Kichay leenaykipaq

Índice nisqaman riy

 33 CAPÍTULO

Jesusmi cuidawasun

Jesusmi cuidawasun

¿Imaynatan Jesusta qhawarinki: Wawata jinachu icha reyta jinachu?

JESUSTAQA Jehová Diosmi cuidaran wawallaraq kashaqtin. Wiñaruspa, ¿agradecekuranchu papanta cuidasqanmanta?... Jinaspapas Josewan maman Mariawan iman Egipto llaqtaman aparanku mana wañuchisqa kananpaq. ¿Ima ninmanmi karan paykunatapas chhayna cuidasqankumanta?...

Kunanqa janaq pachapin Jesusqa tiyan, atiyniyoqmi kapun. Ichaqa askha runakunan juj wawata jinalla rikushanku, ¿reparankichu chayta?... Askha llaqtakunapin chhaynata rikunku navidad fiesta chayamuqtin.

Jesusqa manañan kay allpapichu tiyan, ichaqa ¿kausashanraqchu?... Arí, kausashanmi. Paytaqa Diosmi wañusqanmanta kausarichiran, kunantaqmi janaq pachapi atiyniyoq rey kashan. Ichaqa, ¿imaynatan janaq pachamantapacha cuidawasunman?... Chayta yachanapaq ñaupaqta qhawarisun imaynatan kay allpapi kashaspa amigonkunata cuidaran chayta.

 Juj kutinmi Jesusqa Galilea lamar-qochaq qayllanpi runakunata yachachisharan. Chay qochaq largonqa 20 kilómetro jinan karan, anchontaq 12 kilómetro karan. Tutayamuqtinmi qatikuqninkunata niran: “Jaku qocha chimpaman”, nispa. Jinan boteman seqaspa llapanku chimpasharanku. Jesusqa sinchi sayk’usqan kasharan, chaymi bote qhepaman rispa misk’ita puñurapuran.

¿Ima nishanmi Jesús wayrata lamar-qochatapas?

Jesuspa qatikuqninkunan boteta allinta apasharanku. Ichaqa qonqayllamantan wayramuyta qallariran. Astawan wayramuqtinmi unu phoqcheqayta qallariran. Jinan boteman unu junt’aykusharan.

Jesusqa puñusharanmi. Botetaqmi unuman chinkaykusharan, jinan qatikuqninkunaqa mancharikuranku, Jesusta rijch’achispataq niranku: ‘¡Yachachikuq, salvawayku, mana chayqa wañupusaqkun!’, nispa. Chaymi Jesusqa wayrata qochatawan niran: ‘¡Ch’inlla kaychis! ¡Upallaychis!’, nispa.

 Chayta niqtinmi wayrapas lamar-qochapas thaj kapuran. Chayta rikuspan qatikuqninkunaqa anchata admirakuranku. Manan jayk’aqpas chayta rikurankuchu, chaymi paykunapura ninakuranku: “¿Pipunitaq kay runari, chaytaq wayrapas qochapas kasunri?”, nispa (Lucas 8:22-25; Marcos 4:35-41).

¿Pin Jesús karan? ¿Yachankichu?... ¿Pin atiyta qoran milagrokunata ruwananpaq?... Arí, papanmi qoran. Jesusqa manan noqanchis jina común runachu karan, chaymi qatikuqninkunaqa mana imamantapas manchakunankuchu karan. Kunanqa juj milagro ruwasqanmantañataq yachasun.

Qhepamanmi Jesusqa qatikuqninkunata nillarantaq botepi lamar-qochata chimpanankupaq, jinaspa chimpapi suyamunankupaq. Payqa montañatan riran Diosmanta mañakunanpaq. Chaypin papanwan sapallanpi rimaran.

 Qatikuqninkuna botepi viajashaqtinkun qonqaylla wayramuyta qallariran. Chay ratopaqqa tutañan kasharan. Paykunaqa tukuy atisqankutan ruwaranku boteta chimpaman chayachinankupaq. Ichaqa astawan wayramusqanraykun kaqllapi muyusharanku. Sapa raton lamar-qochaqa boteta altoman oqariran unutaq boteman junt’aykusharan.

Jesusqa unaymi montañapi papanwan rimasharan. Ichaqa qatikuqninkuna peligropi kasqanta rikuspan usqhaylla uraykamuran. Paykunata yanapananraykun Jesusqa unuq patanta purispa paykunaman ayparan.

¿Qan puriwaqchu unuq patanta? ¿Iman pasanman chayta ruwaqtiyki?... Arí, unuman chinkaykuspan jeq’epaspa wañupuwaq. Jesusmi ichaqa atiyniyoq kasqanrayku unuq patanta puriran. Payqa karutan puriran boteq kasqanman chayananpaq, chaymi p’unchayta jinaña chayaran. Unuq patanta puriqta rikuspan qatikuqninkuna mancharikuranku. Jinan manchakuymanta qapariyta qallariranku. Chaymi Jesusqa paykunata niran: “Ama mancharikuychischu, noqan kani”, nispa.

¿Imaraykun Jesús milagrokunata ruwaran?

Jesusqa boteq kasqanman chayaspan boteman seqaran. Seqaqtin jinan wayra thaj kapuran. Chayta rikuspan qatikuqninkunaqa yapamanta anchata admirakuranku. Jinan Jesusman k’umuykuspa niranku: “Cheqaqtapunin qanqa Diospa Churin kanki”, nispa (Mateo 14:22-33; Juan 6:16-21).

¿Imaynan sientekuwaq karan chaykunata rikuspa?... ¿Imaraykun Jesús chay milagrokunata ruwaran?... Qatikuqninkunata munakusqanraykun, chaymi paykunata yanaparan. Jinaspapas chaykunata ruwasqanpin rikuchiran atiyniyoq kasqanta. Chay atiywanmi Diospa gobiernonpi rey kapuspa imaymana milagrokunata ruwanqa.

¿Imaynatan Jesús qatikuqninkunata cuidan?

 Kunanqa Satanasmi mana munanchu Diospa gobiernonmanta willananchista. Chaymi Jesusqa atiy chaskisqanwan paymanta cuidawashanchis. Ichaqa manaraqmi jark’awanchischu onqoymanta wañuymantapas. Ñaupa tiempopi qatikuqninkunapas onqorankun wañupurankun. Santiagotan millay runakuna wañuchiranku, Juantapas carcelpin wisq’aranku (Hechos 12:2; Apocalipsis 1:9).

Kay tiempopipas Jehová Diosta serviq mana serviq runakunan onqoshanku wañupushanku ima. Ichaqa pisi tiempomantan Jesús kamachikuyta qallarinqa, jinan tukuy chaykuna tukupunqa. Manañan imamantapas manchakusunchu. Jesusmi llapa kasukuq runakunapaq imaymana allinkunata ruwanqa (Isaías 9:6, 7).

Kay textokunan willashan Jesuspa atiy chaskisqanmanta, rey kananpaq churasqa kasqanmantapas. Leesun Daniel 7:13, 14; Mateo 28:18; Efesios 1:20-22.