Kichay leenaykipaq

Índice nisqaman riy

 26 CAPÍTULO

¿Imaraykun sasa allin kaqta ruway?

¿Imaraykun sasa allin kaqta ruway?

¿PIN kusikuran Pablo mana allinkunata ruwaqtin?... Arí, Satanasmi. Judío religionpi kamachikuqkunapas kusikurankun. Ichaqa qhepamanmi Pablota cheqnikuranku Jesuspa qatikuqnin kapusqanrayku. Chhaynaqa, ¿facilchu Jesuspa qatikuqnin kay?...

¿Imakunatan Pablo ñak’ariran?

Juj kutinmi Ananías juj runata kamachiran Pablota maqananpaq. Jinaspapas imaymanatan ruwaran Pablota carcelpi wisq’achinanpaq. Pabloqa imaymanapin ñak’ariran. Juj kutinmi askha runakuna maqaranku rumiwan ch’aqespataq yaqa wañuchiranku (Hechos 23:1, 2; 2 Corintios 11:24, 25).

Askha runakunan tanqawasun mana allinkunata ruwanapaq. Chaymi tapukunanchis: “¿Allin kaqllatapunichu ruwasaq jujkunaña cheqnikuwaqtinpas?”, nispa. Allin kaqta ruwanapaqqa mana manchakuqmi kananchis ¿riki?...

 Yaqapaschá tapukunki: “¿Imaraykun allin kaqta ruwaqtinchis jujkuna cheqnikuwanchis? ¿Manachu aswanpas kusikunkuman?”, nispa. Jesuspa tiemponpiqa askha runakunan kusikuranku allinkuna ruwasqanmanta. Juj kutinmi onqosqa runakunata qhaliyachisqanta yachaspa, llaqtantin runakuna Jesusman juñukamuranku (Marcos 1:33).

Ichaqa askha runakunan Jesusta mana allinpaqchu qhawariranku cheqaq kaqllata yachachisqanrayku. Juj kutinmi Jesusqa Nazaret llaqtanpi Diosta adorananku wasita riran. Chaypin askha runakuna kasharanku.

 Jesusmi paykunaman Bibliamanta sumaq simikunawan yachachiran. Chaymi runakunaqa anchata admirakuranku. Ichaqa nisharankun: ‘Kayqa Josepa wawallanmá riki, ¿imaynapitaq kaykunatari yachan?’, nispa.

Chaypin Jesusqa willaran mana judío runakunapaq Jehová Dios milagrokuna ruwasqanmanta. Chayta uyarispan runakunaqa Jesuspaq phiñakuranku. ¿Imarayku?... Paykunaqa juj llaqtakunapi runakunamanta aswan importanten creekuranku. Nirankun: ‘Noqallanchispaqmi Diosqa milagrokunata ruwan’, nispa. ¿Imatan ruwaranku?...

Biblian nin: ‘Jesustan usqhaylla llaqtamanta orqoranku, jinaspan orqo pataman aparanku chaymanta wijch’uykunankupaq. Jesustaq ichaqa chaupinkuta lloqsispa ripuran’, nispa (Lucas 4:16-30).

¿Imaraykun Jesusta wañuchiyta munashanku?

Chhaynata ruwasunkikuman chayri, ¿kutiwaqchu chay llaqtaman Diosmanta yachachiq?... Chaypaqqa mana manchakuqmi kanayki ¿riki?... Jesusqa manan manchakuranchu, chaymi juj watamanta Nazaret llaqtaman kutiran. Biblian nin: ‘Chayman chayaspan runakunata yachachiyta qallariran’, nispa. Arí, Jesusqa yachachishallaranmi runakunaman (Mateo 13:54).

Jesusmi sábado p’unchaypi Diosta adorananku wasipi kasharan. Israel runakunaqa manan sabadopi llank’arankuchu. Diosmi kamachiran chay p’unchaypi payta adoranankupaq. Chaypin Jesusqa makin paralizasqa runata rikuspa qhaliyachiyta munaran. Runakunan ichaqa mana munarankuchu. ¿Imatan Jesús ruwaran?... Chay runakunatan tapuran: ‘Juj ovejaykichis sábado p’unchaypi t’oqoman urmaykuqtin, ¿orqowaqchischu?’, nispa.

