chhayna kasqankumantan paykunata suticharanku: “Rayo t’ojaypa wawankuna”, nispa. Ichaqa Jesusmi niran chhayna kayqa mana allinchu kasqanta (Lucas 9:51-56; Marcos 3:17).

Yaqapaschá mayninpi juj wawakuna millayta tratasunkiku. Manapaschá qanwan pujllayta munanqakuchu. Yaqapaschá nisunkiku: “Imatan munanki, ripuy”, nispa. Maytan sonqonchis nanan pipas chayta niwaqtinchis. Mayninqa vengakuytaraqmi munanchispas ¿riki? Ichaqa, ¿vengakunanchischu?...

Bibliata leesun yá. Maskhay Proverbios librota, 24 capítulo, 29 versiculota. Chaypin nin: ‘Ama niychu: Imaynatachus ruwawaran chhaynatan paytaqa ruwasaq’, nispa.

¿Imatan chaypi entiendenki?... Arí, manan pimantapas vengakunanchischu. Manan mana allin ruwawaqninchista kaqllawantaqchu kutichina. Ichaqa wakin wawakunan qanwan maqanakuyta munanqa. Yaqapaschá k’amisunki otaq nisunki: “Waqati”, “manchali”, nispa. ¿Imatan ruwanki? ¿Payta kasuspachu maqanakunki?...

Chaypaq leesun Mateo librota, 5 capitulota, 39 versiculota. Jesusmi niran: “Ama churapakuychischu millay kaq runawanqa,  aswanpas pipas paña uyaykipi ch’aqlasunki chayqa, lloq’e uyaykitawan kutirichiy”, nispa. ¿Imatan chaywan Jesús nisharan? ¿“Juj lado uyaykipi saqmasuqtiyki juj lado uyaykitawan saqmachikuy” nispachu nisharan?...

Manan chaytachu nisharan. Uyapi ch’aqlayqa pitapas tanqarpariy jinallan. Chayta ruwaqqa maqanakuytan munashan. Phiñakunanchispaqmi tanqarpariwasunman otaq ch’aqlawasunman. Sichus noqanchispas kaqta ruwasun chayqa, ¿iman pasanman?... Arí, maqanakuytan qallarisunman.

Jesusqa manan munanchu maqanakunanchista. Chaymi niran: ‘Pipas ch’aqlasunki chayqa ama kaqwanchu kutichiy’, nispa. Jujkuna imataña ruwawasun chaypas, manan maqanakunachu. Chhaynapin mana paykuna jinachu kasun.

 Sichus pipas qanwan maqanakuyta munanqa chayri, ¿imatan ruwanayki?... Ayqekunaykin, chaymi aswan allinqa. Juj kutikunapipas ayqekunki chayqa manan imapas pasanqachu. Chayta ruwayqa manan manchali kaychu aswanpas mana manchakuq kaymi.

¿Imatan ruwananchis pipas maqanakuyta munaqtin?

Yaqapaschá maqanakuspa qan ganarunki. Ichaqa, ¿iman chay qhepaman pasanman?... Amigonkunawan kutimuspan k’aspiwan otaq cuchillowan k’irisunkiman. Chaymi Jesusqa mana munanchu maqanakunanchista. ¿Ima ninkin chaymanta?...

Ichaqa, ¿imatan ruwawaq jujkunaq maqanakusqanta rikuspa? ¿Chapukunaykichu maqanakusqankupi?... Chaypaq maskhasun Proverbios librota, 26 capitulota, 17 versiculota. Chaypin nin: ‘Jujpa ch’aqwasqanman chapukuqqa alqota ninrinmanta jap’iq jinan’, nispa.

Jujkunaq maqanakusqanman chapukuyqa alqota ninrinmanta jap’iy jinan. Chayta ruwaspaqa k’irisqan rikukuwaq

¿Iman pasanman ninrinmanta alqota jap’iqtiyki? Qanman kutirimuspan kaniyta munasunkiman. Mana kaninasuykipaqqa tukuy kallpaykiwanmi jap’inayki kanqa. Kachariruwaq chayqa imataraqchá chay alqoqa ruwasunkiman. Ichaqa, ¿tukuy tiempochu chay alqota jap’iwaq?...

Chhaynapin tarikusunman jujkunaq maqanakusqanman chapukuspaqa. Manan yachanchischu imarayku maqanakusqankuta pi qallarisqantapas. Yaqapaschá suwakusqanmanta maqashanku. Chaypi  chapukusunman chayqa suwakuqtan yanapashasunman. Chayqa manan allinchu kanman ¿riki?

Chhaynaqa, ¿imatan ruwawaq maqanakuqta rikuspa?... Escuelapi kaspaqa profesormanmi willawaq. Callepi kaspataq papaykiman otaq policiaman willawaq. Jujkunaña maqanakunku chaypas, noqanchisqa llapa runawanmi thajpi kausananchis.

¿Imatan ruwanayki maqanakuqta rikuspa?

Noqanchisqa manapunin jujkunawan maqanakunachu. Chaypin rikuchisun allin kaqta ruway munasqanchista. Biblian nin: ‘Jesusta qatikuqkunaqa manan imaraykullapas maqanakunanchu, aswanmi llapa runakunapaq llamp’u sonqo kanan’, nispa (2 Timoteo 2:24).

Kay textokunan yanapawasun jujkunawan mana maqanakunapaq, leesun Romanos 12:17-21; 1 Pedro 3:10, 11.