Kichay leenaykipaq

Índice nisqaman riy

 40 CAPÍTULO

Jehová Diosta kusichisun

Jehová Diosta kusichisun

LLAPALLANCHISMI munanchis Jehová Dios kusichiyta. Ichaqa, ¿imatan qosunman kusisqa kananpaq?... Jehová Diosmi nin: ‘Noqaqmi allpapi tukuy animalkuna’, ‘noqaqmi qolqepas, noqaqmi qoripas’, nispa (Salmo 24:1; 50:10; Hageo 2:8). Chhaynaqa, ¿imatan Diosman qosunman sonqonta kusichinapaq?...

Jehová Diosqa manan pitapas obligawanchischu payta servinapaq. Sapankanchismi ajllakunanchis serviytapas mana serviytapas. ¿Imaraykun Dios chhaynata kamawaranchis? Chayta kunan entiendesun.

Reqsinkin robot nisqataqa ¿riki? Chaykunaqa juj máquina jinan runaq munasqanta ruwananpaq ruwasqa kashanku. Manan paykunallanmantaqa imatapas ruwayta atinkuchu. Kanmi pujllanapaq robotkunapas. Chaykunaqa botonta nit’iykullaqtiykin imatapas ruwanku. ¿Rikurankichu chhayna pujllanakunata?... Ichaqa qhepamanmi chaykunawan pujllaspa sayk’upunku. Diospas munaspaqa juj robot-ta jinan ruwawasunman karan tukuy munasqanta ruwananchispaq. ¿Imaraykun mana robot-ta jinachu ruwawaranchis?... Payqa manan munanchu  robotkuna jinalla kasukunanchista. Aswanmi munan payta munakusqanchisrayku, tukuy sonqomanta kasukunanchista.

¿Imaraykun Dios mana robot-ta jinachu ruwawaranchis?

¿Imaynan Jehová Dios sientekun tukuy sonqomanta kasukuqtinchis?... ¿Imaynan papaykipas mamaykipas sientekunku kasukuqtiyki? ¿Mana kasukuqtiykiri?... Biblian nin: “Yachayniyoq churiqa taytantan kusichin, mana yuyayniyoq churitaq mamanta llakichin”, nispa (Proverbios 10:1). Tayta-mamaykipas kusikunkun kasukuqtiykiqa ¿riki?... Mana kasukunki chayri, ¿imaynan sientekunku?...

¿Imaynatan Jehová Diosta tayta-mamaykitapas kusichiwaq?

Kunanqa Jehová papanchismanta rimasun. ¿Imaynatan paypa sonqonta kusichisunman? Pay kikinmi Bibliapi willawanchis, leesun Proverbios 27:11 textota. Chaypin nin: ‘Wawalláy, yachayniyoq kay, jinaspa sonqoyta kusirichiway, chaymi k’amiwaqniyman kutichisaq’, nispa. ¿Imaynan ‘k’amikuq’ runa?... Jujkunamanta burlakuqmi, “manan rimasqaykita junt’ayta atiwaqchu”, niqmi. Chhaynatan Satanaspas Jehová Diosta nin. ¿Imaynatan chayta ruwashan?... Chaymanta kunan yachasun.

Satanasqa Dios jinan kayta munan, llapa runakuna kasukunantataqmi munanpas, chaytan pusaq capitulopi yacharanchis. Satanasqa khaynatan piensan: “Runakunaqa wiñay kausayta chaskinankuraykullan Jehová Diosta kasukunku”, nispa.  Adanta Evatawan juchaman urmachisqan qhepamanmi kikin Diosta desafiaran. Niranmi: ‘Runakunaqa imapas qonaykiraykullan servisunkiku. Ima kaqninkunatapas qechuyman chayqa, llapa runakunan qanmanta t’aqakapunman’, nispa.

¿Ima nispan Satanás Jehová Diosta desafiaran?

Bibliapiqa manan chhaynatapunichu nishan. Ichaqa Job runamanta Bibliapi leespan reparasun chhayna kasqanta. Jehová Diospas Satanaspas yachaytan munaranku imarayku Job Jehová Dios servisqanta. ¿Iman pasaran? Chaypaq leesun Job librota 12 capitulokunata.

