Kichay leenaykipaq

Índice nisqaman riy

 7 CAPÍTULO

Kasukuyqa allinninchispaqmi

Kasukuyqa allinninchispaqmi

¿GUSTASUNKICHU jujkuna “kayta ruway”, “jaqayta ruway” nispa ninasuykita? Icha, ¿munasqallaykitachu ruwayta munanki? A ver, cheqaqllata niway...

¿Imaraykun kuraqkunata kasukunayki?

¿Iman qanpaq aswan allin kanman? ¿Munasqallaykita ruwaychu icha tayta-mamaykiq nisqanta ruwaychu?... Jehová Diosqa munanmi llapa wawakuna tayta-mamanku kasukunankuta. ¿Imaraykun chayta munan? Chaymantan kunan yachasun.

¿Jayk’a wataykipin kashanki?... Tayta-mamayki, abueloykikunari, ¿jayk’a watanpin kashanku?... Chhaynaqa paykunan qanmanta aswan unayta kausashanku ¿riki? Askha watayoq runakunaqa sapa watanmi imaymanata uyarispa, rikuspa, ruwaspa imaymanata yachanku. Chaymi wawakunaqa kuraqkunamanta imaymanata yachankuman.

¿Reqsinkichu pillatapas qanmanta aswan sullk’a kaqta?... ¿Qanchu icha paychu astawan imatapas yachan?... Qanmi ¿riki? ¿Imarayku?... Arí, paymanta aswan unaytaña kausasqaykirayku.

 Kunanqa niway, ¿pin qanmanta, noqamanta, llapa runakunamantapas aswan unayta kausashan?... Arí, Jehová Diosmi. Paymi llapanchismantapas astawan yachan. Chaymi ima kamachikusqantapas kasukunanchis mayninpi sasaña kanman chaypas. ¿Yacharankichu juj kutin Jesuspaq Diosta kasukuy sasa kasqanta?...

Jehová Diosmi Jesusta kamachiran juj ruwayta junt’ananpaq. Jesuspaqqa sasan karan chayta junt’ay. Chaymi payqa dibujopi rikusqayki jina Diosmanta mañakuran. Niranmi: ‘Yayáy, munanki chayqa, kay sasa ruwayta noqamanta karunchay’, nispa. Ichaqa, ¿ima niranmi mañakuyta tukushaspa?...

¿Imaraykun Jesús mañakuran?

Kaytan niran: “Ichaqa ama munasqaychu kachun, aswanpas qanpa munasqayki”, nispa (Lucas 22:41, 42). Jesusqa papanpa munaynintan ruwayta munaran manan paypa munaynintachu. Chaymi Jehová Diospa kamachisqanta ruwaran.

¿Imatan chaymanta yachanchis?... Mayninqa sasan kanman Diosta kasukuy, chaywanpas kasukunanchismi. ¿Imatawanmi yachanchis?... Jehová Dioswan Jesuswan mana kaq runallachu kasqankutan. Jehová Diosmi Jesusmantaqa aswan atiyniyoq, jinaspapas aswan yachayniyoqmi.

Diosta munakuspaqa kamachisqantan kasukusun. Biblian nin: ‘Diosta munakuqqa kamachisqantan kasukun’, nispa (1 Juan 5:3). Chaymi llapallanchis Diosta kasukunanchis. Qanpas kasukuytan munanki ¿riki?...

 Bibliapi leesun wawakunaman Diospa kamachisqanta. Maskhasun Efesios libropi, 6 capitulota, 1, 2, 3 versiculokunata. Chaypin nin: ‘Wawakuna, tayta-mamaykichista kasukuychis, chay ruwaytan allinpaq Dios qhawarin. Ñaupa tiempopi promesayoq kamachikuymi nin: “Tayta-mamaykitan respetanki”, nispa. Chay kamachikuypa promesanmi nin: “Chhaynapin allillan kanki, unaytataq kay pachapi kausanki”’, nispa.

Chaypi leesqanchis jina, Jehová Diosmi kamachishasunki tayta-mamaykita kasukunaykipaq. Tayta-mamaykita kasukuspan rikuchinki paykuna respetasqaykita. Jinaspapas Diosmi prometen paykunata kasukunki chayqa allillan kanaykita.

