Kichay leenaykipaq

Índice nisqaman riy

 6 CAPÍTULO

Jesusqa jujkunatan serviran

Jesusqa jujkunatan serviran

¿GUSTASUNKICHU jujkuna qanpaq allinkuna ruwanankuta?... Llapa runakunan chaytaqa munanchis. Jesuspas chaytaqa yacharanmi. Chaymi jujkunapaq allinkunata ruwapuran. Juj kutinmi niran: ‘Manan servichikunaypaqchu jamuni, aswanpas jujkunata servinaypaqmi’, nispa (Mateo 20:28).

¿Imamantan kaypi discutishanku?

¿Imatan ruwananchis Jesús jina kanapaq?... Jujkunatan servinanchis. ¿Imaynatan chayta ruwasunman? Paykunapaq allinkunata ruwaspan. Ichaqa yaqa llapa runakunan servichikuyta munanku, manataqmi jujkunapaq allinkunata ruwankuchu. Jesuspa qatikuqninkunapas qallariypiqa jujkunaq servinantan munaranku. Paykunaqa importante runan creekuranku.

Juj kutinmi Jesús qatikuqninkunawan Capernaum llaqtaman riranku. Chay llaqtaman chayaspan juj wasiman jaykuranku. Chaypin Jesús qatikuqninkunata tapuran: “¿Imamantan ñanpi discutimusharankichis?”, nispa. Paykunaqa mayqenninkuchus kuraq kasqankumantan discutisharanku, chaymi mana ima niytapas atirankuchu (Marcos 9:33, 34).

 Jesusqa manan munaranchu mayqen qatikuqninkunapas importante runa creekunankuta. Chaymi juj kaq capitulopi yachasqanchis jina, juj wawata ladonkupi sayachispa niran: ‘Kay erqecha jinan humilde kanaykichis’, nispa. Chaywanpas manan cambiarankuchu. Chaymi Jesusqa wañupunanpaq pisillaña kashaqtin, juj ejemplowanñataq yachachiran humilde kayta. ¿Imatan ruwaran?...

Llapankun mesapi mijusharanku. Chayllamanmi Jesusqa jatarispa toallata cinturanman watakuran jinaspa juch’uy lavadorman unuta jich’aykuran. Qatikuqninkunaqa nisharankuchá: “¿Imapaqtaq chaytari ruwashan?”, nispa. Jinan Jesusqa sapankankuq chakinta maqchispa toallawan ch’akichiran. ¡Admirakunapaqmi karan chay ruwasqanqa! ¿Imatan qan ruwawaq karan chaypi kaspa?...

¿Imatan Jesús qatikuqninkunaman yachachishan?

Qatikuqninkunaqa p’enqakurankun kikin yachachiqninku chakinkuta maqchisqanmanta. Chaymi mana munarankuchu maqchinanta. Pedron astawanqa mana munaranchu. Chaywanpas Jesusqa llapankuq chakintan maqchiran. ¿Imaraykun chayta ruwaran? Juj importante yachachikuyta yachachinanpaqmi.

Kay tiempopiqa manan chay costumbre kanchu. Jesuspa tiemponpin ichaqa chhayna costumbre karan. ¿Imaraykun chayta ruwaqku?... Chay llaqtakunapi ñankunaqa allpallan karan, usut’allawanmi runakunapas puriqku. Chaymi runakunaqa allpallaña chakintin wasiman chayaqku. Chaymi wasipi kaqkuna sumaqta chaskiykunankupaq visitaq chakinta maqchiqku.

Jesuspas qatikuqninkunapas wasiman jaykuqtinkuqa, manan pipas niranchu: “Chakiykichista maqchirusaq”, nispa. Chaymi Jesuspuni chayta ruwaran. Chaywanmi juj importante yachachikuyta yachachiran. Noqanchistapas chayqa yanapawasunmi.

 ¿Imatan chaywan yachachisharan?... Mesapi yapamanta tiyaykuspan Jesús niran: “¿Entiendenkichischu imaraykuchus chay ruwasqayta? Qankunaqa ‘yachachikuq’, ‘Señor’ niwankichismi ¿riki? Chaytaqa allintan ninkichis, chaypunin kani. Noqaqa ‘Señorña’ ‘yachachikuqña’ kashaspapas maqchiraykichistaq chakiykichista chayqa, qankunapas maqchinakunaykichismi chakiykichistaqa”, nispa (Juan 13:2-14).

¿Imakunapin jujkunata yanapawaq?

Chaywanmi Jesusqa yachachisharan jujkunapaq allinkuna ruwanata. Manan munaranchu kikillankupi piensanankuta nitaq aswan importante runa creekunankuta. Arí, Jesusqa munaran jujkuna serviq kanankutan.

Allintan chaytaqa yachachisharan ¿riki?... Qanri, ¿Jesús jinachu kallpachakunki jujkunata servinaykipaq?... Sapankanchismi jujkunapaq allinkunata ruwananchis. Chayta ruwasun chayqa kusisqan kanqaku, Jehová Diospas Jesuspas kusikunqakun.

Jujkunapaq allinkunata ruwayqa manan sasachu. Fácil ruwaykunapi yanapakuspan jujkunata serviwaq. A ver, mamaykipi  piensay: Yachasqayki jina payqa imaymanatan ruwan qanpaq llapa familiaykipaqpas ¿riki? ¿Imaynatan payta yanapawaq?... Tapuriy imakunapin munan yanapanaykita.

Yaqapaschá mesata limpiawaq otaq mijusqaykichis platokunata oqariwaq. Wakin wawakunaqa q’opa juñukusqantan sapa p’unchay wijch’umunku. Sichus qanpas chaykunata ruwanki chayqa, Jesús jinan jujkunata servinki.

¿Kanchu sullk’achayki? Paypaqpas allinkunatan ruwawaq. Jesuspas qatikuqninkunatan serviran. Sullk’aykita yanapaspaqa Jesuspa ejemplontan qatikunki. ¿Imakunatan sullk’aykipaq ruwawaq?... Yaqapaschá paywan kuska pujllanankunata waqaychawaqchis. Mana p’achakuyta atiqtin p’achachiwaq otaq puñunanta mast’aysiwaq.  ¿Imatawanmi paypaq ruwawaq?... Kusa, chayta ruwanki chayqa sullk’aykin munakusunki. Jesuspas allinkunatan qatikuqninkunapaq ruwaran, chaymi paykunapas munakuranku.

Escuelaykipipas allinkunatan jujkunapaq ruwawaq. Jujkunaq libron otaq imankupas urmaqtinqa oqaripuy. Profesorniykipaqpas allinkunatan ruwawaq. Yaqapaschá pizarrata picharuwaq otaq juj ruwaykunapi yanapawaq. Jinaspapas punkutan kichariwaq pipas jaykuyta otaq lloqsiyta munaqtin.

Ichaqa manan llapa runakunachu “gracias” niwasun allinkuna ruwapusqanchismanta. ¿Chayraykuchu manaña allinkunata ruwasun?... Manan ¿riki? Jesustapas manan llapa runakunachu “gracias” niranku. Chaywanpas payqa ruwashallaranmi allinkunata jujkunapaq.

Amapuni qonqasunchu jujkunapaq allinkuna ruwayta. Aswanpas Jesús jina kallpachakusun jujkunata servinanchispaq.

Kay textokunapin willashan jujkunata yanapanapaq, leesun Proverbios 3:27, 28; Romanos 15:1, 2; Gálatas 6:2.