Kichay leenaykipaq

Índice nisqaman riy

 17 CAPÍTULO

¿Imata ruwaspan kusisqa kasunman?

¿Imata ruwaspan kusisqa kasunman?

¿Imaraykun Jehová Dios ‘kusikun’?

LLAPA runakunan kusisqa kayta munanchis ¿riki?... Ichaqa, ¿imaraykun mana llapa runachu kusisqa kanku?... Manan yachankuchu kusisqa kanapaq imachus ruwanankuta. Wakinqa ninkun: “Qhapaq kaspan kusisqa kasaq”, nispa. Ichaqa qhapaqña kaspapas manan kusisqachu kanku.

Jesusmi willaran kusisqa kanapaq imachus ruwananchista. Niranmi: “Qoypin aswan kusikuyqa kan, manan chaskiypichu”, nispa (Hechos 20:35). Chhaynaqa, ¿imatan ruwananchis kusisqa kanapaq?... Arí, jujkunapaqmi allinkunata ruwananchis. ¿Yacharankichu chayta?...

 “Regalota chaskiqkunaqa manan kusisqachu kanku” ¿nispachu Jesús nisharan?... Manan, manan chaytachu nisharan. A ver, ¿imaynan qan sientekunki juj regalota chaskispa?... Kusikunkin ¿riki? Llapanchispas kusikunchismi juj regalota chaskispaqa.

Ichaqa jujkunaman imallatapas qospan aswan kusisqa kasun. Ichaqa, ¿pin llapanchismanpas aswan askha regalokunata qowanchis?... Arí, Jehová Diosmi.

Biblian nin: ‘Diosmi runakunaman qon kausayta tukuy imaymanatawan’, nispa. Arí, Diosmi qowanchis paratapas intitapas. Chaywanmi plantakunata wiñachin mijuy kananpaq (Hechos 14:17; 17:25). Chaymi Bibliapi Diosta nikun: ‘Kusisqa Dios’, nispa (1 Timoteo 1:11). Imaymanata qowaspanchismi Diosqa kusikun. Chayta ruwaspan noqanchispas kusisqa kasun.

¿Imata ruwaspan aswan kusisqa kawaq?

¿Imakunatan jujkunaman regalasunman? ¿Imatan qan regalawaq?... Wakin regalokunataqa qolqewanmi rantina, valentaqmi kanpas. Chhayna regalota qoyta munashanki chayqa, propinaykitan juñunayki kanqa.

Ichaqa kanmi juj regalokunapas. Chayqa manan rantinapaqchu. Mayninqa ch’akiypi kashaq runamanmi juj vaso unuta qoykuwaq. Chaymantaqa anchatan agradecekusunki, qanpas anchatan kusikunki.

Yaqapaschá juj p’unchay mamaykiwan torrejata ruwankichis. Sapallayki mijunaykimantaqa, ¿imata ruwaspan aswan kusisqa  kanki?... Arí, amigoykikunaman qoykuspan. ¿Qoykuwaqchu paykunaman?...

Jesuspas apostolninkunapas qoykukuq runakunan karanku. ¿Imatan jujkunaman qoranku?... Aswan allin kaqninkutan. Paykunaqa Diosmanta allin willakuykunatan yacharanku. Chaytan jujkunaman yachachiranku. Manataqmi chay qosqankumanta qolqeta mañarankuchu.

Juj kutinmi apóstol Pablo amigon Lucaswan mayu qayllaman riranku. Paykunaqa uyarirankun chay mayu qayllapi juj t’aqa warmikuna Diosmanta mañakuq kasqankuta. Jinan chayman chayaqtinku rikuranku askha warmikunata Diosmanta mañakushaqta. Chaypin reqsiranku sumaq sonqoyoq warmita.

Paykunamanmi Pabloqa Jehová Diosmanta gobiernonmantawan willaran. Lidia sutiyoq warmin tukuy yuyaywan uyariran Pabloq willasqanta. Chay qhepamanmi Pablota Lucastawan niran: “Jehová Diospaq junt’aq kasqaytataq rikuwankichis chayqa, jamuychis wasiyman, chaypi qhepakuychis”, nispa. Jinan paykunata wasinpi alojaran (Hechos 16:13-15).

¿Ima nishanmi Lidia Pablota Lucastawan?

Lidiaqa kusisqan kasharan Pablota Lucastawan wasinpi alojaspa. Paykunan Lidiaman yachachiranku Jehová Diosmanta, Jesusmanta, wiñay kausaymantawan. Lidiaqa tukuy sonqomantan paykunaman qoran mijunata, puñunankupaq juj cuartotapas. Chaymi payqa kusisqa sientekuran. Chaytan noqanchispas ruwananchis. Sichus pimanpas juj regalota qonki chayqa, tukuy sonqomantan qonayki. Obligasqa jinalla qonki chayqa, manan kusisqachu kanki.

¿Imaraykun Lidia kusisqa kashan Pablota Lucastawan alojaspa?

Sichus askha misk’iyki kashaqtin niykiman: “Jaqay erqeman invitaykuy”, nispa chayri, ¿kusisqachu invitawaq?... Munakusqayki amigoykimanri, ¿kusisqachu invitaykuwaq?...

 Pitapas anchatapuni munakunki chayqa, tukuy kaqniykitaraqmi qoyta munanki ¿riki? Jehová Diostapas astawan munakusun chayqa, tukuy kaqninchistan payman qosun.

¿Imanaqtinmi kay wajcha warmi kusisqa kashan?

Juj kutinmi Jesús rikuran juj wajcha warmita. Chay warmiqa anchatan Diosta munakuran, chaymi tukuy kaqninta Diosman qoran. Paypaqa iskay moneda qolqechallanmi karan, chaytan templopi kaq qolqe churanaman churaykuran. Juj runakunaqa manachá rikurankupaschu churasqantaqa. Manataqmi pipas obligaranchu chayta ruwananpaq. Paymi ichaqa anchata Diosta munakuran, chaymi kusisqa sonqowan chayta ruwaran (Lucas 21:1-4).

¿Imakunata ruwaspan rikuchiwaq qoykukuq kasqaykita?... Sichus tukuy sonqomanta qonki chayqa, kusisqan sientekunki. Kusisqa kananchista munaspan Jesusqa kamachiwanchis qoykukuq kanapaq (Lucas 6:38). Chayta ruwaspan jujkunata kusichisun, noqanchispas kusisqan kasun.

¿Imakunatawanmi ruwananchis jujkunaman qospa kusisqan sientekunapaq? Chaypaq leesun Mateo 6:1-4; Lucas 14:12-14; 2 Corintios 9:7.