Willasayki ñaupa tiempopi Diosta kasukusqankurayku salvakuq runakunamanta. Paykunaqa Jerusalén llaqtapin tiyaranku. Chay llaqtapi runakunaqa manan Diosta kasukurankuchu. Chaymi Jesús willaran Jerusalén llaqta thunichisqa kananta. Ichaqa willaranmi kasukuq runakuna imayna salvakunankuta. Niranmi: ‘Jerusalén llaqtata rikunkichis soldadokunawan muyuykusqa kashaqta chayqa, yachaychis ch’usaqyachisqa kanan tiempo qayllaykamusqanta. Chaypacha Jerusalenpi tiyaqkuna orqokunaman ayqeychis’, nispa (Lucas 21:20-22).

¿Imatan kay runakuna ruwaranku salvakunankupaq?

Jesuspa willasqan jina, qhepamanmi Roma soldadokuna Jerusalenta muyuykuranku thunichinankupaq. Ichaqa qonqayllan soldadokuna llaqtankuman kutipuranku. Chayta rikuspan Jerusalenpi tiyaq wakin runakuna niranku: ‘Manan imapas pasanqachu kayllapi qhepakusun’, nispa. Ichaqa, ¿ima niranmi Jesús?... Jerusalén llaqtapi tiyawaq karan chayri, ¿imatataq ruwawaq karan?... Jesusta kasukuqkunaqa kaqpachan Jerusalenmanta lloqsispa orqokunaman ayqekuranku.

 Ichaqa manan imapas llaqtata pasaranchu. Jinan juj wata pasaran, chaymanta iskay wata, chaymantataq kinsa wata. Wakin runakunaqa nisharankupaschá: “Jerusalén llaqtamanta ripuqkunaqa sonson karanku”, nispa. Ichaqa tawa watamantan Roma ejército kutimuran llaqtata thuninanpaq. Chay kutipiqa manañan pipas llaqtamanta lloqsiyta atiranchu. Chaymi yaqa llapa runakuna wañupuranku, wakintataq presota apapuranku.

Jesusta kasukuqkunatari, ¿iman pasaran?... Arí, manan imapas pasaranchu. Paykunaqa Jerusalenmantan karupi kasharanku. Manan pipas paykunata imanaranpaschu. Kasukuq kasqankuraykun salvakuranku.

Qantari, ¿salvasunkimanchu kasukuq kay?... Yaqapaschá tayta-mamayki nisunkiku: “Aman callepi pujllankichu”, nispa. ¿Imaraykun chayta nisunkiku?... Arí, carro mana sarunasuykipaqmi.  Ichaqa yaqapaschá juj p’unchay ninki: “Kunanqa manan ima carropas kanchu. Juj wawakunapas pujllashankun manataqmi imapas pasanchu”, nispa.

¿Imaraykun kasukuq kanayki?

Chhaynatan niranku Jerusalenpi tiyaq runakunapas. Roma soldadokuna kutipusqankuta rikuspan niranku: “Manan imapas pasanqachu”, nispa. Paykunata qhawarispan jujkunapas llaqtapi qhepakuranku. Chay runakunaqa Jesuspa willasqanta mana kasukusqankuraykun wañupuranku.

Fosforowan pujllaymanta rimasun. ¿Yaqachu jayk’aqllapas fosforowan pujllaranki?... Wakin wawakunaqa ninawanmi pujllanku. Ichaqa sinchi peligroson chayqa. Ninawan pujllaspaqa wasiykitan kanaykuwaq chaypitaq qanpas wañuwaq.

Ama kayta qonqaychu: Allin kanaykipaqqa kasukuqmi kanayki. ¿Pin wawakunata nin: ‘Tayta-mamaykichista kasukuychis’, nispa?... Arí, Jehová Diosmi. Chaytaqa nisunki munakusqasuykiraykun.

Kasukuyqa allinpunin, chayta astawan yachanapaq leesun Proverbios 23:22; Eclesiastés 12:13; Isaías 48:17, 18; Colosenses 3:20.