Kichay leenaykipaq

Índice nisqaman riy

 42 CAPÍTULO

¿Imaraykun llank’ananchis?

¿Imaraykun llank’ananchis?

¿IMAN astawan gustasunki, llank’aychu icha pujllaychu?... Pujllayqa manan juchachu. Bibliapas willanmi Jerusalén llaqtaq callenkunapi ‘qhari wawakuna, warmi wawakunapas pujllasqankumanta’ (Zacarías 8:5).

Jesusqa kusikuranmi wawakunaq pujllasqanta rikuspa. Janaq pachapi kashaspan niran: ‘Noqaqa paywanmi llank’asharani, sapa p’unchaymi papayta kusichirani’, nispa. Jesusqa papanwanmi janaq pachapi llank’aran. Chaypi kashaspan kayta nillarantaq: ‘Runa miraymi kusichiwaran’, nispa. Ñaupaqpi yachasqanchis jina Jesusqa kuraqkunata wawakunata iman munakuran (Proverbios 8:30, 31).

¿Imata ruwaspan Jesús kusikuran janaq pachapi kashaspa?

 ¿Pujllaranchu Jesús wawa kashaspa?... Pujllanmanmi karan. Ichaqa janaq pachapi kashaspaqa papantan llank’aysiran. Kay allpapi kashaspari, ¿llank’aranchu?... Jesustaqa “carpinteroq wawan” nirankun, jujkunataq “carpintero” niranku. ¿Imatan chaymanta yachanchis?... José papanmi carpinteriata yachachiran. Chaymi payqa carpintero karan (Mateo 13:55; Marcos 6:3).

¿Allin carpinterochu karan Jesús?... Janaq pachapi papanwan llank’ashaspaqa allin llank’aqmi karan. Chhaynaqa allin carpinteron kanman karan ¿riki?... Ñaupaq tiempopi carpintero kayqa sasan karan. Jesuspunichá  jatun sach’akunata wit’uran chaytataq wasiman q’epimuran. Chaykunawanchá mesata, bancakunata, jujkunatawan ruwaran.

¿Kusikuranchu tukuy chaykunata ruwaspa?... ¿Imaynan sientekuwaq jujkunapaq munay sillakunata mesakunata ruwaspa?... Biblian nin: ‘Runaqa llank’asqanwanmi kusikunan’, nispa. Arí, llank’aspaqa kusikunchismi, chhayna kusikuytaqa manan pujllasqanchispi tarisunmanchu (Eclesiastés 3:22).

Llank’aq wawakunaqa qhalin wiñanku allin umayoqmi kankupas. Wakin wawakunan ichaqa televisionta otaq videojuegos nisqakunata qhawaspa wirayapunku, sapa kutillataq onqonku. Chay wawakunaqa manan kusisqachu kanku, manataqmi jujkunata kusichinkuchu. ¿Imatan ruwana kusisqa kanapaq?...

17 capitulopi yachasqanchis jina, jujkunapaq allinkunata ruwaspan kusikunchis (Hechos 20:35). Bibliaqa willawanchismi Jehová Dios ‘kusikuq Dios’ kasqanta (1 Timoteo 1:11). Yacharanchistaqmi Jesuspas Diospa ladonpi kusisqa kasqanta. ¿Imaraykun kusisqa karan?... Jesusmi niran: “Yayayqa kunankamapas llank’ashallanpunin, chaymi noqapas llank’ashallani”, nispa. Arí, Jesusqa llank’asqanwanmi kusikuran (Juan 5:17).

Jesusqa manan wañupunankamachu carpinteriapi llank’aran. Jehová Diosmi paymanqa jatun llank’anata qoran. ¿Ima llank’anata?... Jesusmi niran: ‘Juj llaqtakunapipas willamunaymi Diospa gobiernonmanta allin willakuykunata, chaypaqmi Diosqa kachamuwaran’, nispa (Lucas 4:43). Jesuspa predicasqanta uyariq runakunaqa uyarisqankutan juj runakunaman willaqku. Chaytan kay dibujopi rikusqanchis Samaria llaqtayoq warmipas ruwaran (Juan 4:7-15, 27-30).