Job 1 capitulopi willasqan jina, llapa angelkunan Diospa ladonpi juñukuranku, chaypin Satanaspas kasharan. Chaymi Dios payta tapuran: “¿Maymantan jamushanki?”, nispa. Satanastaq kutichiran: ‘Pachantinpi purimusqaymantan’, nispa. Chaymi Diosqa tapuran: ‘¿Kamachiy Jobta qhawarirankichu? Payqa tukuy sonqonwanmi serviwan, mana  allin ruwaymantapas t’aqakunmi’, nispa (Job 1:6-8).

Satanasqa manan Jehová Diospa nisqanta creeranchu. Chaymi niran: ‘Mana imatapas faltachisqaykiraykun Jobqa adorasunki. Manachus yanapawaq chayqa uyaykipin ñakasunki’, nispa. Jinan Jehová Diosqa niran: ‘Chhaynaqa, Jobpa lliu kaqninta munasqaykita ruwamuy, pay kikintan ichaqa ama imanankipaschu’, nispa (Job 1:9-12).

¿Imatan Satanás ruwaran?... Kaqpachan wakankunata asnonkunatawan suwachiran, michiqkunatataq wañuchiran. Chay qhepamanmi ovejankunata michiqkunatawan rayo wañuchiran. Chay qhepamanmi suwakuna camellonkunata apapuranku michiqkunatataq wañuchiranku. Chay qhepamanmi jatun wayra chunka wawankunaq kasqan wasita thuniran. Chaypin llapallanku wañupuranku. Chaykunaña pasaqtinpas Jobqa Jehová Diostan servishallaran (Job 1:13-22).

Satanasqa yapamantan Diosman achhuykuran. Chaymi Dios niran: ‘Kaqninkunataña qechunki chaypas, Jobqa tukuy sonqonwanmi serviwashan’,  nispa. Chaymi Satanasqa niran: ‘Millay onqoywan onqochisaq chayqa, uyaykipin ñakasunki’, nispa. Jinan Diosqa niran: ‘Ima munasqaykitapas ruwamuy, ichaqa aman wañuchinkichu’, nispa.

¿Imakunapin Job tarikuran? ¿Imaraykun Diosta kusichiran?

Jinan Satanasqa Jobta millay onqoywan onqochiran. Chay onqoymi llapa cuerponta millayta asnachiran, chaymi mana pipas achhuykuranchu. Chaykunata rikuspan esposan niran: “¡Diosta ñakay, jinaspa wañuy!” nispa. Kinsa amigonkunan visitaranku kallpachanankupaq. Ichaqa astawanmi llakichiranku, ‘mana allinkuna ruwasqaykimantan ñak’arishanki’ nispanku. Tukuy chaykunawanña Satanás ñak’arichiran chaypas, Jobqa Diostan servishallaran (Job 2:1-13; 7:5; 19:13-20).

¿Imaynan Dios sientekuran tukuy sonqonwan Job servisqanmanta?... Arí, anchatan kusikuran. Chaypin Satanasta niran: ‘¡Qhawariy Jobta! Payqa munakuwasqanraykun serviwan’, nispa. Qanri, ¿Job jinachu kanki? ¿Pay jinachu rikuchinki Satanás llulla kasqanta?... ¡Chayta ruwayqa may allinpunin! Chaytan Jesuspas ruwaran.

Satanasqa manan ima juchapipas Jesusta urmachiyta atiranchu. ¡Maytachá Jehová Diosqa chaywan kusikuran! Chaymi Satanasta niran: ‘¡Qhawariy wawayta! Paypas munakuwasqanraykun serviwan’, nispa. Jesusqa papanta kusisqata rikuspan paypas kusikuran. Chaymi payqa k’aspipi wañuytapas aguantaran (Hebreos 12:2).

Qanri, ¿Jesús jinachu Jehová Diosta kusichiyta munanki?... Chhaynaqa Jehová Diosmanta astawan yachay, chayman jinataq imatapas ruway.

¿Imakunatan Jesús ruwaran papanta kusichinanpaq? ¿Imatan noqanchispas ruwananchis? Chaypaq leesun Proverbios 23:22-25; Juan 5:30; 6:38; 8:28; 2 Juan 4.