 Sábado p’unchaypipas paykunaqa orqorankun ovejankuta. Chaymi Jesús niran: ‘¿Manachu runaqa ovejamantapas aswan valorniyoq? Chhaynaqa, allinmi sábado p’unchaypi allin kaqta ruwayqa’, nispa. Chaymi Jesusqa onqosqa runata qhaliyachiran.

Jesusmi niran: “Makiykita jaywarimuy” nispa, jaywariqtintaq makin qhaliyapuran. ¡Maytachá chay runaqa kusikuran qhaliyapusqanmanta! Juj runakunari, ¿kusikurankuchu?... Manan, astawanmi Jesusta cheqnikuranku. Chaymi rimanakuranku wañuchinankupaq (Mateo 12:9-14).

Kunanpas manan llapa runakunachu kusikunqa allinkuna ruwasqanchismanta. Ichaqa, ¿pitan kusichiyta munanchis: Runakunatachu icha Diostachu? Diosta kusichiyta munaspaqa paytan kasukunanchis. Ichaqa, ¿pin chaymanta cheqnikuwasun? ¿Pin jark’awasun allinkuna ruwananchista?...

Arí, Satanasmi. ¿Pikunapiwan?... Satanaspa engañasqan runakunapiwan. Jesusmi religionkunapi jefekunata niran: ‘Qankunaqa taytaykichis Saqramantan jamunkichis, paypa munaynintataqmi ruwayta munankichis’, nispa (Juan 8:44).

Askha runakunan Satanaspa munasqanta ruwanku. Paykunatan Jesús niran: “Kay pacha runakuna”, nispa. ¿Imaraykun chayta niran?... Chaypaq maskhasun Juan librota, 15 capitulota, 19 versiculota. Jesusmi niran: ‘Kay pacha runakuna jina kawaqchis chayqa, paykunaqa munakusunkichismanmi. Qankunan ichaqa mana kay pacha runakuna jinachu kankichis noqa qankunata kay pachamanta ajllakusqayrayku, chaymi paykunaqa cheqnikusunkichis’, nispa.

Chhaynaqa, ¿pikunatan nikun “kay pacha runakuna” nispa? Jesusta mana qatikuq runakunatan. ¿Imaraykun Jesuspa qatikuqninkunata  cheqnikunku?... A ver, kaypi piensay: ¿Pin kay pachata kamachishan?... Biblian nin: ‘Lliu kay pachaqa Satanaspa makinpin kashan’, nispa (1 Juan 5:19).

Chhaynaqa, ¿imaraykun sasa allin kaqta ruway?... Arí, Satanaspas kay pacha runakunapas jark’awasqanchisraykun. Ichaqa, ¿iman jark’awallanchistaq?... 23 capitulopi yachasqanchis jina, juchayoq runa kasqanchismi. May allinchá kanman juchapas, Satanaspas, kay pacha runakunapas chinkapuqtinqa ¿riki?...

Millay runakuna chinkapuqtin, ¿ima premion kanqa allin kaqta ruwaqkunapaq?

Biblian prometewanchis: “Kay pacha kausayqa pasashanmi”, nispa. Chaywanqa nishan mana allinkunata ruwaqkuna wañupunantan. Ichaqa, ¿pikunan wiñaypaq kausanqaku?... Biblian nin: ‘Diospa munayninta ruwaqmi wiñaypaq kausanqa’, nispa (1 Juan 2:17). Arí, allin kaqta ruwaqkunallan paraisopi wiñaypaq kausanqanku. Chaymi kallpachakunanchis allin kaqta ruwanapaq. Qanri, ¿kallpachakunkichu?...

Allin kaqta ruwanapaqqa kallpachakunanchismi, chaypaq leesun Mateo 7:13, 14; Lucas 13:23, 24; Hechos 14:21, 22.