¿Imakunapin Jesús llank’aran kay allpapi kashaspa?

 ¿Kusikuranchu Jesús chay llank’anata ruwaspa?... Pay kikinmi nin: “Mijunayqa kachamuwaqniypa munayninta ruwaymi, qowasqan llank’aytapas tukunaykama junt’aymi”, nispa (Juan 4:34). ¿Kusikunkichu gustasqasuyki mijunata mijuspa?... Chay jinatan Jesusqa kusikuran Diospaq llank’aspa.

Jehová Diosqa llank’asqanchiswan kusikunapaqmi kamawaranchis. Diosmi juj regalota jina chaytaqa qowaranchis. Sichus wawa kasqaykimantapacha llank’ayta yachanki chayqa, kuraq runa kaspaqa kusisqan kausanki (Eclesiastés 5:19).

Ichaqa manan kuraq runakunaq ruwanantaqa wawakuna ruwankumanchu ¿riki? Chaywanpas llapallanchispaqmi imaymana ruwanakuna kan. Tayta-mamaykiqa sapa p’unchaychá llank’anku qankunarayku. Wasipipas imaymana ruwanakunan kan: limpiana, allichana juj ruwaykunapas.

¿Ima ruwaykunapin familiaykita yanapawaq?... Platokunata maqchiypi, mesa limpiaypi, q’opata wijch’uypi, cuartoykita limpiaypi, pujllanaykikunata waqaychaypi ima. Ñapaschá wakinpi yanapakushankiña, chayqa familiaykiq allinninpaqmi kanqa.

¿Imaraykun pujllanaykikunata waqaychanayki?

Chaykuna ruway allinpuni kasqanta yachanaykipaq pujllanakuna waqaychaymanta rimasun. ¿Imaraykun chayta ruwanayki?... Wasiyki limpio ordenpi kananpaq, chhaynapin mana ima accidentepas kanqachu. Sichus pujllanaykikuna pampapi wijch’u-wijch’u kanqa chayqa, mamaykin chaywan laq’akuspa k’irikunman, jinaspa hospitalmanraq apanaykichis kanqa. Chayqa llakikunapaqmi kanman ¿riki?... Chaymi pujllanaykikunata waqaychanayki, chayta ruwaspan familiaykita yanapanki.

Jinaspapas profesorniykiq tareakuna qomusqantan ruwanayki. Escuelapin llapanchispas leeyta yachanchis. Wakin wawakunaqa  facil-llatan leeyta yacharunku jujkunataqmi ichaqa sasata. Leeyta yachay sasaña kanman chaypas, maytachá kusikunki yacharuspaqa. Allin leeq kaspaqa imaymanatan yachanki. Kikillaykimantan Bibliatapas leenki. Chhaynaqa, ¿allinniykipaqchu kanqa tareakunata ruway?...

Wakin runakunaqa manan munankuchu llank’ayta. Yaqapaschá reqsinki chhayna runakunata. Diosmi ichaqa llank’aq kananchispaq kamawaranchis, chaymi llank’asqanchiswan kusikunanchis. ¿Kusikuranchu Jesús llank’asqanwan?... Arí, kusikuranmi, paypaqqa gustasqan mijuna jinan karan. ¿Imapin llank’aran?... Jehová Diosmantan runakunaman yachachiran, imaynatachus wiñay kausayman aypasunman chaymantawan.

Iskay yanapaykunan kashan llank’asqaykiwan otaq tarea ruwasqaykiwan kusikunaykipaq. Ñaupaqta kayta tapukuy: “¿Imaraykun chayta ruwanay?”, nispa. Sichus yachanki imarayku ruwanayki kasqanta chayqa, tukuy sonqowanmi ruwanki. Iskay kaqtaq kay: Imataña ruwanki chaypas allinta ruway. Chaykunata ruwaspan Jesús jina kusikunki llank’anaykiwan.

Biblian yanapawanchis allin llank’aq kanapaq. Chaypaq leesun Proverbios 10:4; 22:29; Eclesiastés 3:12, 13; Colosenses 3:23.