Kichay leenaykipaq

Índice nisqaman riy

 22 CAPÍTULO

¿Imaraykun mana llullakunachu?

¿Imaraykun mana llullakunachu?

JUJ chikachan mamanta nin: “Escuelamanta lloqsispa jinan jampusaq”, nispa. Ichaqa escuelamanta lloqsispan juj amigankunawan pujllaykun. Wasinman tardeta chayapuspataq mamanta nin: “Profesoraymi qhepayachimuwan”, nispa. ¿Allinchu kasharan chay ruwasqan?...

¿Imatan kay chikucha ruwarun?

Juj chikuchan sapallan kashaspa wasi ukhupi pelotawan pujllaykun. Papan tapuqtintaq nin: “Manan pujllanichu”, nispa. ¿Allintachu chayta ruwasharan?...

Jesusmi niran: ‘“Arí” nisqaykichisqa “arí” nisqallapuni kachun, “manan” nisqaykichistaq “manan” nisqallapuni; chayman yapaykuyqa Satanasmantan jamun’, nispa (Mateo 5:37). ¿Imatan Jesús chaywan yachachisharan?... Rimasqanchisman jina imatapas ruwananchistan.

Biblian willashan juj casarasqa warmi-qhari llullakusqanmanta. Paykunamanta  willasqanmi yachachiwasun llullakuyqa jucha kasqanta. Chayta kunan yachasun.

Jesuspa wañupusqanmanta iskay killa qhepamanmi pentecostés fiesta chayamuran. Karu llaqtakunamantan askha runakuna Jerusalenman chayamuranku. Chaymi Pedroqa juj sumaq discursota qoran. Chaypin llapa runaman willaran Jesusmanta, Jehová Dios kausarichisqanmantawan. Askha runakunan chayraq Jesusmanta uyarisharanku. Chaymi astawan yachayta munaranku. ¿Imatan chaypaq ruwaranku?

Askha p’unchaykunan Jerusalén llaqtapi qhepakuranku. Ichaqa wakin cristianokunaq qolqenmi tukurakapuran, manan mijunankupaqpas karanchu. Chaymi Jerusalén llaqtapi tiyaq cristianokuna paykunata yanaparanku. Askhan imachus kaqninkuta vendespa apostolkunaman qolqeta qoranku. Chay qolqetan necesitaq cristianokunaman qoranku.

Ananías esposan Safirapas cristianokunan karanku. Paykunapas allpankutan venderanku. Ichaqa manan pipas obligaranchu,  paykunallamantan chaytaqa ruwaranku. Ichaqa manan munakuq kaspachu chaytaqa ruwaranku, aswanpas allinpaq qhawarisqa kayta munaspan. Chaymi yachachinakuspa kuskallanta qolqeta aparanku “llapantan apamushayku” nispa. ¿Allinchu kasharan chay ruwasqanku?...

Ananiasmi chay qolqeta apostolkunaman qoran. Ichaqa Diosmi rikusharan wakillanta qosqanta. Chaymi apóstol Pedroman willaran Ananiaspa llullakusqanta.

¿Ima nispan Ananías llullakuran?

Chaymi Pedro niran: ‘Ananías, ¿imaraykun Satanaswan tanqachikuranki llullakunaykipaq. Chay allpaqa qanpan karan. Vendesqayki qolqepas makiykipin kasharan chaywan ima munasqaykitapas ruwanaykipaq. Chhaynaqa, ¿imaraykun kuskallanta qoshaspa niwankiku “llapantan qoshani” nispa? Qanqa manan runakunatachu llullakushanki, aswanpas Diostan llullakushanki’, nispa.

Chay ruwasqanqa manan allinchu kasharan. Ananiasqa llullakusharanmi. ¿Iman chay qhepaman pasaran? Biblian nin: “Chayta uyarispan Ananiasqa wijch’ukuspa wañupuran”, nispa. Diosmi paytaqa wañuchipuran. Jinan cuerponta jawaman apaspa p’ampamuranku.

¿Iman Ananiasta pasaran llullakusqanmanta?

 Kinsa horamanta jinan esposan Safira chayamuran. Payqa manan yacharanchu qosanwan imachus pasasqanta. Chaymi Pedro Safirata tapuran: “¿Khayna preciopichu allpaykichista venderankichis?”, nispa.

Jinan Safira niran: ‘Arí, chhaynapin vendeyku’, nispa. Paypas llullakusharanmi. Paykunaqa vendesqanku qolqetan wakillanta aparanku. Chaymi Jehová Dios paytapas wañuchiran (Hechos 5:1-11).

¿Imatan yachanchis Ananiasmanta Safiramantapas?... Arí, Diosqa manan munanchu llullakunanchista. Chaymi cheqaqllata rimananchis. Wakin runakunan ninku: “Llullakuyqa manan juchachu”, nispa. ¿Ima ninkin chaymanta?... ¿Yacharankichu juj angelpa llullakusqanrayku onqoypas, nanaypas, wañuypas paqarisqanta?...

Jesús nisqan jina, ¿pin ñaupaqta llullakuran? ¿Iman pasaran?

Ñaupaqpi yachasqanchis jina, Satanasmi Evata engañaran. Niranmi: ‘Ama Diosta kasuychu. Manan wañunkichu kay frutata mijuspaqa’, nispa. Satanasta kasuspan Evaqa chay frutata mijuran. Chaymantataq Adanman qoran. Chhaynapin paykunaqa juchaman urmaranku. Chaymantapachan llapa wawankuna juchayoq nacenku. Chaymi llapallanchis ñak’arinchis wañunchis ima. ¿Imaraykun tukuy chaykuna pasaran?... Juj angelpa llullakusqanraykun.

Chaymi Jesús niran Satanasqa ‘llullakunaq taytan kasqanta’, pay ñaupaqta llullakusqanrayku. Pipas llullakuqqa Satanaspa ruwasqanta jinan ruwashan. Sichus juj p’unchay llullakuyta munasun chayqa, chaytan yuyarinanchis (Juan 8:44).

 ¿Imaynapin qan llullarukuwaq?... Imatapas mana allinta ruwaruspan ¿riki?... ¿Imatan ruwawaq imatapas p’akiruspa? ¿Mana yachaqmanchu tukunayki? ¿Ninaykichu: “Hermanoymi otaq hermanaymi p’akirun”, nispa?...

¿Imaynapin qanpas llullarukuwaq?

Yaqapaschá tareaykita ruwanayki rato pujllanki. Mamayki tapusuqtiykitaq ninki: “Tukuruniñan tareayta”, nispa. ¿Allintachu chayta nishawaq?... Yuyarisun Ananiasta Safiratawan. Paykunaqa manan cheqaqtachu willakuranku chaymi Jehová Diosqa wañuchiran.

Mana allin ruwasqanchista pakananchisrayku llullakusun chayqa, astawanmi mana allinpi rikukusun. Chaymi mana chikallantapas llullakunanchischu. Biblian nin: ‘Cheqaq kaqta rimaychis’, ‘ama llullanakuychischu’, nispa. Jehová Diosqa manan jayk’aqpas llullakunchu, chaymi noqanchispas mana llullakunanchischu (Efesios 4:25; Colosenses 3:9).

Llapanchispas cheqaqllatan rimananchis. Chaytan Biblia nishan Éxodo 20:16; Proverbios 6:16-19; 12:19; 14:5; 16:6; Hebreos 4:13.